بعدين بصراحة كده المعز ده وزنو بقى تقيل شديد ، الزول ده قاعد يزوغ من تمارين الحراس ولا شنو؟ البعرفو تمارين الحراس تمارين حارة شديد وعايزة قدر عالي جداُ من الرشاقة والخفة وسرعة ردة الفعل ، وده كلو المعز بطة التقول ما سمع بيهو.
بعدين بصراحة أكتر ، أول مرة أشوف لي حارس مرمى عندو جضوم وكرشة (وباقات وأزاهر) وحاجات تانية حامياني زي المعز بطه ده ، ده أصلو حارس مرمى ولا مغترب في أبوظبي؟
سكواها لما وصلتو الكورة ونزلها بيمينو وحولها لي رجلو الشمال كان محاط بي أربعة مدافعين من الهلال ، وبعد ده كلو شات الكورة والكلام ده كللللللللللللللللللللللللللللو كان علي راس خط تمنطاشر.
الحضري شات الكورة دي من بولاق الدكرور ، واحد من لعيبة الهلال (علاء الدين خربشة) لابس فنلة رقم خمسة ، عايز يدقها (هد) وخايف منها زي الشاافع العايزين يحموهو في البرد الصباااااح بي موية صااااقطة ، وبعد داك مشت لي أثير توماس ختاها هدية مقشرة ومقنطرة لي سكواها اللي كان عندو وقت كااافي عشان ينزلها بيمينو وبعد نزلها حولها بيمينو برضو لي رجلو الشمال وبعد حولها لي رجلو الشمال شاتها والكلام ده كككككككككككلو الجماعة ديل واقفين فراجة التقول كمسنجية!!!
ترددت أنباء أن السواها سكواها قد تسبب في أزمة لدى مجلس إدارة الهلال الذي يرى أن ميشو كان وراء الهزيمة السكواهية ، ولكن لأسباب عدة هناك نية تقديم كبش فداء لعمايل سكواها وكبش الفداء سيكون طارق أحمد آدم.
Quote: رفضت اللجنة المنظمة بالاتحاد السوداني لكرة القدم في اجتماعها اليوم بمقر الاتحاد السودانى لكرة القدم بالخرطوم (2) الشكاوي المقدمة من نادي هلال الخرطوم وهلال الساحل ضد حارس مرمي نادي المريخ عصام الحضري وجاءت حيثيات رفض اللجنة للشكوتين المقدمتين من الهلال الخرطوم وهلال الساحل بعد اطلاع اللجنة علي تقرير الانتقالات الرئيسية بالاتحاد السوداني لكرة القدم ومراجعة خطاب الاتحاد المصري لكرة القدم وقرار الاتحاد الدولي لكرة القدم(الفيفا) ثبت للجنة استيفاء لاعب المريخ عصام الحضري لعقوبة الايقاف بدءا بتنفيذ العقوبة ضد اللاعب والمقرر لها اربعة اشهر من قبل الاتحاد المصري واستيفائها بعد انتقال اللاعب للاتحاد السوداني وبناءا علي الحيثيات رفضت اللجنة الشكوتين المقدمين واعتبرت نتيجة المباراتين كما جاءت في تقرير الحكم
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة