|
Re: .... التقيتهم بالمحبة ... (Re: انعام حيمورة)
|
إنعام حيمورة
لك خالص السلام والتحيات. من يوم دخولك المنبر انت وانعام عبد الحفيظ انا متابعة نشاطكم ومعجبة بيكم. خلقتوا حياة وجو إنساني وحلو، بس المشغولية ما بتخليني أكتب كتير. إنتو بنات زي الورد، أتمنى ليكم الخير والحب ودوام العطاء.
" واتمنى الاقي الدكتورة ايمان احمد .. تحياتي لها ولك " شكرا على تحياتك، والله يجيبني السودان ونتلاقى ان شاء الله.
شكرا د/ طه كروم كلامك من طيب أصلك، والأيام الزينة الشفناها معاكم... ما عايزة أكبرك واقول علمتني ودرستني، لكن ذكريات مستشفى أحمد قاسم كانت من أجمل أيامنا، ووجودكم ودعمكم خلانا نستحمل الكثير من الآهات والأطفال البيضيعوا في رمشة عين، ونعمل جهدنا لتغيير الصورة البائسة. It was my first shift in the internship and we faced a lot
سلام للجميع إيمان
| |
|
|
|
|
|
|
Re: .... التقيتهم بالمحبة ... (Re: Sahar Yousif)
|
إنعام، متابعين معاكى، الكلام الحلو فى الناس الحلوة،
التحية و الإعزاز، لإشراقة حيمورة، منى خوجلى، إنعام عبدالحفيظ، ماما دومة، د. نجاة، منال عبدالحفيظ،،،
و ليكى إنتى يا نعومة،،، واصلى على هذا الحب يا اصيلة،،،
| |
|
|
|
|
|
|
Re: .... التقيتهم بالمحبة ... (Re: Sahar Yousif)
|
سحرورة يا عسل والله مشتاقة ليكم ولي رفقتكم الحلوة ..
لاقيت اختك مي يوسف في حفلة البلابل وعرفتها من الشبه بس لاني قلت دي تكون سحرور جات السودان ..
تحياتي ليك وللبنات الحلوات المعاك ..
| |
|
|
|
|
|
|
Re: .... التقيتهم بالمحبة ... (Re: إيمان أحمد)
|
Quote: من يوم دخولك المنبر انت وانعام عبد الحفيظ انا متابعة نشاطكم ومعجبة بيكم. خلقتوا حياة وجو إنساني وحلو، بس المشغولية ما بتخليني أكتب كتير. إنتو بنات زي الورد، أتمنى ليكم الخير والحب ودوام العطاء. |
يا دكتورة .. تسلمي يارب ..
اها كمان الليلة جيتك بي خبرا زين لقيت ياسر المصري وهو هذه الايام بجهز للسفر الى بريطانيا للعلاج هناك ..
يا سلام على محياه وطيبة اخلاقه .. ربنا يشفيه يارب ..
لك كل الود والتقدير وياريت الاقيك ..
| |
|
|
|
|
|
|
Re: .... التقيتهم بالمحبة ... (Re: زينب بدر الدين)
|
Quote: هن جميلات .. نساء بلادي .. |
انعام ""بسم الحب أقدم ليك تحياتي""
وأنا أصلو أشواقي لا بتكِل ولا بتمِل ... وأنا قلت لما شفتكم كيف فات علي أنا من زمان ماعرفتكم!؟
فاكرة القصيدة دي ولا نسيتي ؟
لك التحية ولقائمة الريدة الشديدة .
مشتاقين بالحيل التحية لك ولأحلى قائمة ريدة شديدة .
| |
|
|
|
|
|
|
Re: .... التقيتهم بالمحبة ... د. اشراقة مصطفى (Re: سمية الحسن طلحة)
|
انثى الانهار ..
هكذا اطلقا عليها قبل ان نراها .. لترفرف ارواحنا في هذا العالم الاسفيري ..
وكانت متابعة البوستات والكتابات هنا وهناك هي خيط معرفتنا ببعض ..
وكم بوستات (حنان) (عيد ميلادي) يشهد ..
د. اشراقة مصطفى ..
سيرة أمراة حلوة .. نقية .. مكافحة .. شقت طريقها بوعي وادراك ..
قاسمتهاأحيانا ليل الغربة بمسجات ومسنجرات كانت كفيلة بان تقرب بيننا الى ان جاء تكريمها بالقاء الضوء على تجربتها ..
وبكل فخر كنت من بين اللذين أعدوا لذلك ..
وبكل الشوق والحب التقينا ..
ودعو هذه السيرة تحكي لكم عنها :
البحوث التي قدمتها: *التمييز الواقع على النساء الافريقيات فى فيينا *قضايا الصحة الانجابية لدى المرأة العربية والافريقية المهاجرة *الاندماج بين السراب والمطر ونتيجة لهذه الدراسة تم ولاول مرة فى فيينا تمويل وظيفة ارشادية تهتم بشئون النساء الافريقيات والعربيات *نساء على قارعة الحياة، تحليل اجتماعى لاوضاع المرأة النازحة بالتعاون مع منظمة طيبة *تعزيز دور المجتمع فى مناطق الجزيرة بالسودان *بحثها الذى انجزته لنيل شهادة الدكتوراه {مراحل تعزيز المرأة السوداء بفيينا}. حيث مولت بعضها من حكومة فيينا وبعضها الآخر من المؤسسات المهتمة بالبحوث
الجوائز: حصلت على العديد من الجوائز والمنح والخوافز على مستوى الدولة النمساوية: *جائزة المرأة الفاعلة من الحركة النسائية الكاثوليكية 1997 *جائزة ليبولد اشتيرن الأدبية وفازت بقصتها {ثلاثة وجوه مفرحة تتجاوز الحدود} فى 2002 *نالت جائزة الانجاز الاكاديمى المقدمة من وزارة التربية والتعليم الاتحادية فى اكتوبر 2006 *نالت جائزة الاعتراف فى اطار جائزة الاعتراف الثقافى وذلك للدور الذى قامت به فى المجتمع النمساوى وذلك من بحوث، ومحاضرات، واهتمامات بقضايا حقوق الانسان،حقوق المرأة، قضايا السلام الحوافز: *حفزت باستمرار من مجلس الوزراء النمساوى وذلك دعما لاهتماماتها الادبية وذلك منذ 1999 والى 2007 *تم اختيار ديونها الاول الصادر باللغة الالمانية {ومع ذلك أغنى} من ضمن 15 كتابا صدروا فى عام 2003 وذلك من قبل مجلس الوزراء قسم الفنون، حيث تم اختيارها ضمن خمسة كتاب نمساويين للمشاركة فى معرض لايبزك للكتاب الدولى بالمانيا *حفزتها حكومة فيينا/ مكتب البحوث العلمية مرتين *حفزها معهد فيينا العالمى للبحوث مرة وحدة *نالت منحة معهد الافرويشن لمواصلة دراستها منذ خضورها الى ان نالت الماجستير فى 1997
المحاضرات والورش:
*قدمت مئات الماضرات والورش لجهات مختلفة فى النمسا فى عدة مواضيع *درست فى معهد القابلات عن قضايا الصحة لانجابية بالتركيز على النساء الافريقيات والعربيات المهاجرات فى فيينا *درست مربيات الحضانات فى فيينا عن قضايا الصحة الانجابية ايضا *شاركت فى مؤتمرات منظمة وايد ان ديفلوبميت يورب وهى عضوة فاعلة فيها *نظمت مع ثلاثة نساء اول مؤتمر للمرأة السوداء فى النمسا، حيث قامت ضمن اربعة اخريات بتكوين اول منظمة للنساء السود فى النمسا *نسقت مؤتمر التشبيك للمراة السودانية ودورها فى اعادة البناء والتحول الديمقراطى والذى تم افتتاحة فى البرلمان النمساوى فى 2005 وذلك فى اطار منطمة نيل دانوب للتنمية وثقافة السلام التى اسستها ضمن آخرين واخريات
مشاريع اخرى: *قامت بالتعاون مع مؤسسة هولابرون لحماية البيسئة باول معرض بعنوان { حناية البيئة لاتعرف الحدود فى عام 1995} وعكست فيها مشاكل البيئية فى السودان والنمسا حيث انجزته باسم الجمعية السودانية لحماية البيئية والتى انضمت لصفوفها منذ بداية التسعينات واعدت اول برنامج عن حماية البيئة بالاذاعة والذى اشرف عليه دكتور عيسى محمد عبداللطيف ومازال البرنامج مستمرا
*ثلاثة مشاريع تؤأمة بين مدارس اليونسكو فى فيينا وثلاثة مدارس بالسودان: 1/ المشروع الاول بمدرسة فاطمة بنت الخطاب بالتعاون مع الاستاذ محمد احمد الفيلابى وكان مشروع التوأمة بعنوان { حماية البيئية تحتاج لاكثر من تضامن} 2/المشروع الثانى نفذ فى قرية ود ابقدوم وكان بعنوان ( معا لاجل الوعى الصخى والبيئى) . 3/المشروع الثالث فى كوستى بمدرسة آمنة قرندة وكان بعنوان { نحو ثقافة للسلام}. حيث تم تمويل لتحسين اوضاع هذه المدارس وادخال المياه الصحية لها وتم فى مدرسة ود ابقدوم بالجزيرة ادخال المياة للمدرسة ولمقابر القرية، صاحب هذه البرامج رفع الوعى وضورة لتضامن للاجيال الجديدة. *مشروع {نحن} و {الآخر} والذى نفذ فى جامعة فيينا باتعاون مع جامعة قطر ومن المقترح ان ينفذ المشروع الثالث بين النمسا والسودان حيث تم مناقشة مواضيع مختلفة انطلقت بهدف فتح حوارات معافاة بين الاجيال الجديدة وترسيخ لقيم التسامح وقبول الآخر *ساهمت فى انجاز اسطوانة تعليمية مع منظمة هوريسنت تراى تاوسند وهى مخصصة للاطفال حول قضايا الفقر والبيئية
عضوة بالعديد من المنظمات مثل: *اتحاد الكتاب النمساويين *سودان بلات فورم اوستريا *بلات فورم ضد الختان
*نشرت لها العديد من الموضيع والحوارات فى عدد من الاجهزة الاعلامية النمساوية حيث يعكس محرك البحث العالمى مدى حركتها ونشاطها
*صدر لها ديوان شعرى كنسخة تجريبية ومحدودة بعنوان { احزان شاهقة} ..
و ..
و ..
و ..
| |
|
|
|
|
|
|
Re: .... التقيتهم بالمحبة ... د. اشراقة مصطفى (Re: Tumadir)
|
Quote: برضو داخلة على أسلم على هذه الثروة القومية وهذا التجمع النساء سودانى المهيب ...وفيكن العشم .... |
يا تماضر يا فنانة لو شفتي كمية الفرح لمن لقيت اسمك ..
وانا طبعا شفتك كتيييييييييييييييير ..
برغم انك ما لاقيتيني ولا شفتيني ..
واعمالك تشهد لك بعظمتك ..
وحبي ليك ..
| |
|
|
|
|
|
|
Re: .... التقيتهم بالمحبة ... د. اشراقة مصطفى (Re: حنين للبلد)
|
Quote: نعوم
عارفة ما اتقابلنا"ما محظوظة انا" لكن دخلت اسلم بس... احترامي ليك يارائعة.. |
حنين يا حنين
والله انا الما محظوظة لاني اجتهدت في اللحظات الاخيرة واجتهادي ما ظبط .. وكل ما اتذكر لما امك قالت لي اسمك الحقيقي اتجهجت خالص ..
قلت ليها ياخ حنين حنين للبلد .. ضحكت ومن اللحظة حفظت الاسم الحقيقي ..
وزعلت جدا عشان ما لاقيتك لانو وقتها ظروفي كانت كعبة جدا ..
ياريت تجي بالسلامة تاني ونتلاقي
| |
|
|
|
|
|
|
Re: .... التقيتهم بالمحبة ... (Re: سمية الحسن طلحة)
|
Quote: ""بسم الحب أقدم ليك تحياتي"" |
طبعا عرفتي تختاري لي ..
لما الاكواد ترجع بنزلها ليك بصوتي - بي صوتي دي كيف ..
والله يا سمية مشتاقة ليك شوق شديد ..
عليك الله تمي القصيدة حقتنا دي ..
وأنا أصلو أشواقي لا بتكِل ولا بتمِل ... وأنا قلت لما شفتكم كيف فات علي أنا من زمان ماعرفتكم!؟
ولمن احكي ليهم بعظمتك ..
| |
|
|
|
|
|
|
.... التقيتهم بالمحبة ... ناهد بشير الطيب (Re: انعام حيمورة)
|
ناهد بت الكاتب الوجودى الفلسفى القاص بشير الطيب ..
درست بكلية الحقوق
ام لثلاث بنات وولد ....
تحب الناس والوطن وتحن على المساكين في بلادى ...الغربة اثرت فيها كتيييير في كتابتتها فاصبحت مفعمة بحب الوطن الواحد المعافى ...
18 سنة غربة فى السعودية....تعشق الكتابة ..
لها اعمدة فى كل من :
جريدة الخرطوم
الاضواء
الصحافة
الحياة
وصفحة كاملة فى الصحافة
لاقيتها لما جات السودان .. جابتها لي انعام حفيظ واصلا ما بنسى اليوم داك ..
قررننا تمر على آخر اليوم نمشي لي اطفال المايقوما .. فهي رؤوفة وحنونة جدا
ولما جات غشينا المطار لاقينا لؤي شمت وكنا بنتبارى في منو الحا يعرفوا ..
وانا قلت ليها شفتي الزول ابو بدلة دااااك بكون لؤي ..
ومقولتها الشهيرة .. بركة بالشوفة
وتجيد التقديم فلها برنامج على قناة النيل الازرق (احلام مسافرة) .. من جدة ..
اتمنى ان تعود للوطن الذي تحبه ..
عجبتني فيها مقدرتها الفائقة والحرفنة الزيادة في قيادتها للسيارة ..لتكسر قاعدة (النساء ما بعرفوا يسوقوا)
(ههههههه)
وبي كل الحب التقيتها ..
| |
|
|
|
|
|
|
Re: .... التقيتهم بالمحبة ... ناهد بشير الطيب (Re: انعام حيمورة)
|
اذا كانت الكلمات قادرة على تاسيس المعانى عميقة الابعاد وقت ان يتصل الحديث عن انعام الخير بت حيمورة تلك القامة المتحركة بحب الناس فالمناسبة هنا ليست محض تقدير وعرفان خاصة لمن اشعلت صوتها ووقتها لمساعدة ومواصلة الغير مصابيحا فى ايدى زميلاتها وملاءهاهنا فى المنبر .......
انعام الخير كما يحلو لى ان اسميها كرمتها مواقفها لحظة بلحظة كانسانة التزمت بكثير من القضايا الاجتماعية ونثر كثير من الاغانى دررا على جبين اعضاء وقراء المنبر ذلك المنبر المضىء الذى حملته انعام وصويحباتها فى دواخلهن متنقلين به بين موانىء ومطارات البورد .....
لم تهتز صورتى عن انعام قبل وبعد ان رأيتها ولم تذدها مرارات بعض المواقف سوى اضافات التكوين والتعلق بثدى سودانيز اون لاين الذى ارضعنا صفاء النفس والفكرة واللحن ولقاء الاحباب والكثير الكثير من المواقف.....
فمن يهاتف انعام الخير فى الخرطوم يجدها على الخط الاخر وكانها تنتظرك انت وحدك تستقبل هاتفك بكل عنفوانها وتوثباتها نحو الق الحياة ....نحو حب الحياة تحس بحفاوتها وفرحتها بك كل ذلك كان كفيلا بابقاء مسماع الهاتف ملتصقا بالاذنين لاسراء شفيف من ضفة الوطن الى حيث موجة تتقافها الاحلام.......
انعام كرمتها مواقفها انعام طالعة من احلامنا الاولى ومن ابجدية الانتماء انعام تحلم بغد اجمل لاطفال المايقوما انعام تتسامى معك المشاركة الاصلية فى اشياءك
انعام انعام الخير لك كل تحياتى وتقديرى الذى تعليمه ولصديقاتك انعام عبد الحفيظ ومنال خوجلى كل الود ولى عودة لهن فى هذا البوست بحول الله..... ولكل من قابلتهن ....
| |
|
|
|
|
|
|
Re: .... التقيتهم بالمحبة ... ناهد بشير الطيب (Re: ناهد بشير الطيب)
|
انعام عبدالحفيظ
شمس البورد بعض الروايات تبدأ بمقولة حدث منذ زمن بعيد وانا اقول هنا حدث منذ وطن قريب......
حدث ان التقيت بانعام تلك الفارعة الطول... الهادئة الملامح اتصلت على ذات صباح وكنت فى عمل فى مبنى قناة النيل الازرق بان سالتنى عن اين انا الان....... فاوضحت مكانى قالت لى ساراك الان قلت لها اذن ساخرج الان ونلتقى فى الخرطوم عند شارع النيل ....قالت لى لا بل ساانتظرك بالقرب من كبرى القوات المسلحة وكان ان حضرت وكلى شوق الى رؤيتها.... ووجدتها فى سيارتها تنتظرنى بجانب حديقة الكبرى (وبنتى الصغيرة تسميها حديقة ( ستة عشرة ) لان كل اللذين يجلسون عليها يكونون على شكل مجموعات كبيرة) وما ان راتنى حتى صاحت ناااااهد وصحت انا مهلللة انعااااااااام ونظرت بعدها للحديقة وقالت لى ...( اها قابلتك فى النجيلة زى ماوعدتك بالقطيع فيها هههههه) وهذا الاخير عن مداخلتها فى بوست يخصنى باسم (ليه الجماعة البيقعدوا اتنين اتنين فى النجيلة بيمعطوا فيها كده) تعارفنا وتواددنا وتذكرنا وقالت لى هيا ورائى الى انعام حيمورة فى مكتبها وسوف نفاجئها وكان ان ذهبت وراءها الى ان وصلنا لمكتب انعام الخير ...وكان ان استقبلتناالجميلة انعام بكل حفاوة استغربت حينها ان تكون فى مكتب ( نحن هنا فى الغربة ياويلك لو جاك زول فى المكتب هههه) واتحفتنا بالشاى والعصير وووو وكانت انعام على اهبة الاستعداد لعمل ....ولكنها استأذنت فى الخروج للذهاب معنا الى مكتب منال خوجلى (مااحلى السودان والذهاب الى المكاتب ههههههه)
انعام الخير جلست بجوارى وذهبنا وكلنا فرحة الى مكتب منال بالعمارات والتى استقبلتنى بكل حفاوة هى وزوجها الكريم وكانها تعرفنى منذ زمن وكان ان عزمونى الى فطور بمطعم جاد ولكن حدث ماجعلنى اعتذر.... وكان ان التقيتهم والبورداب بجبل اولياء والسمك فى يوم بهيج حافل لهم منى كل الود وكل الحب والى ان التقيهم فى يوليو القادم بحول الله لهم منى كل تقدير وحب
ولى عودة لاشراقة مصطفى
| |
|
|
|
|
|
|
Re: .... التقيتهم بالمحبة ... ناهد بشير الطيب (Re: ناهد بشير الطيب)
|
الاخت الكريمة إنعام بت حيمورة ، ما من شىء فى هذه الفانية اجمل من قدرة (الزول) على كسب الناس ومحبتهم ، وانتى يا اختى الفاضلة من أهل الفضل سبقا لانك عرفت افضال من تتحدثين عنهن . شهد الله اننى سمعت عنك كلاما يرفع الراس ، فلك التحية و التقدير ، امل ان التقيك و اسرتى باذن فى يوليو القادم انت وكل بورداب الخرطوم ، ، جعل الله كل ما تقومون به للناس فى ميزان حسنات و الديك وحسناتك . مثلك فى الاخوات يشرف ويرفع الهامة ....... اسف والله للوصول متاخر ...... بعدين شايفكم شكرتو بنتنا انعام حسن عبدالحفيظ هى برضو تتساهل كل خير ، وكذلك كل من وردت سيرتهن هنا . اسال الله ان يشملك حديث المصطفى علية افضل الصلاة و السلام(أن جبريل ينادى فى أهل السماء أن الله يحب فلانا فأححبوه ، فيحبه اهل السماء ، و يكتب له القبول فى الارض ) .
| |
|
|
|
|
|
|
Re: .... التقيتهم بالمحبة ... ناهد بشير الطيب (Re: طارق جبريل)
|
حد الريد حوليك عساكر
وقلبك نابض بالحرية وناكر
ذل الشعب الليلة وباكر
أم لخير وامال جبرا الله
معاكم نحنا طول العمر
طول ما الطاغوط جاثم فوقنا
نمد ايدينا لأدين بعض
نعلى كفوفنا ____________________- أغسطس 89 وحد الريد, أم الخير , امال جبرالله , جيدة , ثريا التهامى , فاطمة الجنيد , سهير الشوية سجينات رأى بسجن النساء بام درمان .
ست البنات .
| |
|
|
|
|
|
|
Re: .... التقيتهم بالمحبة ... ناهد بشير الطيب (Re: ست البنات)
|
Quote: حد الريد حوليك عساكر
وقلبك نابض بالحرية وناكر
ذل الشعب الليلة وباكر
أم لخير وامال جبرا الله
معاكم نحنا طول العمر
طول ما الطاغوط جاثم فوقنا
نمد ايدينا لأدين بعض
نعلى كفوفنا |
ست البنيااااات لي حدهن
كل عام وانتي بخير ..
وكل نساء المنبر بخير ..
وكل نساء السودان بخير ..
وكل نساء الدينا بخير ..
_______________
8 مارس يوم المرأة العالمي ..
| |
|
|
|
|
|
|
Re: .... التقيتهم بالمحبة ... (Re: هجو الأقرع)
|
هجو شكرا لكلماتك ..
ويارب نتلاقى في ساعة خير ...
ومجرد وصولك اتصل بي .. تصلوا بالسلامة يارب ..
(أن جبريل ينادى فى أهل السماء أن الله يحب فلانا فأححبوه ، فيحبه اهل السماء ، و يكتب له القبول فى الارض ) .
ياااارب
| |
|
|
|
|
|
|
Re: .... التقيتهم بالمحبة ... ناهد بشير الطيب (Re: انعام حيمورة)
|
Quote: انتي ياانعام شذي بلة دي ماقابلتيها ولاالموضوع اصحاب اصحاب؟ |
يا بهاء حمد لله على السلامة ..
ابدا والله ما اصحاب اصحاب ..
بس .. سقط اسمها سهوا غير مقصودا ..
والقائمة تطول ..
وشذى من المقربين جدا والله لها التحية في يوم المرأة العالمي والتحية لكل نساء المنبر
| |
|
|
|
|
|
|
Re: .... التقيتهم بالمحبة ... نادية عثمان مختار (Re: انعام حيمورة)
|
نادية عثمان مختار
الشاعرة والاعلامية ..
التقيتها وفي احدي زياراتها للخرطوم التقينا على عجل في حفل وداع لصديقننا واخونا احمد القاسم .. وبعدها التقينا على صفحات المنبر .. و اتابع كتاباتها وبوستاتها .. الى ان التقينا .. في احدي زياراتها للخرطوم .. وفيها تعرفنا على بعض اكتر ..
ام للشابة الجميلة ايمان محمد الحاج ..
صحفية حيث اتاحت لي الفرصة للكتابة معاها في صفحتها (من القاهرة سلام) ...
شاعرة لها كتاباتها الشعرية المميزة ...ولها ديوان شعر (ميلاد عصيب لرجل ما )
اختار لكم منه قصيدة اعجبتني ..
.. تفاحتى يا آدم ..
واحشنى
ماواحشاك !!
بايعنى
انا شارياك !!
هالكنى بعذابى
حائر قليبى وراك
ساكن هواى فى الروح
سيب حبى اتحداك !!
**** **** ***
غرقانة فى ريدتك
بحرك مدادو صفاك
وين حنّك الفياض
ياغالى ايه قسّاك
زعلان عشان لومتك
صدقنى مفتقداك
**** *** ***
زعلانة منك جد
حبك بقالى هلاك
انا كنت نجمة ليل
حولى البشر افلاك
هسع سكنى الهم
بقى همى كيف انساك!!
*** *** *****
كل يوم يمر ياحبيب
عمرى الحزين يرجاك
يالغبت عنى كتير
واحشنى ماواحشاك !!
تفاحتى ياآدم
عذبت ليه حواك ؟!!!
| |
|
|
|
|
|
|
حلوين زي ديل (Re: انعام حيمورة)
|
ALGARADABI najma osman righeem العوض المسلمي أحمد الشايقي سلمى الشيخ سلامة سمرية د.نجاة محمود tayseer alnworani إيمان أحمد Hala Hassan سمية الحسن طلحة ناهد بشير الطيب هجو الأقرع مريم عزالدين صديق غادة عبدالعزيز خالد
ممتنة لكلماتكم ومن قبلها ثقتكم الغالية في شخصي
وأسِفت جداً لردي المتأخر جداً عليكم
منكم من لم أقابله إلا من خلال هذا الفضاء الأسفيري
وأتمنى ان يأتي اليوم الذي نتقابل فيه ونوثق معرفتنا أكثر
ومنكم من قابلتهم لدقائق معدودات ولكنها تركت أثراً طيباً عندي
ومنكم من أعرفه جيداً وتربطني بهم صداقات لم ولن تنتهي
أتمنى ان يسود بيننا كل الإحترام والود
| |
|
|
|
|
|
|
Re: حلوين زي ديل (Re: انعام عبد الحفيظ)
|
كل امهات البوست ده بخير يارب وكل من هى على اعتاب الامومة ان تكون بالف الف خير وكل من لم تصبح حتى الان ام اتمنى ان يحل مارس القادم وهى ام ومقدما كل عام وانتم بخير
والتحايا الخالصة ليك ياانعام الخير حيمورة وانعام عبدالحفيظ وكل الين مروا بالبوست
تحياتى
| |
|
|
|
|
|
|
|