|
Re: معقولة ؟!! .. الحاجة طلعت تفتيحة !! (Re: Hadeer Alzain)
|
مدخل ثاني
فى مساء ذلك اليوم سمعت إبنها الأكبر يخاطب شقيقه :
- ايه رأيك نقوم ندقس الجلكين ونديهو (مكنة) نقول ليهو معانا واحد زميلنا أبوهو إتلحس عشان يعمل لينا (زيدان أبراهيم) للضحاكات نقوم نظبط بيها (عشة الفلاتية)
ما أن إستمعت جارتنا إلى ما قاله إبنها مخاطباً شقيقه حتى قامت بتصفح (القاموس) بسرعة فى محاولة لفك الرموز لتجد أن الترجمة هي:
- أيه رأيك نقوم ندقس (نغش) الجلكين (الراجل الكبير يقصد والده) ونديهو مكنة (كضبة) نقول ليهو واحد زميلنا أبوه إتلحس (مات) عشان يعمل لينا زيدان أبرهيم (زيادة) للضحاكات (القروش) نقوم نظبط بيها عشه الفلاتية (العشاء).
بعد خروج إبنيها عشان يعملو (عشة الفلاتية) بعد ان مشت (المكنة) فى (الجلكين) جلست جارتنا ممسكة بالقاموس وقد ألت على نفسها أن تقوم بحفظه (صم) حتى تستطيع أن تتعرف على ما يقوله إبنيها من كلمات وعبارات وتراكيب بعد أن أضحت هذه اللغة هى لغة التخاطب بينهما فى كثير من الأحوال.
فى اليوم التالى بينما كانت جارتنا وإبنيها يجلسون يتناولون الشاى بالمنزل بعد عودتهما من الجامعة سأل الأخ الأصغر شقيقه:
- عملتا شنو مع (الحنان) القاعد (تحنك) معاهو اليوم كلو فى الكافتيريا ده؟
- تعرف اليوم كلو أقعد (أحنك) ليك فيها لكن هى عاملة ليا (عبدالعظيم حركة) بس أنا مرات بعمل ليها (الفاتح النقر) ومرات كده بعمل ليها (عمر إحساس) وكم مرة كده عملت ليها (شرحبيل أحمد) لكن أنا ح أقوم أعمل ليك (جوزيف لاقو) واقوم أمشى أعمل ليك (محمود الخطيب) للبقاقة دى قالو أبوها (مقندل) وماسك كهرباء شديده.
- طيب أفرض قال ليك إنتا لسه وعمل ليك (الجزيرة أبا) ؟
- ما مشكلة بعمل للموضوع (كمال ترباس) طوالى ..
- طيب وكان ورطك وقال ليك عمل ليكم (إيهاب توفيق) ؟
- خلاس أقول ليهو نعمل (عقد الجلاد) بعد ما نتخرج ..
- طيب أفرض قال ليك تعمل (عرس الزين) طوااالى
- ما (بدق ليهو جرس) طوااالى
- وكان أصر على (عرس الزين)؟
- بسيطة بعمل ليهو (الفتيحاب)
معانى المفردات: - الحنان = الحبيبة - أحنك = أقنع - عبدالعظيم حركة = عاملة حركات - الفاتح النقر = بيفتح ليها كناية على عدم الإهتمام - عمر إحساس = يعمل فيها حساس - شرحبيل أحمد = الشرا وعدم الحضور للمواعيد - جوزيف لاقو = مجازفة - محمود الخطيب = الخطوبة - مقندل وماسك كهرباء شديده = مرتاح وعندو قروش كتيره - الجزيرة أبا = رفض - كمال ترباس= يقفل على الموضوع - إيهاب توفيق = الموافقة - عقد الجلاد = عقد القران - عرس الزين = الزواج - دق جرس = للرفض بشدة - الفتيحاب = يفتح ليهو
|
|
|
|
|
|
|
العنوان |
الكاتب |
Date |
معقولة ؟!! .. الحاجة طلعت تفتيحة !! | Hadeer Alzain | 11-13-10, 01:54 PM |
Re: معقولة ؟!! .. الحاجة طلعت تفتيحة !! | Hadeer Alzain | 11-13-10, 02:19 PM |
Re: معقولة ؟!! .. الحاجة طلعت تفتيحة !! | Hadeer Alzain | 11-13-10, 02:41 PM |
Re: معقولة ؟!! .. الحاجة طلعت تفتيحة !! | Abdlaziz Eisa | 11-13-10, 02:43 PM |
Re: معقولة ؟!! .. الحاجة طلعت تفتيحة !! | المكاشفي الخضر الطاهر | 11-13-10, 03:10 PM |
Re: معقولة ؟!! .. الحاجة طلعت تفتيحة !! | الطيب رحمه قريمان | 11-13-10, 03:14 PM |
Re: معقولة ؟!! .. الحاجة طلعت تفتيحة !! | المكاشفي الخضر الطاهر | 11-13-10, 03:22 PM |
Re: الحاجة طلعت تفتيحة !! | Hadeer Alzain | 11-13-10, 06:43 PM |
Re: الحاجة طلعت تفتيحة !! | ABUHUSSEIN | 11-13-10, 07:05 PM |
Re: الحاجة طلعت تفتيحة !! | محمد البشرى الخضر | 11-13-10, 07:09 PM |
Re: معقولة ؟!! .. الحاجة طلعت تفتيحة !! | لؤى | 11-13-10, 08:51 PM |
|
|
|