|
Re: عيونك يا حمادة فيها حاجة . (Re: shaheen shaheen)
|
1980 ميلادية
شمس الصيف التى لا ترحم , اتصبب عرقاً , وهذه (الخرطوم) كئيبة كما هى العادة فى هذا الفصل من السنة , أصوات الهتافات البعيدة , الرائحة الخانقة لمسيل الدموع تُعبق الجو , جنود مدججين باسلحة , ورجال فى ملابس مدنية يُحدقون فى الناس بارتياب - ماشى امدرمان ؟ . لم أعتقد انها تتحدث معى .. أبتعدت خطوتين عن سيارتها التى وقفت بجوارى تماماً - يا زول انا بتكلم معاك .. ماشى امدرمان . تمد راسها من النافذة الامامية , نظارة شمسية كبيرة تُغطى نصف وجهها - انا ؟ . - يعنى فى زول غيرك واقف هنا ؟ .. ماشى امدرمان ؟ . اندهشت من العرض - أأأيوه . - اتفضل اركب , انا ماشية لحدى الاذاعة . فتحت الباب الامامى , وصعدت بجوارها وانا فى قمة الحرج - معليش ازعجتك . كانت ما زالت تنظر لى , او ربما كانت تنظر لاتجاه آخر مختلف , عيونها كانت محجوبة عنى بالعدسات السوداء الامعة - مالك مسكين كده ؟ .. البلد فيها مُظاهرات وما ح تلقى مواصلات بسهولة . على جنبات الطريق كان العسكر يرتدون خوذات ثقيلة معدنية رغم حرارة الطقس - موظف ؟ . - أستاذ ثانوى عالى .. لغة انجليزية . - no .. yes , خشمك ما بيتعب من الانجليزى . - اتعودنا . تخوفت ان تكون رائحة عرقى ثقيلة بما يكفى لكى تصل الى أنفها , وهى كأنها خرجت لتوها من (الحمام) , رائحة ناعمة لطيفة تنبعث من بشرتها - وانتى موظفة ؟ . - مذيعة فى الاذاعة .. ابتسام فيصل .. ما سمعتا بالاسم ده قبل كده ؟ . - معليش انا اكتر حاجة بسمع اذاعة لندن . ندمت على اننى قلت ذلك - الظاهر عليك مثقف كبير .. اذاعتنا دى سجمانة ساكت .. متزوج ؟ . - لا ابداً ؟ . فرحت لاننى قلت ذلك - غريبة رغم انك وسيم وعيونك خضرا . - ش ش شكرا . - الاسم منو بالمناسبة ؟ . - حمادة . - لا بالجد اسمك منو ؟ . - بالجد والله حمادة . - ح م ا د ة . قالتها بحروف متقطعة - طيب واسم الدلع شنو ؟ . - محمد . - هاهاهاها . - متزوجة ؟ . - متزوجة .. للاسف الشديد . شعرت بحسرة لا ادرى لها سبب - تاجر ؟ . - هاهاهاها .. يعنى عشان راكبة عربية ؟ .. لا , متزوجة عميد فى جهاز الامن . - يا ساتر .. يا ساتر . - يا ود ما تخاف .. الدنيا لسه بخير . على مدخل (الكبرى) العتيق اوقفونا , وانحنى عسكرى مُرهق على نافذتها الامامية , قال فى لهجة روتينية ثقيلة - ماشيين وين ؟ . خلعت نظرتها الشمسية , ظهر وجهها كاملاً , جمال طبيعى ناعم بدون رتوش او مساحيق , قالت فى ثقة - انا أبتسام فيصل خليل , مذيعة فى الاذاعة , وده محمد مخرج مشهور , وماشيين الاذاعة نسجل برنامج مع الرئيس نميرى . تراجع العسكرى فى ذعر , حتى اوشك على القاء التحية العسكرية علينا - معليش يا أساتذة . صاح بصوت مرتفع - خلى العربية دى تمر . انفجرنا فى الضحك ونحن فى منتصف (الكبرى) العتيق - عساكر وهم .. انا شيطانة , مش كده ؟ . - شديد .. انا بحب الناس الدمها خفيف . - ساكن وين فى امدرمان . - الموردة . - رأيك شنو اعزمك شاى فى كفتريا الاذاعة . - شاى وقت الغداء ؟ . - اممممم .. انا زولة بخيلة . على الطريق شاهدت شاباً صغير السن , يتم ضربه بوحشية بالغة , يحاولون ادخاله داخل عربة تقف فى منتصف الطريق , وهو يُقاوم فى بسالة لو تعود تلك الأيام .. أيام الايمان بالشعب غير المؤمن . ...... شاهين
(عدل بواسطة shaheen shaheen on 11-15-2010, 06:19 AM)
|
|
|
|
|
|
|
العنوان |
الكاتب |
Date |
عيونك يا حمادة فيها حاجة . | shaheen shaheen | 11-13-10, 11:19 AM |
Re: عيونك يا حمادة فيها حاجة . | shaheen shaheen | 11-13-10, 11:30 AM |
Re: عيونك يا حمادة فيها حاجة . | shaheen shaheen | 11-13-10, 12:27 PM |
Re: عيونك يا حمادة فيها حاجة . | shaheen shaheen | 11-13-10, 01:38 PM |
Re: عيونك يا حمادة فيها حاجة . | shaheen shaheen | 11-13-10, 01:40 PM |
Re: عيونك يا حمادة فيها حاجة . | shaheen shaheen | 11-14-10, 09:18 AM |
Re: عيونك يا حمادة فيها حاجة . | shaheen shaheen | 11-17-10, 08:59 PM |
Re: عيونك يا حمادة فيها حاجة . | وائل فاروق | 11-17-10, 09:38 PM |
Re: عيونك يا حمادة فيها حاجة . | مرتضى احمد عبد القادر | 11-17-10, 11:03 PM |
Re: عيونك يا حمادة فيها حاجة . | shaheen shaheen | 11-19-10, 12:24 PM |
Re: عيونك يا حمادة فيها حاجة . | shaheen shaheen | 11-19-10, 10:43 PM |
Re: عيونك يا حمادة فيها حاجة . | shaheen shaheen | 11-20-10, 10:58 PM |
Re: عيونك يا حمادة فيها حاجة . | Asim Fageary | 11-21-10, 06:21 AM |
Re: عيونك يا حمادة فيها حاجة . | shaheen shaheen | 11-21-10, 09:32 AM |
Re: عيونك يا حمادة فيها حاجة . | shaheen shaheen | 11-23-10, 05:03 AM |
Re: عيونك يا حمادة فيها حاجة . | shaheen shaheen | 11-30-10, 11:11 PM |
Re: عيونك يا حمادة فيها حاجة . | shaheen shaheen | 12-03-10, 11:08 PM |
Re: عيونك يا حمادة فيها حاجة . | shaheen shaheen | 12-04-10, 05:48 AM |
Re: عيونك يا حمادة فيها حاجة . | حسن الجزولي | 12-04-10, 09:05 AM |
|
|
|