أحلى البنات

والله يا احلى البنات
لو كان لقيت سر الغنا
كان طرت عانقت الخيال
حلقت عبر الأزمنة
وقلت الخيال يصبح حقيقة
ونهدي ليك خاتم المنى
شان تسرحي وتتخيلي
وتوهي في بحور الخيال
تتمني فيها وتسألي
ويتم ليك كل المنى

تستاهلي العرش البشيل
حسنك يطوف بيك العصور
ويمر بيك عبر الزمان
شان تمرحي وتتخيلي
كيفن تجيك ليلى بتغير
يبين عليها وينجلي
وكيفن يجيك الغيث ترش
دربك ورود لو تقبلي
ويطل جميل وكتير يقولوا
بيوت شعر مرهف طلي
وتمري بي عهد الرشيد
ويغني ليك الموصلي

تستاهلي لو درتي من قلب القمر
باقات أساور أو حلي
أو حتى من كل النجوم
عنقود مبهرج ومنطلي
كان خف لي لقاك القمر
منصاع وقال ليك أسألي
وكان حفوا دنياك النجوم
إتباكوا ليك شان تعزلي
وأنا في هواك يا ست هواى
لليلة دايب في الغنا

شفتيني كيف حاضن هواك
غيران عليك من كم سنة
شفتيني كيف ساعة الوداع
أنا كنت دمعة محننة
والليلة يا نعمة حياتي
بذوب حنان وبذوب منى
والليلة عايش أمنيات
يا حليلا لو كان ممكنة
أحكيك حروف أشواقي ليك
واسمع حروفك واحضنا