الكـااااك X الغـااااغ (أستديو تحليلى)

Quote: انا عرفت ليه كروجر ما بشرك (مهدي بن ضيف الله وهيثم المرابط)..في التشكلية. { اتاريه عندو (فهم). { وعندو (نظرية) في الحتة دي. { الخواجة دا طلع ما ساهل. { طلع فاهم أي حاجة. { نحن ساكت كنا بنهاجم في (البرمودة). { البرمودة هسع ذنبها شنو؟. { وعرفنا ليه كروجر بطلع عبدالكريم النفطي من الشوط الاول. { عرفنا السبب. { عشان كدا. { كروجر بعتمد على (الحكام)...عشان كدا ما بشتغل بالتوانسة. { خلاص يا الهلالاب طفشتوا (وارغو)..وعاوزين تقبلوا على (التوانسة). { انا اول مرة اشوف لي تونسي محترف ..جايبنو بالشيء الفلاني ...يقعد احتياطي لي سعيد السعودي. { الشغيل ...الشغيل بيلعب. { في (هملة) اكتر من كدا. { خسارة توانسة ساكت. { كنبة المريخ من التوانسة (شمعت). { مهدي بن ضيف الله في الفندق. { النفطي في الميدان. { هيثم المرابط في القمصورة. { البسمع كلمة (المرابط)...يقول الله يورني (القزاز). { قزاز شنو يا زول؟. { هسع (القزاز) ذنبو شنو؟. { لكن انتوا ما بتتفقوا معاي في (تبزير) في الحتة دي. { يعني في داعي تجيبوا ليكم (جالية تونسية) كاملة في البلد دا وتلعبوا منها فد لاعب. { واللاعب البتلعبوا ذاتو بيلعب شوط واحد. { نظام شنو؟. { نظام (عينة) كدا. { زي العينة البشلوها من الدم للفحص. { او زي الزول الشغال موظف ...وعندو (تاكسي) بطلع بيه بعد ستة. { هسع (النفطي) دا لو قعدتوا مع (مرق) ما كان احسن ليكم. { تسجلوا ساكت. { التوانسة في المريخ بقوا اكتر من (السودانيين). { المشكلة ..الجماعة ديل بقوا لي (العجب) في رقبتو. { النفطي دا يلعب شوط واحد ...ويتفرغ في الشوط الثاني للهجوم على العجب. { النفطي قال العجب ما بنفع (قايد). { شوفوا الحقارة. { والله دا الفضل. { نحن العجب دا ما بنقبل فيه أي حاجة. { ما بنفع قايد كيف يعني؟. { قالوا ليك نحن عاوزين نحارب بيه. { العجب دا انت ما عارف يا النفطي ودانا (غانا). { انا اول مرة اشوف لي زول يودينا (غانا)..ويقعد هو. { العجب في مباراة المنتخب الاخيرة امام غانا ..رفض يسافر...اعتذر زي كل مرة. { وبعد دا يقولوا ودانا (غانا). { هو زول بي رقبتو ما مشي ..يودانا نحن. { محن والله. { عندي ليكم رأي...هيثم (المرابط) دا عينوه مدير نادي. { او مدير استاد. { احسن من يقعد (يرابط) ليكم في الفاضي. { دا زي الزول البسمي (مربوطة) في الوست...وورقو (مفرمل) بي ولد هارتي. { هي (المربوطة) دي بسموها ساكت. { الحاجة الغريبة. { المريخاب فرحوا بتعادل الهلال مع الامل. { شوفوا (الكسوف). { انتوا مفروض تخجلوا ... نحن التعادل دا بسطنا ...عشان وضح لينا الفرق. { نحن بنلعب كورة عديل كدا. { ما بنستعين لينا بي (حكم). { بالله عمار مرق دا تقول كان بيلعب في (روسيا). { روسيا هسع ذنبها شنو؟. { قالوا ليك روسي اشتري ليه (جدادة)...وقعد يراقب فيها. { من الواطة تصبح هو براقب في (الجدادة) وبسجل في الورقة. { الساعة خمسة صباحا وقفت على فد رجل. { الساعة سبعة وقفت على الرجل التانية. { الساعة تمانية نزلت من الفرع. { الروسي شغال كدا ...مراقبة من خمسة صباحا الي السابعة مساء. { في واحد (وصيفابي)...شاف ليك الروسي ديل براقب في (الجداد). { قال احسن حاجة اشتري لي (جدادة). { والاحسن من كدا ..اقعد اراقب في (الجدادة). { الروسي دا ما بكون براقب في الجدادة دي من فراغ. { احتمال الموضوع دا فيه (جائزة). { او فيزا. { او رحلة للقمر. { تب (الروسي) دا ما براقب في (الجدادة) دي ساكت. { المريخاب اصلو كدا لو شافوا ليهم زول عمل ليه حاجة اليوم التاني بعملوا نفس الحاجة. { نحن كرهونا بالتقليد. { الواحد لو حلق شعرو ساكت ..بكرة تجي تلقي المدرج كلو حصل. { انت تعال هنا...ما قلت لينا. { الروسي كان براقب في (الجدادة) ليه؟. { كان براقب فيها (تجربة). { عاوز يوديها (القمر)..انتوا مالكم بتتخبروا. { أي حاجة عاوزين تعرفوها. { كدا ما كويس. { ما في داعي تعرفوا أي حاجة. { يعني تفتكرو الروسي دا كان براقب في (الجدادة) عاوز يناسبها. { الروس ديل ما بعملوا حاجة ساكت. { ناس بفكروا. { وبجضموا الكفر. { الكفر هسع دخلو شنو؟. { لكن نحن بالجد كدا عمار مرق بالغ معانا. { يا مرق شنو يا ابو الشباب؟. { تقول ما كان بيلعب مع (مدثر كاريكا). { عمار مرق اتغابي فينا العرفة. { هيع ...عافي منك انا ...الهلالاب اصلو بيلبعوا كدا. { الكورة عندهم كورة. { نحن نلقاها من احمد سعد وإلا من عمار مرق. { احمد سعد دا اتحول مصارع وقعد. { في زول بضرب هيثم مصطفي (حفظه الله ورعاه). { السنة دي لو موسم (السمسم) ضرب...السبب احمد سعد. { لو صناعة السكر طرشقت ...السبب احمد سعد. { لو الدولار ارتفع ...السبب احمد سعد. { ناس ما عندها عشرة. { نحن ما عاوزين منكم حاجة ...لكن العبوا بي اخلاق. { ما شفتوا مجاهد احمد محمد ...لعب ليه 3 شهور في المريخ ...وهسع واقف السنة كلها في الخط. { يا مجاهد انت دي عرفت من متين؟. { 3 شهور تخليك تنسي اصلك. { على الاقل ناس جزيرة الفيل ديل مفروض يكون ليهم خاطر عندك. { انت ما شفت ابراهومة دا وقت يلعب النيل مع المريخ بيلعب لعب مفتوح كيف؟. { اغلبونا يا جماعة. { عملتها ظاهرة. { يغلبوه ..ويتمها تصريحات. { الغريبة ابراهومة بهاجم (الحكم)...عشان ما تبقي واضحة. { الموردة عشان مدربها غريب ..ناس المريخ استعانوا عليها بالحكم. { ناس بالحكم ..وناس بالحافز. { معتز عبدالباسط دا من وين؟. { دا عمل حاجات ...(العجب) في (شبابو) ما بعملها. { العجب (زمان) ما كان خطير كدا. { ناس الموردة يجيبوا قون ..ما يعدو ليهم. { ناس المريخ يسجلوا من (تسلل) يحسب ليهم الهدف. { كورتكم دي (صورة مقلوبة). { ناس الموردة يعملوا معاهم ضربة جزاء ..الحكم يقول ليك : مشي ..مشي. { حكم تقول جايبنو (صدقة). { دا شنو البعمل فيه الحكم دا. { انتوا يا ناس المريخ ما بتخجلوا. { ما بتتعقدوا من الحكاية دي. { بتعملوها ظاهرة. { هسع تعادلنا مع الامل دا ...ما افضل من فوزكم (الخجول) على الموردة. { الموردة دي نحن بدون حكم ....اخذت مننا ستة. { انتوا بالحكم .يا الله ...الله ..غلبتوها بفارق هدف. { الغريبة (راجي) كان فرحان بالهدف. { انت يا اخوي ..عملت ليك حاجة. { الشغل دا كلو قايم بيه الحكم. { الحكم والحوافز. { الظاهر كدا ...الموردة حضارة. { الموردة جسارة. { ما بتقبل بالحافز. { حافز نهي. { نحن لو لقينا حكم زي حكمكم الحكم ليكم كورة الموردة ...بنجيب كأس العالم للاندية. { ولا بنتلفت. { ولا بنعسكر للموضوع دا. { ولا بنجيب لينا (توانسة). { التوانسة نعمل بيهم شنو؟..ونحن (الحكام) ما بقصروا معانا. { ولا عاوزين لينا مدرب اجنبي. { نحن (ميشو) حقنا مسكين ...المباراة ما بنوم ليها. { بساهر ليها عديل. { زول تعبان وشايف شغلو.. ما زيكم...حكمكم ما فاضل ليه إلا يقلب الهوبة وقت المريخ يسجل ليه (هدف). { انتوا يا ناس المريخ ...حكمكم دا طلع اخطر من (ابوتريكة). { انا اول مرة اشوف لي حكم ...خطير كدا. { ولا بتلفت ...(الهدف) بيلغي من قولة تييت. { انتوا الحكم دا ...فاكر الكورة دى في (عطارد). { فاكر انو ما في زول شايفو. { لو دي كورتكم...(التوانسة) ما في داعي ليهم. { سرحوهم. { نحن ح نقعد نتكلم عن الموضوع دا الي ان يتم اعارة (الحكم) محمد عبدالباسط الي ليبيا. { انتوا بس اصبروا. { نحن أي حاجة عندنا بي نظام. { والله نحن نظامك دا ما شايفين فيه أي نظام. { ملحوظة: النظام نظام. هوامش { الهلال والميرغني اليوم ...عاوزين نكون فيها الافضل هجوما. { الهلال الان الافضل دفاعا. { ونريده ان يكون الافضل هجوما. { لكن مع غياب هيثم مصطفي ...الحكاية دي بتبقي صعبة. { هيثم مصطفي يجب عدم المجازفة بمشاركته دون ان يتكمل شفاءه. { الهلال كل 48 ساعة بقي يلعب مباراة. { بويا ..يمكن ان يعيد اكتشاف فضيلة التهديف من بعد اليوم. { شاهدوه واحكموا. { بكرى المدينة ..يحتاج الي مساندتكم. { شجعوه ..وسألوه من الشبكة. { بشة مفروض يعاقب على الكرت الاحمر الذي طرد به في مباراة الهلال واهلي مدني. { سادومبا امام الامل كان غايب. { لم يكن له اثر. { مباراة الصفقاصي ..يجب ان يذهب الهلال اليها من اجل الانتصار. { احسموا موضوع الصفاقصي في تونس ...عشان نجي نحسم موضوع الممتاز. { هل يعقل ان يلعب الهلال يوم الاربعاء مع الامل ..ويوم السبت مع الميرغني كسلا ويوم الثلاثاء مع الاتحاد مدني ثم يسافر ويلعب في تونس يوم 30 ...ويوم 3 نلعب في الحصاحيصا مع النيل. { دي كورة دي وإلا قرعة اراضي. { جدول مباريات الهلال بقي اسرع من سادومبا. { الهلال وقع مع شركة راعية ..وإلا شركة جارية. { نفسنا اتقطع. { ميشو ليه حق ما ينوم. { دا وقت ينوموا فيه يا كروجر. { خبر عاجل : ما في داعي للاحراج.