|
ربط حزام البطن والعربية ...وفك حزام الوطن !!حاجة عجيبة!!
|
بتطبيق لائحة المرور الجديدة ,تكون حكومة الجن دى دخلتنا كل انواع الربط بينما هى تسرح وتمرح وتتفنن فى فك الاحزمة واهمها حزام الوطن..
ربطنا احزمة البطون وقلنا زنقة وتعدى لنتفاجأ بإلزامنا بربط احزمة اخرى كثيرة.. بينما فكت الحكومة حزام الوطن فى احتفالية كبيرة وبهجة اكبر لتنتهى باتفاقية هزيلة ممهورة بتوقيع على عثمان..من يوما ولم نشاهد بعدها ولا حتى الحزام الاخضر ودا حصل بعد ما اتفكت كل الاحزمة القبلو من الاخلاق والامانة والضمير وغيرها كثير ..
غايتو صحى المثل البقول الناس فى شنو والحسانية فى شنو؟؟ بينما الحكومة فى موقف حالك والوطن فى طريقه للتشرزم والانقسام يبدع ويتفنن اهل الدولة فى عصر وربط المواطنين حد الاختناق وكأننا قاعدين نقول ليهم(عذبنى وتفنن فى الوان عذابك).
التسوى الحكومة فينا تلقا فى رئيسها ويكفيها خزياً تعرضها لاقبح موقف فى شأن سيادة واحترام الدول بطرد الرئيس من قمة طرابلس بعد تجهيز نفسو وطيارتو وبعديها قالوليهو عفواً ايها النائم عن شعبك..
اقتراح لجماعة التعسف فى المرور واكيد فيهم من يقرأ هنا تطبيق نظام الدفع بالاجل للمخالفات بدلا عن الغرامات الفورية لانو فى كتير من الاحيان الزول بكون ماشايل معاو ال 30 الف دى واذا شايلا بكون محدد اوجه صرفها بدقة وقد تكون ناقصة شويتين فبالدفع الاجل ممكن يدخل المخالفة فى ترتيباتو وتدبيراتو لحق الفطور والمدارس والعلاج والتنفس وغيرها من المنصرفات الهادة حيل الجميع..
حاجة عجيبة!! دعوة: تعالوا سوا نرصد الحاجات العجيبة فى البلد دى
|
|
|
|
|
|