|
|
 بين العفوية والتنظيم إنفجر البركان ..وداعاً مساطبنا الشعبية
|
الموضة اليومين ديل هلال مريخ هيثم مصطفى وراجي جمهور المدرجات ودعوة للإرتقاء بالتشجيع أحداث هلال مريخ الاخيرة وما قبلها وما بعدها ..المنتديات والكيبوردات سهلت علينا كتيير أي زول يدلو بي جردلو والعارف والما عارف ينضم والصاح والما صاح بيتكتب (انا تبع الما عارف والما صاح غايتو ..)
سألت روحي كتييير الجديد شنو ؟؟؟
الناس دي بتغش في روحا ؟؟؟
الهيجة شنو في جماهير الفريقين ؟؟
ألفاظ شنو الجديدة ودخيلة على مجتمعنا الكروي؟؟
النصيحة ما فكرت ولا قدرت ولااا حتى أرجعت البصر لا كرة ولا كرتين فالشغلانة زي واضحة وما محتاجة تفكير ..
الألفاظ المتداولة داخل الإستادات هي هي والصور نفس المشاهد ..التعصب هو التعصب وداخل الميدان ألفاظ مخيفة أكتر من الفي المدرجات والكلام ده ما أسة بل بالعكس الناس الشابكننا في التلفزيون بي قصصهم حقت سنة خمسين ديك نتلم في بيت ناس منو نتغدا وبعد داك نمشي الكورة ده هلال وده مريخ ما كفاية لإثبات نقاء الاجواء لأنو أسة أسة وحالييياً العلاقات بين اللاعبين أقوى من ناس زمان ومش علاقة كسرة وملاح وغدا في بيت ناس فلان لالالا ديل وصلوا مرحلة الشراكة في البيزنس والما عارف يعرف ..يعني عااادي جدا المعز محجوب والعجب عندهم بيزنس مع بعض شكرة حقت مواد حفريات وكده ..
طمبل الشوفتوهو شتم هيثم مصطفى ده بيتلاقو في اليوم اكتر من جغلومية مرة وده في بيت ده وداك في بيت داك وبالعودة ..
علاء الدين يوسف وقلق البيتشاكلو طول المباراة وهاك يا نبز شلاليت أصحاب أكتر من صحوبية ناس قاقرين و بشارة القدونا بيها ديك للدرجة البتخلي علاء الدين في التلفزيون يقول ليهم لما سألوهو عن بتو ح يعرسا لي ولد كاريكا قال ليهم لالالا دي الا يعرسا ولد قلق (يا قول الفلاتية ما شين زيو :) )..
عليه حنك ونسة زمان ده بالجد حنك عاااضي وضارب أو عشان ما نظلمهم ما يفتكروا انو دي ميزة زمان لأنو اسة احسن من زمان في العلاقات بين اللاعبين ..
زمان سمعنا بي الدحيش وحسب الروايات عااادي جدا تكون ناطي معاهو (هيد) يجر منك الشروت تنزل أم فكو ويا مولاي كما خلقتني يعني دي أخير منها نبز طمبل لي هيثم مصطفى مش؟ (طبعا ناس زمان بيقولوا ليك ده اسمو شغب وحرفنة وخفة لاعب ومهارة وتكتيك )
الناس العايزة تدفن راسا جوووة الرملة دي المعلومة اللي عارفها أي رياضي بيدخل الاستاد إنو 90% من البيدخلوا الكورة بيدخلوا عشان الإستاد متنفس ليهم والحتة الوحيييدة البتقول فيها أيي شي لي أييي زول ..أي لفظ جاك طاير بتقولوا ومتعة المتعة الألفاظ الما الفاظ ديك لأنو بتلاقي نص الإستاد بقا يضحك ويصفق ليك ..
في الاستاد بتنبز رئيس البلد ...في الإستاد بتنبز رئيس النادي ..في الإستاد بتنبز اللاعبين .. في الإستاد الزول الجمبك ده تنبزو لمن الله يغفر ليو وليك مع انك عزمتو كباية شاي ولا اشتريت ليهو كيس تسالي معاك ..في الإستاد تضحك وفي الإستاد تبكي ..في الإستاد تفرح وفي الإستاد تحزن ..في الإستاد توعا وفي الإستاد بتفقد الوعي..في الإستاد لاحظت إنو أكتر الناس وقاراً هم أكثرهم تلفظاً وأقل الناس تلفظاً اللي بنقول عليهم شماسة ديل..
في الإستاد ده تلاقي عمك راجل كبييير لافي العمة وجادع الشال ولابس النضارة وقمممة الوقار فجأة كده قوووم يا عم الراجل اديها من ابو كديس لما لاعب منفرد يوديها الكشافات ..
في الاستاد تشوف ليك اتنين لابسين بدل سفاري ودقون كيزيانية بيضاء بيتكلموا عن قال الله تعالى وقال رسول الله والظلم ظلمات ولا تنابزو و و وفجأة كده الحكم يلغي لي فريقهم ضربة جزاء وتوووف يدوهو ليك من النبز البيريح في الكنكوج داك ..
ياخ كمال افرو القادينا في التلفزيون كللل يوم ده والرياضة سفارة وتسامح ووزير الإنسانية والرياضة أخلاق كدي أمشي يوم اقعد جمبو في دار الرياضة !!! والله لما تحتار في الزول القاعد جمبك ده ..
محاولة جعل الاستادات كما المساجد محاولة ما بقول فاشلة لكن ح تجرد الاستادات الجمهور ما لأنو الجمهور طالع الاستاد عشان يقل أدبو وينبز ابداً ما كده بس لأنها حا تمنع العفوية في العبير ..
الإساءة للاعبين ما جديدة ..نفس النبز بي نفس الكلام لي نفس اللاعبين ..ما طال هيثم مصطفى حبيبنا وحبيب كل الهلاليين طال قبله ابراهومة وسمعت مثله عن عبد الناصر لاعب المريخ وسمعنا من المريخاب عن حموري وسمع فاروق جبرة من جمهور الهلال فسمع الراحل والي الدين ما سمع فتجرع راجي عبد العاطي من نفس الكأس التي تجرعها أنور الشعلة ..والقصة ما هلال مريخ الموردة ما سلمت في كابتنها بريش كذلك !!
ما محاباة لي هيثم مصطفى ولا دفاعاً من باب الهلالية العمياء حقتي بس فعلاً كل الروايات السابقة في كفة وقصة هيثم مصطفى في كفة لأنو ومن وجهة نظري لحدي مشكلة راجي عبد العاطي ورغماً عن قساوتها إلا إنها ما كانت مدبرة ولا منسقة ..هتافات عفوية ..وخلونا نكون شجعان أكتر ونسأل سؤال مباشر :
ما الفرق بين هتاف السكران ..السكران .. اللي إتردد لي راجي وهتاف الشماسي..الشماسي اللي بيتردد لي علاء الدين يوسف؟؟
هتافات جمهور المريخ من داخل الاستاد للاعب هلالي بتاع الطين بتاع الطين ..
وهتافات جمهور الهلال للاعب مريخي ود الحبشية ود الحبشية ..
هتافات كانت قبيحة نعم مرفوضة نعمين أصلاً ما مقبولة وما اظن زول بيتوقعا تحصل اوووكي بس والله كانت بتمشي في لحظتها وممكن تاني ما تتذكر في خمسن كورة لتعود بعد كم وسبعين كورة تتردد من ناس تانيين غير اللي رددوها زمان ديلك مع إنو الزمان ديلك بيكونو قاعدين جوووة الاستاد..
إذن الخطورة والخطورة كلها في التنظيم ..التنظيييييم ..التنظييييييم ..
الهتاف المنظم والمتفق عليه هو الكارثة والظاهرة الجديدة ..الإتفاق على هتاف نعين لي لاعب معين بي حاجة معينة هو اللي خلانا ننتبه ..
الهتاف المنظم واللافتات المعدة بعناية هي اللي خلتنا فجأة نقول بدأت تظهر عادات دخيلة على مجتمعنا الرياضي..
صدقوني مشكلة راجي كانت مشكلة زيها زي مشكلة انور الشعلة وغن كانت مشكلة انور الشعلة أسوأ للحد اللي اقسم فيهو جمهور المريخ إنو شافو اللاعب في القسم بي ملاية وهتفوا ضده في هلال مريخ ومشت ..
قصة راجي كانت ح تمشي لو المريخ فاز ..
هتافات راجي كانت ح تكون مبلوعة ولن يلتفت أحد ويتذكرها في هلال مريخ القادمة لو الممتاز بقا مريخي ..
جملة واحدة ..واحدة فقط نسفت كل العرف الرياضي..
جملة كتبت في عمود صحفي مفادها (سترد جماهير المريخ وبعنف وسترد الصاع صاعين ولا عذر لمن أنذر)..
قد تكون دعوتي غريبة وميبة ولن يتقبلها البعض من الذين لن يفهموها ولكن لا لتحجيم الجمهور ووضع الرقابة عليه بتلك الطريقة ..
لا تعلقوا في جمهور الجيل الحالي صفة التردي والسقوط فالجيل السابق كان أكثر سقوطاً في الالفاظ ولكنها عدت ..
لا تحملوا جمهور الجيل الحالي تراكمات اجيال سابقة وثقافة ورثها منهم كما هي (Save As) ويجي الجيل السابق يتنكر عنها ..
التصحيح مطلوب من بوابة ردع الصحافة والصحفيين لكن لا تفكروا في تأديب الجمهور فتهدموا التسامح الرياضي العفوي ..
لا تنشروا العساكر بين الجمهور ولمجرد سماع لفظة خادشة نشاهد خمسين عسكري بالخراطيش السوداء تضرب في ظهر هذا المسكين عبر بوابة الان حان الاون للتصحيح ..
لا تجعلوا المساطب الشعبية هي كبش الفداء بينما رؤوساء الإدارات وأعضاء المجالس المركوب النمري ورواد المقصورات الطائرة يتبجح عبر بوابة الدفاع عن الحق مع إنه قال نفس بل أسوأ من تعابير المساطب الشعبية ..
لا تراقبونا في الملاعب ..دعونا نصحح اوضاعنا ..فقط فقط فقط أضبطوا صحافتكم وصحفييكم ..
تخريمة :
طلحة وامير الجمري عليكم الله أرخوني وشيلوني من راسكم عااارف روحي بكتب ساي وبنق نقة فارغة ومش نقة ساي لالالا نق تربيع
|
|
  
|
|
|
|
|
|
|
|
Re: بين العفوية والتنظيم إنفجر البركان ..وداعاً مساطبنا الشعبية (Re: عمر الفاروق)
|
عمر اللايوق موضوعك الفوق دا عديت كلماتو لقيتا 1121 كلمة
كلها طالعة من الشبكة إلا الأربعة كلمات دي Quote: فقط فقط فقط أضبطوا صحافتكم وصحفييكم ..
|
أوع تجى تقول لي ديل ستة كلمات لأنو إتا مكرر
كلمة (فقط) تلات مرات وأنا حسبتها ليك واحدة بس ...
لا والغريبة الكلمات الأربع العليهن الرك حاتلات في آخر الموضوع
معقولة بس يا عميرة ياخ .
| |
|
|
|
|
|
|
| |
عمر الفاروق
nadus2000
فيصل نوبي
مرتضى احمد عبد القادر
طلحة عبدالله
فيس بوك
تويتر
انستقرام
يوتيوب
بنتيريست