|
|
 الغياب الكامل للاسس والضوابط التي تنظم اجراءات التعامل مع الجثث
|
سونا قالت .. اللهم اني صائم
كشفت اللجنة العدلية التي شكلتها النيابة العامة بامدرمان الغياب الكامل للاسس والضوابط التي تنظم اجراءات التعامل مع جثث مجهولي الهوية الذين يتوفون بالمستشفيات سواء كان ذلك بدفنها او تحويلها لكليات الطب للاغراض العلمية كما لاحظت اللجنة عدم تقيد ادارة المستشفي او المشرحة باخطار الاجهزة العدلية او الامنية بحالات الوفاة بالنسبة لمجهولي الهوية وقالت النيابة العامة ولاية الخرطوم منطقة امدرمان في بيان اصدرته امس ان اللجنة لاحظت انه لا يتم الاعلان عن وجود جثث المتوفين مجهولي الهوية عبر الوسائط الاعلامية او من خلال النشرات الجنائية التي تعمم علي اقسام الشرطة المختلفة والزمت اللجنة العدلية بالنسيق مع المجلس الطبي السوداني بالزام ادارات المستشفى اخطار النيابة العامة المختصة بحالات الوفاة الخاصة بمجهولي الهوية.
كتر خير نيابة امدرمان العامه العرفت عملت ليها لجنه عدليه عشان تبحت (اسس وضوابط ) دفن الناس
بس الواحد كان بدور يعرف هي الاسس والضوابط دي اصلا كانت في وفجأة كدي اختفت ...واللا يا دوب الناس فكرت فيها
واكان كانت في... ليه اختفت.؟.والناس الاتصرفو فيهم من غير ضابط ولا رابط ديل في زول مسئول مسكوهو وحاسبوه واللا (ربنا امر بالستر) فستروهو زي ما بستر الجنايز وقالوا عفي الله عما سلف؟
وعدد الناس الدفنوهم مجهولين الهويه ديل قدر شنو ؟ في احصائيات ورصد واللا الناس في السودان بتنقر نقر ساكت
وهل في مستشفيات قاعده تستر ليها ميت غير بتاعة ام درمان دي .. واللا كلهم شغال غمت ؟
وكليات الطب ديل قاعدين يدوهم الزول بي طولوا واللا بملصوا ليهم الدايرنو منو؟ وامان فيها مليص الفاضي بودهو وين؟
ومع مصاريف الجامعات البقت بالشي الفلاني شي ريال وشي دولار وشي بالجنيه السوداني حار .. حار ، بدوهم المراحيم ديل ملح واللا قاعدين بدفعوا حاجه؟
انا من زمان كانت محيراني حكاية المستشفيات البتكنكش في المراحيم لامن اهلهم يدفعوا الحساب كاش... اظنو الحكايه سوقا حار مع كليات الطب الملن الدنيا وخريجهم قاعدين ما لاقين ليهم شغل واحنا ما جايبين خبر... انا هسع بقيت ما مستبعد انو ناس جامعات ومستتشفيات استثماري يكونوا فكروا في لملة المراحيم وتصديرهم اصلوا الانتاج عندنا بقي علي قفي من يشيل ناس تموت ساي عديل لا احم لا دستور وناسا شيتا حرب وشيتا ضرب وشفع بجدعوهم مع انهم شغالين .. المستشفيات زاتا ما فيها مشارح كفايه عشان يلقطوا فيها المراحيم ويصبروهم ويعقدوا يحرسوا ناس النيابه عشان يقولوا ادفنو ده وخلو ده؟
وفي السودان البوليس اكان مباحث واللا تحري داير ليهو عربيه توديهو وتجيبوا وتديهو حق العشا والسجاير يعني بتاع النيابه معقول يقوم يجي ساي ؟ اليه ماهيتو كلها كام؟
واكان بتاع النيابه كمان داير زي البوليس ....المرحوم مجهول الهويه ده يدفع من وين وكيف عشان بتاع النيابه يجي يقولوا ادفنوهو ؟
واللا كمان يعني المستشفيات هي اللازم تقوم ترسل الاسعاف يجيب بتاع النيابه .. اكان اتلقي عندها اسعاف من اصلوا ع؟
والله بورد البكري ده قرايتو ساي تجرح الصيام ... الله يدينا ويديكم خيرو
|
|
 
|
|
|
|
محمد مصطفي مجذوب
فيس بوك
تويتر
انستقرام
يوتيوب
بنتيريست