|
Re: ساعدونا بالخيال والجمال : شوارع الخرطوم بعد القبض على المجرم البشير (Re: فتحي البحيري)
|
شكرا جزيلا أخ أحمد
دا طبعا واحد من السيناريوهات المتوقعة
وهو (وسط) .... بين أولئك الذين ظنوا أن الخرطوم ستغرق في الدماء حال تنفيذ أمر القبض وأولئك الموقنين أن الأمور ستسير بشكل ممعن في العادية .. (والغيظ) الناس تكابس في أشغالا ومعايشا بشكل عادي جدا ومنهم من يحمد الله في سره أن الله قد استجاب لدعائه ودعاء الكثيرين .. أخيرا ومنهم من يحس أن البلد فيها شي ما عادي
كان يكون الهلال مغلوب أمس سبعة صفر
وهذا حوار بين اثنتين ماشات على سوق خضار قريب منهن
الأولى : انتي يا ختي الليلة الحاصل شنو ؟ الثانية : بري .. غايتو في شي ما طبيعي الأولى : غايتو بتي امس مساهرة للصباح في الترنت وقالت لي انو الزول دا قبضوهو الثانية : الزول منو ؟؟ الأولى : (تتلفت يمنة ويسرة) مالو عمر القشير المطلع عينا دا ؟ الثانية : نعلو عوكامبو الأولى : اظنو ، غايتو ما بعرفو الثانية : اريتك تتبارك يا ولدي ، اريتا خطوتك تنعدل محل ما تقبل كان فشيتنا وبردت قلبنا ، غايتو أصلو جنس دا ما سمعنا بيهو قبال كدا .. دا رئيس شنو دا الغالبو يجيب لينا الموية في المواسير دا الأولى : يا بت امي اسكتي ، دا كلام ترنت ساكت ، لسا ما سمعناهو في التلفزيون ولا في الرادي ، كدي خلينا نقطع شكو بالاوّال وبعدين نفتّو الثانية : لا لا، ظنييتو صحي ، انا لي يومين ما بنوم لا من الواطا تصبح ، شايلة الليل كلو صلاة ودعا ، اولادي الصغار طاردنهم من المدرسة عشان ما دفعوا حق الشهر ، وبتي الكبيرة قاعدة معانا في البيت لا عارفا روحا ارملة لا عارفة روحا مرت راجل ، راجلا ماسكينو ليهم 5 سنين ما عارفين محلو وين ،وابو اولادي طردوه من شغلو الله يطردم من رحمته وقاعد في البيت وجاهو مرضا ما عندنا ليهو علاج و ...
|
|
|
|
|
|