|
|
 Re: شاهد مهرجان الاهداف الهلالي الـ( 17) في كاس السودان (Re: قلقو)
|
رمضان كريم يا شباب
حاولت أن أنتظر المحطة التي تقف فيها أهداف الهلال حتي أبدأ كتابة العمود ولكن من الواضح أن الغضب الهلالي على ممثل الكاملين وصل مرحلة عدم التوقف في المحطة نفسها !!
فسرعة لاعبي الهلال في إحراز الأهداف جعلتهم يقفزون فوق المحطات وعلى رأسها محطة الكاملين التي وقفت ضد كمال شداد وبالتالي وقفت ضد مصلحة الهلال المتضرر الأبرز والوحيد حتى الآن من تهديدات الفيفا بتجميد مشاركات السودان الخارجية.
وغضب لاعبي الهلال (كوم) وغضب سادومبا (كوم) لأن الفتى الزيمبابوي الذي ترك أهله وعشريته من أجل مغازلة الكرة مع الهلال والانتقال عبره لأوربا الضرر الواقع عليه مضاعفاً لذلك فإنه كلما أحرز هدفاً تذكر (طعن) فتى الكاملين فطعنه بهدف آخر حتي وصل إلي سبع طعنات حتي لحظة كتابة هذا السطر من العمود..
نعلم أن في الكاملين الكثير من الرجال الخيرين والنساء ولكن لاعبي الهلال المهددين بالتوقف عن الإرسال في بطولة الكونفدرالية بسبب طعن رجل ينتمي للكاملين قرروا أن تكون العقوبة جماعية حتي يقول أهل الكاملين كلمتهم في هذا الطعن!!
قرأت قبل أيام حواراً جميلاً مع الأستاذ (الجميعابي) تحدث فيه حديث العارف عن مشاكل (الإنقاذ) والحركة الإسلامية في السودان وسنوات الحكم الأولى وانتقد الجميعابي بعنف ما أسماه بعدم قدرة الإنقاذ على اختيار القيادات .. أتمني أن تكون للجميعابي القدرة على قراءة الواقع الرياضي ليكتب لنا عن الفريق الذي يحمل اسمه ويحمل حتي كتابة هذه السطورة 15 هدفاً من بينها سبعة أو ثمانية أهداف لسادومبا.. الزول ده زعلان شديد..
يا أخوانا قالو سادومبا جاب التاسع .. الزول ده ثبتو .. الجماعة ديل فرحانين بقونين الأهلي ما يمسخ عليهم فرحة التعادل!!
بالمناسبة المريخ لم يتذوق طعم الفوز مع الفرق الأجنبية للمباراة السابعة على التوالي.. مباراتان مع الترجي ومثليهما مع الجيش النيجيري وثلاث مباريات في الإمارات..
لذلك لا تستغربوا الاحتفالات بالتعادل!
نرجع لموضوع (الجميعابي) أنا خائف يكون في مجموعة من لاعبين الهلال ضد (الجميعابي) سياسياً..
حكاية الـ17 دي ما طبيعية!!
الناس ديل يكون عندهم رأي في مشوارك السياسي يا شيخنا؟!!
والله لو لقينا عشرة من الـ17 ديل في الجماعة!! الله!!
جمال الوالي قالو إتبرع للجميعابي (الفريق) بي بص عشان يشيلو فيهو الأهداف.. قالو ليك من الهدف الـ13 وحتى الـ17 كانوا واقفين شماعة!!
سكان الحارة ( 17 ) أمبده قدموا تعازيهم (للجميعابي)!!
الهلالاب في الصيام .. ما بخلو (الحمام) رحمة مافي.. في كأس السودان في الدوري الممتاز في الكونفدرالية..
ما عندنا كورة قريبة مع الجماعة..
أعملوا لينا مباراة .. إن شاء الله لدعم الوحدة !! نحن متنازلين عن الدخل!!
الجماعة قالو شبعانين..
اتضح إنهم شاركوا في بطولة دبي بـ(بطنهم)
درهم واحد ما شافوهو..
ونازلين في فندق أبو عشرين درهم والكهرباء عليك!!
لما رئيس البعثة إحتج .. نقلوا الفريق لي شقق فندقية!!
ورمزي صالح ما جا..
في مشكلة في الجواز..
الظاهر كلام صلاح إدريس صاح!!
احتمال يحترف في نادي (ند الشبا)!!
من أول سفرية!!
الحاجة الظريفة إنو رمزي صالح شحن الأقوان التلاتة مع البعثة!!
يعني المريخ والجميعابي دخلت فيهم عشرين قون في تلاتة مباريات!!
والمباراة الجاية راجعين لمحمد كمال!!
وإبراهومة مدرب النيل الحصاحيصا عارف البير وغطاها!!
أدي كرنقو ده فرصة يا كوتش..
وييين مباراة المريخ والأمل عطبرة!!
حقو شداد يكلم ناس الفيفا بالمجاملات دي!!
نحن تاني والله لو زول قال لينا المباراة الساعة تمانية ونص بدل تمانية بنشتكي الفيفا!!
والفيفا فيفتنا!!
وين عبدو يا مزمل!!
عبدو منو؟
أبو فيفي يا خي!!
شايفكم نسيتو الوطنية والقوانين الداخلية وبقيتو مركزين علي سقوط شداد!!
شداد انتصر زمان لما جاب ليكم الفيفا!!
ما تزعل ما مزمل دي ونسة كده بين الجد والهزل..
بالمناسبة عندنا حلقة ظريقة عازمنكم ليها الليلة في قناة الشروق الساعة حداشر بالليل!!
تعالو أضحكوا مع علاء الدين يوسف..
يا مزمل.. عاملين انتخابات اتحاد الكرة في شارع الجمهورية..
أنقر الفاز منو؟؟
إشتكي للوزير!!
|
|
 
|
|
|
|
|
| العنوان |
الكاتب |
Date |
| شاهد مهرجان الاهداف الهلالي الـ( 17) في كاس السودان | Maawya Hussein | 08-21-10, 11:15 PM |
| Re: شاهد مهرجان الاهداف الهلالي الـ( 17) في كاس السودان | Maawya Hussein | 08-21-10, 11:28 PM |
 Re: شاهد مهرجان الاهداف الهلالي الـ( 17) في كاس السودان | محمد عبد الماجد الصايم | 08-21-10, 11:30 PM |
| Re: شاهد مهرجان الاهداف الهلالي الـ( 17) في كاس السودان | فدياس نجم الدين | 08-21-10, 11:36 PM |
| Re: شاهد مهرجان الاهداف الهلالي الـ( 17) في كاس السودان | Ashraf el-Halabi | 08-21-10, 11:57 PM |
| Re: شاهد مهرجان الاهداف الهلالي الـ( 17) في كاس السودان | Hassan Senada | 08-22-10, 07:49 AM |
| Re: شاهد مهرجان الاهداف الهلالي الـ( 17) في كاس السودان | hassan bashir | 08-22-10, 08:01 AM |
| Re: شاهد مهرجان الاهداف الهلالي الـ( 17) في كاس السودان | فيصل نوبي | 08-22-10, 08:12 AM |
| Re: شاهد مهرجان الاهداف الهلالي الـ( 17) في كاس السودان | hassan bashir | 08-22-10, 08:25 AM |
| Re: شاهد مهرجان الاهداف الهلالي الـ( 17) في كاس السودان | Munir | 08-22-10, 10:35 AM |
| Re: شاهد مهرجان الاهداف الهلالي الـ( 17) في كاس السودان | قلقو | 08-22-10, 12:04 PM |
 Re: شاهد مهرجان الاهداف الهلالي الـ( 17) في كاس السودان | Amany Elamin | 08-22-10, 12:39 PM |
| Re: شاهد مهرجان الاهداف الهلالي الـ( 17) في كاس السودان | قلقو | 08-22-10, 01:11 PM |
| Re: شاهد مهرجان الاهداف الهلالي الـ( 17) في كاس السودان | Maawya Hussein | 08-22-10, 01:44 PM |
|
| |
Maawya Hussein
فيس بوك
تويتر
انستقرام
يوتيوب
بنتيريست