|
Re: مدن في السودان لم أقوم بزيارتها حتى الآن .. (Re: Nasruddin Al Basheer)
|
سلام يا نادر أنا لم أقوم بزيارة: جوبا واو ملكال نيالا الفاشر الجنينة المجلد بابنوسة الدمازين الدندر السوكي شندي عطبرة مروي كريمة دنقلا كسلا بورتسودان حلفا الجديدة حلفا القديمة خشم القربة المحس المدن الذي زرتها أو عشت بها هي :- الابيض بارا الرهد النهود ام روابة الدلنج كادوقلي بانتيو تندلتي كوستي ربك الدويم سنار مدني الحصايصا الكاملين الخرطوم القضارف الدبة --- بوست يشجع علي السياحة الداخلية
تسلم
| |
|
|
|
|
|
|
Re: مدن في السودان لم أقوم بزيارتها حتى الآن .. (Re: نادر النور آدم)
|
نادر
الحمد لله الواحد ومن خلال طبيعة عملو تمكن من زيارة أغلب مدن السودان
بدءً من حلفا دغيم حتي شرق الاستوائية وكادقلي والجنينة و والقضارف وحدودنا مع ارتريا
بس نفسي في سياحة خريفية في سهول البطانة وكثبان كردفان
اتمني وفي مثل هذه الايام عشوة كاربة في ( الله كريم ) قعدة في عنقريب والدعاش يضرب وريحة الشية
تسوي يا غربتي .
| |
|
|
|
|
|
|
Re: مدن في السودان لم أقوم بزيارتها حتى الآن .. (Re: نادر النور آدم)
|
الاخ نادر لك عاطر التحايا والحمد لله شفناك بعد غيبه... المدن الزرتها بدون ترتيب عطبره الدامر شندي الخرطوم الحصاحيصا رفاعه تمبول مدني سنار سنجه الدمازين الرصيرص القطينه ربك كوستي الابيض الدلنج
واتمني زيارة كسلا بورسودان جوبا مريدي جبل مره الدندر
بنصحك تزور الدلنج والابيض في هذه الايام والذ حاجه انك تبيت في السنجكايه في نص الطريق بينهم (كان زمان ممنوع العبور بعد المغرب)
| |
|
|
|
|
|
|
Re: مدن في السودان لم أقوم بزيارتها حتى الآن .. (Re: منتصرمحمد زكى)
|
بعد السلام والتحيه مولود بكرمه البلد زرت دنقلا الغابه الدبه كريمه مروى امدرمان درست فيها اكلت المرحله الثانويه فى نيالا زرت الفاشر مرتجلو كاس الضعين كتم عد الغنم (عد الفرسان حاليا) رهيد البردى كاس بابنوسه الابيض (الدوره المدرسيه 82 ) كوستى ربك السوكى كاج عبد الله بركات ود مدنى القضارف كسلا كنت داير اتزوج بنى عامريه بورتسودان (سكنت فى حى سلبونا وعملت فى التخليص) عطبره داير ازور اركويت وطوكر ووادى حلفا تحياتى
| |
|
|
|
|
|
|
Re: مدن في السودان لم أقوم بزيارتها حتى الآن .. (Re: خيرى بخيت خيرى)
|
لنادر التوم آدم ونصر الدين البشير أدعوكما لزيارة مدينتي أبو جبيهة الحُبَّاك ... مسواك الأراك... جنّة من هِنِى وجنة من هناك.
المواقيت: لو عاوزين الليمون والجوافة والطماطم والتبش والعيش ريف والعنكوليب: من أغسطس وحتى أكتوبر. لو عاوزين المنقة : من ديسمبر إلى مايو. لو دايرين الروب والسمن من يوليو وحتى سبتمبر.
لو كنت من هواة الصيد بأنواعه فالوقت المناسب بين نوفمبر ومارس. (الغزلان - دجاج الوادي - الحبارة - أبقار الوحش- النمر وغيرها)
ولو بتحبوا لحم الضان (الفريش) من السكين للصاج للصحن زورونا في دار أولاد حميد خلال الفترة من ديسمبر وحتى مايو في القرى. وفي الفترة من يوليو وحتى نوفمبر في فرقان العرب الرحل. الشرط الأساسي للزيارة هو أنك تكون مستعد تشرب ما بين 38-88 كباية شاي ما بين سادة وحليب في اليوم من طلوع الشمس وحتى صلاة العشاء. وألا ترفض شرب أي كوب شاي يقدم لك من التاسعة صباحاً وحتى التاسعة مساءً.
ما تسبب إحراج لأي زول يقدم ليك صحن أرز بالحليب والسمن بعد العشاء الدسم بلحم الضان. وإلا تكون تفّهت الرجل أمام رجالات الفريق.
الزيارة مفتوحة والترحيل بعربة نيسان باترول مكندشة بارد على حسابنا.
يا عبد المنعم المقابل: يا أستاذ معقول تمشي الرهد وأمروابة والدلنج وكادقلي وتندلتي وكوستي ما تمر علينا في أبو جبيهة؟ زعلانين منك حتى إشعار آخر.
الدعوة لكل المنابرة والمنبريات
| |
|
|
|
|
|
|
Re: مدن في السودان لم أقوم بزيارتها حتى الآن .. (Re: cantona_1)
|
Quote: اعشق قبائل المحس والدناقله والحلفاويين |
الاخ الحبيب هذه ليست قبائل فهذه دول كانت قبل التاريخ وهى ماعرف بدولة النوبة والله اعلم اما القبائل فامر اخر
فيما خص امر البوست شكرا اخى نادر المدن التى لم ازرها هى مدن الجنوب فقط للاسف عدا ذلك فلا تسال بحكم عمل والدى فى السكة حديد وبعامل الدراسة فى كلية المعلمات حيث كنا نقوم بزيارة المدن من اقصى الى ادنى البلاد كل معاهد التربية وكليات المعلمات كانت تفعل وكذا كلية الفنون وكذا معهد الموسيقى والمسرح للاسف هذه الخيوط انتفت لا اعرف من اى زمان لكنها انتفت تحياتى
| |
|
|
|
|
|
|
Re: مدن في السودان لم أقوم بزيارتها حتى الآن .. (Re: cantona_1)
|
كانتونا يا عمك
فعلاً ما ذكرته هنا هو عرف أهلي متكامل
ونحن أهل الريف والبداوة خير من يعرف هذه الأعراف المحلية
أتمنى من كل قلبي أن أزور تلك الديار العامرة
Quote: لو كنت من هواة الصيد بأنواعه فالوقت المناسب بين نوفمبر ومارس. (الغزلان - دجاج الوادي - الحبارة - أبقار الوحش- النمر وغيرها)
|
بس ... حا نكون عندك بإذن الله في السودان في هذه الفترة
| |
|
|
|
|
|
|
Re: مدن في السودان لم أقوم بزيارتها حتى الآن .. (Re: نادر النور آدم)
|
Quote: أتمنى أزور الكاملين |
نتشرف بيك يا أستاذ منتصر محمد زكي.. وحبابك مليار.. شرفت الديار.. نسعد نحنا أهلك في الكاملين بزيارتك.. حباب الدارنا والزارنا.. وحباب الزارنا في دارنا..
يا سيد البوست..
Quote: ياخي الكاملين دي من عندنا جدعة بس اعتبر نفسك معزوم في أول فرصة متاحة ليك |
بس بقول ليك بطل السلبطة.. وحبابك انت ذااااتك في الكاملين..
| |
|
|
|
|
|
|
Re: مدن في السودان لم أقوم بزيارتها حتى الآن .. (Re: أيمن دياب)
|
Quote: بس ... حا نكون عندك بإذن الله في السودان في هذه الفترة |
الأستاذ ناذر التوم مرحب بيك وحبابك عشرة بلا كشرة. وكمان حنوديك مناطق إنتاج الصمغ العربي. حيث يمكنك جنيه وأكله فريش ولو أضفت له قليلاً من السكر (يعني تكون شايل ليك صرة سكر في جيبك) تكون أكلت ألذ وأطعم حلوى في الدنيا.
الدعوة للجميع
| |
|
|
|
|
|
|
Re: مدن في السودان لم أقوم بزيارتها حتى الآن .. (Re: نادر النور آدم)
|
يانادر سلبطة.. ياخي نسيت أقول ليك إنو شفت أم روابة في سنة 1980 وكنت في السادسة من عمري.. درست فيها أولى ابتدائي.. ولي فيها ذكريات لا تغيب عن ذاكرتي أبداً.. سوق الروب.. والسينما.. ونادي الهلال.. والسوق.. شارع بيتنا كان يفتح على (خور) كبير جداً.. أم روابة أجمل مدينة.. وأحلى ناس.. أتمنى أزور أم روابة مرة أخرى.. واستعيد ذكريات بعد ثلاثين عاماً من الغياب..
| |
|
|
|
|
|
|
Re: مدن في السودان لم أقوم بزيارتها حتى الآن .. (Re: محمد عبد الماجد الصايم)
|
نادر النور انا أحب السفر موت زرت شمالا حتى حلفا وشرقا حتى كسلا وبورتسودان وعلى النيل الأبيض جنوبا حتى كوستي وعدد مقدر من مدن الجزيرة والنيل الأزرق وفي الجنوب جوبا والكثير من مدن الاستوائية في الغرب للأسف لم اتشرف بزيارة أي مدينة عايز أزور الفاشر ونيالا ورهيد البردي وأم روابة والأبيض ودعوة كانتونـــــــا مقبولة مع وقف التنفيذ كمان عايز أزور الروصيرص والفاو
| |
|
|
|
|
|
|
Re: مدن في السودان لم أقوم بزيارتها حتى الآن .. (Re: نادر النور آدم)
|
يا جعفر محي الدين يا إبني إنت قايل أبو جبيهة دي وين ... تفطر كوستي تتغدى أبو جبيهة وتحلي بالمنقة وترجع تنوم في كوستي.
Quote: عمكـ كانتونا دقس معاي! ما عارفنا بتاعين ديسمبر؟ |
يا محمد الصايم ياتو ديسمبر في الديسمبرات... تعال طوالي مرحب بيك .. نوديك الصيد بس يكون معاك بندقية خرطوش لو ما بتعرف تستعمل الكلاشينيكوف والجيم 3.
(العوج راي والعديل راي)
| |
|
|
|
|
|
|
Re: مدن في السودان لم أقوم بزيارتها حتى الآن .. (Re: نادر النور آدم)
|
Quote: الموضوع كلو بعتمد على مزاج الكفيل في حال تقديم طلب الإجازة |
يا محمد الصائم ونادر ما عرفت الكفيل دا شنو؟ تكونوا قاصدين الكفيف بس الفاء قلبتوها لام؟
أنا السعودية مشيت ليها زيارة وحج وعمرة وبس. عشان كدا اشرحوا لينا عشان نجهز الإجازة كويس.
(العوج راي والعديل راي)
| |
|
|
|
|
|
|
Re: مدن في السودان لم أقوم بزيارتها حتى الآن .. (Re: cantona_1)
|
نادر يا اخوي ازيك
والله كلامك جاني في جرح يعلم الله
انا طبعا زول خرطوم ساااي وما لفيت في البلد كتيرسافرت مرتين بورسودان بالخط القديم والجديد يعني مرور ساي ويعلم الله كنت بخطط السنة الجاية الواحد يمشي الاجازة بعربية عشان يلف السودان دا بلد بلد وخاصة في الخريف وكلام اخونا كانتونا ده شهانا ابو جبيهة وماجاورها
اكان كدي يا زول بنجيك تب
في الخاطر زيارة
الابيض في الخريف
حلفا القديمة بالقطر
الدمازين بعد الخريف
تسلم يا حبيب
| |
|
|
|
|
|
|
Re: مدن في السودان لم أقوم بزيارتها حتى الآن .. (Re: نادر النور آدم)
|
نادر تحياتي
من وادي حلفا شمالا و حتى شندي جنوبا ، تقريبا زرت كل المدن و القرى الأمصار ( شرق و غرب النيل. ثم الحصاحيصا و مدني و القضارف ( و معظم قرى محلية المناقل ) ثم رفاعة و تمبول و حلفا الجديدة و كسلا و خششم القربة و سواكن و بورتسودان )
كم تمنيت أن أزور الفاشر و الأبيض و جوبا
حاشية : أحيانا أتحسر على عدم رؤية الأجيال الجديدة لمدينة وادي حلفا قبل غرقها تحت النيا .. فقد كانت مدينة حديثة تعيش في غير زمانها.
دمتم
| |
|
|
|
|
|
|
Re: مدن في السودان لم أقوم بزيارتها حتى الآن .. (Re: ابو جهينة)
|
Quote: من وادي حلفا شمالا و حتى شندي جنوبا ، تقريبا زرت كل المدن و القرى الأمصار ( شرق و غرب النيل. ثم الحصاحيصا و مدني و القضارف ( و معظم قرى محلية المناقل ) ثم رفاعة و تمبول و حلفا الجديدة و كسلا و خششم القربة و سواكن و بورتسودان )
|
تحيات يا ريس
وأهو رصيدك ما شاء الله فل
| |
|
|
|
|
|
|
Re: مدن في السودان لم أقوم بزيارتها حتى الآن .. (Re: نادر النور آدم)
|
كانتونا الكلس
يديك العافية وباذن الله نصلكم في الاجازة عشان كرمكم و منقتكم الرهيبة دي
اخونا نادر
Quote: ] والرحلة حتى الآن محجوز فيها مقعدين فقط (العبد لله وود الصائم)
لو كنت من ناس نوفمبر وديسمبر وما جاورها
نضيفك للكشف بتاع الرحلة المتجهة إلى ديار عمك كانتونا
|
نحنا ناس خريف سااااااااااااي ماناس ديسمبرات ورانا اجازات مدارس وكدا
تحياتي
| |
|
|
|
|
|
|
Re: مدن في السودان لم أقوم بزيارتها حتى الآن .. (Re: cantona_1)
|
وردتني اتصالات من أبناء القرير
تعقيباً على أمنيتي بزيارتها
حيث اتصل بي رئيس جمعية القرير بالرياض
ورئيس منتديات أبناء القرير من الجماهيرية الليبية
والأخ والعم/ مامان زميل البورد هنا
وأحد الشباب معنا هنا في الرياض (الجميلابي)
وكلهم يؤكدون لي الدعوة لزيارة المنطقة
وهذا يدل على أن إعجابي بتلك المنطقة وأهلها في محله تماماً
فهم أهل للكرم والترحاب
..
أود أن أرفع لهم صوت شكر من هذا الموقع
وأؤكد على أن مثل هؤلاء الرجال لا يوجدون إلا في السودان
ولا يكونون إلا سودانيون
فالتحية لهم
| |
|
|
|
|
|
|
|