حنة عواطف .. صاحبها الفاتح جبرا ( صدر تحت توقيعي)

Quote: حنة عواطف / دكتور عادل الصادق المكي "" سجيمان"" لقيتو قاعد جنب باب الشقة حقتو.. جنبو أنبوبة غاز.. متفن في واطة الله.. سلمت عليهو.. إزيك يا أخينا.. مالك قاعد هنا؟.. عاين لي.. وهو يأشر بإيدو للشقة.. وقال الشقة مقفولة وأنا ما عندي مفتاح.. المفتاح جوا.. أصلها عواطف قاعدة جوا.. لكن متحننة.. وما دايرة تقوم تحوم وتخرب حنتها.. قالت لي انتظر لحدي ما الحنة تشيل.. وأخرتها.. وبعدين أجي أفتح لك الباب.. أهه أنا حسي قاعد وراجي الحنة تشيل.. لكن يا جنى الحنة بتشيل في كم ساعة؟.. عاينت ليهو.. وحقيقة شفقت على هذا الزوج الأليف.. الوديع.. الذي أبدع الفكي بتاع عواطف.. في أن يخلق منه نعجة.. وقلت ليهو.. والله يا أخينا شيل الحنة ومدتو بيعتمد على عوامل كتيرة.. لكن أهمها.. نوع الحنة.. نوع المحلبية أو الصبغة.. وأهم حاجة كرعين المرا المتحننة.. كل ما كانن ناعمات.. الملمس.. كل ما كانت المدة أطول.. وبرضو بتعتمد إذا كانت الحنة منقوشة.. ولاّ.. مفروشة ومجلوطة ساكت.. وبرضو طبقات الحنة.. ليها دور.. انتهيت من نضمي وعاينت ليه.. لقيتو الهم باين على وشيهو.. وعلى وشك أن يذرف الدمع السخين.. قال لي.. تعرف الحنة نمرة واحد جايانا مخصوص من الدامر.. والمحلبية ميسو الأصلية.. ما قاعدة تستعمل صبغة عندها حساسية الله يحفظها من عين الناس.. وبطن كرعين عواطف صلاتي على النبي.. جضوم ليلى علوي وداخلات في سفنجة.. يعني بي نضمك دا حنتها عشان تشيل دايرة لها تلاتة ساعات.. وأنا ماشي الشغل.. كيف الحل؟.. قلت ليهو.. طيب يا أخي كلمها.. وخليها تفرتق الحنة وتقوم تفتح لك الباب.. عاين لي وبانزعاج وغضب.. نهرني لمن نطيت.. يا زول إنت ماك نصيح..؟ داير حنتها تخرب.. وتطلع شينة.. والنسوان يقعدن يقارصن ويتونسن فيها؟.. يا أخوي كل شيء ولا زعل عطوفتي دي.. إن شاء الله يرفدوني.. بس هي حنتها تطلع سمحة.. واتلفت على باب الشقة وقعد يكورك.. يا عواطف.. عواطف.. ما شالت؟.. وجاء صوت من الداخل.. وكأنو صوت عسكري في الحركة.. وبحدة شديدة.. قالت ليهو.. ما قلنا لك لسه.. كرهتني الحنة ذاتها يا أخي.. زولي هنا.. قعد يبلع في ريقو.. ويضاحك.. وعاين لي وقال.. والله.. الله يهديها بس.. عصبية خلاص.. إلا طيبة.. والله.. وحنينة.. لملمت بعضي.. ونزلت وأنا ما مشيت تلاتة خطوات إلا وأسمع أخونا يغني.. ويدندن الزول السمح... فات الكبار والقدرو