|
|
 فوائد الماء الذي يقدم مع القهوة
|
ناس الطبقة المتوسطة والطبقات العليا والطبقة المستنيرة ومن لف لفهم أول ما تجيهم يقوموا يقدموا ليك مع القهوة كباية موية ساقطه ، أها قدر ما فتشت وسعلت ما عرفت السبب. أها عندنا ود عماً لينا صايع بالبنادر والمدن الكبري وما وراء البحار ، يوم كده لقيتو في بيت عرس في الحلة قلت ليهو إنت يا الطيب كدي أقيف لي النسعلك "هو قطعاً كان واقف ولم يكن متحرك" لكنها على ما أظن محاولة لأخذ أو إنتزاع كامل إهتمامه بسؤالي ، الراجل كالعهد به قال لي إتفضل أسأل ، قلت ليهو شنو حكاية الموية البجيبوها الناس مع فنجان القهوة في البنادر.
قال لي طبعاً الموضوع له فوائد يعني ما حاجه كده إعتباط ، في ناس بشربوا كباية الموية ششششوطك قبل القهوة وفي ناس لغاية ما يكملوا القهوة يقوموا يحبسوا بي كباية الموية ، والطريقتين ليهم فوائد كبيرة. فالذي يشرب الموية قبل القهوة بكون بطريقة غير مباشرة عمل عملية تساعد على تخفيف تركيز الكافيين.
والبشرب الموية بعد القهوة دا كما بيكون ساعد على ازالة أو تخفيف اللون الذي قد يعلق على الأسنان ، وأيضاً تخفيف تركيز الرواسب التي تترسب في الكلى والناتجة عن القهوة وتساعد على عدم منع جفاف الجلد وتمنع تكوين الحصى في الكلى.
فكرت ملياً بعد أن شكرته وقلت في نفسي والله زمان قايلها فلهمة ناس بندر ساكت أتاري الحكاية لها ما يبررها. وبالرغم من إننا نشربها بكرى وتنى وتلتاوى إلا أنه لم يحدث أن جابت ست البنات كوز موية ساكت طوال سنين إعدادها للقهوة وإرتباطها بحضرتنا ، ووحات خوتكم المنبرية عشان أصل الزير لو عاوز أشرب إلا أجيب لي ركشه لطول المسافة بين الراكوبة حيث الجبنة والمزيرة.
|
|
 
|
|
|
|
|
| العنوان |
الكاتب |
Date |
| فوائد الماء الذي يقدم مع القهوة | almulaomar | 07-12-10, 07:59 AM |
| Re: فوائد الماء الذي يقدم مع القهوة | humida | 07-12-10, 08:24 AM |
| Re: فوائد الماء الذي يقدم مع القهوة | omer osman | 07-12-10, 08:29 AM |
| Re: فوائد الماء الذي يقدم مع القهوة | almulaomar | 07-12-10, 10:06 AM |
| Re: فوائد الماء الذي يقدم مع القهوة | almulaomar | 07-12-10, 09:02 AM |
| Re: فوائد الماء الذي يقدم مع القهوة | عبدالعزيز حسين عبدالرحيم | 07-12-10, 10:37 AM |
| Re: فوائد الماء الذي يقدم مع القهوة | عبدالعزيز حسين عبدالرحيم | 07-12-10, 11:08 AM |
| Re: فوائد الماء الذي يقدم مع القهوة | almulaomar | 07-12-10, 11:25 AM |
| Re: فوائد الماء الذي يقدم مع القهوة | فايزودالقاضي | 07-12-10, 11:25 AM |
| Re: فوائد الماء الذي يقدم مع القهوة | عبدالعزيز حسين عبدالرحيم | 07-12-10, 11:56 AM |
| Re: فوائد الماء الذي يقدم مع القهوة | almulaomar | 07-12-10, 02:11 PM |
| Re: فوائد الماء الذي يقدم مع القهوة | almulaomar | 07-12-10, 01:39 PM |
|
| |
almulaomar
فيس بوك
تويتر
انستقرام
يوتيوب
بنتيريست