|
Re: كيف تصنع تورتة بالشيكولاته (Re: Amira Elsheikh)
|
اصالة عن نفسي ونيابة عن حليم ارحب بالاخ الانسان النساي ياسر طيفور الشهير بـ أبو تفه كما أطلب نفس الاغنية الطلبتا اميرة الشيك .
وبعد نرجوا من الناس الالتزام والتقيد بمحورين البوست علي الاقل بمناسبة الصفحة الجديدة
| |
|
|
|
|
|
|
Re: كيف تصنع تورتة بالشيكولاته (Re: Amira Elsheikh)
|
يا ياسر : البدري و لابورتا و شخصيه جديده اسمها (حسبو عكاشه ) عباره عن شخصيات إسفيريه وهميه لا وجود لها علي أرض الواقع من تاليف اميره الشيخ : الاثباتات و الدلايل و إعترافات اميره كلو بطرفنا !! و تعرف مافي حاجه مؤلماني في الموضوع ده كلو غير الدور القمئ اللعبو خضر حسين في إثبات وجود لابورتا علي أرض الواقع مجاملة لاميره . الكلام كتيييير يا ياسر و ناس كتاااار يدينا ملطخه بالمؤامره : و كلو بوقتو !!!
| |
|
|
|
|
|
|
Re: كيف تصنع تورتة بالشيكولاته (Re: خضر حسين خليل)
|
Quote: و تعرف مافي حاجه مؤلماني في الموضوع ده كلو غير الدورred] القمئ اللعبو خضر حسين في إثبات وجود لابورتا علي أرض الواقع مجاملة لاميره . |
قمئ بالقا
خضر بالخا
حليم بالحا
باصويرد بالشيكولاتة,,,,[
| |
|
|
|
|
|
|
Re: كيف تصنع تورتة بالشيكولاته (Re: خضر حسين خليل)
|
Quote: يا ياسر : البدري و لابورتا و شخصيه جديده اسمها (حسبو عكاشه ) عباره عن شخصيات إسفيريه وهميه لا وجود لها علي أرض الواقع من تاليف اميره الشيخ : الاثباتات و الدلايل و إعترافات اميره كلو بطرفنا |
وده يا ياسر بعد لقائها بالسيد الصادق المهدى مباشرة > وعندنا شهود
.....
يا خضر
Quote: الله يعمل ليكي جنينة كلها موز وفانيليا |
جنينة بال ك و فانيليا بال م
: : :
بوست شعرية بالقسطنطين
| |
|
|
|
|
|
|
Re: كيف تصنع تورتة بالشيكولاته (Re: أمين محمد سليمان)
|
Quote: وبعد نرجوا من الناس الالتزام والتقيد بمحورين البوست علي الاقل بمناسبة الصفحة الجديدة |
يا زول هوي لابورتا طلع من (عارضي أزياء ) أفكار اميره و إنت ساعدتها في تمرير الأكاذيب !! قال سوق سته قال !!
| |
|
|
|
|
|
|
Re: كيف تصنع تورتة بالشيكولاته (Re: أمين محمد سليمان)
|
أثني اقتراح المخضرم خضر بالالتزام ب
Quote: المسار الاول : قصة حليم المسار التاني : قصة الشيكولاتة
|
وذلك درءا" للشبهات
Quote: الود مورتا ده بالطريقة دي بيبقى عارض أزياء.. |
------------------------------------------- ياسر طيفور .... حمدالله على السلامة
| |
|
|
|
|
|
|
Re: كيف تصنع تورتة بالشيكولاته (Re: Amira Elsheikh)
|
Quote: النبى فيك ياامين ياسمين تسمع اغنية شوكلاطة دى
|
سمعتها يا اميره و إتحيرت تماما !! ما عايز أزيد الغم في بوستك التعيس ده ، لكن الناس ديل are making fun of us عديل كده (التوب و الجلابيه و بوركينا فاسو ) غايتو شكلها جزء من فلم لكن الغنينه stand alone براها كده : عنصريه لمن بيغادي !!
| |
|
|
|
|
|
|
Re: كيف تصنع تورتة بالشيكولاته (Re: أمين محمد سليمان)
|
والذي نفس محمد بيده مشينا حفلة في حلتنا انا والاسرة الكريمة ومعانا حليم برضو المهم في نص الحفلة الفنان الاول قدم الفنان التاني المهم الزول ده غني غنية واحده بداها بالضبط عشرة وخمسة وانتهت الساعة حداشر شوكة بتوقيت جنوب الخرطوم ـ المحيرني في الحفلة دي كلها انو كلمات الملحمة دي كانت كالاتي اي اي اي مشينا شندي (العريس بالمناسبة من كسلا) اي اي اي شندي حلوة اي اي اي خالد عشمنا (العريس بالمناسبة برضو اسمو نادر) اي اي اي المهم لما الفنان حسا (حسع ولا بعدين) المهم لما حسا انو مافي تجاوب من الجمهور الكريم قال كلاكلات يا القطعية يا القبة يا صنقعت يا اللفة يا القلعة يا المنورة يا الوحده يا
المهم اولاد حلتنا يعجبوكم في المساخة زول هبب ليهو مافي شبكنا ليك طوالي اي اي اي يا انتو مالكم سكتو اي اي اي الصفقة الصفقة
لحدي ما ربك رب الخير جاب الساعة حداشر العايز اعرفوا هسي العرسان ديل بجيبوا الفنانين ديل من وين ؟ والفنان ده زاتو جاب كلمات الملحمة دي من وين ؟ والله الزول ده انتهي مننا خالص خالص ـ غايتو بيت مال وعيال يانادر لكن اتجابنت معانا والله ايما جبن ؟
| |
|
|
|
|
|
|
Re: كيف تصنع تورتة بالشيكولاته (Re: أمين محمد سليمان)
|
Quote: نرجوا من الناس الالتزام والتقيد بمحورين البوست علي الاقل بمناسبة الصفحة الجديدة |
في الوقت الحالي عندي محورين في البوست ده ، كان الله مد في العمر حا أقدم فيهو ورقتين : - الأولي عن شخصيات اميره الوهميه العامله لينا كركبه و ضبابين إسفيريه . - و التانيه عن الشخصيات الخلت المكان ده (الطريفي و ندي عثمان حسن مثالا ) بسبب اميره و ضبابينها الأسفيريه المذكوره . !
| |
|
|
|
|
|
|
Re: كيف تصنع تورتة بالشيكولاته (Re: أمين محمد سليمان)
|
Quote: طيب كنتو بترقصوا علي انغام شنو مثلاً؟
|
كنا بنرقص علي دقات قلوبنا !!
بمناسبة عمو أمين دي يا خضر : يومديك واحد من أعضاء المنبر المحترمين - اللي ما حصل بينا أي تداخل قبل كده عشان أقول بيهزر - رسل لي ماسنجر و أخرو كاتب لي فيه : ابنكم فلان الفلاني ! و الذ منو عصام جبر الله - قدامي في الجامعه بدفعتين - و شابكني يا خال !! عملتو لينا سمعه ، الواحد كان داير يعرس تاني ما يلقي طريقه معاكم !!!
| |
|
|
|
|
|
|
Re: كيف تصنع تورتة بالشيكولاته (Re: أمين محمد سليمان)
|
الكلام ده كتبتو قبل فتره ، كدي خلي يجي زول يقول لي سرقه أدبيه بالواو و العين !!
وكان يوماً خالصاً من أيام الله توافدت وقوم آخرين لنشهد تدشين الحملة الإنتخابية للحزب الشيوعي السوداني ، ذهبت وفي البال جملة أشواق ناس من كل الأجناس ، بنات وأولاد ، عمات وخالات ، أعمام وخيلان تشققت الأرض هذا المساء فخرج القوم من كل فج عميق !
المركبات العامة والخاصة كانت تحمل صور رمز الثورة السودانية وحكيمها الآن يجلس نقد علي قلوب الناس (حباً وكرامة) بتضحياته ونكران ذاته بصموده وعزمه الذي لايلين بسنوات عمره التي قضاه ما بين المنفي والمنفي ناشداً في حله وترحاله سعاده شعبه حاملاً قضيته بجسارة يحسد عليها
جاءت المدن تباعاً كانت أمدرمان بكل تاريخها النضالي الطويل حضوراً ، جاءت بحري ، الخرطوم ، زقلونا ، جبرونا، مايو، عيد حسين ، الثورات ، أمبدات ، الكلاكلات . ببساطة جاء صناع الحياة ليضيفوا لنكهة هذه المدينة الناعسة بعض بهار إفتقدتها الخراطيم طويلا .
تذكرت طارق الأمين إذ يقول :
ناس من كل لون إتعمرت أنسابا والنيل في الهجير دوزن وتر أعصابا
لا أدري لماذا لكن المؤكد أن المشهد كان كذلك تماماً كما قال طارق !
علي فضل لم يكن غائباً في تدشين الحزب الشيوعي دشن الشيوعيين حملتهم من أمام المنزل الذي قضي فيه علينا الفضل أجمل سني عمره فكان المشهد حاراً وصادقاً .....
دموع للحاضرين ضجت زغاريد غطت الدنيا وعاد فرح الرجوع منية
توسطت الخلفية الرئيسية للمسرح صورة عميقة للأستاذ نقد لاتدري فيم يفكر غير أنه غارق في تفكير عميق وحزن أعمق يشع من عينيه . جاء خطابه منسجماً مع الصورة عميقاً ومرتباً وأنيقاً كذات أناقة جلبابه ناصع البياض . زغردت النساء وأدمت الرجال أكفها تصفيقاً والرجل يتقدم بسنوات كدحه ونضاله للمنصة الرئيسية . كان العسيلات يتحدث بطريقة تدمي القلب عن الرجل ونضالاته عن صموده في وجه الريح عن وعن وعن
كان العسيلات يتحدث عن المواطن السوداني ودالبلد محمد ابراهيم نقد
غادرت المكان وأسئلة الدنيا والعالمين تلاحقني عن أي ناس هم هؤلاء الشيوعيين السودانيين وأي محبة يحملوها للأرض غادرت وأنا مليئ وممتن لهذا المساء الطيب ولهذا الشعب الجميل الذي يقتل ولايموت . نظرت خلفي لأري العمائم كأشجار التبلدي والنساء كغابات الأبنوس فارعات مجدات حالمات أنيقات جميعهم يغادرون أرض العلمين بعد أن غرسوا في ترابها أصدق جنين يخلق في أرض الثورات .
| |
|
|
|
|
|
|
Re: كيف تصنع تورتة بالشيكولاته (Re: أمين محمد سليمان)
|
Quote: غادرت المكان وأسئلة الدنيا والعالمين تلاحقني عن أي ناس هم هؤلاء الشيوعيين السودانيين وأي محبة يحملوها للأرض غادرت وأنا مليئ وممتن لهذا المساء الطيب ولهذا الشعب الجميل الذي يقتل ولايموت . نظرت خلفي لأري العمائم كأشجار التبلدي والنساء كغابات الأبنوس فارعات مجدات حالمات أنيقات جميعهم يغادرون أرض العلمين بعد أن غرسوا في ترابها أصدق جنين يخلق في أرض الثورات |
غنيناك وبنغني ونتحدي الزمن فنان
كلامك باب وكتاب يا امين
| |
|
|
|
|
|
|
Re: كيف تصنع تورتة بالشيكولاته (Re: خضر حسين خليل)
|
Quote: ويسألونك عن الأسود
ما إن نلتقي حتي يحدثني عن البازنجان كأرخص خدار في تاريخ السودان الحديث . تزوجوا فقراء يغنيكم الله تزوجوا فقراء وسيقف البازنجان الي جانبكم ما أن يخرج من منزله بإتجاه السوق الكبير حتي يقرر (حليم) شراء كم كيلو من الأسود ، لا تمسكاً بنظرية (القيمة الغذائية) بل إمتثالاً لحكمة (الجيب) . وهو محق في ذلك إذ أن كيلو البازنجان لن يكلفه علي الإطلاق أكثر من جنيهين إضافة لتعدد إستخدامه شئ بالتقلية وشئ بالروب وشئ مسقع وشئ مسلوق وشئ بالليمون وشئ بالكمون وإن تيسر الحال محشي ، لذا كانت وصيته لكل أصدقائه الذين قرروا الدخول في شرك الحياة الزوجية ومطالبها التي لا تنتهي علي الإطلاق . كانت ليلة نادرة من ليالي خرطوم الهزيمة ليلة فرح إستثنائية مرد ذلك دخول صديق عزيز لعش الزوجية أو وكر (المطالب) أيهما أنسب . تقدمنا (حليم) بحكم السن ونظارته المقعرة التي ساهمت وقبيل أن يتم تعيينه بإحدي المؤسسات الحكومية في إحالته للصالح العام بفضل ذات العدسات المقعرة ليحتل مقعده في صفوف من يعرفون بأرباب المعاشات . المهم أنه تقدمنا ترافقه حرمه المصون لتقديم التهاني والتبريكات لصديقنا المشترك ، كان يمشي بذات الطريقة الدراماتيكية التي عرفناه بها طوال الأيام التي جمعتنا في سني حياتنا الطالبية ، غير أن الفارق هنا أنه يمسك بذراع شريكة حياته ، وبطريقته الخاصة يشق جموع المهنئين مستخدماً في ذلك صوتاً لا يخالجك شك أنه صادر من رجل في خريف العمر . لو سمحتوا يا عيالي وسعوا السكة شوية لي عمكم يا بتي لو سمحتي شوية وهكذا الي أن ينتقل بنا لنكون مباشرةً أمام صديقنا (العريس) الذي بدوره قفز ناهضاً بطريقة لا علاقة لها ببروتكولات الأعراس . يخيل اليك الشاهد لمنظرنا يومئذ أن (العريس) وأصدقائه قوم زاهدون في الحياة لم يشتغلوا بالمعازيم الشغلة فتسالموا وتحاضنوا وتناضموا كل علي طريقته ولكأنهم في زقاق من أزقة الجامعة أو بيت من بيوت العزابة بسيطة الحال . ما إن إنتهي الحفل حتي تقدم (حليم) ناحية العريس لينقل إليه وصيته وهو القادم الجديد لمعترك حياته الجديدة والتي فضلها علي ليالي الأنس وضحكات الرفاق ومواويل العاشقين ما إن يليل ليل البلاد . قال بصوتٍ خفيض : شوف الناس ديل كلهم ما في زول فيهم حيقول ليك النصيحة ، المسألة الإنتا غطست فيها دي ما بحلك منو الا (البتنجان) كان يتحدث بثقة مفرطة وبيقين ما بعده ثانٍ . والله البتنجان ده بس ربنا يخليهو لينا لو ما هو حالنا كان انشال بدري تمشي السوق من دربك ده وإشتري ليك كم كيلو كدة تقزقز بيهم في شهر العسل . إنفجر الحضور ضاحكين وما دروا علي الإطلاق حكمة الرجل . هاتفني ياسر منذ أيام من السوق المركزي كان صوته يأتيني عميقاً من بين أصواتٍ شتي أصوات الباعة المتجولون والمتجولون والمتجولات والمتجولون ساي سألته عن الجوطة التي حوله . إنقطع الخط فجأةً بيننا عاد وإتصل بي مرةً أخري قائلاً : جيت السوق إشتري خدار الأسبوع ، الطماطم ما بتتهبش ، البطاطس خلي ساي ، الـ.... والـ وجد لكل ما تنتجه الأرض السودانية مخرجاً لجيبه سوي الأسود كيف لا وهي وصية صديقنا الأزلي (حليم) . عاد (ياسر) حاملاً معه قفة معتبرة أسها وأساسها (البازنجان) . حينما دلف لمنزله هرعت صغيرته ممنيةً نفسها بأي شئ سوي المذكور أعلاه . غير أنها سرعان عادت لتتقول ببراءتها المعذبة : تاني يا بابا ؟ ما أن يرن هاتفي حتي يأتيني صوته مملوءاً بضحكته الأليفة وهو يقول : عارف يا خضر والله بي صراحة لو ما (حليم) ده أنا بيتي كان إنخرب . لكم بسيطة أمنياتنا يا صاحبي لكم يا ياسر
لكم ...! |
ـــــــ كان تعرفوا يا امين
| |
|
|
|
|
|
|
Re: كيف تصنع تورتة بالشيكولاته (Re: خضر حسين خليل)
|
Quote: ما إن نلتقي حتي يحدثني عن البازنجان كأرخص خدار في تاريخ السودان الحديث . تزوجوا فقراء يغنيكم الله تزوجوا فقراء وسيقف البازنجان الي جانبكم |
Quote: عاد (ياسر) حاملاً معه قفة معتبرة أسها وأساسها (البازنجان) . حينما دلف لمنزله هرعت صغيرته ممنيةً نفسها بأي شئ سوي المذكور أعلاه . غير أنها سرعان عادت لتتقول ببراءتها المعذبة : تاني يا بابا ؟ |
| |
|
|
|
|
|
|
Re: كيف تصنع تورتة بالشيكولاته (Re: مرتضى احمد عبد القادر)
|
شفتها في كافتيريا الكليه لاول مره ، في نفس اللحظه ماتت كل نساء العالم في قلبي !!!
هكذا أخبر حليم صديقه خضر و هم يتعاطون مخدر الشاشمندي عند زيارتهم للقضارف لحضور زواج صديقهم النور :
- عليك الله يا حليم جليني من الكلام ده لانو ده والله ما وقتو و جنس كلامك ده بيفشل القعده كلها و تعريفه ما عندنا نجيب بيها زياده ....... و بعدين ياخي إنت قلبك ده ما بفتر : كل يوم واحده جديده ؟ - دي مختلفه يا خصر !! - مختلفه مالها ؟! بتمشي حركة وراء ؟ ثم تبعها خضر بضحكه مجلجله اهتز لها عمك شاشمندي في قبره !!!
| |
|
|
|
|
|
|
Re: كيف تصنع تورتة بالشيكولاته (Re: أمين محمد سليمان)
|
لاكثر من اربعه شهور لم يكن لحليم أي كلام سوي ( علا ) و لما كان خضر هو صديق حليم الوحيد كان معظم هذا الكلام لا يذهب أبعد من الاذن الوسطي لخضر : قله قليله كانت تتفلت لتتعلق بخلايا الأدراك .
شهور عددا ، و لا سيره لحليم إلا علا و مع ذلك لم ينتبه خضر لجدية المساله إلا بعد زمنا زمين !! أدرك خضر أن صديقه في حاجه حقيقيه للمساعده : - إنت الزوله دي اتكلمت معاها ولا بتقعد النهار تعاين ليها و تجي تطلع د...... أنا الليل كلو ؟! - اتكلمت معاها مره واحده عن طريق صديقه مشتركه ، سلمت عليها في يدها و كان ما خجلت كنت قطعت يدي و لبستها سلسل !! ....قاطعه خضر قبل أن يسترسل : - هي دفعتكم ؟ - آي دفعتنا ، ياخي إنت معناته ما كنت خاتي بالك لكلامي كلو كلو !! - أنا أخت بالي ليك و لا للسم البنطفح فيه اليوم كلو ده ؟ من وين هي . من الخرطوم ولا من الأقاليم ؟ - من الخرطوم و ساكنه في الرياض كمان !! - ساكنه وين ؟!! قالها خضر و إنتصب واقفا - ساكنه في الرياض قلت ليك !! - يا زول إنت جادي ؟! ثم تبعها بسيل من الشتائم (نصها عربي و نصها رطانه ) - يا زول إنت زعلان كده ليه ؟ - زعلان علي وقتي الضيعتو مصاحب لي فاره زيك ، بالله شوف الحلبي ال......... ثم أعاد خضر نفس فاصل الشتايم ال (نصها عربي و نصها رطانه ) و بنفس الترتيب !! إنت يا حليم قايل رقبتك عبدالحليم حافظ ولا شنو ؟ من ما الله خلقك سمعت ليك بزول من الكلاكله مجكس من الرياض ؟ - ........... - ياخي إنت بيتكم الخريف الفات لو ما شفع الحله كانو بمرقوكم بلساتك العربات كان تكونو لحدي حسي محبوسين !!! تقول لي الرياض ؟!! غايتو كان يوم عايز تعزمها عشاء إلا نعمل ليك كشف من صنقعت و إنت جاي !!!
أخرج خضر كيس السعوط و أفرغ نصفه في فمه تاركا مهمة توزيع (السفه ) للسانه السليط ، و من ثم واصل تهكمه الغاضب : - ياخي إنت قاعد معاي شهرين ما قادر تخش حلتكم من الديانه ، تقول لي الرياض ؟ الرياض بالباء ؟!! -............... - بعدين ما تعتمد علي وجاهتك المزعومه دي ، ناس الرياض ديل كان ما عنك قروش إلا تمشي ليهم زيارات !!! الرياض ؟ الرياض يا أرنب !!! أمضي خضر باقي الليل تهكما و إنفعالا حتي مات الكلام في شفتيه و نام علي كرسيه !!
| |
|
|
|
|
|
|
Re: كيف تصنع تورتة بالشيكولاته (Re: أمين محمد سليمان)
|
Quote: يا لابورتا جيت قطعت لي أفكاري و نفشت لي قصتي كلها ، ياخي أمشي أفتح ليك بوست تاني رد بيه علي الناس دي ، ما لقيت ليك حته تنحشر فيها غير في نص قصتي دي ؟ |
ههههههههههههههههههه هي ما إنتهت يعني !!؟
البوست دا مسكون يا عمك ولا شنو ؟؟ جا الربع الجديد براهو فجاءة بجي القى عشرة وتلتين مداخله جديده وناس كتار بيتكلمو عن حرية التعبير وتنصيب الأمير والضمير ومحاور البوست أسي عليك الله دا بوست داير ليهو محاور
| |
|
|
|
|
|
|
Re: كيف تصنع تورتة بالشيكولاته (Re: مرتضى احمد عبد القادر)
|
Quote: محور إنساني حليم ليس له ذنب في المغارز الحاصله دي
|
المغارز الحاصله دي كلها عاملها حليم ، تقول لي ما عندو ذنب !!
Quote: محور مستبصر في إتفاق سري تم بين خضر و عمو أمين |
والله و تالله و بالله لم اتفق مع خضر و لا ينبغي لي : خضر شيوعي و أنا امبريالي عتيق : لا أؤمن باقتسام الثروه بين طبقات المجتمع و لا أؤمن بسيطرة الحكومات علي وسائل الإنتاج !!! أنا برجوازي كبير يا لابورتا فاني لي الاتفاق مع خضر ؟
| |
|
|
|
|
|
|
Re: كيف تصنع تورتة بالشيكولاته (Re: أمين محمد سليمان)
|
Quote: البوست دا مسكون يا عمك ولا شنو ؟؟ جا الربع الجديد براهو فجاءة بجي القى عشرة وتلتين مداخله جديده وناس كتار بيتكلمو عن حرية التعبير وتنصيب الأمير والضمير ومحاور البوست أسي عليك الله دا بوست داير ليهو محاور |
البوست ده بقي منطقه محرره !! و قد أعلن في ختامو امارتي للقصه القصيره في السودان !! ما عارف لو حا أتم قصة (حليم الملتاع ) الليله ولا لا ، عندي نزلة حر بالاني بل ما إعتيادي : و نزلة الحر هي الأخت غير الشقيقه للاخ ك ل ب الحر و هم أبناء عمك الحر أحد أكبر مشاكل السودان الشقيق .
و النزله- سوي كانت نزلة حر أو برد - واحده من الحاجات المحيراني في دنيتي دي واحده من أسباب ايماني الصمدي إنو شركات الأدويه أو ما يعرف في الشقيقه أمريكا بال Pharmaceutical industry عندهم مصلحه و يدين و كرعين في مسالة عدم وجود دواء ناجع للنزله : ما قادر استوعب إنو الخواجه - حقنا بالذات ما بتاع أوروبا - ما قادر يخترع ليه عقار يعالج النزله و ليس أعراضها.؟ كمية الأدويه المختلفه لمعالجة أعراض النزله و الأنفلونزا و البرد و ما يصرف عليهم هنا قد تكون أكبر من ميزانية الدول الأفريقيه مجتمعه ، يبقي مافي زول عندو مصلحه يخترع ليه دواء للنزله و بالتالي مافي طريقة علاج لي انصاص الليلي مما يغلب الظن بان قصة الملتاع لن تتم الليله !!
| |
|
|
|
|
|
|
Re: كيف تصنع تورتة بالشيكولاته (Re: أمين محمد سليمان)
|
Quote: نزلة الحر هي الأخت غير الشقيقه للاخ ك ل ب الحر و هم أبناء عمك الحر أحد أكبر مشاكل السودان الشقيق .
|
عمنا الضباح ضبحنا بقصة الشليخ دي ، شنو يعني كلمه زي كلمة (ك ل ب ) و زيها مئات الكلمات الما بذئيه تتشخلخ في وضح النهار و بدون سبب ؟!! يا بكري رجاء : أوقف هذا العبث !!!
| |
|
|
|
|
|
|
Re: كيف تصنع تورتة بالشيكولاته (Re: عمر التوم)
|
Quote: شفتها في كافتيريا الكليه لاول مره ، في نفس اللحظه ماتت كل نساء العالم في قلبي !!!
هكذا أخبر حليم صديقه خضر و هم يتعاطون مخدر الشاشمندي عند زيارتهم للقضارف لحضور زواج صديقهم النور :
- عليك الله يا حليم جليني من الكلام ده لانو ده والله ما وقتو و جنس كلامك ده بيفشل القعده كلها و تعريفه ما عندنا نجيب بيها زياده ....... و بعدين ياخي إنت قلبك ده ما بفتر : كل يوم واحده جديده ؟ - دي مختلفه يا خصر !! - مختلفه مالها ؟! بتمشي حركة وراء ؟ ثم تبعها خضر بضحكه مجلجله اهتز لها عمك شاشمندي في قبره !!! |
العم أمين تحياتي واحتراماتي
المقدمة دي ممكن تكون مدخل مدهش لعمل فني فخيم , أرجو ان تواصل فيما افترعته حتى يكتمل النص , ونكون شهودا على هذا الميلاد.
| |
|
|
|
|
|
|
Re: كيف تصنع تورتة بالشيكولاته (Re: عمر التوم)
|
Quote: لاكثر من اربعه شهور لم يكن لحليم أي كلام سوي ( علا ) و لما كان خضر هو صديق حليم الوحيد كان معظم هذا الكلام لا يذهب أبعد من الاذن الوسطي لخضر : قله قليله كانت تتفلت لتتعلق بخلايا الأدراك .
شهور عددا ، و لا سيره لحليم إلا علا و مع ذلك لم ينتبه خضر لجدية المساله إلا بعد زمنا زمين !! أدرك خضر أن صديقه في حاجه حقيقيه للمساعده : - إنت الزوله دي اتكلمت معاها ولا بتقعد النهار تعاين ليها و تجي تطلع د...... أنا الليل كلو ؟! - اتكلمت معاها مره واحده عن طريق صديقه مشتركه ، سلمت عليها في يدها و كان ما خجلت كنت قطعت يدي و لبستها سلسل !! ....قاطعه خضر قبل أن يسترسل : - هي دفعتكم ؟ - آي دفعتنا ، ياخي إنت معناته ما كنت خاتي بالك لكلامي كلو كلو !! - أنا أخت بالي ليك و لا للسم البنطفح فيه اليوم كلو ده ؟ من وين هي . من الخرطوم ولا من الأقاليم ؟ - من الخرطوم و ساكنه في الرياض كمان !! - ساكنه وين ؟!! قالها خضر و إنتصب واقفا - ساكنه في الرياض قلت ليك !! - يا زول إنت جادي ؟! ثم تبعها بسيل من الشتائم (نصها عربي و نصها رطانه ) - يا زول إنت زعلان كده ليه ؟ - زعلان علي وقتي الضيعتو مصاحب لي فاره زيك ، بالله شوف الحلبي ال......... ثم أعاد خضر نفس فاصل الشتايم ال (نصها عربي و نصها رطانه ) و بنفس الترتيب !! إنت يا حليم قايل رقبتك عبدالحليم حافظ ولا شنو ؟ من ما الله خلقك سمعت ليك بزول من الكلاكله مجكس من الرياض ؟ - ........... - ياخي إنت بيتكم الخريف الفات لو ما شفع الحله كانو بمرقوكم بلساتك العربات كان تكونو لحدي حسي محبوسين !!! تقول لي الرياض ؟!! غايتو كان يوم عايز تعزمها عشاء إلا نعمل ليك كشف من صنقعت و إنت جاي !!!
أخرج خضر كيس السعوط و أفرغ نصفه في فمه تاركا مهمة توزيع (السفه ) للسانه السليط ، و من ثم واصل تهكمه الغاضب : - ياخي إنت قاعد معاي شهرين ما قادر تخش حلتكم من الديانه ، تقول لي الرياض ؟ الرياض بالباء ؟!! -............... - بعدين ما تعتمد علي وجاهتك المزعومه دي ، ناس الرياض ديل كان ما عنك قروش إلا تمشي ليهم زيارات !!! الرياض ؟ الرياض يا أرنب !!! أمضي خضر باقي الليل تهكما و إنفعالا حتي مات الكلام في شفتيه و نام علي كرسيه !! |
يا لبؤسنا, ان لم ننصبك أميرا عليها
| |
|
|
|
|
|
|
Re: كيف تصنع تورتة بالشيكولاته (Re: عمر التوم)
|
عمر التوم عمو أمين أبدع وأمتع و أقنع في المشهد دا وبهذا المشهد وحده يمكننا أن ننصبه أميرا عليها
Quote: أخرج خضر كيس السعوط و أفرغ نصفه في فمه تاركا مهمة توزيع (السفه) للسانه السليط ، |
| |
|
|
|
|
|
|
Re: كيف تصنع تورتة بالشيكولاته (Re: GamarBoBa)
|
لا حولااااا انتو الحنك دا لسه مدور !! و اميرة سحبت البدري تاني!! و أمين قال Quote: يا زول هوي لابورتا طلع من عارضي أزياء أفكار اميره |
دي اخرته يا مورتا !! ميك اب !!
-- الحمد لله كنت مسحوب الفترة الفاتت هسه الواحد كان يكون جوا الرج
| |
|
|
|
|
|
|
Re: كيف تصنع تورتة بالشيكولاته (Re: عمر التوم)
|
حليم الملتاع - ٣
حليم كان يملك كل ما تحبه النساء إلا المال ، و عدم المال هو الشئ الوحيد الذي لا تحبه النساء !!! و لكن بالوسامه الفايته الحد ، بالقلب الحنين و ( الحنك السنين ) تسرب حب حليم لقلب علا كجيش من النمل ضل الطريق ، أصبح الأمر أشبه بالادمان ! و حليم لا يقل عنها شغفا و حبا . إستمر الحال علي ما هو عليه حتي إقترب موعد التخرج و دنت ساعة الحقيقه . بادرته قائله : نحن في حاجه أصلا ما اتكلمنا فيها !! - حاجة شنو يا علا ؟ - ما عارفه ، لكن نحن ما حصل اتكلمنا في مستقبلنا ... - كيف يا علا ما اتكلمنا في مستقبلنا ؟ - ما حصل اتكلمنا في انك حا تتقدم لي بتين و كيف ؟ - ........ - إنت عارف إنو أنا البت الكبيره و أختي الأصغر مني مخطوبه ليها سنتين و زواجها شهر عشره الجاي ، و مهند ود خالتي ما عايز يسيبني في حالي و بالذات بعد ما خالتي اتكلمت مع أمي ... قاطعها قائلا : يعني أنا مفروض أعمل شنو هسي ؟ - مفروض تتقدم لي هسي و نعمل خطوبه ! تحسس حليم علبة الصعوط في جيبه عند سماعه كلمة (خطوبه ) ، فقد كانت - و ديون لا ليها أول و لا أخر - هي كل ما يملك في هذه الفانيه !!! - أخطبك كيف يا علا - تخطبي زي ما كل الناس بتخطب !!
| |
|
|
|
|
|
|
Re: كيف تصنع تورتة بالشيكولاته (Re: مرتضى احمد عبد القادر)
|
حليم الملتاع -٤
إنت هسي دايرني أعمل ليك شنو ؟ قالها خضر ببرود غير معهود - دايرك تشوف لي دباره في القصه دي ، ياخي إنت صاحبي علي شنو ؟ - و لانو أنا صاحبك ، كلمتك زماااان إنو ياخي البت دي أبعد منها ، ده شعرا ما عندك ليه رقبه : الله يقطع رقبتك و يريحني منك و من( بلك ) الما بنتهي ده !!! -......... - غايتو إلا بالفاتحه ، ياخي إنت حق ركشه تمشي بيه لبيتهم ما عندك ! -عارف !! - و لمن إنت عارف : فاتح نفسك مالك ؟ ياخي إنت ما سمعت قول الشاعر (لا مال عندك لا ذهب تهديه ، فمن أعطاك الاذن لتعشق ؟!! ) - يا خضر ده ما وقت الكلام ده !! المشكله إنو مافي زول بعرفو ما داير مني قروش : يعني دين ساي نعمل بيه خطوبه مافي !!! - - - - - - والله يا حليم ما شايف ليك حل غير تشخت للموضوع ده كلو و تنسي بس !! - عليك الله إنت جادي ؟! - جادي و ساي ؟ بعدين كونك انك تفتكر إنو المشكله بس الخطوبه دي سطحيه منك ، بكره تخطبها بعد شهرين يقولو ليك العرس بتين و نحن ما بنحب الخطوبات الطويله و حددو لينا مواعيد العرس . و العرس ده ياهو (البل) الأصلي ، بعدين يا حليم خت نفسك في محل أبوها : اديني سبب واحد يعرس ليك بتو دي ؟ ياخي إنت لو طلعنا ( والعاملون عليها ) بتجوز ليك الزكاه بمصارفها الباقيه كلها !!! - لو أهلها رفضو نحن حا نتزوج و نهرب !! - تهربو إلي مضارب بني تغلب ؟ بالله شوف الحلبي ال..... ده ، تهربو بالهاء ؟ اها و بعد ما تهربو حا تسكنها وين ، حا تاكلو من وين ؟ - الاتنين حا نشتغل !!! - لا والله مبروك ، و حا تشتغلو وين يا المبروك ؟ ناس إتخرجو امبارح العصر الحا يشغلهم منو ؟ و هو وينو الشغل ده أصلا ؟
| |
|
|
|
|
|
|
Re: كيف تصنع تورتة بالشيكولاته (Re: عمر التوم)
|
Quote: لو أهلها رفضو نحن حا نتزوج و نهرب !! - تهربو إلي مضارب بني تغلب ؟ بالله شوف الحلبي ال..... ده ، تهربو بالهاء ؟ |
والله متعه يا د.أمين
أنا أشك إنو د. أمين قابل حليم وخضر واكل معاهم جقاجق وأم جنقر بسوق سته
| |
|
|
|
|
|
|
Re: كيف تصنع تورتة بالشيكولاته (Re: عمر التوم)
|
Quote: والله متعه يا د.أمين |
وطبعا د.امين حريف بدي المسألة في شكل جرعات (زي مخدر الشاشمندي الكان في عرس النور في القضارف) يامورتا انا كل يوم (طبعا مع مراعاة فروق التوقيت) بجي اتاوق أشوف حكاية حليم ده وقصتو حاتمشي لوين (لدرجة انو جاني اقتناع انو د.امين لقى حكاية حليم دي شماعة يكتب من خلالها سيرتو الذاتية) زي حكاية منسي انسان نادر على طريقته (رحم الله الطيب صالح).
--------------------------------------- يا اخي حليم زاااتو يكون اسع متحير
| |
|
|
|
|
|
|
|