|
|
 # # الحظ خشُم بيوت # #
|
نتناول كثيرا مسألة الحظ فى قعداتنا وونستنا وعالماشى ...
كل واحد يراه من وجهة نظر مختلفة ، والأغلبية يقولوا ليك "والله انا اصلوا ما محظوظ"
وتجى سيرتو لمن نسمع واحد حصل على جائزة مالية او عينية ضخمة ،
كالفوز بجائزة نقدية من بنك او سيارة سحبت على كوبونات مشتريات او زى جوائز شركات الهاتف فى السودان او فى مسابقات رمضان ،
كأنما الحظ مرتبط بالحصول على مكسب مادي او عيني فقط
فى اعتقادي أن اى شخص فى الدنيا دى لابد أن يكون الحظ قد إبتسم له فى يوم من الأيام ولكنه لم يحس بطعم هذا الحظ
لأنه لم يرتبط بمكسب مادى....
أسوق تجربتي مع الحظ هنا لأبرهن أن الحظ موجود وقد يأتيك فى يوم حتى لو باللفة زى حالتى دون أن تحس ،
سافرت السودان فى إحدى الاجازات الصيفية المعروفة من زمان ومازالت بزحمة السفر فيها لأنها موسم الهجرة الى الوطن ،،،،
بعد أن عملت حجز ذهاب وعودة على طيران الخليج قبل 6 شهور من بدء اجازتى ، حتى أضمن ألقى مقعد .
وفى وقتها كانت خطوط الطيران العاملة بين مسقط والخرطوم هى طيران الخليج والقطرية والسودانية فقط ،
مشيت السودان قضيت اجازتى بكل ما فيها من حلو ومر ،،
وقبل يومين من السفر راجعت مكتب الطيران عشان اعمل تأكيد لحجز العودة ،
وكالعادة كان خط الطيران زحمة مبالغة ما فيش حجز ولا فى مقاعد فاضية والمكتب عامل زى مكاتب جهاز المغتربين
صفوف ومدافرة وكل واحد ياعاوز تذاكر يا عاوز يؤكد حجزو . وهناك من يصرخ " أنا عندي حجز ماشى وجاى كيف تقول لى ما عندك حجز للعودة "
وتانى يكورك " انتو بتلعبوا علينا والا شنو " ويتصدى ليهم واحد موظف مفترى فى المكتب " ايوه ما عندكم حجز ولو ما عاجبكم اشربوا من البحر "
وخامس وسادس وكم طاشراوى يسب ويلعن اليوم الجابو السودان زاتو .
جيت المطار يوم السفر قبل أربعة ساعات من موعد الإقلاع ، الناس مكدسة من باب الصالة مدافرة وملاكزه والوشوش مصرورة دايره تقع فى الواطا ...
بقدرة قادر دخلت الصالة كيف ما عارف !! حسيت انا ما كنت ماشى على رجلى ، المهم لقيت رقبتى جوه ،
والكويس كنت شايل لى شنطة هاندباك فى إيدى بس ، هى راس مالى فى العودة ، مكنكش فيها بيد واحدة والتانية باقية عشره على التذاكر والجواز ...
انتهيت من رسوم المغادرة واستلمت البوردنق باص وبآخر نفس دخلت صالة المغادرة وكان باقى لاقلاع الطائرة حوالى ساعة ونص .
مقاعد ملانه ، الواطا ملانه ، مويه مافى ، السخانه تكتل ونفسك تطلعوا يجيك راجع . بقيت واقف ابدل فى رجلى ... ايروبيك اجبارى ...
شُفع تتجارى ، وصغار يتصارخوا ، وأم تكورك ،، وأبو قرفان زراير قميصوا اتقطعت فى المعافره يبرطم بى كلام ما مفهوم
والعرق يتخارت لمن سايل فوق عدسات النضارة ومخرخر فوق جُضموا ،،، هو فاضى ينهر وليداتو!!! ما صوتوا بح من مناقرة بتاع الحجز وناس الكاونتر .
مرت ساعة ،،، وفجأة اسمع اسمي فى المكرفون بتاع الصالة ينادى باسمي واسم واحد تانى مطلوبين نقابل موظف طيران الخليج ،،،
لا حول ولا قوة الا بالله العلى العظيم ،، اللهم اجعلوا خير ... مشيت بعد شويه جا رفيقى التانى ...
بعد السلام والمقابلة اللطيفة من موظف الخطوط قال لينا : " ياجماعة الحقيقة نحن عشمانين فى مساعدتكم ، لانو فى أسرة مكونه من 5 افراد مالقوا حجز فى طائرة واحدة
واضطروا اتقسموا فى طيارتين ،، جزء فى الطيارة بتاعتكم المسافرين فيها إنتو والبقية فى طيارة تانية إضافية حتقوم بعدها بى نص ساعة ...
فلوا سمحتوا نحن حنحولكم الاتنين للطيارة الاضافية عشان نلم الاسرة دى فى طيارة واحدة" ...
قلت ليهو "طيب ليه اخترتونا نحن ديل بالاسم من دون الناس؟ قال لى " والله يابن العم لقيناكم إنتو الاثنين الوحيدين الما معاكم أسرة"
قلت ليهو "طيب ياخوى نحن طيارتنا دى حاجزين فيها من قبل سته شهور ، وطيارتك القلت عليها دى طيارة إضافية لحل مشكلة الزحمة
يعنى ما مبرمجة أصلا فى جدول سفرياتكم فكيف نضمن تقوم فى مواعيدها؟
وبعدين نحن عفشنا دخل خلاص فى طيارتنا المسافرين فيها أصلا حنلم فيهو كيف تانى ؟
قال لى تانى يابن العم : "ما تخاف اولا الطيارة الاضافية دى حتقوم فى مواعيدها لأنها موجودة الآن فى المطار ،،
تانيا عفشكم هسه نحن بنحولوا للطيارة بتاعتكم " عاينت لى صاحبى المعاى نظرة رأيك شنو ،، لقيتوا وشو ينقط طيبة وبساطة ،
قلت للراجل " والله ياخى ختيتنا فى مطب ، لكن يازول فوضنا أمرنا لله وما عندنا مانع" الكلام ده بقول فيهو وانا قلبى ما مرتاح لكن طيبتنا الزايدة غلبت . قلت لى صاحبى "
زولنا البدلونا بى مقاعدو ده عندو ضهر والا لومك على ما كان ادوهو وش وقالوا ليهو ياخى احمد ربك انك لقيت ليك مقاعد !!!
أها ضربنا الانتظار ،،، بعد نص ساعة بالضبط من الحصل ده اسمع ليك المكرفون تانى ،،،
المرة دى يعلن عن إلغاء قيام الطائرة الأصلية لأسباب خارجة عن الإرادة ،، والطلب من المسافرين على تلك الطائرة مراجعة مكتب الخطوط خلال أسبوع "
ولحدى هنا وبس !!! " أما الطائرة الإضافية فسوف تقوم فى مواعيدها " ...
فى اللحظة دى الصالة تقول ضربوا فيها بمبان الناس اتنفضت مرة واحدة كل واحد مسك راسو ،، والقاعد قام والقائم قعد والمقبل يمين قبل شمال والعكس
والايادى فى هستيريا تتنفض لى فوق وهاك يا هرج ومرج ، وبعض الناس قرب يبكى
" انا اجازتى أكلت فوقها اسبوع ولو غبت اسبوعين برفدونى حسب القانون" (زى حالتى انا كمان) ،
والتانى يقول ليك "انا جاى من الابيض والتالت انا جاى من كوستى وما عندى اهل فى الخرطوم"
والرابع والطاشراوى "انا آخر فكه عندى اديتها لى اخوى والا ود عمى الوصلنى المطار وماعندى التكتح ارجع بيهو" ،،،
وزمان كمان مافى حاجه اسمها موبايلات الله يكرم السامعين ...
الناس اتلخبط كيانها على الآخر إلا منو ؟ انا وصاحبى من ناس الطائرة المنحوسة ...
دورت على صاحبى ما لقيتو فى الزحمة ... اللهم حمدك وشكرك ..
تخيلوا هل ممكن فى نص حالة الاكتئاب والزهج والنرفزة دى يكون فى زول مبسوط !!! اللي هو انا وصاحبى ..
لكن والله رغم ذلك قلبى كان بتقطع على الناس المجقلبة اعاين ليهم بحسرة واشفاق ،
حيرجعوا تانى يعانوا من حكاية شوفوا لى حلل ومتين يارب !! بعد اسبوع بعد اسبوعين!!! مع الزحمة المهولة دى ،
والا يقنع وينتظر يجيهو خطاب التفنيشة لحدى باب بيتو ....
لو نظرنا للحصل ده بنلقى فى 200 او 300 شخص حظهم سىء ،، بينما فى اتنين فقط منهم محظوظين ....
|
|
 
|
|
|
|
|
|
|
 Re: # # الحظ خشُم بيوت # # (Re: الطيب شيقوق)
|
الشيقوق حبابك الف
بس انشاء الله قِدروا على البوده ماتكون خربت ليهم العيش
حاكم ملايدهم تكون صقّرت من عدم التِسِلّكه
بعدين إت زاتك ياخوى حظك ضارب
شايفك متجدع فى بيت الفنون مع الزمرة الانيقة
ده برضو حظ والا مش؟
| |
|
|
|
|
|
|
|
|
|
Re: # # الحظ خشُم بيوت # # (Re: الفاتح الجنيد)
|
بما ان الحظ خشم بيوت
فاكيد كل واحد كانت ليهو تجربة مع الحظ
لكن انا بفتكر ان أكثر انسان محظوظ
هو من وفقه الله فى الارتباط بى إنسانه تفهموا وتحترمو وتقدر معنى العشرة الزوجية
فهى اساس السعادة
| |
|
|
|
|
|
|
| |
الفاتح الجنيد
لؤى
الطيب شيقوق
فيس بوك
تويتر
انستقرام
يوتيوب
بنتيريست