ما بين مطبخ منال العالم في قناة أبو ظبي وبين بيت الهنا في قناة النيل الأزرق فرق مقدار يقاس بشكل البصله ولون المنقه. أم أحمد هداها الله أصبحت هي المسئولة عن إدارة شئون التلفزيون في بيتنا وهي المتحكمة في الريموت بعد شهر قضيناه بحرية وتحرر في مشاهدة كأس العالم لايف ، أها أصبحت مكرهاً على مشاهدة قنوات تتعلق بالمطبخ وأخرى تبث مسلسلات من وادي الذئاب إلى وادي الوحوش ، ولما كان لابد مما ليس منه بد أصبحت مستمع أو قل مشاهد جيد لهذه البرامج ، أها قومي يا منال العالم قدمي أكلة وبعدها صحن حلو غاية في الجمال والوضوح وكتابة المقادير لمن قربت ألبس المريلة وأجرب حظي. بالأمس هداها الله السيدة حرمنا المصون فتحت على بيت البكا بقناة النيل الأزرق وهناك جابو الشيف أظن أسامه الراجل ده عمل ليهو لحمة كده لا شفتها في بيت طهور لا في سماية لا في عيد ضحية لا وكمان جاب ليهو كمية بتاعت خضار عكاها مع بعض نظام تجميل وكده ، المهم وحاتكم طلع صحن في تقديري المتواضع كديسة سجيمان ما تأكله. المهم الراجل زاتو شرحه ضعيف بالرغم من أن المذيعة بتديهو دفره كل مرة وتصلح ليهو لكين وحاتكم المحرش ما بكاتل. قدله: أبو خليل في إحدى إجازاته السنوية عمل لينا عدس غاية في الروعة فيه كل خبرات العزابة في الغربة وفيه الجزر وكمية بتاعت خضروات ومسبوك بطريقة رائعة ، أها تكرم مشكوراً بعد أن زروط المطبخ عندنا وجعل كل أفراد الأسرة تعلن خطة الطوارئ لمجابهة ما إستخدمة من عدة وأواني وصواني في سبيل الوصول إلى هذه الحلة العدسية ، وقام بإرسال عينه مجانية من طبخته إلى إحدي قريباتنا وبعد عدة أيام قابلها وسألها أها العدس كيف ، فأجبت بعفوية والله كنت متحيره أطبخ شنو أها ربنا جاب لي عدسك دا ، فأٌحبط محاولاً إستدراجها فقال ليها دا عدس فيهو وفيهو وفيهو من مكونات ، فردت عليهو قائلة والله هو عدس سمح لكين تكلفته كتيرة وبدل ما يكون ملاح مساكين بي الطريقة دي بقي رفاهية. .
07-21-2010, 09:26 PM
سجيمان سجيمان
تاريخ التسجيل: 10-03-2002
مجموع المشاركات: 14875
سجيمان لك ولكديستك السلام- وشكراً على تكبدكم المشاق والدخول هنا بالرغم من مشغولياتكم الجمة وسجالاتكم مع الفاتح جبرا أها الموضوع طلع في قناة الشروق أكرر إعتذاري لي ناس النيل الأزرق من الغفير لغاية حسن فضل المولي وأقول أن البرنامج في قناة الشروق. أمس القريبة دي ذات الشيف جاب ليهو كوسة قال حا نحشي كوسه باللحمه والصنوبر أها الأمور كانت ماشه تمام قام جاب ليهو سكين حكا بيها بعض جوانب الكوسا وقال أثناء العملية حا نعمل ديكور للكوسه وأخشي ما أخشاه أن يعمل طرطشه للكوسه وقد فعل ، كيف؟ أنا أقول ليكم كيف ... الراجل قام جاب ليهو كمية بتاعت زبادي مع طحينه وهاك يا لخبطه وأثناء ما الكوسا في النار قوم طشششششششششششش شوت خليط الطحينة والزبادي دا في الكوسا أها وحاتكم ذكرتني أفلام الكرتون والآكشن الهندي أو المصري لمن يكون الضرب جمب طاحونه أو في مخزن دقيق ، وبعد ما وضع الكوسا في الصحن (بقت أقرب للفافات الشاش من المحشي) قوم تاني طمبزا بي باقي الطحينة أم زبادي وطبعاً بقت حاجه كده زي الكوسا بي كريم شانتيه. قدله: سجيمان اخبار الدواس شنو بينك كشيخ وبين شيخ جبرا هل سلخ أحدكم ساق الآخر في مسألة حنة عواطف أم تم إعلان الهدنة ، أقترح أن يتنازل أحدكم للآخر مع إحتفاظ المتنازل بأفضلية الكتابة عن مشاط سكينة أو حلاوة ريا..
07-24-2010, 11:31 AM
د.محمد بابكر د.محمد بابكر
تاريخ التسجيل: 07-16-2009
مجموع المشاركات: 6614
د. محمد بابكر تحياتي نقطة شكل أو رمز بلا زوايا. ما قبل الحرف وما بعد النقطة ... يمكن عبقرية أو إستهجان أو إختزال رد فلسفي عميق ، أكثر الأشياء التي تكون عصية على الفهم حاجة إذا كان الوضع يحاكي ما يعرف بالـ standing on the fence فمن الصعب تحديد إتجاه القفزة للداخل أم للخارج. وفي كل الأحوال لك التقدير وإن شاب الرد بعض الغموض فالقصور لاشك في إدراك المتلقى
07-25-2010, 12:38 PM
almulaomar almulaomar
تاريخ التسجيل: 07-08-2002
مجموع المشاركات: 6485
فتحت أمس السيدة حرمنا التلفزيون ووجهت ريموتها أو رمت به لا فرق فأصابت القناة 309 بحسب برمجة قنواتنا الفضائية وما هي إلا لحظات حتى ظهر بيت الهنا برنامج السفاسف على قناة الشروق "شمس السودان التي لا تغيب" (هي حقت بريطانيا العظمي غابت لامن نحنا) المهم وأنا بين المشاهدة والمجابدة والمجاهدة سمعت التالي: كيلو و نصف لحم عجل فيليه (2) علبة مشروم صحيح- ملح - فلفل اسود زيت نباتي جزرة - ورق غار - قشرة ليمونة حامضة . راس ثوم يقشر و يوضع اسنان صحيحة دون فرم ، بصلة تقطع جوانح سميكة حاولت أن أفهم أو أوزن هذا الكلام وفي ذات الوقت أقوم بالعمليات الحسابية عطفاً على أسعار سوق الخضار تحوطاً لأن تطلع الحكاية في رأس أم أحمد وتركب رأسها مطالبة بعهمل هذا الطبق المكلف المهم لم أستطع أن أفهم أبعد من أشياء مألوفة البصل والتوم والليمون وذلك في حدود معرفتي القصوي وثقافتي الفولية البوشية ، جليت المشروم الصحيح حيث أنني إفتكرته من تصريفات الأفعال في اللغةالعربية ، الملح بلغات الشمس أصبح بطعام تاني خالص ، أما ورق الغار فما يحسب عليهم لا لهم أنهم لم يحددوا إسم الغار أو موقعه ، وهنا قلت لحرمنا المصون أها نقوم نمشي السوق قالت لي قديمة ألعب غيرها حتى لو مشينا الريموت كونترول معاي
07-25-2010, 12:47 PM
almulaomar almulaomar
تاريخ التسجيل: 07-08-2002
مجموع المشاركات: 6485
نسيت حاجه مهمة جداً في حاجة إسمها روزماري أنا قلت دي حاجة من إتنين يا تكون الحبشية الشغالة الجديدة الجابوها ناس سيد أحمد جارنا يا كمان تكون معلمة من الخواجيات البدرسن في المدارس الأجنبية والتي أصبحت أكثر إنتشاراً من المدارس الحكومية.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
almulaomar
سجيمان
د.محمد بابكر
فيس بوك
تويتر
انستقرام
يوتيوب
بنتيريست