|
|
 Re: سكان القصر العالي..قصيدة.. ود بادي (Re: علاء الدين محمد بابكر)
|
يا سكان القصر العالي سلام..
يا سادات البرج العاجي سلام..
آناسات البلد الغادي سلام..
أدوني سلام..إن جيتكم تاني ملام..
والله كان عارفني تمام..
قدامي وما شايفكم..وساعة أشوفكم ..أشوف قدامي أقزام..
أما سوافل..تبنو عوالي تناطح الغيم الراحل تالا السافل..
دور فوق دور..حدائق سور..وتلاتة مداخل..
باب مقرون في باب..مفتوح في باب..دهليز ومجاهل..
والقرش الأحمر بينكم صايل..تارك وفاعل..
اللقمة الطوسة اتحقت بالإيجار..
الريش يتقصقص تحتك بالإيجار..
وحرير يتماوج فوقك بالإيجار.
لكن الموووت.. الموت إن جاكم طرفة عين..بتأجرو مين..
إن كان الموت بالأجرة يفوت..بتأجرو زول علشانكم يموت..
لكن الموت مرسال..جبار وعنيد..
أعذار الناس..أعمار الناس..عظمة الناس في إيد.. والموت في إيد..
أرقدو عوافي..نومو عوافي..فوق الفوق لا حر.. لا سموم..لا سوافي..
الليد الطايلة تجيب المافي..
خزاين الأرض ونعيم الدنيا الزايل .. كلو معاكم وما كفاكم..
حتي القرش إن فاتكم للبيستاهلو..تزعلو ليش ما جاكم..
يا الملك النازل فجراوي..وشايل أرزاق الخلق الرقدو رقاد..
إنتو تختفو اللقمة الحفت من جنحين الملك الرفت..وسيدها يموت بالفاق..
العين إن زاغت..شن بيملاها غير مولاها..وبيتا رملو دقاق..
يا سكان القصر العالي..وداع
يا سادات البرج العاجي..وداع
آ ناسات البلد الغادي ..وداع
نتلاقي يوم أنداد..
ونصفي حسابنا الصاع بالصاع..
|
|
 
|
|
|
|
علاء الدين محمد بابكر
فيس بوك
تويتر
انستقرام
يوتيوب
بنتيريست