Author: تقارير سودانيزاونلاين
|
08:52 PM April, 17 2019 سودانيز اون لاين
تقارير سودانيزاونلاين-USA
مكتبتى
رابط مختصر
تقرير : مهادن الزعيم
✵ بعد مرور 12 يوم علي تواجد المعتصمين امام القيادة العامة اصبحت هناك حياة مكتملة الاركان ومنظمة بطريقة جميلة تعكس قدرة الشباب علي قيادة البلد ......
✵ وانت داخل علي اول حاجة بقابلوك شباب المتاريس (نقاط تفتيش) وديل شباب مهمتهم تفتيش كل الداخل والمارق ومابخلو ليك حاجة ممكن تشكل خطر علي الاخرين حتي الاقلام بشيلوها منك عشان م تطعن بيها زول وعادي ممكن تتفتش تلاتة مرات في شارع واحد قبل م تدخل الميدان واغرب حاجة انو البفتش والبفتشو فيهو الاتنين بكونو بضحكوا علي نغمة هتافهم المميز (ارفع يدك فوق والتفتش بالذوق)وبتلقوا معاهم واحد رافع بوستر مكترب فيهو (ابتسم ياخ) ....
✵اعلي النفق (بتاع الجامعة وبتاع بري) بتلقي كمية شباب مرتكزين هناك بصورة دائمة وشغالين ذي سلاح الاشارة (لو في اي هجوم بضربو علي الجرادل والحديد عشان المعلومة توصل) ..
✵ جوة بتلقي في اربعة عيادات مجانية مهمتها علاج المصابين والموضي وتوفير الدواء ودا كلو مجاني بي بركة الثورة ......
✵ شباب النضافة وديل بتحركو في مجموعة من 60 فرد وبشكلو مربع فارغ في النص وبنضفو المربع وبتحركو طوالي لمربع اخر بالاضافة الي شباب لافين بي اكياس لجمع القوارير الفارغة ولاول مرة تتوفر اكياس للنفايات في كل مكان من ميدان الاعتصام ....
✵ ناس الخدمات وديل مهمتم استلام التبرعات العينية والمادية بالاضافة الي الشير لتوفير الاكل والموية لكافة الموجودين في ميدان الاعتصام ....
✵ بما انو الحياة في ميدان الاعتصام بخدمات (سفن استار) اصبحت هناك خدمات مجانية اخري يعني عادي تلقي شاب شايل لافتة مكتوب عليها (رصيد مجاني ولو م عندك تلفون نديك تتكلم تطمن اهلك) وبرضو في (حلاق الثورة) وديل كمية من الشباب لافين بحلقوا لاي زول عايز حلاقة علي اعلي مستوي وبرضو مجان ....
✵ لو بتحب الموسيقي يادوب ح تلقي مكانك هنا (ناس بغنو بي طبلة وناس جيتار وناس كمنجة وعود) والله الميدان بقي ذي معهد الموسيقي ...
✵ اما لو انت من الناس البحبو اركان النقاش في الجامعات ح تلقي كل كوادر الاحزاب المعروفين شغالين مخاطبات ليل نهار وفي كل حتة من الميدان ....
✵ ناس الكورة ودوري ابطال اوروبا .... اتخيلوا انو في شركة جابت شاشتين بحجم كبير جدا واصبحنا نحضر الكورة بارتياح ومجان كمان (البارح حضرنا كورة يونايتد في برشلونة وكانت جميلة بس اسوا حاجة فيها انو المانيو اتهزم) ....
✵ في خيمتين شغالات قهوة شاي للثوار 24 ساعة بدون مقابل المهم يكون راسك مظبط عشان تحافظ علي اعتصامك لحدي ث تحقق مطالبك ....
✵ صور الشهداء موزعة في كل مكان لتذكر المعتصمين بمن دفعوا حياتهم فداء لخلاص الوطن من ايدي الكيزان ...
✵ خيم كثيرة تحمل اسماء جامعات ومدن واصحاب المهنة الواحدة (اي واحد فيهم بقدم توعية كبيرة للمعتصمين ويعلمهم كيف يدافعوا عن حقوقهم ويحمو ثورتهم) .....
✵ تلاحم خرافي بين عساكر وضباط الجيش وبين المتظاهرين (تلقاهم يلعبوا سوا ضمنة وكوتشينة وليدو وشطرنج كلو) .....
✵ الدراميين عاملين خمية وبقدموا في عروض مسرحية توعوية جميلة جدا والتشكيلين عملو جداريات لشهداء ولوحات فنية في كل الجدران المحيطة بالميدان حولت الساحة الي متحف فني .....
✵ تصحي من الصباح علي جوطة بي نوبة علي ايقاع (صباح الخيييير صباح الخير) ....
✵ كل بتجي عربات مواطنين فيها اكل وموية وشاي وقهوة وكيك وبسكويت ووصلت لحدي الشوكلاتة كمان ...
✵ ميدان الاعتصام اصبح حياة قائمة بذاتها ايقظت في دواخلنا كل الصفات الحميدة التي حاول الكيزان طمسها خلال 30 عاما من الكذب والدجل والنفاق ولكنها عادت بقوة مع اول نسمات لعبير الحرية ....
|
فيس بوك
تويتر
انستقرام
يوتيوب
بنتيريست