|
اها ياجماعة انا مغتربة ولميت القروش وجاهزة للعرس
|
أول شئ عملته بعدما كملت الجامعة فكرت في الإغتراب لأني عارفة وراي حاتكون هموم الحياة والعرس وتكوين اسرة وتربية عيال، اها جيت السعودية واشتغلت شغل السواد وجريت جري الوحوش ولميت الريالات وحسع مستعدة للعرس.
رسلت لي ابوي يجهز العريس وقال لي اصلو دي مامشلكة يابتي عشان الاولاد راقدين ومالاقيين عروس تمرقهم من هموم الدنيا بس انتي جهزي شيلة العريس، اها قمت مشيت سوق باب شريف وماخليت شئ، خمج شديد، اشتريت شيلة العريس من جلاليب وعراريق وطواقي للعريس وون مان شو الهلال رشو ولي الافترشيف وأمواس ومعجون الحلاقة جبتهم.
ضربت لي ابوي وقلت ليه اها انا جاهزة انت لقيت العريس؟ قال لي انتي كان جيتي ومشيتي ليك عرس وااااحد بس بتلقي ليك عريس ود ناس ومؤدب ومستور، قلت ليه يابوي انا مابقدر اجي انتو شوفوا الولد وكان لقيتوه رسلوا لي الصور وانا كان عجبني بديكم رايي وانتو تعقدوا من هناك وترسلوه لي وانا في المطار بعرفه بالصور.
اها رسلوا لي صور لي كم ولد من اولاد الحلة ورشحوهم لي قالوا اولاد ناس ومن الجامعة للبيت ومن البيت للجامعة وهديين ورضيين ويومهم كله في المطبخ بيساعدوا في ابواتهم ومابيمرقوا من البيت الا مع اهلهم، المهم لقيت الأولاد صورهم حلوة ولابسين لبس حشمة فاخترت منهم اتنين وقلت لي اهلي اسالوا من اهلهم ولو عاوزين يكملوا قرايتهم قبل العرس وكده.
قالوا واحد من الاولاد قال ماعندو مشكلة موافق على العرس وممكن يواصل الدراسة وهو عريس، وانا قلت ليهم انا مابتوقف في الموضوع دا وبديه كامل حريته عشان يواصل دراسته ولو جبنا اطفال بساعده في تربيتهم وفي شغل البيت من طبيخ وغسيل عدة لحدي مايكمل دراسته رغم ظروف الشغل هنا دوامين وجري وبجي البيت هلكانة.
المهم ادوني تلفون اهل الولد قالوا عشان اتعرف بيه وفعلاً اتصلت بوالدته ووالده وسلمت عليهم وقلت ليهم عاوزة اتكلم معاه لو ممكن، قالوا لي والله يابتي نحن مابنحبذ المسألة دي خالص لكن انتي بت ناس واهلك ناس سيرتهم سيرة محترمة فبنديك تتعرفي بيه .
نواصل .....
ايمان
|
|
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
اها ياجماعة اسمحوا لي اتم الموضوع وبعد داك اجي ارد عليكم نواصل جزء جديد من الحكاية
انا طبعاً لقيت الولد ده سمح شديد في الصورة وقلت اركز عليه هو عشان ده اهم شئ طبعاً، عشان مااجيب لي راجل يضحك فوقي الناس ويقولوا بعد فصاحتها دي كلها وفلسفتها دي مشت عرست ليها راجل وشو ينعل قفاه، فقلت اشوف طريقة كلامه واسلوبه عشان مايكون كمان تور الله الانطح ويضحك فوقي الناس.
اتكلمت معاه وانا شايلة صورته واعاين لي سماحته واقول ليه في الكلام السمح واغازل فيه، صوتك حلو، عيونك جميلة، انا من زمان بحلم براجل سمح زيك كده، وهو همه كله في القراية ويسأل فيني، انتي متأكدة موضوع اني اكمل دراستي دا مامشكلة بالنسبة ليك؟ وانا طبعاً بيني وبينكم ناوية ليه على نية، قراية شنو كمان البيكملها؟ انا بس قلت اتم الموضوع باي شكل ولما يصلني هنا بعرف امشيه على مزاجي زي ماكل النسوان بيعملن.
قلت ليه بالعكس، انا من انصار انه الولد يكمل دراسته قبل الزواج وحتى لو اتزوج يكمل دراسته وعشان كده انا ذاتي حااساعدك واقيف جنبك بس انت اهم شئ هسه تقول لي رايك عشان انا مستعجلة شوية في موضوع العرس ده، واحتمال ينقلوني لمدينة تانية ووظيفة جديدة فعاوزاك تكون معاي عشان نختار عفش بيتنا وحاجاتنا كلها مع بعض، ولا انت رايك شنو؟
قال لي والله انا من حيث المبدا ماعندي مانع خصوصاً اني عرفت انك من عائلة كويسة ووظيفتك في السعودية محترمة وانك مع فكرة اكمال تعليم الرجل دي، وكمان عرفت انك جاهزة من كل النواحي واظن ده بيوفر علينا وقت طويل، فماعندي مانع.
قلت ليه خلاص انا بتكلم مع امك وابوك وبتصل باهلي برضو عشان يكملوا المسائل دي بسرعة عشان اقوم اعمل ليك اجراءات الاستقدام عشان بتاخد ليها زي شهرين تلاتة كدي وبتصل بيك عشان نتفق على التفاصيل، يلا اديني الوالدة اتكلم معاها، قال لي كويس واداني امه وسمعت صوته بيتكلم مع ابوه وبعد شوية سمعت صوت زغرودة من ابوه وفهمت انه فرح عشان ولده وافق.
المهم قلت لي امه تتصل بي امي عشان التفاصيل عشان انا مستعجلة، وقفلت منهم واتصلت بي ناس بيتنا وقلت ليهم شوفوا انا ماعاوزة جوطة وصرف في الفاضي انا برسل ليكم الشيلة دي وتشوفوا ليكم اي ولد من اولاد الحلة يغني في حفلة دكاكينية كده وتتموا الموضوع باي طريقة سريع سريع ولو حسيتوا انه اهل العريس عاوزين يبالغوا وروهم اني عندي كم زول اترشحوا لي واني مستعجلة.
وفعلاً اهل الولد طبعاً حسوا اني عروس لقطة وخافوا الولد يبور وسدوا دي بي طينة ودي بي عجينة ورضوا بالمقسوم وعقدوا في صمت وبدون صرف، رغم اني كنت سامعة من اخوي انه الولد كان بيحلم بجلابية زفاف وسيرة وزفة ورقيص عريس زي حق عمر البشير البيعملوا داك، لكن في النهاية رضى بالمقسوم واتوكل على الله وقال اخير اعرس ولا اقعد احلم واطير العروس خالص من يدي واقعد اندم زي اولاد كتيرين.
ونواصل.....
ايمان
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
اها نواصل الجزء التالت
اها بعد مااتفقنا على التفاصيل والاهل رضوا بالمقسوم حددنا التواريخ للعقد وقلنا حفلة الدخلة ممكن نعملها في وقت تاني لمن الظروف تسمح. ورسلت ليهم توكيل من قنصليتنا في جدة بعدما سلوا روحي وحققوا معاي التقول مجرمة مازولة بدفع ضرائب وبطلب عمل شئ من ابسط حقوقي كمواطنة.
الجماعة في السودان عملوا العقد وبقيت عروس رسمي بس ماشعبي وسكيت موضوع الاستقدام عشان اجيبه السعودية، وطبعاً مع الجري الشديد والصرف والمشغوليات بقيت مابقدر اتصل كتير، اها هو بقى يتصل ويقول لي مالك انتي بقيتي مابتتصلي ومابتقولي لي كلام حلو زي الكنتي بتقوليه لي ايام التعارف؟ ومالك بقيتي مابتشتاقي لي؟ وقدر ماحاولت اشرح ليه الظروف كان بيقول لي برضو مهما كانت الظروف يعني اكيد بتلقي ليك خمسة دقايق تتصلي بي فيها.
اها انا بيجاي قمت فتشت لي شقة براي عشان كنت ساكنة مع مجموعة طبعاً ولقيت لي شقة من غرفة وصالة وحمدت الله عشان الايجارات هنا مرتفعة شوية لو البيوت كبيرة، ومشيت الحراج محل بيع اغلب الاشياء المستعملة اشتريت لي عفش معقول وفرشت البيت بما تيسر، وقلت اخلي عدة المطبخ لمن هو يجي عشان يختار براه الشئ البناسبه.
المهم مرت فترة الاستقدام وادوه الفيزا وقطعت ليه التذكرة بالخطوط السودانية ناقلنا الوطني لانها ارخص من الخطوط السعودية طبعاً وحجزت ليه واخيراً جات لحظة اللقاء المنتظر وشلت الصورة وحفظت تقاطيع وشه سممممممح ومشيت المطار، بقيت اعاين لوشوش القادمين زي الرايح لي شئ واقول بري ده ماهو ده ابيض وده اسود، ده طويل وده قصير، لغاية ماشفت الجلابية واللبسة بتاعة باب شريف المابتغباني وعرفته ده زولي.
رفعت ليه يدي من وسط الناس وشفته مسكين مع الخجل وشيل الشنطة كل شوية الشال يقع من كتفه ويخت الشنطة يقيف يرفعه في كتفه ويصلحه ويدنقر يجر الشنطة تاني، لمن وصلني وسالمني وسالمته وباركت ليه قلت ليه مبروك علي انت، ضحك بي خجل وقال لي الله يبارك فيك، ومرقنا من المطار وركبنا لينا ليموزين على قولة ناس السعودية واتجهنا على الشقة.
ونواصل الجزء الجايي من الحياة الزوجية....
ايمان
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
اها نواصل الحكاية
جينا البيت وبدينا اخيراً الحياة الزوجية الكاسرين الناس رقبتهم عشان يعيشوها، زارونا زميلاتنا في البيت وبعض السودانيين المعارف والجيران وباركوا لينا، ومشينا السوق اشتريت العدة للمطبخ والملايات واكياس المخدات والذي منه، وبدينا النقنقة من اول ايام في السوق يقول لي الحاجات دي ماسمحة وحاجات رخيصة وهايفة ساي ولو في مراده يشريني الحاجات الغالية السماها اصلية.
بعد اسبوع قعدة في البيت ولاحظوا انا ماعندي اجازة اها قمت نزلت الشغل وبقيت كل مااجي البيت من الشغل القاه بس قاعد يتبكى اها انا انخلع واقول الحصل شنو ياربي ولما اساله يقول لي مافي شئ ولما اقول ليه مافي شئ كيفن مالك بتبكي؟ يقعد يقول لي انا بس كنت متخيل نقعد مع بعض اكتر شوية قبل ماتنزلي الشغل، ومرات يقول هو بس عشان مافارق اهله خالص من صغير ومشتاق ليهم ومرات يقول حاسس اني بعيدة منه.
اها انا بقيت ازهج من جنس الدلع ده ومااستحمل كل يوم بكاء ودموع ودلع وقلة ادب وبقيت اقعد احاول افهمه اني ماعندي اجازة عشان اقعد معاه في البيت اكتر وانه الشغل هنا مابيرحم وانه مفروض يتبسط عشان انا قعدت معاه اسبوع كامل في البيت، وافهمه انه الحياة كده وانه مفروض يستحمل بعده من اهله ويتفرغ لحياته الزوجية، وافهمه برضو انه انا مابعيدة منه.
البيت بقى يزهج من النكد والموبايل كرهته من كترة اتصالاته بي والسؤال، اها جاية متين؟ ماممكن نطلع لما تجي راجعة البيت؟ ممكن تجيبي معاك الشئ الفلاني؟ المكيف ده فوقه مشكلة، الخ... كرهت حياتي من اول شهر وكرهت العرس القايلاه بيريح بالي، وبقيت اجي القاه بس ماسك التلفون، يابيتكلم مع واحد من ازواج السودانيات الهنا الدخلوا علينا وبقوا اصحاب متين مابعرف، ياالقاه ضرب لي اهله يتونس معاهم.
النصيحة انا زهجت من الدلع ده وفصلت تلفون البيت عشان الفواتير كمان ماتعمل لينا هم جديد، وطوالي سالني التلفون ده ماله كضم؟ وقلت اتكلم معاه عشان يفهم الظروف كان يخلي الدلع وعدم المسئولية ده شوية. اها قعدت معاه وقلت ليه التلفون مابنقدر على فواتيره عشان كدي انا قطعته وانه البلد دي مابلد ابوي واني جيت واغتربت عشان نصلح ظروفنا ونرجع بلدنا، وانه لازم يخلي الكلام الكتير في التلفون ده.
قعد يرمي في دميعاته ويقول لي دي ماحياة اصلها وانه بيصحى معاي الساعة خمسة الصباح وانه بعد ماامشي الشغل بيقوم ينضف البيت كله وده بياخد منه وقت طويل وبيغسل العدة والهدوم وبيبدا في عمل الغدا عشان عارفني برجع البيت زي الساعة اتنين وبمرق تاني لدوام المساء زي الساعة خمسة، وانه لما يخلص من الحاجات دي بيكون زهج من الوقفة طول اليوم ومافي زول ينضم معاه كلمة واحدة وقعدة البيت ليه براه بين اربعة حيطان قال حارة شديد عشان كده بيتكلم مرات في التلفون.
وقال ماهو البيضرب كل المرات وانه مرات راجل فلانة هو البيضرب ليه وبيتونسوا، وانه ماقاعد يضرب لي اهله الا مرة واااااحدة كل اسبوعين وبقينا في غلاط انا اقول ليه هسه انت يوم الجمعة الفات ماضربت ليهم وهو يقول لي ااااي لكن ده ماعشان ابوي كان راقد عيان وغلاط ونقة وكل مانتناقش يقول لي حسع انتي مالك بتكوركي فيني؟ والله بيني وبينكم كرهته وكرهت وشه وبقيت كان في طريقة البيت ذاته مااجيه بين الدوامين من عيشة النكد دي وعدم الفهم وعدم الاحساس ده.
اها بعد داك دورنا اسطوانة جديدة وانا قلت اكيد دي من راس راجل فلانة ، بقى يقول لي انتي قلتي انا ممكن اواصل دراستي وانا اقول ليه انا قدمت اوراقك وراجية الرد والناس ديل مابيردوا بالساهل اخير تصبر، اها بقى يقول لي خلاص طيب انا عاوز ذاتي اشوف لي شغل عشان قعدة البيت صعبة وعشان اساعدك انتي ذاتك. واريته ماقال الكلمة دي خلاني انفجر واطلع الحابساه جواي كله من زهجي منه.
قلت ليه والله ياها دي الفضلت انا اتعب اليوم كله في الشغل واجي البيت عشان اخت راسي وارتاح ساعتين واكل لي شئ قبل ماامرق تاني اها اجي كمان القاك انت شغال ولا بتقرا وسايب البيت لا نضافة لا اكل اصله هي القصة كان كدا انا معرساك ليه؟ اسمع ياراجل من الليلة تشيل من راسك فكرة الدراسة دي خالص وماعاوزاك تاني تقول لي عاوز تشتغل واهلك واصحابك ديل كان هم البيملوا ليك راسك بالافكار دي ذاتك تاني ماتتصل بيهم الا مرة في الشهر وقدامي.
اها من اللحظة الوريته فيها العين الحمراء كترت الدموع لكن بقى مابيقول لي اصله بيبكي ماله، بقى الكلام بيناتنا ذاتو بالقطارة وريحني بيني وبينكم من النقنقة ووجع الراس لكن كمان انا المسخرة وقلة الادب مابتنفع معاي كيفن يعني يقعد ساكت وكل ماسالته سؤال يرد علي من طرف نخرتو زي الانا خدامة عنده؟؟
اها اقروا الكلام ده واحكموا براكم على البقت علي انا القلت ارتاح بالعرس وانتظروا اكتب ليك الجزء الجاي وشوفوا جنس الظلم الاتظلمته.
ايمان
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
اها نواصل الحكاية
جينا البيت وبدينا اخيراً الحياة الزوجية الكاسرين الناس رقبتهم عشان يعيشوها، زارونا زميلاتنا في البيت وباركوا لينا، ومشينا السوق اشتريت العدة حقت المطبخ والملايات واكياس المخدات والذي منه، وبدينا النقنقة من اول ايام في السوق يقول لي الحاجات دي ماسمحة وحاجات رخيصة وهايفة ساي ولو في مراده يشريني الحاجات الغالية السماها اصلية.
بعد اسبوع قعدة في البيت ولاحظوا انا ماعندي اجازة اها قمت نزلت الشغل وبقيت كل مااجي البيت من الشغل القاه بس قاعد يتبكى اها انا انخلع واقول الحصل شنو ياربي ولما اساله يقول لي مافي شئ ولما اقول ليه مافي شئ كيفن مالك بتبكي؟ يقعد يقول لي انا بس كنت متخيل نقعد مع بعض اكتر شوية قبل ماتنزلي الشغل، ومرات يقول هو بس عشان مافارق اهله خالص من صغير ومشتاق ليهم ومرات يقول حاسس اني بعيدة منه.
اها انا بقيت ازهج من جنس الدلع ده ومااستحمل كل يوم بكاء ودموع ودلع وقلة ادب وبقيت اقعد احاول افهمه اني ماعندي اجازة عشان اقعد معاه في البيت اكتر وانه الشغل هنا مابيرحم وانه مفروض يتبسط عشان انا قعدت معاه اسبوع كامل في البيت، وافهمه انه الحياة كده وانه مفروض يستحمل بعده من اهله ويتفرغ لحياته الزوجية، وافهمه برضو انه انا مابعيدة منه.
البيت بقى يزهج من النكد والموبايل كرهته من كترة اتصالاته بي والسؤال، اها جاية متين؟ ماممكن نطلع لما تجي راجعة البيت؟ ممكن تجيبي معاك الشئ الفلاني؟ المكيف ده فوقه مشكلة، الخ... كرهت حياتي من اول شهر وكرهت العرس القايلاه بيريح بالي، وبقيت اجي القاه بس ماسك التلفون، يابيتكلم مع واحد من ازواج السودانيات الهنا الدخلوا علينا وبقوا اصحاب متين مابعرف، ياالقاه ضرب لي اهله يتونس معاهم.
النصيحة انا زهجت من الدلع ده وفصلت تلفون البيت عشان الفواتير كمان ماتعمل لينا هم جديد، وطوالي سالني التلفون ده ماله كضم؟ وقلت اتكلم معاه عشان يفهم الظروف كان يخلي الدلع وعدم المسئولية ده شوية. اها قعدت معاه وقلت ليه التلفون مابنقدر على فواتيره عشان كدي انا قطعته وانه البلد دي مابلد ابوي واني جيت واغتربت عشان نصلح ظروفنا ونرجع بلدنا، وانه لازم يخلي الكلام الكتير في التلفون ده.
قعد يرمي في دميعاته ويقول لي دي ماحياة اصلها وانه بيصحى معاي الساعة تمانية الصباح وانه بعد ماامشي الشغل بيقوم ينضف البيت كله وده بياخد منه وقت طويل وبيغسل العدة والهدوم وبيبدا في عمل الغدا عشان عشان عارفني برجع البيت زي الساعة اتنين وبمرق تاني لدوام المساء زي الساعة خمسة، وانه لما يخلص من الحاجات دي بيكون زهج من الوقفة طول اليوم ومافي زول ينضم معاه كلمة واحدة وقعدة البيت ليه براه بين اربعة حيطان قال حارة شديد عشان كده بيتكلم مرات في التلفون.
وقال ماهو البيضرب كل المرات وانه مرات راجل فلانة هو البيضرب ليه وبيتونسوا، وانه ماقاعد يضرب لي اهله الا مرة واااااحدة كل اسبوعين وبقينا في غلاط انا اقول ليه هسه انت يوم الجمعة الفات ماضربت ليهم وهو يقول لي ااااي لكن ده ماعشان ابوي كان راقد عيان وغلاط ونقة وكل مانتناقش يقول لي حسع انتي مالك بتكوركي فيني؟ والله بيني وبينكم كرهته وكرهت وشه وبقيت كان في طريقة البيت ذاته مااجيه بين الدوامين من عيشة النكد دي وعدم الفهم والاحساس ده.
اها بعد داك دورنا اسطوانة جديدة وانا قلت اكيد دي من راس راجل فلانة ديك، بقى يقول لي انتي قلتي انا ممكن اواصل دراستي وانا اقول ليه انا قدمت اوراقك وراجية الرد والناس ديل مابيردوا بالساهل اخير تصبر، اها بقى يقول لي خلاص طيب انا عاوز ذاتي اشوف لي شغل عشان قعدة البيت صعبة وعشان اساعدك انتي ذاتك. واريته ماقال الكلمة دي خلاني انفجر واطلع الحابساه جواي كله من زهجي منه.
قلت ليه والله ياها دي الفضلت انا اتعب اليوم كله في الشغل واجي البيت عشان اخت راسي وارتاح ساعتين واكل لي شئ قبل ماامرق تاني اها اجي كمان القاك انت شغال وسايب البيت لا نضافة لا اكل اصله هي القصة كان كدا انا معرساك ليه؟ اسمع ياراجل من الليلة تشيل من راسك فكرة الدراسة دي خالص وماعاوزاك تاني تقول لي عاوز تشتغل واهلك واصحابك ديل كان هم البيملوا ليك راسك بالافكار دي ذاتك تاني ماتتصل ب%
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
نواصل الجزء الاخير هنا ومعليش الظروف ماخلتني اتم الموضوع في قعدة واحدة
اها بعد الكلام ده كله بقت اسطوانة داير اقرا اسطوانة يومية وانا زولةً عنيدة وعشان كدي اي زول راسه قوي وداير يمشي كلامه ورايه علي مابينفع معاي اصله فقفلت ليه كل الابواب دي وقلت ليه تاني لو قلت دراسة ماتلومني في اي تصرف. اها ضربت لي امه وقالت لي الولد ده قال في بيناتكم شوية عدم تفاهم يااولادي، والحياة دي محتاجة صبر وخصوصاً انتو في الغربة. قلت ليها شوفي ياحاجة لو ماعاوزاني اتلوم معاك ارجوك تاني ماتتدخلي في امور حياتنا الشخصية وزهجت منها وقفلت ليها الخط في وشها من الزهج.
اها اليوم داك ماخليته ينوم من الدروس الاديتها ليه عشان بيحكي بامور حياتنا للناس، وقال لي انا ماحكيت لي زول غير امي والسبب انك اصلك مابتسمعيني وانك زولة متسلطة وانا لو عارف حياتنا كده ماكنت اتزوجتك، وهسه نحن ناس متزوجين لينا شهور اصلك وقت مادايراني اكمل دراستي ولا رضيانة اشوف لي شغل ليه ماحصل قلتي لي دايرة اولاد ولا مادايرة. قلت ليه اصله موضوع الاولاد ده ماتتكلم فيه تاني، انا جيت هنا اكون نفسي ومامتفرغة هسه لصرف على اولاد ولا لتربية اولاد، بس والبكاء بدا.
طبعاً بعد ده بقى ده موضوعنا الجديد الاولاد والولادة وطوالي في لحظة زهج من النقة قلت ليه لو عاوز اولاد امشي الديهم انت براك، ومن اليوم داك بقينا لا انا لا هو طايقين وشوش بعض، وبقيت اقضي يومي كله بره ولما اجي البيت بس اقرا الجرايد، لامن يوم جيت البيت لقيته قال عاوز يرجع السودان وعاوز الطلاق وطوالي بدون ماافكر مشيت قطعت ليه تذكرة السفر للسودان الدايره ده وحجزت ليه وسفرته في ظرف ايام.
اها ولي حسع اهله يضربوا لي في التلفونات عشان نتم الاتفاق على موضوع الطلاق وبقيت مابرد عليهم ذاتي ومخلياه معلق ماعارف روحه لسع معرسني ولا طليقي ولا يسمي روحه شنو، وانا مافارقة معاي وقت اصله الموضوع بتاع العرس ده موضوع شراء وبيع اها لميت القروش تاني وحسع خلاص دايرة اشتري لي عريس جديد غيره.
يلا ياجماعة الحشاش يملا شبكته.
ايمان
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
استريحي ليس للدور بقيّة انتهت كلّ فصول المسرحيّة فامسحي زيف المساحيق و لا ترتدي تلك المسوح المرميّة و اكشفي البسمة عمّا تحتها من حنين .. و اشتهاء .. و خطيّة كنت يوما فتنة قدسّتها كنت يوما ظمأ القلب .. وريّه *** لم تكوني أبدا لي إنّما كنت للحبّ الذي من سنتين قطف التفاحتين ثمّ ألقى ببقايا القشرتين و بكى قلبك حزنا فغدا دمعة حمراء بين الرئتين و أنا ؛ قلبي منديل هوى جففت عيناك فيه دمعتين و محت فيه طلاء الشّفتين و لوته .. في ارتعاشات اليدين كان ماضيك جدار فاصلا بيننا كان ضلالا شبحيّه فاستريحي ليس للدور بقيّة أينما نحن جلسنا ارتسمت صورة الآخر في الركن القصيّ كنت تخشين من اللّمسة أن تمحي لمسته في راحتي و أحاديثك في الهمس معي إنّما كانت إليه .. لا إليّ فاستريحي لم يبق سوى حيرة السير على المفترق كيف أقصيك عن النار و في صدرك الرغبة أن تحترقي ؟ كيف أدنيك من النهر و في قلبك الخوف و ذكرى الغارق ؟ أنا أحببتك حقّا إنّما لست أدري أنا .. أم أنت الضحيّة ؟ فاستريحي ، ليس للدور بقيّة........!
سلامات ياأيمان تحياتى واشواقى غايتو ماعارف اقول ليك شنو لكن مسرحيتك دى الا تعيشيها فى الاحلام
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: القلب النابض)
|
هافيه منك يا أيمان أخدتى لينا حقنا من الرجال
بس كلامك ده كثير يابتى مابنقدر كلنا عليهو, يعنى لما الواحده تشتغل فينا وتجهز حق العرس تكون عضامها ما أتلقت
انا بتغاظ من الاولاد البرسلو لأهلهم يجيبوا ليهم عده صور لبنات عشان يختار واحده فيهم, يعنى قرار الزواج الاول بعتمد على الشكل اول وبعدين المواصفات التانيه كما بحسسنى انو البنت ماعندها اى رأى فى الموضوع وعايزه تتزوج اى عريس مغترب وخلاص
عارفه لما اخوى كان ماشى السودان عشان يعرس مع انوهو برضو رسلو ليهو صور بنات عشان يختار منهم, سألنى قال لى عايزه شنو من السودان? قلت ليهو ولا حاجه بس ماتنسى تجيب لى صور معاك عشان أختار عاين لى بغيظ كده وقال لى ياهو ده الفضل
فتك بى عافيه واتوقع لك الزواج فى خلال 24 ساعه من الان
وحظا سعيدا وهارد لك يا القلب النابض
وفى امان الله
لا اله الا الله
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: saadeldin abdelrahman)
|
Quote: العروس يا دوبا ليها اسبوع في البورد .... جنس شففة لكن .... |
خير البر عاجله
Quote: من هسه...
عايز مكنة الحلاقه Gillete ام ثلاثه امواس مدرجه دييييك 3 والAfter shave يكون Brut أصلي 3
وكاان لقيت حاجه مضروبه البسي الخوذه ساي وشيلتك شيلي فيها شيلتك
non refundable |
شفتى الباب الفتحتيهو لينا يا أيمان?
اها أتصرفى وانا ما معاكم غايتو
وفى امان الله
لا اله الا الله
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: saadeldin abdelrahman)
|
اها يا ايمان دا الخايفة منو انا شايفة سعد الدين كتب الماركات ومكنات الحلاقة وكريم الحلاقة عااااااارفة انا القصة بتجر وفي النهاية قال(non refundable)قال. عرسة وخراب ديار, شفتي البتشرطوا ديل تشختي ليهم طوالي
بنت الاحفاد حبيبتي ما عرفتك والله انت بدل تقيفي معاي تطاوعيها شفت جنس المحن دي الوقعنا فيها دي يل بنات امي
وبعد دا ان شاء الله جابوا ليك الصور لو جابوهم ليك بعد تعزلي رسلي لي انشوف بس ما تكلمي زول.
ايمان والله الجماعة ديل بيكونوا بكتبوا في اللسته وبيبصصوا بعض كمان.
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
Quote: فاتمرن كويس
على قراية الجرايد وفرجة مباريات الكورة |
قصدك البري يعني? لا يا أختي عوجة تب ماف عندنا مناعة طبيعيه ومكتسبه ومضادات كمان ييني بينك شايل هم بنت الناس الناويه تنتحر معاي نكبتا حا تفوت نكبة العرب في 67
Quote: وبعد داك انا بلقى ليك مليون عروسة ارجل من ملايين الرجال |
ياحنينه الزواج قسمه وترباس بس
الكلام ده كان جاني من راجل حررررم علا اقع بيهو الدايمه الشده على الله يا بتي
انا
بشيل شيلتك
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: Elmuez)
|
Quote: بنت الاحفاد حبيبتي ما عرفتك والله انت بدل تقيفي معاي تطاوعيها شفت جنس المحن دي الوقعنا فيها دي يل بنات امي |
القلب النابض
هو الرجاله البتقبل بؤفر ذى ده ويشتروا حريتهم بالحاجات الجاهزه ديل ذاتو ماعايزنهم, وخلى أيمان تشبع بيهم والفيهم أتعرفت
الواحده ياحبيبه بتبحث عن الواحد الاحميها مش هى التحميهو وأخير يجيب ليها خاتم من حديد من جنس البهدله ده
Quote: وبعد دا ان شاء الله جابوا ليك الصور |
أنتى بتضحكى ياحبيبه? انا أخوى جعلى ما كويس ما ضبحنى تقولى لى جاب ليكى صور? عندى صور مناظر طبيعيه بتنفع?
وفى امان الله
لا اله الا الله
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: saadeldin abdelrahman)
|
الاخت العزيزة : ايمان صالح
شكرا لك على كل هذا الجمال..
وامنى نفسى والقراء ..بكاتبة ..متميزة وجريئة..وعميقة فى نفس الوقت(حتى وان حاول البعض من التعامل مع هذا البوست من باب السطحية)..
فما كتبته : يصلح لان يكون دراسة راقية فى علم الاجتماع..
وهو (فى تقديرى) يستعرض دراسة مقارنة بين (القديم والجديد) ..فيما يتعلق بقضية المراة..والافق الذى يقود الى تطورها..
لك مجددا منى كل الود ..
ولى قدام
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
تررم تررم...تررم تتتتترم
الو..
الاخت ايمان...
كبف حالك ،ان شاء الله مبسوطة..
معاك اخوك صديق الموج..اى المو ما الموت الموج ..الموج بالكاف
من امدرمان ..الثورة
لقيت اعلانك وانا مستعد وسيد بيت ممتاز
اكوى واطبخ واغسل عدة واعمل خبيز واجلد عناقريب كمان
ومستعد ..بس ما تنسى فى الشيلة الكلها عراريق وطواقى دى تجيبى معاك موبايل 3310
وانا ما عندى مانع ..مع انو متكلمين فوقى لكن حا افتح ليهن
صوتك بعيد...الو الو الو الو
كده كويس..لا سامعك
لا البامبرز عادى بعرف اغيرو واشد الملايات كمان وبعرف كمان الخلطة بتاعت فسخ الوش
بتنوفيت كريم +كريم كيلى+بوهلى+ديانا+كريسبدا..لا عادى
والحنة وحاتك رسام رسم..اخت حنة ما تخرش موية.
اى اوامر اخرى...
احش الرجلة افرم خدرة الا الكمونية لو شفتى زول نضفها يكون كويس
لا اتفقنا بس انت كلمى اطرافك وردى لى..
انت عارفة العرس دى ببدا بين اتنين لكن اخيرا ببقىFAMILLY AFAIR تلقى
رايك عندو خال وودعمك عندو راى وود خالة ابو الجاب اهل العروس عندو رائين
وكده ،المهم اذا اقنعتيهم التلفون معاك
ظيب سعدنا بسماع صوتك..واقول ليك انا كمان ملقى لى جك عشان العسل ده ما يتدفق
تسلمى...
اها اضرب ليك تانى متين عشان اخذ الجواب.
شكرا تصبحى على خير
بالمناسبة(لافى مناسبة ولا حاجتين) بعرف اعمل الريحة انضف ليك الضفرة ما اخلى
فيها لحمة طايره..والمحلب برضو..والقرنفل..والمسك اعرف ليك مسك التمساح من
مسك الورل...وبكفى الد.....وعندى ماستر نشاة حلبة.
اها لقيتنى كيف..مع السلام!!!كرب(دى ختت السماعة)
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: صديق الموج)
|
صديق الموج الله يجازي محنك قطعت مصاريني ياود الناس والله رجالتك سرت بالي ولقيتك اخو اخوات وسيد حارة وحرم الا ارسل ليك الجوال الطلبته وارسله ليك بشريحته كمان شفت النسونة دي كيف؟ وازيدك من الشعر بيت؟ ماتفتح للمتكلمين عليك ياخوي ماانت راجل والشرع محلل ليك اربعة مالك مخليهن؟ بس الرسول فوقك امشي اتعلم نضافة الكمونية عشان عيد الضحية باقي ليه شهرين بس وال CV بتاعك ده بدون كمونية مابيخارج معاي وبرجاك ياالغالي
ايمان
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: Abureesh)
|
ما تخليك فى علم إجتماعك ياخى وترحمنـا...
حولا!!!
الاخ : ابو الريش
اولا كل سنة وانت طيب.
حقيقة لم استطع ان اميز ان كنت تخاطبنى انا ام الاخ محمد ادم؟
عموما انا من كتب فما كتبته يصلح لان يكون دراسة راقية فى علم الاجتماع.)
وهذا هو رائى فيما كتبت الاخت ايمان( فانا اظن بان ما كتبته :يعالج فكرة متخثرة )..فحواها افضلية الرجل على المرأة..وارى انها قد تناولتها من جانب موضوعى (حتى وان كان قالبه السخرية)..ولكن ما وددت قوله :ان من تعاملوا معه على انه (مجرد خستكة)..بل وسعوا الى تحويل البوست الى (مسخرة)..وددت لفت انتباه كاتبة البوست الى ذلك..ولا اعطى نفسى كل الحق ..فيما توصلت اليه..
فذلك يرجع الى كاتبة البوست..فان كنت محقا فيما ذهبت اليه..اكون قد بلغت..
وان كنت مخطئا ..فلها ..ولكم العتبى حتى ترضوا!!
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
يا بت هوي و الله انا ما اديك العوجة خلي الكلام ده بعيد اكان هزار اكان جد انا لا داير قروشك لا داير شيلتك لا داير منك قرش اصلو انا مغترب و مليان قروش و عندي ثلاثة اطفال الاطفال عايزين يقروا في السودان مكجنين البلد دي و انا ما بقدر علي عيشة العزوبية اصلو عامل السن 48 سنة و الرلاطوبة اثروا فينا اها الحرمة وافقت مبدئيا علي الزواج مرة و اخري لو انتي جادة يومين تلاتة طوالي تكوني عروس ان شاء الله ما تمشي البروفايل بتاعي برسل ليك تلفوني كويس هوي انا كلامي ده جد جد و اصلو كايس عروس لاني مرتي اصيله و بت حلال اناس الحوالي كلها ما عايز تساعدني القي لي مرة تانية اها الله جابك لينا عديل اها اكان كلامك ده هزار شوفي لي واحد جادة و أنا جاهز
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
اها يا ايمان مع انو ما عندي نية اعرس واحده من السعودية ... وصوري اسه موزعه لواحدات في الامارات والكويت ...وسلطنة بروناي .. ان شاء الله يا الله ...تختارني بتاعة سلطنة بروناي دي ...
لكن ... ممكن اغير راي واجي معاك السعودية بس بصراحة كده يا ايمان انا عايز اطمن على مستقبلي معاك ...والاولو شرط اخرو نور * اول حاجة الشيك الخدري بتاع الراتب بتاعك يكون باسمي والسبب ياستي اني راجل شرقي خالص .. * ثانيا توريني عقد العمل بتاعك بنتهي بتين ما يكون عقدك قرب يخلص ولذا قررت تعقدي علي انا ..وتعقديني بالمشاكل بعدين .. واهم حاجة كمان يا ستي قولة خير وسد المال وهدايا الوالدة(ام العريس) يكونوا كلهم معتبرين لانهم والله تعبوا فيني شديد وصرفوا دم قلبهم على .. * اخر حاجة وما تزعلي انا عارف دايره يوصولك كل يوم لشغلك اكون صريح معاك الكريسيدا ما بتنفع معي .. والواضح ما فاضح ...مع السلامة ..
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: luai)
|
Quote: اها قمت مشيت سوق باب شريف وماخليت شئ، خمج شديد، اشتريت شيلة العريس من جلاليب وعراريق وطواقي للعريس وون مان شو الهلال رشو ولي الافترشيف وأمواس ومعجون الحلاقة جبتهم.
|
عرفنا الافترشيف وأمواس ومعجون الحلاقة المقاسات التانية اخترتيها free size ولا شنو ؟
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
اها دي القصة كااااااااملة
أول شئ عملته بعدما كملت الجامعة فكرت في الإغتراب لأني عارفة وراي حاتكون هموم الحياة والعرس وتكوين اسرة وتربية عيال، اها جيت السعودية واشتغلت شغل السواد وجريت جري الوحوش ولميت الريالات وحسع مستعدة للعرس.
رسلت لي ابوي يجهز العريس وقال لي اصلو دي مامشلكة يابتي عشان الاولاد راقدين ومالاقيين عروس تمرقهم من هموم الدنيا بس انتي جهزي شيلة العريس، اها قمت مشيت سوق باب شريف وماخليت شئ، خمج شديد، اشتريت شيلة العريس من جلاليب وعراريق وطواقي للعريس وون مان شو الهلال رشو ولي الافترشيف وأمواس ومعجون الحلاقة جبتهم.
ضربت لي ابوي وقلت ليه اها انا جاهزة انت لقيت العريس؟ قال لي انتي كان جيتي ومشيتي ليك عرس وااااحد بس بتلقي ليك عريس ود ناس ومؤدب ومستور، قلت ليه يابوي انا مابقدر اجي انتو شوفوا الولد وكان لقيتوه رسلوا لي الصور وانا كان عجبني بديكم رايي وانتو تعقدوا من هناك وترسلوه لي وانا في المطار بعرفه بالصور.
اها رسلوا لي صور لي كم ولد من اولاد الحلة ورشحوهم لي قالوا اولاد ناس ومن الجامعة للبيت ومن البيت للجامعة وهديين ورضيين ويومهم كله في المطبخ بيساعدوا في ابواتهم ومابيمرقوا من البيت الا مع اهلهم، المهم لقيت الأولاد صورهم حلوة ولابسين لبس حشمة فاخترت منهم اتنين وقلت لي اهلي اسالوا من اهلهم ولو عاوزين يكملوا قرايتهم قبل العرس وكده.
قالوا واحد من الاولاد قال ماعندو مشكلة موافق على العرس وممكن يواصل الدراسة وهو عريس، وانا قلت ليهم انا مابتوقف في الموضوع دا وبديه كامل حريته عشان يواصل دراسته ولو جبنا اطفال بساعده في تربيتهم وفي شغل البيت من طبيخ وغسيل عدة لحدي مايكمل دراسته رغم ظروف الشغل هنا دوامين وجري وبجي البيت هلكانة.
المهم ادوني تلفون اهل الولد قالوا عشان اتعرف بيه وفعلاً اتصلت بوالدته ووالده وسلمت عليهم وقلت ليهم عاوزة اتكلم معاه لو ممكن، قالوا لي والله يابتي نحن مابنحبذ المسألة دي خالص لكن انتي بت ناس واهلك ناس سيرتهم سيرة محترمة فبنديك تتعرفي بيه .
انا طبعاً لقيت الولد ده سمح شديد في الصورة وقلت اركز عليه هو عشان ده اهم شئ طبعاً، عشان مااجيب لي راجل يضحك فوقي الناس ويقولوا بعد فصاحتها دي كلها وفلسفتها دي مشت عرست ليها راجل وشو ينعل قفاه، فقلت اشوف طريقة كلامه واسلوبه عشان مايكون كمان تور الله الانطح ويضحك فوقي الناس.
اتكلمت معاه وانا شايلة صورته واعاين لي سماحته واقول ليه في الكلام السمح واغازل فيه، صوتك حلو، عيونك جميلة، انا من زمان بحلم براجل سمح زيك كده، وهو همه كله في القراية ويسأل فيني، انتي متأكدة موضوع اني اكمل دراستي دا مامشكلة بالنسبة ليك؟ وانا طبعاً بيني وبينكم ناوية ليه على نية، قراية شنو كمان البيكملها؟ انا بس قلت اتم الموضوع باي شكل ولما يصلني هنا بعرف امشيه على مزاجي زي ماكل النسوان بيعملن.
قلت ليه بالعكس، انا من انصار انه الولد يكمل دراسته قبل الزواج وحتى لو اتزوج يكمل دراسته وعشان كده انا ذاتي حااساعدك واقيف جنبك بس انت اهم شئ هسه تقول لي رايك عشان انا مستعجلة شوية في موضوع العرس ده، واحتمال ينقلوني لمدينة تانية ووظيفة جديدة فعاوزاك تكون معاي عشان نختار عفش بيتنا وحاجاتنا كلها مع بعض، ولا انت رايك شنو؟
قال لي والله انا من حيث المبدا ماعندي مانع خصوصاً اني عرفت انك من عائلة كويسة ووظيفتك في السعودية محترمة وانك مع فكرة اكمال تعليم الرجل دي، وكمان عرفت انك جاهزة من كل النواحي واظن ده بيوفر علينا وقت طويل، فماعندي مانع.
قلت ليه خلاص انا بتكلم مع امك وابوك وبتصل باهلي برضو عشان يكملوا المسائل دي بسرعة عشان اقوم اعمل ليك اجراءات الاستقدام عشان بتاخد ليها زي شهرين تلاتة كدي وبتصل بيك عشان نتفق على التفاصيل، يلا اديني الوالدة اتكلم معاها، قال لي كويس واداني امه وسمعت صوته بيتكلم مع ابوه وبعد شوية سمعت صوت زغرودة من ابوه وفهمت انه فرح عشان ولده وافق.
المهم قلت لي امه تتصل بي امي عشان التفاصيل عشان انا مستعجلة، وقفلت منهم واتصلت بي ناس بيتنا وقلت ليهم شوفوا انا ماعاوزة جوطة وصرف في الفاضي انا برسل ليكم الشيلة دي وتشوفوا ليكم اي ولد من اولاد الحلة يغني في حفلة دكاكينية كده وتتموا الموضوع باي طريقة سريع سريع ولو حسيتوا انه اهل العريس عاوزين يبالغوا وروهم اني عندي كم زول اترشحوا لي واني مستعجلة.
وفعلاً اهل الولد طبعاً حسوا اني عروس لقطة وخافوا الولد يبور وسدوا دي بي طينة ودي بي عجينة ورضوا بالمقسوم وعقدوا في صمت وبدون صرف، رغم اني كنت سامعة من اخوي انه الولد كان بيحلم بجلابية زفاف وسيرة وزفة ورقيص عريس زي حق عمر البشير البيعملوا داك، لكن في النهاية رضى بالمقسوم واتوكل على الله وقال اخير اعرس ولا اقعد احلم واطير العروس خالص من يدي واقعد اندم زي اولاد كتيرين.
اها بعد مااتفقنا على التفاصيل والاهل رضوا بالمقسوم حددنا التواريخ للعقد وقلنا حفلة الدخلة ممكن نعملها في وقت تاني لمن الظروف تسمح. ورسلت ليهم توكيل من قنصليتنا في جدة بعدما سلوا روحي وحققوا معاي التقول مجرمة مازولة بدفع ضرائب وبطلب عمل شئ من ابسط حقوقي كمواطنة.
الجماعة في السودان عملوا العقد وبقيت عروس رسمي بس ماشعبي وسكيت موضوع الاستقدام عشان اجيبه السعودية، وطبعاً مع الجري الشديد والصرف والمشغوليات بقيت مابقدر اتصل كتير، اها هو بقى يتصل ويقول لي مالك انتي بقيتي مابتتصلي ومابتقولي لي كلام حلو زي الكنتي بتقوليه لي ايام التعارف؟ ومالك بقيتي مابتشتاقي لي؟ وقدر ماحاولت اشرح ليه الظروف كان بيقول لي برضو مهما كانت الظروف يعني اكيد بتلقي ليك خمسة دقايق تتصلي بي فيها.
اها انا بيجاي قمت فتشت لي شقة براي عشان كنت ساكنة مع مجموعة طبعاً ولقيت لي شقة من غرفة وصالة وحمدت الله عشان الايجارات هنا مرتفعة شوية لو البيوت كبيرة، ومشيت الحراج محل بيع اغلب الاشياء المستعملة اشتريت لي عفش معقول وفرشت البيت بما تيسر، وقلت اخلي عدة المطبخ لمن هو يجي عشان يختار براه الشئ البناسبه.
المهم مرت فترة الاستقدام وادوه الفيزا وقطعت ليه التذكرة بالخطوط السودانية ناقلنا الوطني لانها ارخص من الخطوط السعودية طبعاً وحجزت ليه واخيراً جات لحظة اللقاء المنتظر وشلت الصورة وحفظت تقاطيع وشه سممممممح ومشيت المطار، بقيت اعاين لوشوش القادمين زي الرايح لي شئ واقول بري ده ماهو ده ابيض وده اسود، ده طويل وده قصير، لغاية ماشفت الجلابية واللبسة بتاعة باب شريف المابتغباني وعرفته ده زولي.
رفعت ليه يدي من وسط الناس وشفته مسكين مع الخجل وشيل الشنطة كل شوية الشال يقع من كتفه ويخت الشنطة يقيف يرفعه في كتفه ويصلحه ويدنقر يجر الشنطة تاني، لمن وصلني وسالمني وسالمته وباركت ليه قلت ليه مبروك علي انت، ضحك بي خجل وقال لي الله يبارك فيك، ومرقنا من المطار وركبنا لينا ليموزين على قولة ناس السعودية واتجهنا على الشقة.
جينا البيت وبدينا اخيراً الحياة الزوجية الكاسرين الناس رقبتهم عشان يعيشوها، زارونا زميلاتنا في البيت وبعض السودانيين المعارف والجيران وباركوا لينا، ومشينا السوق اشتريت العدة للمطبخ والملايات واكياس المخدات والذي منه، وبدينا النقنقة من اول ايام في السوق يقول لي الحاجات دي ماسمحة وحاجات رخيصة وهايفة ساي ولو في مراده يشريني الحاجات الغالية السماها اصلية.
بعد اسبوع قعدة في البيت ولاحظوا انا ماعندي اجازة اها قمت نزلت الشغل وبقيت كل مااجي البيت من الشغل القاه بس قاعد يتبكى اها انا انخلع واقول الحصل شنو ياربي ولما اساله يقول لي مافي شئ ولما اقول ليه مافي شئ كيفن مالك بتبكي؟ يقعد يقول لي انا بس كنت متخيل نقعد مع بعض اكتر شوية قبل ماتنزلي الشغل، ومرات يقول هو بس عشان مافارق اهله خالص من صغير ومشتاق ليهم ومرات يقول حاسس اني بعيدة منه.
اها انا بقيت ازهج من جنس الدلع ده ومااستحمل كل يوم بكاء ودموع ودلع وقلة ادب وبقيت اقعد احاول افهمه اني ماعندي اجازة عشان اقعد معاه في البيت اكتر وانه الشغل هنا مابيرحم وانه مفروض يتبسط عشان انا قعدت معاه اسبوع كامل في البيت، وافهمه انه الحياة كده وانه مفروض يستحمل بعده من اهله ويتفرغ لحياته الزوجية، وافهمه برضو انه انا مابعيدة منه.
البيت بقى يزهج من النكد والموبايل كرهته من كترة اتصالاته بي والسؤال، اها جاية متين؟ ماممكن نطلع لما تجي راجعة البيت؟ ممكن تجيبي معاك الشئ الفلاني؟ المكيف ده فوقه مشكلة، الخ... كرهت حياتي من اول شهر وكرهت العرس القايلاه بيريح بالي، وبقيت اجي القاه بس ماسك التلفون، يابيتكلم مع واحد من ازواج السودانيات الهنا الدخلوا علينا وبقوا اصحاب متين مابعرف، ياالقاه ضرب لي اهله يتونس معاهم.
النصيحة انا زهجت من الدلع ده وفصلت تلفون البيت عشان الفواتير كمان ماتعمل لينا هم جديد، وطوالي سالني التلفون ده ماله كضم؟ وقلت اتكلم معاه عشان يفهم الظروف كان يخلي الدلع وعدم المسئولية ده شوية. اها قعدت معاه وقلت ليه التلفون مابنقدر على فواتيره عشان كدي انا قطعته وانه البلد دي مابلد ابوي واني جيت واغتربت عشان نصلح ظروفنا ونرجع بلدنا، وانه لازم يخلي الكلام الكتير في التلفون ده.
قعد يرمي في دميعاته ويقول لي دي ماحياة اصلها وانه بيصحى معاي الساعة خمسة الصباح وانه بعد ماامشي الشغل بيقوم ينضف البيت كله وده بياخد منه وقت طويل وبيغسل العدة والهدوم وبيبدا في عمل الغدا عشان عارفني برجع البيت زي الساعة اتنين وبمرق تاني لدوام المساء زي الساعة خمسة، وانه لما يخلص من الحاجات دي بيكون زهج من الوقفة طول اليوم ومافي زول ينضم معاه كلمة واحدة وقعدة البيت ليه براه بين اربعة حيطان قال حارة شديد عشان كده بيتكلم مرات في التلفون.
وقال ماهو البيضرب كل المرات وانه مرات راجل فلانة هو البيضرب ليه وبيتونسوا، وانه ماقاعد يضرب لي اهله الا مرة واااااحدة كل اسبوعين وبقينا في غلاط انا اقول ليه هسه انت يوم الجمعة الفات ماضربت ليهم وهو يقول لي ااااي لكن ده ماعشان ابوي كان راقد عيان وغلاط ونقة وكل مانتناقش يقول لي حسع انتي مالك بتكوركي فيني؟ والله بيني وبينكم كرهته وكرهت وشه وبقيت كان في طريقة البيت ذاته مااجيه بين الدوامين من عيشة النكد دي وعدم الفهم وعدم الاحساس ده.
اها بعد داك دورنا اسطوانة جديدة وانا قلت اكيد دي من راس راجل فلانة ، بقى يقول لي انتي قلتي انا ممكن اواصل دراستي وانا اقول ليه انا قدمت اوراقك وراجية الرد والناس ديل مابيردوا بالساهل اخير تصبر، اها بقى يقول لي خلاص طيب انا عاوز ذاتي اشوف لي شغل عشان قعدة البيت صعبة وعشان اساعدك انتي ذاتك. واريته ماقال الكلمة دي خلاني انفجر واطلع الحابساه جواي كله من زهجي منه.
قلت ليه والله ياها دي الفضلت انا اتعب اليوم كله في الشغل واجي البيت عشان اخت راسي وارتاح ساعتين واكل لي شئ قبل ماامرق تاني اها اجي كمان القاك انت شغال ولا بتقرا وسايب البيت لا نضافة لا اكل اصله هي القصة كان كدا انا معرساك ليه؟ اسمع ياراجل من الليلة تشيل من راسك فكرة الدراسة دي خالص وماعاوزاك تاني تقول لي عاوز تشتغل واهلك واصحابك ديل كان هم البيملوا ليك راسك بالافكار دي ذاتك تاني ماتتصل بيهم الا مرة في الشهر وقدامي.
اها من اللحظة الوريته فيها العين الحمراء كترت الدموع لكن بقى مابيقول لي اصله بيبكي ماله، بقى الكلام بيناتنا ذاتو بالقطارة وريحني بيني وبينكم من النقنقة ووجع الراس لكن كمان انا المسخرة وقلة الادب مابتنفع معاي كيفن يعني يقعد ساكت وكل ماسالته سؤال يرد علي من طرف نخرتو زي الانا خدامة عنده؟؟
اها اقروا الكلام ده واحكموا براكم على البقت علي انا القلت ارتاح بالعرس وانتظروا اكتب ليك الجزء الجاي وشوفوا جنس الظلم الاتظلمته.
اها بعد الكلام ده كله بقت اسطوانة داير اقرا اسطوانة يومية وانا زولةً عنيدة وعشان كدي اي زول راسه قوي وداير يمشي كلامه ورايه علي مابينفع معاي اصله فقفلت ليه كل الابواب دي وقلت ليه تاني لو قلت دراسة ماتلومني في اي تصرف. اها ضربت لي امه وقالت لي الولد ده قال في بيناتكم شوية عدم تفاهم يااولادي، والحياة دي محتاجة صبر وخصوصاً انتو في الغربة. قلت ليها شوفي ياحاجة لو ماعاوزاني اتلوم معاك ارجوك تاني ماتتدخلي في امور حياتنا الشخصية وزهجت منها وقفلت ليها الخط في وشها من الزهج.
اها اليوم داك ماخليته ينوم من الدروس الاديتها ليه عشان بيحكي بامور حياتنا للناس، وقال لي انا ماحكيت لي زول غير امي والسبب انك اصلك مابتسمعيني وانك زولة متسلطة وانا لو عارف حياتنا كده ماكنت اتزوجتك، وهسه نحن ناس متزوجين لينا شهور اصلك وقت مادايراني اكمل دراستي ولا رضيانة اشوف لي شغل ليه ماحصل قلتي لي دايرة اولاد ولا مادايرة. قلت ليه اصله موضوع الاولاد ده ماتتكلم فيه تاني، انا جيت هنا اكون نفسي ومامتفرغة هسه لصرف على اولاد ولا لتربية اولاد، بس والبكاء بدا.
طبعاً بعد ده بقى ده موضوعنا الجديد الاولاد والولادة وطوالي في لحظة زهج من النقة قلت ليه لو عاوز اولاد امشي الديهم انت براك، ومن اليوم داك بقينا لا انا لا هو طايقين وشوش بعض، وبقيت اقضي يومي كله بره ولما اجي البيت بس اقرا الجرايد، لامن يوم جيت البيت لقيته قال عاوز يرجع السودان وعاوز الطلاق وطوالي بدون ماافكر مشيت قطعت ليه تذكرة السفر للسودان الدايره ده وحجزت ليه وسفرته في ظرف ايام.
اها ولي حسع اهله يضربوا لي في التلفونات عشان نتم الاتفاق على موضوع الطلاق وبقيت مابرد عليهم ذاتي ومخلياه معلق ماعارف روحه لسع معرسني ولا طليقي ولا يسمي روحه شنو، وانا مافارقة معاي وقت اصله الموضوع بتاع العرس ده موضوع شراء وبيع اها لميت القروش تاني وحسع خلاص دايرة اشتري لي عريس جديد غيره.
يلا ياجماعة الحشاش يملا شبكته.
ايمان
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: luai)
|
luai انت قلت الواضح مافاضح اها النقول ليك ياسيدي النصيحة لي الله انا زولاً جبهجي كان اموت بايرة مابقربو الكيزان ديل هم المعرسين ليها شنو؟ مايعملونا جواري او يعملوا لينا قانون جديد اصلهم فالحين في نجر القوانين لمصلحتهم ومعقول انت ترضى بالكريسيدا؟ بي وين عاد مع اللاندكروزرات ديك؟ اها ماتقوم تزعل الواضح مافاضح
ايمان
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
الأخت / ايمان تحيه وسلام والله الموضوع شيق وجميل بس فى حاجات مهمة انتى نسيتيها.. وين الدش البجيب المسلسلات المكسيكية التستمر خمس سنوات والديجيتال والأفلام الماسمع بيها وشرايط المصارعه القديمه وأجهزة الهاى فاى وأغانى زمان البكت المغتربات والعزابيات سنين طويله , الحاجات دى يا ايمان كان تخفف للعريس كتير وتشغلو فى أوقات فراغو وبعد شهر أو اتنين تلقيهو بقى زى خروف العيد القومه تغلبو ويقند فى كل حركه تقول شايل كبسه فى راسو , وما تنسى كمان تعلميهو لعب الكتشينه عشان فى أوقات الفراغ لو ما لقيتى واحده من صاحباتك تلعبى معاها يفرق ليك .
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
الفضلى نادية عيد سعيد وعمر مديد (وزواج مبارك)
التورية رائعة والاسلوب شيق رغم ان الموضوع قديم لكن الجديد هل لازال زواج المغترب يتم بذات الطريقة ان كان الامر كذلك فيبدو اننا لم نتقدم اجتماعيا خطوة للامام وبما ان الامر يخص في المقام الاول عزابة المغتربين فليهم تناول القضية بجدية واهتمام ايضا ننظر الى موضوعك من ناحية اخرى هل تتطلب الفتاة من الشاب ان يتزوجها مارايكم دام فضلكم
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: Emad Abdulla)
|
حا يحصل يا ايمان...انت قايلة ود تكتوك كان بيعلم الغيب... بس كان زول واعي وحكيم زيك كده...حا يحصل....البنات ماشات شاطرات...وماسكات بيوت والاولاد....متكئين علي الارائك...ولساتك طرف الحلة وما ناجحين...لما تضيفي علي الموضوع...كم سنة تجنيد اجباري...وخدمة وطنية...ومكابسة لوتري وسفارات بتلقي شمسن غابت
وأنا شخصيا أعرف بنت عملت بالضبط مثل ما اوردتي من سيتاريو... وتزوجت من تحب علي سنة الله ورسوله...وهي التي دفعت المهر... لكنها فضلت ان تقرضه زوجها قرضا حسنا وكذلك شيلتها وشيلتو سجلتها قطعة قطعة في دفتر وانا كنت شاهد علي الدفتر...لعلاقتي بهما القريبة ولا أعلم الآن ان كان الزوج قد سدد ما عليه من عراريق...ام اعتبرها ديون معدومة...ولم يكن الامر سرا ولم يحذروننا من كتابته لذلك أوردته هنا
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: nazar hussien)
|
إيمان طلباتي بصصيطه خلاس فيزة لأستراليا .. عشان اشيل العروص بعضين من الخليج ولا امريكا ما فرقت .. أنا أكمل قرايتى وهي تواسل دراصطها.. شيلة .. صكو.. ما دايرين.. الطبيخ وغصيل العضة على.. وعليها (العضه) ما قالوا تننكح المرأة لمالها... كايس لي واحدة تشيلني (شنته) ولومك علي أحاجيها كل يوم لومان تنوم.. قصرنا معاكم؟؟؟
| |
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
يا شباب الربة :
إيمان جات السعودية بي مهنة راعي CowBoy!!! يعني ما حا تقدر تعمل إستقدام !!!! ومهنتا قدرت تغيرا في الجواز بس لكن في الكمبيوتر بتاع الخارجية والجوازات السعودية ما قدرت تغيروا .. ما تدقسوا تستعجلوا ساي يا شباب لأنها البتعرسو بتقعد معاهو شهر واحد بس وتاني إلا يجيها عمرة !!!! وبعد شوية نبقا في رسلي لي المصاريف والحوالة ما وصلت وهدوم العيد صغيرة وشوية شوية تبقا في الطلاق الغيبي!!!
تخريمة : المرا ضربت تلفون لي راجلا المغترب ليهو جغلومية سنة ولا قدر يعمل ليها إستقدام ولا قدر يمشي ليها السودان أها ضربت ليهو تلفون قالت ليهو : يا خالد حمودي طلّع السنون !!! خالد راجلا ردها بالتلفون وقال ليها : والله انا خايفو يطلّع الجواز ويجي هنا وانا ما أشوفو خليك من السنون
| |
|
|
|
|
|
|
|