ليست عنصريه ولا انا بشايقى لكن عجبنى الشعر الشايقى لحد الثماله ولم ارتوى منه ؟؟؟ وارتبط الشعر الشايقى بالحنين و الحب و الارض و المزارع وحمل الشعر الشايقى فى طياته جميع المواضيع التى تهم الانسان السودانى البسيط .. والشعر الشايقى انتزع مكانه له وسط الشعر السودانى واتذكر حديث قاله الهرم الاكبر وردى عن شعر و شعراء الشايقيه وكان اهل الشمال من المحس يسمعون الشعر من الطيانه الشوايقه و قت الزرع وحش التمر
محمد الحسن سالم حميد هذا الرائع قال .... سوقنى معاك ياحمام
سوقنى معاك يالحمام
سوقنى محل ماالحبيبه
قريبه تراعى الغمام
غريبه الاشواق حبيبه
يجيبا منام فى منام.
وقال الشاعر خالد شقورى
الرسالة
وقفت بعد حلبت لبينة الشاي تكورك يا الحسن يا ام الحسن وينو الحسن لمن صفت رغوة شخيبات اللبن في حلتا المبني من طبق السكن واقفي في حوش البهايم ولسع تكورك يا الحسن جاها حسا من بعيد مارق من القاطوع ورا قال ليها خير يا الحاجي خير قالتلو خير تعال لي جاي دايراك تعنون لي جواب يا الراسي لي ولدي الخدير لا تبقي زي شافع السرير يقول لي زين آيمة زين وزين تبقي بعد شهير وان جاني يكتب فد سطير اقولو يا سجم السجم انا زي قرايتك ما قريت لكن عويناتي بيفرزن الوريقة البيضاء من لون القلم بعد المغيرب بي شوي جاها الحسن تعبان يسير دا العشى غنمو من الدرب سرقت ندي وشو الهجير سوتلو شايا بي لبن قرض معاهو حرف فطير قالتلو بسم الله قول واكتب وصيتي انا للخدير الزمن يا ولدي ماحقاهو السنين البعيش في الدنيا ما بعيش مرتين العمير فاضلي بس منو اليقين وانت طول في البنادر يا الحبيب لا متين تعال اوريك حق ابوك الجم حقيق حاج اللمين ان عرفتو بلا عمار يقولو ولدا عندو طين العلاج لا تنسي رسلو لي دحين العوينات آجناي شوفن ضنين سلامنا ليك مطرز للبنيات والبنين ولو الارض يا ولدي تنشال في الايدين انا كت برسلا ليكا في لوري الخزين.....
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة