أتقدم بخالص الشكرة للأستاذة سوناتا أحمد لهذا الأداء الصوتي الرائع
( نخلة . . . وتفـاصيل أخرى ) من ياتو باب يا نسمة تدخلي للوشوش لمّا الوشوش . . تتصافى تمسح صرتا ترجع طيورك من بعيد تقلع هدوم الغربة تزهد . . حُلتا تلبس جديد تفرح غصون طربانة جد . . من رجعتا والنسمة ترقص . . للنشيد بي طار وطنبور (وجريد) دلّوكة دقت دقتا لعروس جديد رقصت . . وشفّقت العريس وكتين تنت للجيد . . . ومدت رقبتا خُمرة . . وسَرُوكا وقرمصيص الليلة فرحانه العروس بي توب زفافا الحقتا
* * * تفرح قلوب ناساً بُساط من مُدّة ما ضاقت فرح من مُدة ما شافتلا عيد يا النسمة بيجوك البُعاد . . كاسرين شبابيك الجهات حازرين غضب هازي البلاد . . ولعنتا تفرح قلوب أُمات . . بكن تمسح دموعا الكبتا تضحك عجوز . . لمن يجو الأطفال قريب تتمدّ . . تفتح صُرتا لولي بوبا وقونقوليز بلح ونبق في البرطمانة الختتا وتتمطى . . تمسك حُقتا وتسف صعود والناس كُتار . . حوالينا . . تسمع حُجوتا
* * * وينبقَ ضو لو . . بقَ نورك يا وطن يا الله . . . لو بحرق شياطين الكجور يبطل سحر حيكومة جور تنفك عقدة شعوذاتك وبخرتا لو يصفى هزا الجو حيجوك يا سودانا من بحركِ . . أكيد شاقين مطارات اغترابك . . أو جايين على السكة الحديد وإن كان صعب نغسل من النيل التعب نمسح عرق غربتنا بي بشكير . . وإيد نستأصل الورم الحميد من فوق عيونا الألتا نشرب عِشق بلداً حبيب من ضِرِع نيل البحر اليابنقّط . . زي حليب نفرح . . فرح ساعة يجينا الهمبريب نلعن ظروفنا . . وعِلتا الفرقتنا أشتات (عذاب) مِن نُدرة أسباب المعيشة وقِلتا
* * * هي العلمتنا نكون قُراب وهي العلمتنا الاغتراب وهي الشايلة في زاتا زاتنا وخبتا قفلت علينا رموشا واتوصت شديد سمتنا . . ناس وادتنا لونا . . وقامتا وبكت صديد مع كل زول يمرق يفوتا . . ويمقُتا
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة