|
|
 عيد الضحيّة في الرياض .. والخروف (أبو كرتونة)!!
|
ممّاقررت قراري (النادم) بأن ابقى مغترب بعد ما سمعت المقولة الكاذبة (يامغترب يا ودغرب) خاصة في شقها الأول وبما اني ما من الغرب ومافي طريقة أبقى منهم فكرت في الاغتراب وبسهولة شديدة تم ذلك ما عارف ليه ؟!! حينها كان شقيقي المرحوم عثمان الجمري يعمل موظفاً بمستشفى القوات المسلّحة بالرياض وكان بعمل لينا زيارات علاج خاصة للوالدين والأخوات وانا جيت على ما اذكر مع شقيقتي الصغرى امال الجمري (مرافق) ومن ديك وعيك (واررووووووك) وكل انواع الكوراك .. المهم جيت السعودية سنة 1993 شهر اغسطس يوم 14 ومنذ ذلك التاريخ بقيت (مغترب) ومن التاريخ داك المقولة اتحذفت منها جملة (يا مغترب) وثبتت (ود غرب) مع خيارات أخرى كثيرة لم أحظى بأحدها ولم أفكر حتى في أن أحظى بها خاصة بعد أن اغتربت و(كجيت) المغتربين قلت ما في داعي اقلب حظ اصحاب الخيارات الأخرى ويا بخت اولاد الغرب بعدم تمكني من الانتماء لهم والاّ كانت امورهم باظت .. المهم من تاريخ اغترابي انقطعت عن العيد في السودان في البداية لأكثر من سنتين يعني اربعة اعياد مرة واحدة والوقت داك كنت عزّابي وكنت (مغبّي) يعني حتى الأعياد ما كنت حاسي بأي احساس تجاهها اياً كان الاحساس كان سمح كان كعب .. وعادة وفي اعياد الفطر بالذات كنا بننوم لغاية الساعة تلاتة العصر من يوم الوقفة بالليل ونقوم العصر نمارس حياتنا العادية بدون أي ملامح ليوم العيد .. امّا في أعياد الأضحى ففي العادة كان المرحوم عثمان يذهب باكراً ليحضر وبمعيته كرتونة محملة باللحم المقطّع وايضاً تمارس الحياة باعتيايتها الرتيبة بعد اكل وجبة لحم مشكّلة .. وطيلة تلك الفترة تصادف ان حضرت عيد الأضحى خارج الرياض تلاتة مرات احداهما كانت مع ابن عمي ونسيبي الاستاذ عماد محمد الحسن شقيق زميلنا الحبيب بسودانيزاونلاين عمر (القردابي) أو (القرضابي) كما يحلو للبعض وكانت تلك المرة في ابو ظبي التي تقترب كثيراً في ملامح العيد من الخرطوم في طريقة الذبح وشية الجمر ونضّيف الكرشة .. اما المرتين الأخريات فكانتا في السودان الحبيب وآخرها كانت العام الماضي .. وطبعاً وبعد أن دخلت (القفص) الذهبي في العام 2000 بقيت من أصحاب الضحايا أو ممكن نقول من (الضحايا) ذاتها .. لكن صادف وان التلاتة مرات الضحيت فيهم خارج السعودية كنت متزوجاً يعني مرتين واولادي معاي في السودان ومرة وانا مع اختي وزوجها في أبو ظبي وتلاتة مرات اخرى كنت في الرياض لكن عائلتي كانت في الخرطوم وكنت برسل ليهم حق الخروف من هنا وهم بيتصرّفوا بي هناك ( وبيني بينكم رسلت ليهم مرة واحدة بس المرتين التانيات ودوهو ليهم اخواني القاعدين في الخرطوم) ..
العيد الوحيد الذي صاحبتني فيه عائلتي في الرياض هو عيد الأضحى الأخير وقد بدأت مراسم الاحتفال بالخروف قيل أربعة أيام من العيد حينما ذهبت برفقة صديقي احمد عوض لشراء الخروف ومعاي عثمان ابني البكر ومرح البنت الوسطانية وايمن ابني الصغير وهم يتلهفون لرؤية خروف العيد ويعتقدون ايضا اننا سنقوم بحشره في ضهرية العربية وناخذه معنا للبيت (الشقة) الصغيرة التي تحتضننا .. وطبعا احبطوا بعد ان خابت توقعاتهم تلك وبالفعل قمنا بشراء الخروف وحجزوهو لينا في زريبة الخراف المباعة وكتبو عليهو بالبوهيه رقم 151 بعلبة بوهية بخاخ كحلية وذهبت على ان احضر صباح العيد لأخذه الى المسلخ (المقصلة) .. وبيني بينكم كنت خايف الخروف في الاربعة ايام دي يموت وللا تحصل ليهو مصيبة ومرات اقول يا ربي الناس ديل يكونوا بيدوهو (قش) وموية وللا بيكونوا شغالين بالمعروضات الما اتباعن وعشت اربعة ايام مرعبة جداً حتى جاء فجر العيد لأذهب ومعي عثمان ابني الذي كان ينتظر تلك اللحظات بفارق الصبر وايضا كان هناك صاحبي احمد عوض واخذنا الخروفين ومشينا باتجاه المسلخ الذي كان شكل الخراف في صف الدخول لملاقاة حتفها يشبه تلك الصفوف التي كنت اشاهدها في استاد الخرطوم يوم مباراة (المريخ والهلال) .. وطمأنني احمد عوض بحكم ان له تجارب في هذا الخصوص بان الصف بمشي سريع بس انا ما اقلق ودخلنا الخرفان في ستة مسارات كل مسار في ما لايقل عن 50 خروفاً ده غير المنتظرين برة والمذبوحات في الداخل والذي يفوق عددهم كل الموجودات بالخارج وادونا رقمين رقم لي وآخر لأحمد وربطو في رجل كل خروف رقم وبعد كده انت تتابع خروفك في هذه المسارات لغاية ما تشوفو دخلوه جوة وهناك في 6 غرف ذبح ولازم تركّز كويس عشان تشوف خروفك ودوهو ياتو غرفة وكمان في الغرفة الذبح باتجاه القبلة نعم لكن الخرفان مردّفة في بعضها ولو بقيت حريف وشفت خروفك عليك ايضاً ان تدق الزجاج الفاصل بينك وبين الضباحين (السيافين) وتشير ليهو علي خروفك وتلوح ليهو بي (خمسة ريالات) ومعاها ضحكة خبيثة وغمزة عين وبعد كده يرفعوه في العلاقات وتبدأ تسكو لغاية ما يصل آخر مرحلة وهي مرحلة التقطيع لأربعة أجزاء وأيضاً لابد من التلويح بنفس الفئة السابقة ومع نفس الضحكة والغمزة مع اظهار الرقم المعاك عشان يجتهد ويفتش ليك خروفك وانا عامل فيها الود شفت كنت متابع لي واحد والله في النهاية طلع ما هو لغاية ما اعصابي باظت والراجل شافني اتضايقت والخمسة ريال بقت في خطر اجتهد اجتهاد شديد حتى وجد ذبيحتي وقام بتكسيرها للأجزاء الأربعة وأكدت عليه بأن يضع الرأس مع اللحمة داخل (الكرتونة) التي تفرح بالعيد أكثر منا اذ ترى كمية من الكراتين يحملها عمال المسلخ وهم يهرولون باتجاه عربات المضحيين .. المهم قلت للراجل اهم شيء تخت لي الراس (النيفة) عشان اقنع نفسي اول حاجة باني ضحيت واقنع اولادي بان اللحمة دي حقت الخروف الاشتريناهو اليوم داك وكان ما مصدقني (اهندا الراس) .. وطبعاً الكمونية حظوظ يعني يا تلحق الجماعة المسؤولين في المسلخ وبرضو (ترشيهم) ويختوا ليك الكمونية يا يرموها وانا كنت من اصحاب الحظ الكعب ولم أحظى بالكمونية التي اعشقها بنهم رغم اصابتي بـ (القاوت) .. المهم بعد ما طلعت من المسلخ مشيت فتشت لي جزارة عشان يقطعوا لي اللحمة قطع صغيرة ومشيت لي جزارة الراجل قال لي حا اقطعها ليك وسط عشان اللحمة طازة بتسحب ايدي على منشار التقطيع وفعلاً قطعها متوسطة وجيت كملتو في البيت مع ام العيال وخالها (اخيها) فيصل وكانت تقول والله ده خروف هامل الوقع في يدنا انا وامير وفيصل ده وثبت كلامها بعد أن أكلنا أول وجبة منه في الساعة الرابعة والنصف عصراً علماً بأن المغرب في الرياض يؤذن له في الساعة الخامسة وعشرة دقايق .. بعدها نمت لغاية الساعة تسعة (والله بدون شربوت) بس من التعب والمجهود المبذول من خمسة صباحاً في سبيل ذبح خروف لا يتجاوز ذبحة وتقطيعه وتكسيره ونضّيف كرشته تحت النيمة او العمود وطهيه في الصاج الكبير وفي الحلّة وفي الكانون والشوايةوكمان بي كمونيتو في السودان الساعة ونصف .. لكنه الخروف (ابو كرتونة) ..
|
|
 
|
|
|
|
|
|
|
|
Re: عيد الضحيّة في الرياض .. والخروف (أبو كرتونة)!! (Re: امير عوض الجمري)
|
امير كل سنة و انت و العيال بخير
ياخي عيد الضحية بتاع الخرطوم بتاعكم داك زاتو انا عندي فيهو راي
العيد لو ما كان هناك في البلد ماهو عيد ابدا
الضبيحة تبدأ في بيت اكبر واحد في العائلة و تستمر الضبايح متواصلة تقيف تالت يوم العصر في بيت اخر عريس متزوج ، و قطع شك من رابع يوم العيد و انتا ماشي بكون في كمية من الاعراس و الحفلات و المناسبات ، و جية ناس الخرطوم و هم شايلين الصابون و الزيت و الحلاوة ، و رجعتم بي شوالات التمر و الفول .
يا سلام يا امير
منظر الباصات و اللواري و هي جاية قبل العيد بي يوم و يومين و فرح الناس بي التلاقي ، و الوداع بعد العيد و بكا النسوان و كواريك الشفع ، مع بوري تلاتة في الموقف و صياح المساعدية يلا يلا يلا ، و اهم شي صوت الابنص و كب النار و مسك الجاز خاصة لما الكوز يكون مكرب .
| |
|
|
|
|
|
|
|
|
|
Re: عيد الضحيّة في الرياض .. والخروف (أبو كرتونة)!! (Re: حمد فتح الرحمن)
|
اخي الحبيب حمد
كيفك يا غالي .. كل سنة وانت طيب ويا رب
يا حمد تضحّي زيّي كدي في السعودية وفي الدمام
ام رطوبة ديك عشان تطير ليك في راسك .
Quote: ياخي عيد الضحية بتاع الخرطوم بتاعكم داك زاتو انا عندي فيهو راي
العيد لو ما كان هناك في البلد ماهو عيد ابدا |
يا جماعة انتو الخرطوم دي قايلنها فرانكفورت ؟! والله ناس الخرطوم ديل زيّكم
والأصالة سودانية والمحنة ياها المحنة وكلهم جايين من البلد يا حمد وكلهم اولاد بلد.. لكن بيني بينك يا ابوحميد حق البلد محنتو زااااااااااايدة وطاعمة .
| Quote: الضبيحة تبدأ في بيت اكبر واحد في العائلة و تستمر الضبايح متواصلة تقيف تالت يوم العصر في بيت اخر عريس متزوج ، و قطع شك من رابع يوم العيد و انتا ماشي بكون في كمية من الاعراس و الحفلات و المناسبات ، و جية ناس الخرطوم و هم شايلين الصابون و الزيت و الحلاوة ، و رجعتم بي شوالات التمر و الفول . |
آآآآآآآآآخ يا حمد ما تقلّب المواجع
| |
|
|
|
|
|
|
|
|
 Re: عيد الضحيّة في الرياض .. والخروف (أبو كرتونة)!! (Re: امير عوض الجمري)
|
امير الجمري
اول حاجة عيدك سعيد ويا ربي كل أيامك سعيدة
تابعت قصة الخروف ابو كرتونة
وبصراحة اول مره احس بانو الخروف فعلاً ضحية كبيرة
| Quote: واخذنا الخروفين ومشينا باتجاه المسلخ الذي كان شكل الخراف في صف الدخول لملاقاة حتفها يشبه تلك الصفوف التي كنت اشاهدها في استاد الخرطوم يوم مباراة (المريخ والهلال) .. وطمأنني احمد عوض بحكم ان له تجارب في هذا الخصوص بان الصف بمشي سريع بس انا ما اقلق ودخلنا الخرفان في ستة مسارات كل مسار في ما لايقل عن 50 خروفاً ده غير المنتظرين برة والمذبوحات في الداخل والذي يفوق عددهم كل الموجودات بالخارج وادونا رقمين رقم لي وآخر لأحمد وربطو في رجل كل خروف رقم وبعد كده انت تتابع خروفك في هذه المسارات لغاية ما تشوفو دخلوه جوة وهناك في 6 غرف ذبح ولازم تركّز كويس عشان تشوف خروفك ودوهو ياتو غرفة وكمان في الغرفة الذبح باتجاه القبلة نعم لكن الخرفان مردّفة في بعضها |
منظر الخرفان وهي منتظرة دورها في الذبح منظر صعب
بالله ماحنيت عليهو وقلت يخلوهو ما يضبحوهو
لكن بيني وبينك ما دام كنت منتّظر ومتلّهف على الكمونية كدا
ما بتكون جبت ليهو خبر 
والجاتك في كمونيتك سامحتك 
عندك عدد واحد كمونية مجمدة مرسلة ليك من عندنا هنا رأيك شنو؟
| |
|
|
|
|
|
|
|
|
|
Re: عيد الضحيّة في الرياض .. والخروف (أبو كرتونة)!! (Re: امير عوض الجمري)
|
مسلسل ( الخروف أبو كرتونة ) فكرة وتأليف وسيناريو وحوار
وإخراج أمير الجمري ويتم عرضه اليوم الأول في العيد 00
الحبيب أمير الجمري 00
التحية وكل ( خروف ) عفوا 00 كل سنة وانت طيب 00 تابعت بتشوق
كبير هذا السرد التاريخي للحدث التاريخي للخروف ( أبوكرتونة )
ولقد أصبحت حقا أنت الضحية وليس الخروف 00 سبق وعشت مثل هذه
التجربة من قبل 00 تشتري خروف أب أربعة وتعود به في كرتونة 00
مع مودتي 000
| |
|
|
|
|
|
|
|
|
|
Re: عيد الضحيّة في الرياض .. والخروف (أبو كرتونة)!! (Re: عثمان سيد أحمد)
|
الأخ السيناريست والمخرج والممثل الفنان / عثمان سيد احمد
تحية قلبية وكل عام وانت بالف خير
Quote: مسلسل ( الخروف أبو كرتونة ) فكرة وتأليف وسيناريو وحوار
وإخراج أمير الجمري ويتم عرضه اليوم الأول في العيد 00 |
أيفتى ومالك في المدينة ؟! ده شغلكم يا يابا بس الخروف (الضحية) زي ما قالت انعام .. وكونه الهدف الأساسي للجميع في تلك الأيام جعلني اتعاطف معه واذكر محاسنه وهو ميتاً خاصة وان الملايين يحتفلون بموته بل ويهللون ويكبرون .. (ربنا يتقبّل منّا جميعاً) ..
Quote: التحية وكل ( خروف ) عفوا 00 كل سنة وانت طيب 00 تابعت بتشوق
كبير هذا السرد التاريخي للحدث التاريخي للخروف ( أبوكرتونة ) |
وبيني وبينك القصة موجزة جداً ومختصرة خالص وفي تفاصيل كتيرة بس خفت الناس تمل وقلنا نديها جرعة جرعة
| Quote: ولقد أصبحت حقا أنت الضحية وليس الخروف |
انا تراني عايش بس هو وأخوانو وينم ؟
Quote: سبق وعشت مثل هذه
التجربة من قبل 00 تشتري خروف أب أربعة وتعود به في كرتونة |
ايوة والله يعني حتى بعد موتو ما عايزين يكرموه .. والعجيبة يمشو يمزمزوهو ليك مزمزة الجن العجب الكمونية .. طبعا انا حارقاني كمونيتي الرموها ديك .. ويا انعام ضربت لي ناس الدي اتش ال قالوا لسة ما جاتم حاجة.
| |
|
|
|
|
|
|
| |
امير عوض الجمري
حمد فتح الرحمن
انعام عبد الحفيظ
عثمان سيد أحمد
فيس بوك
تويتر
انستقرام
يوتيوب
بنتيريست