|
ده عيــد شــنـو يـا تـلـفـزيـون الســودان
|
بالله ناس تلفزيون السودان ديل ما بيخجلوا من برنامجهم الواحد الشغال خمسة ايام متواصلة ولحدي اليوم
البرنامج هو كالتالي
صالون (استوديو) فيهو طقم جلوس فاخر واربعة أو خمسة او ستة ضيوف بتونسو وفنان او فنانة تقوم تغني اغنية لقطع الملل من الونسة
خمسة أيام والكاميرا ما طلعت الشارع في بث حي ولا شفنا الحدائق ولا شارع النيل ولا فرحة اطفال المساكين البتفسحو في المراجيح والحدائق
خمسة يوم والعيد في التلفزيون بين اربعة جدران وونسة ما فيها اي مضمون ولا ليها اي داعي
يعني كان بيكلف ناس التلفزيون شنو لو طلعوا كاميرا ولفوا بيها على الناس الغبش وقابلوا الاطفال بملابسهم الجميلة مش احسن من البدل والكارفتات الكثيرة دي
الله يرحم الفنان خوجلي عثمان وسهرة العيد القدمها زمان وجمع فيها كل الفنانين تقريبا
بالله الونسة في التلفزيون تقول ونسة بيت بكا
والميت هو المشاهد السوداني
ونحن مستنين يرفعوا الفراش
وينتهي العزاء بإنتهاء مراسم العيد
جمال السنوسي
|
|
|
|
|
|
|
|
|