وردي مات ؟؟ معقوله ياخ ؟؟ النيل التالت جفّ؟؟ قولك كلام تاني.. أكيد بتهظر.. طالب اللهفه. إمكن إشاعه أو ، دقسة إذاعه إمكن غلطه وجات بالصدفه الزي وردي بموت كيفن؟! هو الموت بس موت أجساد؟! وين العشق الصادق؟ مات؟؟ وين الناس الكان لها زاد في الأفراح وفي الأتراح في الأعياد وفي الميلاد في أحزان عيون الناس وفي الضل الوقف ما زاد أنا ، شفتو قبيل ، لافح توبو زي النيل التوب البلدي وحبوب سكينو وأيضاً مركوب حيموت كيفن ، و أنا شايفو نابت يا دوب؟! الزول الطيب وإنساني الدغري و ملهم وحقاني الوطن الشامخ ومحبوب أنا ، شفتو قبيل في صوتو كمنجه ولحن منضوم زي سبحة لالوب هدّاي الوطن الملتاع غنايو في كل الأوضاع العارف قدرو ومقدارو لا خانو وحاتك لا باع الحافظ عهدو و أسرارو لا باح لي غيرو ولا ذاع الهذب لينا قوافينا الرجّع فينا ما ضاع الزيو بموت كيفن؟؟!! هبّار أشراك المهووسين صبّار الوطن الما باعو غناي النخله الأبنوسه شاشايو في أصعب أوضاعو الزيو بعيش ما بموت جوانا وجملة سُمّاعُو بي فنو بعيش الفرعون لن ننسي مهما يكون الفقرا الناس العدمانين بقتاتو غناهو إن جاعو طرّاب أفريقيا يا حزنو كيفن حا تقدر إخضاعو؟ معروف بالدهشه وموصوف بالحنكه ، الدّربه وطول باعو الزيو بموت كيفن؟ الريحو بتملا شراعو الزيو بموت كيفن ؟! البرّ الوطن وأطاعو الزيو بموت كيفن ؟! الموت كيف إلوي ضراعو؟ الزكري ضراعك يا حبوب الياها عصيه علي النسيان يا أجمل و أشرف إنسان نعم إنو حق هو الموت هو الطايل أياً كان إلاّها جروفك ناديه جوانا يا فنان. بموت كيفن ؟!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة