ديمقراطيون وكت الفراغ . . حزب سوداني جديد

Quote: الاستاذ م. الملك و الاستاذ ما لقب في الحالة دي، اعتبرها توصيف حالة ان شاء الله سيد البوست يقبل لينا بالاستمتاع بالقراءة لكليكما ولكل من يأنس في نفسه المزاج لتناول أمر التدوين و انتقالنا عبر قرون من الطبلة و رسائل الدخان إلى عصر النت و المنتديات والمعلومة العابرة للقارات و السفر عبر فروق الزمن وخطوط الطول بضغطة على زر الموبايل كرسالة أو (رد) في بورض بكري تبراه العافية و يفتحها في وشو شقيق ما قبل (كسير تلج لا يخفى عليك)... و ان ما شالنا البوست و سعة صدر سيد البوست الما بتغباني، بيشيلنا بورد بكري، انتو بس ابقوا مارقين مودتي و احترامي

قصرو - و رفقاً بالباندويدث - لو نزلت النص ( مكتوب ) هنا البوست دا ح يبقى كم كيلومتر طولاً . . و بعرض بيت شعر حديث بس ، المشكلة التانية النص مكتوب بكم لكنة ( شامية ، مصرية ، سودانية وسطية ، فصحى ) . . و قرايتو - بالعين - ما ح تكون ممتعة زي سماعو - دا رأيي الشخصي - اها كيف الدبارة هنا ؟ . . ممكن نستخدم الاضان كـ ( اداة ) قراية و لا بنبقى اضينات ساي ؟
اعتقد - و قد اكون مخطئ - انو مشكلة المشافهة ما في وسيلتها او داواتها . . لا ياخ !! . . القصة قصة ( توثيق ) اولاً ، الشعر ، الامثال ، الحجى موجود بوجود الانسان تقريباً و رغم ما فيها من افكار صائبة، و نظرات ثاقبة " فإنها جميعاً كانت مجرد أقوال عابرة ، او محض امثال سائرة ، لا تشكل تركيباً فكرياً ، و لم ترتب تكويناً عقلياً. " * ، اضف لذلك محدودية الاتصال و التواصل بالمشافهة المجردة ، و قارن بالفرص الاتاحتا الانترنت .
اها مع الثورة التقنية و المعلوماتية ، و امكانات الكمبيوتر الهائلة في التخزين و التوصيل و التواصل ، الاضان دي ما جاء وكت اكرامها و اعفاءها من عيوب و علل المشافهة ؟ و رفعها لمرتبة ( فاعل ) عديل .
غايتو عندنا في التسويق بقولوا ليك " اغلب الفرص المرتقبة تكمن في الاذان " . .




-------
يا عزاز يا عزيزة
المقامات محفوظة ياخ ! . .سامحك الله يا اخية فقد قتلت اخاك بترقية غير مستحقة ، و رفعتي ذكره بالربط باستاذنا الملك مرة واحدة !! . . يا للهول !! . . دا مقام ذهول بذوب الدراويش الزينا ديل
المقامات محفوظة
و الدار كان ما شالتك نشيلك في رسينا ديل . . انت قايلة روحك هينة و لا هينة ؟
سؤال شخصي ممكن تجليهو عادي : الاخت مش برج الثور ( بنات ) برضو ؟
يا ملك ما بخذلك تب . . انت قايلني الحبشي - بالمناسبة انا ذاتي حبشي ( تثبت في حينها ) - ياخ انا ما بقدر التزم اكون جادي كوووووووول اليوم . . ساعةٌ فساعة يا حبيب . . مع ذلك و برغمه ملتزمين بخط الحزب . . اقصد خط البوست . . رغم اني من انصار الحداثة لكن برضو ملتزم بوحدة الموضوع و ح ارجع ليك ببيان . . لوكتها شاكر ليك بالجد وجودك في الساحة دي
و بالمرة نتآسى بيك و نصحح التصحيف و نحرر التحريف الوقعت فيهو في بوست المعيار عن " الدلكة دميرة هذا العام " و هي ( بالاخدر . . ايوة بالاخدر ) :
قراءة جديدة من تحت خيول الترك
من ظهر خيول المك
للدم السايل من قدح الدفتردار
الصحيح الحركة ( السايل ) و كان كتبتها ( السال )
و الدليل آلوا لو :

يطلع فارس درويش
يسارق الدم في الروح والجتة
يلبس علي شكل الارض مرقع
غابة وصحراء ونيل
يسارق الدم في الروح و الجتة
يملص درعوا في كرري
يلبسوا فارس بي كسكتة
ويخطط اوردة الجسد النّور
للنيل الوهج الازرق
شارعين ومحطة وغيم رحال

و الدليل :

والدلكة دميرة هذا القرن الواحد والعشرين
سارقوا الدم في الروح والجتة
يطلع مك من يات من حتة
تشرق شمس العرس الغابت
يمشي الحق ويخت الختّة
ما لاقيت من غير الصامد
ما لاقيت من غيروا البتة
يمرق حاضن الفعل السيد
شال نوار الثورة وحتّ

* بالمناسبة النص كتب قبل قيام التجمع الوطني الديمقراطي ، و هجرتو الى اراض الحبشة ( تقدر تقول : انو خالد مونيكا إتنبأ بيو بدون أي مجازفة تذكر ) . .