الحضر ( رحيق الأمكنة) في قناة الشروق أمبارح منو..؟

Quote: يالله ياالله شفت الشجرة والبحر, المعلومات الوفيرة والشرح المفصل القدمو , العم -نسيت اسمو- لتاريخ الرى المصرى وحى الشجرة. لمة النسوان- المشلخات- الجميلات فى ضل النيمة , الحكى عن شكل حياتهن, بكل بساطتا وجمالا الخالة الفنانة الهلالابية المعجبة بهيثم مصطفى .

خالتك الهلالابية دي متعتني ليك متعة عجيبة جدا طبعا .. ودا الاصل في الحاجات .. قلنا ليكم الهلال وما دونه كلهم هلالاب زعلانين ..
عمتك دي بتشجع الهلال من زمن كانو بيشلخو وبيدقو الشلوفه .. لي زمن هيثم مصطفى .. تقولي لي وارقووو ..؟
جميل عمك كان في الحكي بتاعو في الشارع .. والبيوت الناصية جدا .. والمدارس الابتدائية . التراب المكوم في الشارع وكسار الطوب ..
ياخ دي كلها تفاصيل الواحد يدفع دم قلبو ويعيش لحظة بس منها ..

Quote: الخالة اللذيذة, الاتكلمت عن شكل حياتهن فى الماضى وكيف انو مافى مرة بتمشى السوق تجيب خضار اواغراض بيت وقالت: رجال الزمن دة الواحد ناااااايم, مرتو تمشى تجيب الخضار وتجى تطبخو وتصحيهو ياكل. (دى عجبتنى عجب)هههههههههههه.

.. اللذ حاجة إنو قالت لو كان المرة زمان طلعت السوق راجله بدقها .. دي اكتر حته عجبتني برضو .. لكن بي تحت كدا حاجة نفيسه طنطنت ليها وقالت ليها هووي يا بت أمي والله زمان ماف راجل بيدق ليهو مرا ..

Quote: رحيق الأمكنة, برنامج فى غاية الجمال ووبيقدم معلومات قيّمة حتى الناس الفى السودان ممكن تكون غايبة عنهم. التحية لتلفزيون الشروق ولـ إيمان بركية , ولاعزاء لكل من هاجر ورحل.

.. فعلا البرنامج لامي يا ندى فهو ثقافي اجتماعي .. جغرافي .. حضرت حلقات كتيرة جدا .. حلقة حلفاية الملوك بالذات عجبتني شديد لانو كانت تعريفيه خالص .. وفيها شغل جميل .. فاتت علي الحلقة السابقة حقت حي الضباط حينا الامدرماني العتيق .. حضرت فيها زي خمسة دقايق ومن شكل الاسرة عرفتها وحددت المنطقة وين بالضبط ..
ايمان بركية اعتقد إنها وضعت في المكان المناسب جدا جدا من خلال البرنامج دا .. واعتقد انو الجاي منها كتير ومنتظرين زيارات حميمية وودية تنقلنا في كل لحظة ..
وقاتل الله الغربة يا ندى والمهجر ..