(غنت) .. (الهل) ما معاك .. (مصران الضحية)

Quote: بالمناسبة كل الاشياء الذكرتها انا معاك فيها الا بتاعة وبر الناقة دي يطرشنا

أنا غايتو ما عارف حبوبه دي استخدمت البتاع دا عوضا عن القطـن وناجراهو من راسة ساي وضربت معاها واللا علاجة دا زي حظ العمايا البقولوهو داك .. واللا الفترة بتاعت التمنينات دي كان زمن التسوي تلقى ..؟

Quote: بعدين انت البرويك بالشاي اسمو البخاري طيب البروي ليك الاحاديث اسمو منو

.. بخاري زاتووو لانو بيكون (بيلت إن) لانو لو الدوا حقو كويس .. بيقوم يعمل ليك (نفوذ) في الذاكرة .. ولما يعمل ليك نفوذ في الذاكرة بيعمل ليك تضخم .. وبتقوم طوالي تجتر البتاعات ..

Quote: بالمناسبة الازيار الخاتيها دي انا شربت منها وانا خالط في نص حلتكم كاااااااك

طبعا ممكن تعتبر نفسك من المحظوظين .. ياخ دا بيتنا بتاع الموردة زاتوووو .. إنت اصلك كنت بتجي الساعة كم ...؟ طبعا انا النهارية بقضيها في الشجرة دي فوق زي خدر بشير الله يرحمو.. دا برج المراقبة حقي .. والحتة البكون زايغ بيها من العالم دي كلها بالاضافة لي إنو عندي اصدقاء من العصافير فوق كم قمرية كدا وكم دباسة .. اتعودو علي واتعودته عليهم بعدما عملنا اتفاقية تقسيم الحدود وكل زول يلزم حدو وبلاش اعتداءات متكررة ..
بالمناسبة بتاعت إنك بتخلط لينا في حلتنا دي :
وإنت طالع على ايدك الشمال كدا أول لفه شمالك والازيار دي شمالك في نهاية الشارع الدخلت بيهو دا كنا بنلعب (ضمنـه) العصريات قدام بيت ناس الزين .. يعني الشارع بتلقاهو مرشوش من بدري جدا .. وكل الشباب قاعدين .. في واحدين بتلقاهم مدورين (قشة) شديدة جدا (ووازنين ) وزنه حلوة المهم يوم قاعدين كدا .. جات زولة سمحة جدا قاطعه الزقاق .. والزقاق ضيق وطربيزة الضمنه شبه قافله المكان المهم لفة المرة الأولى .. والتانية وماف زول انتبه ليها .. وشكلها عايزه تسال ومتحسسة .. المهم راشد انتبه ليها .. قام سأله على اساس إنها حالة نادرة في عصرية زي دي وأنا كنت اقرب واحد ليهو .. قالت ليهو عايزه بيت ناس دكتور حسين .. .. نحتنا راسنا خالص دكتور حسين في الشارع دا مافيش .. في حسين واحد بس .. المهم اقنعناها توصف لينا حسين دا عامل كيف ..؟ فعلا قعدت توصف في حسين الما بيغبانا .. وهو طوالي مدخلنا في حتات ضيقه زي دي مع الجكس .. هو حنكو سنين لكن مشكلتو بيوصف ليهم الوصف الجد جد
المهم بعدما وصفت البيت وشكلو .. ووصفت لينا أوصاف الما دكتور حسين طوالي سقناها قلت لي راشد إنت اقيف بي الباب دا وأنا بمش بالباب التاني اشوف حسين وين واكشكشو ليك .. طبعا الباب الرئيسي هو الباب القدامك جمب الازيار دا وبيفتح في الخور بتاع ابوعنجة راشد كان بيدق في الباب .. ومعاهو الزولة دي واقفه .. وانا دخلت بي جوه لقيت حسين لابس لبس الدافوري وشكلو عجيب جدا .. قلت ليو في ناس عايزنك بي الباب التاني ..
لما فتح الباب لقى راشد ومعاهو الزولة دي .. طبعا اتخلعت إنو دا زاتوو دكتور حسين .. حسب الوصفة الطبية حقتو والمكنة الفكاها فيها ..
راشد قاليها .. دا حسين لكن ما دكتور ولا حاجة كضب عليك سااي ..
...
ومن اليوم داك .. طوالي سميناهو دكتور حسين ..