1و2و3 وتلقى روحك في بلدك ومستمتع بوجودك وسط أهلك
أدناه تجربتي الخاصة في هذا الشأن الذي أصبح هو محور حديث السودانيين في مختلف مهاجرهم وهو متى وكيف نعود لحضن الوطن وهل تنجح التجربة؟ أسئلة بسيطة سهلة لكن الجواب عليها شاق وعسير لكن بالعملي نحكي واقع التجربة، التي نسأل الله إستمرار نجاحها: دعوة صديق للعودة لحضن الوطن: كنت أتحدث مع أخ صديق عزيز وهو بدار الغربة حيث كنت أقيم قلت له: ياخي أنا عاوز أقول ليك كلام مابقولو إلا عشان أنا بعزك وانت عارف كده وقلت ليهو ياخي شوف ناس عمي فلان وعلان ناس كباااااااااار نحن جينا لقيناهم في دار الغربة ومشينا خليناهم برضو قاعدين، لكن ياأخي الناس ديل بالتأكيد ما كانوا كبااااااااار لما طلعوا من السودان بل كانوا شباب وتزوجوا وهم بأرض المهجر والعيال كبرت وتضخمت الأسرة والمسئولية وقل الدخل وانقطع المطر وووو ,,, فعشان ما يحصل علي أنا تحديداً ماحصل عليهم فقد قررت العودة منذ أكثر من 5 أعوام وقد وفقت بحمد الله قبل عام ونصف ونفذت فكرة العودة ، وقلت ليهو فكر في العودة ياأخي من هسع ، وعشان تنجح الفكرة بالنسبة له وللجميع قلت له الآتي: 1. القناعة القوية بضرورة العودة لحضن الوطن - لأنه بدون قناعة ممكن تحصل ليك ردة وتفتش للرجعة وسيحدث ذلك لامحالة نسبة لفارق طبيعة الحياة بين الوطن ودار الغربة. فلازم الزول يكون مقتنع 100% . غير كده ماتجازف. 2. الإعتماد على الله ثم نفسك، يعني لا تركن لمساعدة من أي شخص في تحديد هذا القرار الخطير جداً - بالذات لي زول عنده أسرة. وذلك حتى لاتصدم في أي إنسان إنك تكون وضعت آمالك فيهو وإنه حايساعدك ووووووو. وعشان تكون إنت الذي سيتحمل تبعات هذا القرار هذا أولاً ثم توقع أن أي شخص يمكن يخذلك بمافيهم أنا العامل صاحبك وصديقك ده، (من واقع الحياة وليس من طبع الناس - ظروف ياهندسة). 3.النقطة الثالثة وهي ترتبط بماذكرفي 1و2 وهي ضرورة وجود مصدر دخل ثابت يغطي منصرفاتك في حدها الأدنى إلى أن يرى مشروعك النور أو تلقى ليك شغل مناسب. وتذكر دائماً أن الناس سيطاردوك بهذا السؤال: يازول إنت الجابرك علي البلد دي شنو؟ ياخي إنت ماكنت مرتاح؟ (كنت أعمل في وظيفة مرموقة في مؤسسة مرموقة جداً فركلتها حين تمددت وأستطالت سنوات الغربة) وكنت أجاوبهم: أنا جيت عشان أولادي يتربوا مع أهلهم ويعرفوا بلدهم. لا أسمع ردهم على كلامي ولكني أعرفه: (الزول ده جن ولا شنو؟) وأنا أضحك في سري. يا أخوانا: أنا بعودتي كسبت: 1. صحتي: حيث إرتحت من الضغط النفسي الرهيب - سببه شنو أنا ذاتي ماعارف لكن أظن: ضغط العمل. هم الأهل وأنت بعيد طابع الحياة مهما كانت رغدة فنحن لم ننشأ ولذلك لم نتأقلم. وطلت فكرة العودة للوطن هاجساً إضافياً حتى عدنا بحمد الله. الآن وقد سارت الأمور بحمد الله، أسأل الله أن ييسر لهذا الوطن أمر رشد وإستقرار ليعود دوحة ظليلة تشرع أغصانها وأحضانها لكم بكل الود والحب والمودة والجمال والسلام. هامش: حيث أن أسباب الهجرة متعددة فكذلك دوافع العودة ولذلك قلنا: كل تجربة منفصلة عن سابقتها ولكن يمكن الإهتداء بها. فكرة هذا البوست كانت حاضرة في ذهني مدة ليست بالقصيرة تأخرت في نشرها حتى تنضج التجربة حركتها مشاركة في الربع الأخير إعتماداً على تجربة الأخ الطيب بشير(فقدت الرابط) وشاءت إرادة الله أن ترى النور بالأمس في بوست آخر للأخ بكري علي عباس نورده أيضاً لتعم الفائدة عزيزي المغترب ... متي تعود الي وطنك السودان (عدل بواسطة أبوعبيدة محمد الأمين on 02-11-2010, 02:16 PM)

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]