|
|
|
 Re: أُم غِزيّل (Re: أبوذر بابكر)
|
واتا ما هاميك نشافك
وتسقى فى الناس سلسبيلك
البريدك والبعافك
شربتن سمحه وهنيه
ام غزيل تبقى نيلك
تريانه ساهله
للسمع بيك ولا شافك
الله يفتح عليك دنيا وآخره ياأباذر ود بابكر.
| |
  
|
|
|
|
|
|
|
 Re: أُم غِزيّل (Re: Safa Fagiri)
|
الحبيب الشاعر ،
" من شوفتو طولنا "
نعرف أنك كالخشبة الطافحة قرب من أوشك على الغرق ،
ننتظر مجيئك ، من بعد ظلمات أهل السياسة وفقر ثقافتهم .
رجاءً سيدي
فاللغة العامية تحوجنا للتشكيل حتى لا ننطقها بما يخالف ما أراد الشاعر ،
ونتوه في دُنياوات اللغة :
أم غزيل خالته جنك
أو:
أُمْ غِزيل خَالتُه جَنِّكْ
أو بتعديل :
أُمْ غِزيل خَالاتُه جَنِّكْ
ألحقنا وأفزعنا يا سيدي
كبير احترامنا
وفوق الراس كلامَك
وكثير محبة فوق التسعين و " ما مزورة "
*
.
| |
|
|
|
|
|
|
|
|
|
Re: أُم غِزيّل (Re: عبدالله الشقليني)
|
الباهى عبد الله
وكسره كبيره ها إسم الجلالة
عشان تستقيم القافيه وجرس الإسم
أعذب من كسرات حسن عطية
ديك ال بالعود
والتانية الفى دار الرياضة امدرمان
ومن كلا الحسنين أنت فائز بكلتا الحسنيين
طرب و طرب
كيف الحال يا شقلينى
إنت تأمر يا سيدنا
ونحن حيرانك علينا المحبة والطاعة
وكان الله مد فى العمر فى باقى الليل ده
وبالكتير فى صباحاته البيض
بشكلا ليك تب
عاميتنا ودارجيتنا يا شقلينى بطرانه وخمجانه ومليانه
الناس ساى ما فارزين مشاهدا وطيب معناها
وجاييك تب بالخيرة
قول يا باسط
وتسلم يا صاحبى على حضورك الذى دوما يسمن ويغنى من كل شى
| |
|
|
|
|
|
|
|
|
|
Re: أُم غِزيّل (Re: عبدالله الشقليني)
|
لبيك يا شقلينى
النشكلا ليك
قبل التشكيل النوريك برضو كمان ال
Inspiration
جا اصلا مارق من وين
وأكيد بتكون سمعت المربعات السمحة ديك البتقول
أنا حلال رفيقو
أنا الدابى الرصد للزول بعيقو
أنا فرج الرجال وكتين يضيقو
وأنا المامون على بنات فريقو
والبعدو طوالى البقول، مع تشديد الياء
أنا الضل الضليل للداير يقيل
رحل الكحل وكتين يميل
أنا الرمد البخلى العين تسيل
وأنا الجن المخالتاهو أم غزيل
ناسنا هناك طبعا فى أطراف البطانة والمحلات القريبة منها
لامن يجو يقولو "الخلط" و "المخلوط" و "الخلطة"
بقلبو الطا، لى تاء
زى ما قال الشاعر فوق هنا
أنا الجن المخالتاهو ام غزيل
يمكن كده المعنى يكون اتفهم تقريبا فى كلامى أنا
يلا النشكل، وبركز على الكلمات الغريبة الما مطروقة أو مسموعة كتير
دربك مارق منك
ديدابًا شاقى
بطون السفر الطال
وحلمك شارب حِِنّك
من محاحاة الحروف
الطارن وحامن
وتّلن وركّن
ومن الطارن تانى
سدّن عين الوجعه
والفجه عَلال
وام غِزيّل خالتََه جِنّك
معطون زى طين الجداول
الجاريه زى دم الشرايين
فى الجروف
لافحه توب الفرحة ماشه
جيهة الدّوبَن غبينتك
وغيمة الريد المحال
هاطله مطرة
من تيبار سحابه
صابه للقعدن رجنّك
وجاريه كابه
الغناوى
والمسادير
الحكاوى
والطنابير
المسافات
والمشاوير
والفجة علال
ودربك مارق منك
ماشى يساسِق
تالا فُرقان الجمال
الراجيه منك
فرحة فزعه
وام غزيل خالتَه جِنك
واتا لا هاميك نشافك
ساوى درب المويه رجعه
خاتى مقدافك مقام
فوق جروفك
فوق ضفافك
وام غزيل تبقى نمه
سايله زى شعر البنيه
ام غزيل تبقى ضمه
فى سِدور أُمات نديّه
واتا ما هاميك نشافك
وتسقى فى الناس سلسبيلك
البريدك والبعافك
شربَتَنْ سمحه وهنيه
ام غزيل تبقى نيلك
تريانه ساهله
للسمع بيك ولا شافك
شبعانه مواسمك
حامده شاكره
نديانه ماهله
ونورا نورك
جهْرة فوانيسك دليلك
أم غزيل خالتَه جنك
تبقى عِينَه
تسقى جيهات اليباس
بالمطيرات الحنينه
تبقى منها
تبقى منك
ابقى ماشى
شِدّو سرجك
فوق غناك
نِِمْ ودوبى وقول هديلك
واملا خُرجَك
من مُناك
شتِت الأحلام كرامه
أدى روحك والمعاك
من زُوادة الروح بَلِيَله
ومن صباك
وابقى سادِر فوق عديلك
| |
|
|
|
|
|
|
|
|
|
Re: أُم غِزيّل (Re: Osman Musa)
|
عثمان الجميل
كيف حالك
يا البيك نور اقليمك
أنا موجود والله معاكم وفيكم وبيكم
لكين الدنيا حوالينا بى جاى وفى جيهاتنا
نشفانه راقده كركعوبة
وطاقانا قهبونة الليامات دى
تنجض القنقر
ان شاء الله انت طيب والمعاك
| |
|
|
|
|
|
|
| |
أبوذر بابكر
محمد المرتضى حامد
Safa Fagiri
عبدالله الشقليني
Osman Musa
حبيب نورة
فيس بوك
تويتر
انستقرام
يوتيوب
بنتيريست