من جماليات منبر بكري أبوبكر "بالمناسبة الزول دا وين ما يظهر ليك إلا في الأرشفة الربعية تقول فاتح مكتب محاسبة قانونية" إنو مرات كده وهو في الواقع واقع إفتراضي – المنبر – يعني زي المرايا تعاين فيها تضحك أو تزعل أو تبحلق هذا شأنك وقطعاً سوف تجري أو تعمل لوق أوف وبالضرورة تجي راجع تاني ما بقيت الباسوورد التي منحك إياها الأدمنيستريتور صالحة للإستخدام الآدمي. وهي بتوريك في كثير من الأحيان حقيقتك شعرك شاب الصلعه سرحت الجضوم إتنفخت العيون عمشت كل مراحل التحول الفسيولوجية (مش بسموها كده) ، لكين زي ما بيقول الفرنجة wait a minute مش دا برضو بيحرك معه الخيال يعني التحول القلنا عليهو دا ، ولا الحكاية حا تكون كبران بي جهلو يتحول فيسيولوجياً ويبقي فكره في المنطقة الواقعة بين كيدزويه وحمارويه أو بشرح أكثر تبسيطاً Kids Zoon وحٌمر مستنفره البورد أو المنتدي أو whatever مرات كده بزهجك كمتصفح أو متلقي حجج أو متداخل كسار تلج حتى ومرات كتيره بفك ليك الزهجة وحراق الروح وبخليك تضحك براااااك لمن الناس الحولك يقولو الله يستر ويغطي عليهو ، لإعتبارات أنك ربما مشروع جنكيز أو جنتره ، وممكن ناس وهم يفهموا التغطية دي لابد أن تكون لواحد بردان أو مكشف نظام يا ستار على. من طرائف وجماليات البورد أن بعض الناس قارشه ملحة بعض وربما يكونوا أصلاً ما بعرفوا بعض ولا شافوا بعض ولا أظن يشوفو بعض يعني زي أغنية محمد ميرغني لا بنساك ولا بقدر ولا عاوز .... وتحس أن بعضهم يمثل التكشيرة أو صرة الوش للتاني في ملعب كبير والكهربا قاطعه يعني عينك ما تشوف أصبعك وأنسي حكاية النور دي لأن الموضوع عاوز ليهو ربع ساعة تاني عشان نعرف نشغل الـ standby جنريتور ... أعترف أمام الله الواحد الأحد أنني كبشر ناقص يتنازعني الخير والشر فأميل لهذا تارة وذاك تارة أخرى كرهت أناس في هذا المنتدي دونما سبب وجيه وملت ميلاً بيناً أيضاً لآخرين دونما سبب ، ربما يكون جزء من كتابات هؤلاء وتفكيرهم وطريقة مداخلاتهم ومفرداتهم دور أو أثر في تغليب هذا الشعور على ذلك ، وأزيد أنني كرهت ناس بدون سبب مقنع يعني نظام من أول كحله "First Impression" وكده أها شوية شوية وبعد قعده كده زي ما بقول الفلاسفة بين المرء ونفسه تغيرت أفكاري تجاه بعضهم ومنهم من ينتظر. أيضاً عرفت بعضاً من أعضاء هذا المنتدي في الواقع وإن كانوا يجهلونني تماماً أو لا يعرفونني (نظام spy cam) فوجدت أن واقعهم يخالف في كثير من جوانبه ما يمثلونه سايبيرياً من شخصيات هي أقرب للكارتونية الكاركتيرية أو الخيالية قياساً بواقعهم..... المنتدي إجمالاً يكون موقعه منا بحسب إستخدام وأهداف كل فرد فيه وحتى لو أصبح إرتياده يمثل ضرورة للكثيرين من أعضائه سوف لن يكون مؤثراً في العلاقات بين القبائل أو قرار الوحدة والإنفصال أو سياسة تغيير العملة أو زيادة سعر الرغيف أو تغيير المنهج الدراسي أو إعادة الثقة بين الشعب والنظام الحاكم وخلافه فهذه أشياء بلا أدني شك واقعية لا إفتراضية وما يكتب هنا لا يتجاوز أرشيف بكري أبوبكر في أحسن الأحوال. هذه ليست دراسة يعتد بها إنما هي خطرفات وبعثرة لبعضاً من البعض وغوصاً في كتابات ومطالعات في منتديات سودانيزأونلاين دوت وات.
Quote: يضاً عرفت بعضاً من أعضاء هذا المنتدي في الواقع وإن كانوا يجهلونني تماماً أو لا يعرفونني (نظام spy cam) فوجدت أن واقعهم يخالف في كثير من جوانبه ما يمثلونه سايبيرياً من شخصيات هي أقرب للكارتونية الكاركتيرية أو الخيالية قياساً بواقعهم.....
الملا عمر....سلاااام
اها بالنسبة لى دا الانفصام بعينو
الكتابة دى مش برضو تعتبر سلوك?
يعنى بتعبر عنك بشكل او باخر,
مسالة انك هنا اسد ومقطعة ونازل فى الناس طاخ طراااخ فى الفارغة والمليانة وبرة عامل فيها طيب واجتماعى وتمثل دور المهذب ..دا كلام مابدخل لى فى صنقوعى دا
تحياتى
05-10-2010, 02:21 PM
ابو جهينة
ابو جهينة
تاريخ التسجيل: 05-20-2003
مجموع المشاركات: 22549
جلال بن داؤود إنت عارف أنا من زمان لمن يكون المراقب في الإمتحان بعاين لي برجف شوية كده زي الحرامي الفي راسو ريشه وتقرب شوية البيانات والمعلومات تطش ولكنها لاتفعل ، صحيح أن العبد لله يمتلك قدراً من الشجاعة الأدبية لكنها تبقي أقل تماسكاً في حضرة جلالك. جلال إبن داؤود أحياناً يحتاج الإبداع إلى مساحات يعني في ناس ما بتعرف تبدع في الزنقة زي لمن تلعب مع واحد مان تو مان ما يقدر يعمل حاجه وفي ناس بتعشق الزحمة والزنقة ودا نوع خطير قالوا فيهو زمااان بيعمل من الفسيخ شربات ، الآن ذات النوع ومن ذات سمك الفسيخ بيعمل شربات ومربى ووجبه غنية بالبروتينات وتيك أوي كمان إضافة إلى mask لشد تجاعيد الوجه وتفتيح البشرة يستخدم ما قبل النوم مع ضرورة التأكد من وجود خزان ماء إحتياطي لمواجهة طوارئ ومفاجآت الموية حبيبتي الموية ، وعلى المواطنين في محليتى أمبده والحاج يوسف عدم إستخدام القناع والإكتفاء بالشربات لوجود محاذير طبية في حال إستخدام القناع على الجلد مباشرة ، ومع شديد الأسف النوع دا بالذات أصبحوا يمثلون رابطة سائقي الركشات بالعاصمة والثورات لما يتمتعون به من مهارات ولولوة وتخطي للعربات وما إلى ذلك من مخالفات. أبا جهينه داوم على تشجيعي عسي ولعل أن أعمل من الفسيخ شربات فالكباية موجودة والفسيخ مخلوط والسكر ما كفاهم وباقي زي ما قال الغفير "كان رجال سوطو" الله يكفينا وإيامكم شر السواطه.
05-10-2010, 02:50 PM
almulaomar
almulaomar
تاريخ التسجيل: 07-08-2002
مجموع المشاركات: 6485
أميره تحياتي صنقوعك دا expression دخيل لم أجد له تفسير في قاموس ويبستر ولا كولنز ولا حبوباتنا والحال كذلك أحسب (شفتي أحسب دي كيف شغال عداد بالفتح لكين) أن أميره عنت صنقورها فأخطأت وأصاب الملا وما بين إصابة الملا في الأنكل وخطأ أميرة في الرماية ضُمنه وقفلت. الكلام المكتوب في كثير من الأحيان ما بعبر عن الأسد النتر طارد النمل والباعوض لأن كثير من الأسود الإفتراضيه – برضو – هنا تتصرف بمبدأ من أمن العقوبة ففي ناس تخاف من القانون أو النظام أياً كان وفي ناس تحترم القانون أو النظام وما بين رقيبك الذاتي ووكيل الرقيب لابد أن يتم كسر مصيدة التسلل مرات ومرات لكن الموضوع خاضع لتقدير شخصي مش شخصي أنا طبعاً. وفيها يصفر الحكم وفيها يطنش عشان كده نذاكر كويس حكاية حسن والصفارة الفي كتاب المطالعة لأن فيها الكثير من العبر. دا غير أن المنبر بشبه ليهو غرفة كبيرة للشات أو قولي حوش شات وبالتالي كل واحد حا يعمل فيها الأجمل والأول والأعدل والأطول ودا بودينا توش لي حميدة – وهو من قدامي المحاربين هنا وصل لحقيقة أصل أعضاء المنتديات السايبيرية بصفة عامة ومنتدي سودانيزأونلاين in particular الأمر الذي جعله يكتب مقالاً بعنوان "سودانيزكضبلاين". كابتن عكرمه صديق من ألد أصدقائي وهو وسيم بما فيه الكفاية ليأكل الجو ويخرط البلي كلو من أول نظره ، أها عكرمه دا فضل في شات مع واحده إفتراضية لمدة شهرين ونيف (نيف دي علي كيف القارئ يعني تكون أسبوع تكون ساعه لا فرق) وكل ما يوعدها تخلف الميعاد وتفط سطر أها يوم كشحها ليها أونلاين فقامت وافقت تقابله وجهاً لوجه ويا ليتها لم تفعل ، فقد إعتزل عكرمة النت والشات وحتى الموبايلات وأداني اللاب توب خاصته بي باقي إشتراك الإنترنت وبقي فيلسوف
05-10-2010, 03:00 PM
Giwey
Giwey
تاريخ التسجيل: 09-03-2003
مجموع المشاركات: 2130
لا والله ما ياهو دا واحد تاني ، تعرف عكرمة دي نسبة إلى جده الرابع لأبيه "عبد الكريم" والراجل إلتصق به هذا الإسم ومن يومها لم يفارقه حتى أن أقرب الأقربين له يناديه بهذا الإسم وهو زول بتاع كمبيوتر هواية ودراية ودراسة يعني مزرره لي آخر زراره هذا بالنسبة لعكرمه الأول. شكراً لمرورك وإن شاء الله عكرمه الثاني يظهر أو يظهر من يعرفه.
05-10-2010, 04:01 PM
الطيب شيقوق
الطيب شيقوق
تاريخ التسجيل: 01-31-2005
مجموع المشاركات: 28804
تحياتنا الطيبات سيدنا الملا عمر.. اهو جبتها من اخرها ....قضيت حتي تاريخه حوالي 15 سنة اونلاين بعد وصول الانترنيت مباشرة الي مناطقنا وقبلها سبعة سنوات من خلال شبكة اليكترونية خاصة بي وحوالي 4 سنوات مع ناس كومبيوسيرف والاشياء الديناصورية والتي تجعل اخونا السوري والذي تامرك ستيف جوبز بتاع ابل يلعن سلسفيل مايكروسفت ...يعني ان تديناصورت اونلاين من كثرة التواجد الديناصوري و 90 في المائة وربما اكثر من معارفي خلال ربع قرن هم من نتاج علاقة الاسفير ....كنت في البدايات مبهورا متحمسا اخلق لمن اتواصل معه اسفيريا صورة وفق رؤاي انا من كتاباتهم ومع الزمن صرت احاول الا اخلط الاوراق بحيث ابحث عن وسيلة فيها بعض من روح (صوت مثلا من خلال هاتف ) واعيد قراءتي مرات محاولا ان اعرف حتي لا ياخذ الخيال مني ماخذا ... نسبة مستعملي الانترنيت في منطقة الشرق الاوسط هي 3.2% من مستعملي الانترنيت في العالم ونسبتهم مقارنة بحجم سكان المنطقة ذاتها هو 28.8% .. يعني ربع السكان في كل المنطقة يستعملون الانترنيت بصورة او اخري واعلي المجموعات التي تستعمله هي في الامارات العربية ومصر (حوالي 4 مليون معا مقارنة بعدد سكان المنطقة والذي هو 202 مليون نسمة)..ولذا فاستعمالاتنا هي هامشية عددا ولذا يجب الا نضخم من دورنا في كثير من الامور بحيث نظن اننا قوة ضخمة مؤثرة ونكتفي بتواجد عاقل متزن يجعل من سودانيزاونلاين منبرا فيه موضوعية بحيث يكون مفيدا بدل ان يضيع دوره في مشاحنات وتنميطات عشوةائية وقراءات خاطئة .. اختلاف الراي والتوجه السياسي لا يجب ان يجعل خطابنا عدوانيا وانما خطاب قادر علي النقد البناء وكشف المفاسد دون غلو وشطط
05-10-2010, 09:02 PM
طارق جبريل
طارق جبريل
تاريخ التسجيل: 10-11-2005
مجموع المشاركات: 22556
البهجة عمر كيفنك يا الحبيب اقولك شي يمكن انا متفق فيه مع بت الشيخ انا غلبني ابقى طارقين واحد أليل سايبر وواحد تاني في هبوب الله دي انا ياني انا لاني عايز اكون احسن من هسي ولا كمان اكعب ياني طارق وليد عشة بت ابو دية الله يرحمها الفي البروفايل دي وعاجباني رويحتي كدي الجاني في بطن داري حبابه والكمان ماهو دايرني الله يعدلها عليه شقيش يقبل بس ماني قادر ابقى اتنين كله كله
05-12-2010, 07:41 AM
almulaomar
almulaomar
تاريخ التسجيل: 07-08-2002
مجموع المشاركات: 6485
طارق جبريل تحياتي طبعاً لا يمكن أن يكون الناس هنا كلها وشين وش بطانه زي الفي البوهية ووش أى لون علي كيفك بس في آخرين طالما جبنا سيرة البوهية والمقاولات العامة مريحين رقبتهم وحنان المستعمعين بأن أبدلوا البوهية بورق حائط يعني لصق ليس إلا. كل أمور البشر تحتمل الأمرين الجيد والسئ الحُسن والقُبح وبالضرورة المنتدي وبقيةالمنتديات ليست إستثناء. فلابد أن تجد فيها ما يفيد جمباً إلى جمب مع ما يؤذي وفي بعض الموضوعات هنا يا ود جبريل لمن تقرأها بحاكي حالك نكته المسطول القال أصعب موقف هو أن تحلق دقنك وأنت بتلوك في لبانه. ود جبريل الموضوع في النهاية مرض تسميهو إنفصام إنفصال شيزوفرينيا جنون مبكر هو مرض مدمر وأياً كانت أسبابه فهي غالباً ما تكون في إطار الشعور بالنقص أو الخبث وسياسة خداع الاخرين
05-12-2010, 10:23 AM
almulaomar
almulaomar
تاريخ التسجيل: 07-08-2002
مجموع المشاركات: 6485
ود شيقوق كتر خيرك في مضاربنا نختزل الهمزة بالرغم من أننا لا نفرق كثيراً بينها كحرف يكتب في أم الكتاب حتى وبين الذين توعدهم الله بالثبور والعذاب في محكم تنزيله فيأتي عشاءنا عشا إن كان لبايتات أو مقيلات وبدون همزة حتى وإن أفتانا سيبويه أوالفراهيدي بأنه يمكن أن تنقلب إلى ياء كراهةً. ما أفعله هنا يا ود شيقوق كلام خارم بارم لأنني من الناس الذين كانت وما أنفكت مجالسهم الضلله وأركان المنازل الناصية وبخاصة تلك المطلة على شارع رئيس ظلط كان أو ظلط لس فنتحدث ونخوض في حديث يقطعه موقف live فنقوم بالتوقف الإضطراري لمعالجة الموقف وتناوله وربما ننسي العودة للموضوع الأول وحتى في خضم تناولنا لهذا الموضوع اللايف يأتنيا موضوع أكثر ليافة منه فنترك الأول لنتشعبط بتلابيب التاني وهلم... عشان كده الموضوع ليس نقداً ولا دراسة متخصص لكين وكما يقول الندماء كلام زعل ما بتقصدو ولا تؤاخذوا الملالي بما يقولون.
بعد جدع السلام والمطايبه والتى قست أن تكون هاتفيا لصعوبة الوصول إليك وكدت أن أستل كتلوج عمر عليه رضوان الله وأنادى يا سمى عمر أصنت وأصب ما كان من شوق بلا تردد ويا أيها المله منبرنا روعه وفيه من جميعو وكل ما تطلبه فى الملجه تجده فيه إلا أنه رابطنا بوثاق غير مرئي وجميعنا فيه بشخصيات عده نتدور ونتكور ونتحور وفقا لموسيقى الظرف فيا صديقى سأظل أحاول حتى يجعل الله فرجا وسلامى لك وللأسره
منصور
05-12-2010, 12:31 PM
عفاف الصادق بابكر
عفاف الصادق بابكر
تاريخ التسجيل: 08-10-2009
مجموع المشاركات: 4188
أبو مهند شكراً أخي على المرور والتحية ، قلت لي رجعت بالزمن سبعة أعوام عجاف والله لكين نحنا هنا تقدمت بنا السنون وبالواضح كده عجزنا والحال كذلك يا سيد المنبر دا يقوم ينفحنا بترقية يا كمان يدينا أسهم في هذا المحفل الجامع نظام shares وكده زي ما بقول القانون الدولي
05-12-2010, 04:19 PM
محمد عبدالله حمدنا الله
محمد عبدالله حمدنا الله
تاريخ التسجيل: 11-24-2009
مجموع المشاركات: 616
. . يا أيها "الملا"... . . بعد السلام و التحية... . . . ما تعلمته من هذا المكان...هو ان "السايبر" لا يصلح على الإطلاق أن يكون مرآة صادقة للشخصية السودانية..دي فسرها بي راحتك... . . . . تعلمت أيضآ... . . أنه...لا تزال أمامنا العديد من السنوات الضوئية....فليس كل ما نحسه نقوله...و ليس كل ما نقوله نفعله... . . و أننا أمهر الأقوام في "طعن ظلال الفيلة"... . . . . مودتي.. ودحطب الله
05-12-2010, 05:09 PM
بدر الدين اسحاق احمد
بدر الدين اسحاق احمد
تاريخ التسجيل: 03-29-2008
مجموع المشاركات: 17127
مناهج البحث حقــت الجامعات ديــك مــا ( مقدس ) ...
انــت شوفك / قولك / احساسك / ... فى الحاجات المختلفات هو ( المطلوب ) ...
Quote: هذه ليست دراسة يعتد بها إنما هي خطرفات وبعثرة لبعضاً من البعض وغوصاً في كتابات ومطالعات في منتديات سودانيزأونلاين دوت وات.
النــص حقــك ده عايز قعــدة وقراءة مع ( بحتـــه إرشيفيــة ) بــس عشان نفهــم ونعرف الزول
(الملاوز ليــه اسمــو ده ) حين يعمل السايكولجــى ...
نلون بعض من نصــك ثم نعــود ...
Quote: من جماليات منبر بكري أبوبكر "بالمناسبة الزول دا وين ما يظهر ليك إلا في الأرشفة الربعية تقول فاتح مكتب محاسبة قانونية" إنو مرات كده وهو في الواقع واقع إفتراضي – المنبر – يعني زي المرايا تعاين فيها تضحك أو تزعل أو تبحلق هذا شأنك وقطعاً سوف تجري أو تعمل لوق أوف وبالضرورة تجي راجع تاني ما بقيت الباسوورد التي منحك إياها الأدمنيستريتور صالحة للإستخدام الآدمي. وهي بتوريك في كثير من الأحيان حقيقتك شعرك شاب الصلعه سرحت الجضوم إتنفخت العيون عمشت كل مراحل التحول الفسيولوجية (مش بسموها كده) ، لكين زي ما بيقول الفرنجة wait a minute مش دا برضو بيحرك معه الخيال يعني التحول القلنا عليهو دا ، ولا الحكاية حا تكون كبران بي جهلو يتحول فيسيولوجياً ويبقي فكره في المنطقة الواقعة بين كيدزويه وحمارويه أو بشرح أكثر تبسيطاً Kids Zoon وحٌمر مستنفره البورد أو المنتدي أو whatever مرات كده بزهجك كمتصفح أو متلقي حجج أو متداخل كسار تلج حتى ومرات كتيره بفك ليك الزهجة وحراق الروح وبخليك تضحك براااااك لمن الناس الحولك يقولو الله يستر ويغطي عليهو ، لإعتبارات أنك ربما مشروع جنكيز أو جنتره ، وممكن ناس وهم يفهموا التغطية دي لابد أن تكون لواحد بردان أو مكشف نظام يا ستار على. من طرائف وجماليات البورد أن بعض الناس قارشه ملحة بعض وربما يكونوا أصلاً ما بعرفوا بعض ولا شافوا بعض ولا أظن يشوفو بعض يعني زي أغنية محمد ميرغني لا بنساك ولا بقدر ولا عاوز .... وتحس أن بعضهم يمثل التكشيرة أو صرة الوش للتاني في ملعب كبير والكهربا قاطعه يعني عينك ما تشوف أصبعك وأنسي حكاية النور دي لأن الموضوع عاوز ليهو ربع ساعة تاني عشان نعرف نشغل الـ standby جنريتور ... أعترف أمام الله الواحد الأحد أنني كبشر ناقص يتنازعني الخير والشر فأميل لهذا تارة وذاك تارة أخرى كرهت أناس في هذا المنتدي دونما سبب وجيه وملت ميلاً بيناً أيضاً لآخرين دونما سبب ، ربما يكون جزء من كتابات هؤلاء وتفكيرهم وطريقة مداخلاتهم ومفرداتهم دور أو أثر في تغليب هذا الشعور على ذلك ، وأزيد أنني كرهت ناس بدون سبب مقنع يعني نظام من أول كحله "First Impression" وكده أها شوية شوية وبعد قعده كده زي ما بقول الفلاسفة بين المرء ونفسه تغيرت أفكاري تجاه بعضهم ومنهم من ينتظر. أيضاً عرفت بعضاً من أعضاء هذا المنتدي في الواقع وإن كانوا يجهلونني تماماً أو لا يعرفونني (نظام spy cam) فوجدت أن واقعهم يخالف في كثير من جوانبه ما يمثلونه سايبيرياً من شخصيات هي أقرب للكارتونية الكاركتيرية أو الخيالية قياساً بواقعهم..... المنتدي إجمالاً يكون موقعه منا بحسب إستخدام وأهداف كل فرد فيه وحتى لو أصبح إرتياده يمثل ضرورة للكثيرين من أعضائه سوف لن يكون مؤثراً في العلاقات بين القبائل أو قرار الوحدة والإنفصال أو سياسة تغيير العملة أو زيادة سعر الرغيف أو تغيير المنهج الدراسي أو إعادة الثقة بين الشعب والنظام الحاكم وخلافه فهذه أشياء بلا أدني شك واقعية لا إفتراضية وما يكتب هنا لا يتجاوز أرشيف بكري أبوبكر في أحسن الأحوال.
النــص اقرب للخواطر التى انتجــت للمسلميــن ( فى ظلال القران ) حيــن تجلــت النفس المؤمنــة
فى عصــر مـا فكان الظلال ...
خلينــى وانــا الذى لا اذكر اين ومتى وفى اى موضوع تداخلت معك ( سلبا/ ايجابا ) اسلك معاك الدرب
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة