كنا في رحلـة .. في جزيرة توتي .. ونحن في المرحلة الثانوية .. مسموح ليك بالدخول وقتها داخل الجناين .. شريطة أنك ما تعمل فوضى بالحاجات الجوه .. يعني كل شئ في مكانو .. وممكن يسمحو ليك بعد أن تطلب ذلك .. .. محمد صاحبنـا شليق جدا .. بعدما فطرنا .. مشى الجنينة الجمبنا .. وفيها منقة كتيرة قد حان قطافها .. وجنينتنا الكنا فيها كان شجر الليمون شايل .. سمحو لينا بي اي كمية من الليمون .. التلج عندنا والسكر عملنا كم حفاظة بتاعت عصير ليمون بعد ان اللزمنا كل واحد بعصر عدد عشرة ليمونات وكنا تقريبا عدد عشرين نفر .. محمد ضرب كمية من الباسطة المخصصة للتحلية .. ضرب ما يعادل نص صينية .. وهي معمولة بطريقة مركزة أو بي طريقة خاصة .. حيث تم رفع معدل الثمن البلدي .. والعسل وجوز الهند .. محمد لم يكتفي بالباسطة وعصير الليمون .. دخل الجنينة التانية متسحباً.. ولقى غفيرة نايم .. مع العلم إنو الكلام دا بالنهار ما بالليل .. ملص قميصو وعباهو كمية مبالغ فيها من المنقة بمختلف اصنافه .. البلدية ، والفونص ، والتيمور ، والدبشة.. اللحظة العايز يخارج فيها نفسو ويجي محل الجنينة حقتنا .. كمشو الغفير .. وكان الغفير منزعج جدا .. وهو يرتدي فقط (شورت) من النوع الرياضي في الوكت داك .. به خطوط بالجوانب بالابيض وهو بالاخدر .. وأرسل باقي جسمه عاريا .. يبدو من حديث الرجل إنو محمد حاول الهروب والجري .. في حين إنو الزول دا بي (فاراتو) دي .. كان لصقو تلاتة من (كاكي) مع بعض .. بيفوتم .. قاوم محمد القبضة الحديدة للرجل .. والزول كان ماسكو من قميصو بي وراء ومحمد بيفرفر .. وبيكورك .. جرينا بعدما سمعنا صوت محمد .. حاولنا نفك محمد من الزول دا .. وكان الرجل مصر إنو محمد حرامي .. لانو اتسلل وشال المنقة .. بدون اذن .. حاولنا نقنع الرجل إنو محمد ما حرامي لكن دي حركة منو .. اصر الرجل إن يودي محمد البوليص .. ودا حق مكفول ليهو من كونو أمين على المكان دا .. محمد بيعافر والرجل محكم القبضة .. هو يجر من مكان .. ونحن نجر من طرف .. بي باقي الحيل الفضل فينا أخيرا اقتنعنا إنو نسمع كلام الزول دا .. ونمشي البوليص حسب طلبو .. وقلنا نستعين بي صاحب المزرعة علشان ننهي المسالة دي وديا ندفع قروش .. المنقة دي .. ونخارج محمد .. اصر الرجل إنو البوليص بس .. في اللحظة دي انتبه محمد لي إنو فقد (فردة) الشبط حقتو .. قام قال للحارس: خلاص .. خليني أجيب شبطي .. قام الحارس قاليو .. في حرامي عندو شبـط ..؟
ملحوظة: - تم الإشرة إلى قصة الشبط والحرامي في مكان ما في هذا البورد قبل فترة .. - قصة الشبط والحرامي لا اعتقد أنها بايخـه للحد الذي لا يجعلك عزيزي القاري لا تقف عندها وتتأمل حال حرامي بي شبط .. وتعبير الحارس العفوي جدا .. ولك ايضا أن تتخيل حالنا ونحن نشمت في اكتر مريخابي في الحلة .. كان بيغيظنـا .. حتى ولو كنا غالبين المريخ تلاتة صفر ..
ملحوظة أخيرة .. البوست مشفر بنسبة تفوق نسبة الاكتساااح المشار إليها في مكان ما.. أو بنسبة تجعل من يقرا هذا البوست ليلا .. يموت من الضحك ..
04-21-2010, 01:35 PM
omer osman
omer osman
تاريخ التسجيل: 06-09-2007
مجموع المشاركات: 15218
Quote: ياخى دا لو كان جرا على البحر كان اسى تلقاهو فى بوست التوثيق بتاع معسكر العيلفون...
.. أفكارك بوليسية جدا يا اميقو .. بالمناسبة: في (بعاتي) هنا زمان كان في البورد دا .. يضحك معاك بالنهار بي إسم .. وبالليل يجيك بي اسم تاني يسمعك شيتا كتررر .. فما كان مني إلا وان .. جبت حبل .. وطبنجة .. حاول يجري لحقناهو طلقتين تحت رجلينو .. وقع .. كتفناو بالحبل كان ايام جميلة جدا .. لكن حسي الأمني .. رصد بعض التحركات القديمة .. والتحركات المريبة جدا .. بس في تحركاتو دي ما كان عندو شبط .. ودا بيرجعني لي نفس السؤال ..
Quote: العزيز علاء والله سلامات واخبارك؟ طبعا ماممكن اتخيل الحرامي (شـــبط ) مستحيل
.. سلامات يا هشام ووينك ووين الحي بيك ..؟ طبعا السؤال دا هو الكان محير الغفير .. استبعد مسالة إنو يكون حرامي وعندو شبط .. لكن ممكن يا هشام النشالين .. الواحد بيجيك قاشر .. ومتريح وحالق ولابس ليهو جزمة لون البنطلون .. وكان بعت القشرة اللابسة دي أو قيمتها ممكن تكون تكفيك مصارف شهر لي قدام .. المسالة كلها حرفنة يا هشام .. لكن شقي الحال البقع في القيد ..
04-21-2010, 02:20 PM
tmbis
tmbis
تاريخ التسجيل: 10-19-2002
مجموع المشاركات: 24862
... مرة يا جنابو .. فكوني ليك جمب الحيطة بتاعت مدرسة الموتمر الثانوية الجزو الغربي .. وكنت قدر حجر البطارية .. وكانت الغارة .. على شجر التمر هندي .. الجماعة الفكوني لما قالو يصلو العراضات بتاعت قلب الأسد .. أنا كنت وصلت البيت مرتين وجيتم راجع تاني
04-21-2010, 02:48 PM
ALZOLZATOO
ALZOLZATOO
تاريخ التسجيل: 03-14-2002
مجموع المشاركات: 4216
اها متمركز حوالين روضة الاطفال وهي روضة وارفة ظليلة تحيط بها اشجار التمرهندي من الاتجاهات الاربعة
وبها درابزين وترتوار بارتفاع متر كانت مرتع الطفولة ونجد كل هواياتنا متوفرة فيها من نيش الطيور او حفر الطين واستخراج الصارقيل لعملية صيد السمك
صاحبنا هذا كان نشطاو يبدا قبل صلاة المغرب بقليل يطلع من بيتهم وفي يديه ادواته الخاصة وهي عبارة عن كبريته وكيس به سكر وحلة ويبدا بحلب الاغنام التي ترعى في تلك الاشجار من الخارج ويقوم بتفوير اللبن وشربه لوحده يحلبه وحده ويفوره وحده ويشربه وحده عملية التفوير تتم بجمع كمية من فروع الاشجار الناشفة يكرر العملية في اليوم تلاته اربعة مرات وقد سمي في الحلة بالورل لالتصاقه الشديد بضروع الاغنام وبعد المغرب ترجع الاغنام الى اصحابها كما ولدتها امها لووووووولز
مشتاقين
زاتوووو
04-21-2010, 03:33 PM
tmbis
tmbis
تاريخ التسجيل: 10-19-2002
مجموع المشاركات: 24862
.. .. أوفر تايم يا حبه .. أوفر تايم بي توقيت الساحل الشرقي .. أحتمال يراعونـا.
Quote: وبها درابزين وترتوار بارتفاع متر كانت مرتع الطفولة ونجد كل هواياتنا متوفرة فيها من نيش الطيور او حفر الطين واستخراج الصارقيل لعملية صيد السمك
.. تعرف يا زاتووو حسع كان لقوك بتمارس في هوايتك دي ... الله قال بي قولك .. دي بقت فيها حقوق إنسان .. وحقوق صارقيل .. وحق الطير رحل خلاني زاتوووو تخيل يا عمك هنا في كمية بتاعت قمري عجيبة خلاص .. ولا بيطير من قدامك . في بنقالي بينشف ليهم الرغيف .. وبيدقو .. والقمري والدباس يجي يتلمو فوقو .. تخيل بلاي ..؟ والله مرة شفت القمري دا لمن (دمعته) .. ياخ زمان قمرية واحده .. تزازي ليها من عابدين شرف لحدت استاد الهــلال .. وكان نشتها والحجر وقع ليهو في بيت زول .. يعمل ليك فيها ولا بكري ابوبكر .. .. ياخ كنا بنطلع الصارقيل من النجيلة بتاعت بيت المامور .. (الاطرش الغفير) بيجي طالع من جوه البيت يكون مزازي بينا الحلة كلها .. بيسمع الحفر دا كيف ما عارف .. عليك الله دي طفولة دي ..؟ صاحبنا الكان بيجازف الغنم زي زولك دا .. لما رجعت السودان حسع دي لقيتو راسمالي وطني .. الله يديهو الصحة والعافية ويزيدو ما قصر معاي جاني في البيت اكتر من مرة .. ومشينا زرنا المحلات العجيبة الكنا بنمشي ليها .. غايتةو أنا ما عارف لكن شكلك دا ما غرب علي .. شفتك ووين .. شفتك وووين ..؟ إنتو نطاق التغطية بتاعتكم كانت لحدت ووين جغرافيا
04-21-2010, 02:53 PM
خالد عبد الله محمود
خالد عبد الله محمود
تاريخ التسجيل: 11-28-2004
مجموع المشاركات: 5393
والله يا خالد كنت قبيل بفتش لي لي مواد كدا من إرشيف البورد .. لقيت ليك جنس لفحي .. ياخ .. البورد دا زمان كان ممتع جدا .. ناس كتااار لفاحين .. الواحد يلفح ويجي يعمل ليك ثورات هنا .. غايتو كانو خامننا خم ..
حرامي القوقل يا خالد ما عندو شبط .. حرامي القوقل مقاس مافي .. لانو بتجول عبر القارات
04-21-2010, 02:59 PM
Osman Musa
Osman Musa
تاريخ التسجيل: 11-28-2006
مجموع المشاركات: 23082
العزيز علاء سلامات هو فى حرامى عندو شبط ؟؟؟؟ والله يا علاء الغفير كلامو صاح . والزول بالجد خبير فى الشغلات دى . يا علاء الزول يقصد الشبط ما هو لبس حرامى . الحرامى الجد مفروض يلبس ال RUNNING SHOES الرنق شوز دى ضمان . الساعة التفرتك من توتى وتكسح (اكتساح ) تانى ما بتقيف الا فى الباقير القدامى .
04-21-2010, 03:53 PM
عمران حسن صالح
عمران حسن صالح
تاريخ التسجيل: 11-26-2004
مجموع المشاركات: 10159
الحكاية دي مااااااااااااااااا واقعة لي !! يعني تقوم تخت (نقطة) ، سطر جديد وتدخل في العضم وإلا فقصصكـ حقت أولاد الحلة الزمان ديكـ ما لازمانه هنا ده .. ناقصين نحن ؟؟؟
_________ ما متضايق والله
04-21-2010, 04:12 PM
مزمل خيرى
مزمل خيرى
تاريخ التسجيل: 03-29-2009
مجموع المشاركات: 5652
.. .. عندنا جارنا يا مزمل الله يرحمو .. عمك في السبعينات كدا أو التمنينات من عمرو ونحن كنا صغار بنستمتع بي خدمتو .. (الشباشب) بتاعتو ولامؤاخذه كانت شهيرة جدا .. هي اصلا سفنجة لكن مصممين ليها (لستك) مطاط عشان ما تفارقو ندخل عمك دا جوه من المطرة .. نقوم ننسى (شباشبو) .. يقوم يكورك .. دخلو لي (شباشبي) .. أول ما يصحى أهم (جـرس) عندو (شباشبو) .. عندو (ود بتو بتاع) جلكسات .. كان أكبر مننا .. .. يوم شلنا عمك دخلناهو وكان نايم .. ولحقنا الدافوري .. قام جا صاحب جدنا دا .. عايز يضرب ليهو معاهو عشرة ونسة كدا .. دق الباب .. فتح ليهو (ود بت) جدنا دا .. قام قاليهو : يا ود جدك في ..؟ قاليو دقيقة اشوفو ليك .. مع العلم إنو جدو دا ما بيطلع اي حتة غير نشيلو نختو في الحوش وندخلو الغرفة ونوديهو الحمام .. قام دخل جوه وجاو طالع .. بعدما مسح الحوش وما لقاهو .. لانو دخلناهو الغرفة .. رجع لي الرجل دا في خشم الباب .. قاليهو والله جدي مافي .. لكن في (شباشبو) ..
04-21-2010, 04:12 PM
tmbis
tmbis
تاريخ التسجيل: 10-19-2002
مجموع المشاركات: 24862
عمران واسامة .. ح اجيكم راجع لو الله حيانا يوم السبت دا لو ام جو فتحو فيني بلاغ الليلة بالليل .. في زول عامل زي كبسور .. كلما الواااطه تليل يجي يفتح فيني بلاغ غايتو الله اقوى منو
يا عمران .. ياخ الكونيكتر وين أنا عايز اكون نفسي الايامات دي جيب لي الكونيكتر الوعدتني بيهو بعداك إن شاء الله ردخلو جوه السلك وأربطو مع التلفزيون
ما تفك التشفير يا عمران التزم بالقواعد العامة للبوست ما تتضايق
04-21-2010, 04:09 PM
محمد كابيلا
محمد كابيلا
تاريخ التسجيل: 11-15-2008
مجموع المشاركات: 3510
Quote: البوست مشفر بنسبة تفوق نسبة الاكتساااح المشار إليها في مكان ما.. أو بنسبة تجعل من يقرا هذا البوست ليلا .. يموت من الضحك ..
النسبة دى تموصا و ت .... زى ما عارف حا أجى اقراهو تاااانى بالليل عارفنى عندى عمى نهارى... عسي و لعل اضحك بوستاتك بقت تجي بي شروحاتها و تفسيراتها و حواشيها ... حليلك أيام كنت تفكها و هى لسه ما ظبطت .... اييييه زمن انت كان عندك شبط يا قرموط ؟ ... ما تكضب
04-21-2010, 04:47 PM
نصرالدين صلاح
نصرالدين صلاح
تاريخ التسجيل: 09-01-2009
مجموع المشاركات: 444
الحقيقة انا جني وجن سرقة المنقة السودانية من الحرامية السراقين ديل ياخي الحرامية ديل بقوا عقدة لكل من يريد ان يتنزه في حدائق افريقيا الوريفة وانا ابداً ما قبلت الحصل لي الزول صاحب تمبس دا لأنو مهما كان الراجل فردتم ومشي معاهم الحدائق المفروض يشفوفو اي طريقة عشان يخارجوهو
لكن في الرحلة الجاية لازم زولك يا هارون يعمل حسابو ويحاول يرجع السرقو كلو عشان سيد المارسيدس يقيف معاهو.
والسلام والمحبة دائماً بيننا يا ود دياب
الصادق
04-24-2010, 11:03 PM
haroon diyab
haroon diyab
تاريخ التسجيل: 06-20-2007
مجموع المشاركات: 23215
Quote: النسبة دى تموصا و ت .... زى ما عارف حا أجى اقراهو تاااانى بالليل عارفنى عندى عمى نهارى... عسي و لعل اضحك بوستاتك بقت تجي بي شروحاتها و تفسيراتها و حواشيها ... حليلك أيام كنت تفكها و هى لسه ما ظبطت .... اييييه زمن انت كان عندك شبط يا قرموط ؟ ... ما تكضب
.. كيف ما تجي بي شروحاته طالما إنو في واحدين بيجوك الساعة تسعة صباحا يقوليك .. اتعشيت ..؟ يللا شفت يا عصام البجو للعشاء بالصباح ديل .. عاملين زي الاشتر البرقص ليك قدام بتاع الايقاع في الحفلة .. لاتقدر توقف الايقاع ولا تقدر تغمض عيونك منو .. لذلك مستواك لازم يتدهور .. وتجليها وهي ثابتة .. شبط شنو ياخ ... أنا أول شبط امتلكو في حياتي كان من غازي بتاع الشباطة في الحلة .. والوكت داك كان طالع موضة خاصة بي اولاد الموردة .. الشبط التاني .. امتلكتو من الرياض قبال كم شهـر .. ياخ شبط والله العظيم ماركة .. مشتريهو بي قروش كتيرة خلاص .. لبستو مرة واحدة .. ندموني عليها .. وطلعو لي قرار جمهوري إنو تاني ما اللبسو ..
04-24-2010, 01:17 PM
tmbis
tmbis
تاريخ التسجيل: 10-19-2002
مجموع المشاركات: 24862
سلام يا شباب ادام الله عليكم الصحة والعافية والذكريات الجميلة خاصة زكريات الصبى موضوع تمبس الجميل دة ذكرنى بذكرة جميلة وحارة فى نفس الوقت حيث انى كل ما ارى اوكل ثمرة جوافة اتذكرة هى كالاتى كنا اطفال صغار فى حى الوابورات او حى الميرى كما يحلوء لكثيرين تسميتة ،وكانت هناك جنائن صغيرة فى نهاية المصلحة الحكومية تفصل بين حلة حمد والوابورات وكثر فيها اشجار الجوافة والبرتقال وحضرنا نحنا تلاتة اصدقاء وكان عمكم الغفير مافى وكان مولد بالنسبة لينا ،المهم واحد منا قال هو براقب لينا المكان اذا حضر شرطى بالرغم بان الشرطة لم تكن مشكلة حيث نحن ابناء الحى لكن الغفير هو المشكلة المهم انا استرجلت وقلتة للشباب انا بطلع وصديقنا الثالث بلم الجوافة بسرعة عشان نمشى بسرعة قبل الغفير ما يجى وبالمناسبة اليوم داك كان ساقين الجنينة وطبعا بحكم قربها من النيل طمى تقييل الشباب تحت شافوء الغفير من بعيد ذاقو براحة من غير اى حركة واخوكم فى قمة الشجرة المسكينة ذات الفروع الهشة وطالع كمان لسة لى قدام شايف لى جوافة صفرة كبيرة الطير نقر فيها ولمن وصلت الجوافة وكانت فى يدى لقيت نفسى فى الأرض قاطس فى الطين والوقعة من فوق حارة والغفير الشايل ليهو سوط من شجرة الجوافة المكلوج فى يدو تخيلو حالى مزنوق زنقة مافى انسان فى الدنية دى بحسدنى عليها المهم اخدت دقتى وكمية الشحيط الذى اهالو على عمنا الغفير وبالرغم من كدة لم تسقط الجوافة من يدى .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة