|
Re: ثقافة المبالغة عند اهل السودان (Re: abubakr)
|
ادعاؤنا بمعرفة كثيرة في كل المجالات مبالغة تقييمنا لاشياء حولنا دون تريث ودؤراسة مبالغة نظرتنا الي الاخر باستعلاء يمنعنا حتي من المطالبة بحقوق مبالغة تنازلنا عن حقوق اساسية مبالغة
| |
|
|
|
|
|
|
Re: ثقافة المبالغة عند اهل السودان (Re: abubakr)
|
صحبى الجميل المبالغة بقت سمة من سماتنا العجب لو شفت رجال شرطة المرور دى المبالغة التى لا بعدها ممكن يعمل ليك مخالفة وان تكون ماشى ابو الصاح زاتو وحصلت قدام عينى واتضح انه العسكرى كان محتاج لستين الف جنيه اخدها وضحك بعد اخدها قطع الورقة بتاعة الغرامة ؟؟؟؟؟
| |
|
|
|
|
|
|
Re: ثقافة المبالغة عند اهل السودان (Re: سلمى الشيخ سلامة)
|
ياصحبي الجميل
Quote: المبالغة بقت سمة من سماتنا العجب لو شفت رجال شرطة المرور دى المبالغة التى لا بعدها ممكن يعمل ليك مخالفة وان تكون ماشى ابو الصاح زاتو وحصلت قدام عينى واتضح انه العسكرى كان محتاج لستين الف جنيه اخدها وضحك بعد اخدها قطع الورقة بتاعة الغرامة ؟؟؟؟؟ |
انها المبالغة الكارثية فاكييد العسكري بتاع المرور شايف الاكبر منو رتبا ببالغو بدرجات فبالغ درجة ....
| |
|
|
|
|
|
|
Re: ثقافة المبالغة عند اهل السودان (Re: abubakr)
|
الاخ الفاضل/ abubakr سلام وتحايا،،
مجددا لك ولما تكتب وافر التقدير ، وما جئت به هذه المره فيه ما اجبرنا على حتمية الثناء، وما تقدمت به، فيه ما ننهل منه خيرا، تنصب خلاصتة فى نقد الذات قبل ان يقدح بها غيرنا، ومن الافضل لنا ان نرى انفسنا وما تعج به شخصيتنا السودانية من سلبيات... نسعى ان تزول من حياتنا، ان لم تكن فى الوقت الحاضر فليكن لاجيالنا القادمة، واجد ان كشف سلبياتنا وتصحيحها دون ان نجد لها الاعزار بشماعات ضعف الحكومات وعدم توفر الامكانات تارة اخرى هو عين العقل، وهنا انا اعنى الصفات التى ارتبطت بالشخصية السودانية منذ قديم الازمان وعلى مر الحقب السياسية والثقافية، دون ان يكون لها مؤثرات واسباب غير انها سودانية فقط ..وامل ان لااكون قد (بالغت ) فى مداخلتى هذه ولك منى مجددا فائق الود،،،
| |
|
|
|
|
|
|
Re: ثقافة المبالغة عند اهل السودان (Re: على محمد الخير)
|
عزيزي علي ..تحياتي ..شاكر لك اهتمامك دائما بما اكتب .. انني احاول اضعف الايمان ...ان مثل هذه الثقافة في هذا العالم المتواصل والذي صار قريبا وقرية واحدة كما يقولون ان تاثرت بها اجيالنا الصغيرة اليوم وصارت تفعل وتقول وفقا لذلك فوضعهم سيكون سيئا ويتساقطون في منافسه اقرانهم من بلاد اخري ....الواقع السئ الغير مرتب ومنضبط يجب ان يتغيير..التغيير لاياتي من الخارج وانما من الداخل وبقناعة وشجاعة تعترف بالاخطاء وتصلحها ..قراءة لمواضيع صفحة واحدة من هذا المنابر ترييك كثير من اسقاطاتنا التي يجب ان نعالجها نحن ...
| |
|
|
|
|
|
|
Re: ثقافة المبالغة عند اهل السودان (Re: abubakr)
|
بينما نحن نبالغ في نقد الاخر وبانهم يبالغون في تضخييم ذواتهم يغيب عنا اننا لا نقل عن الاخر تضخيما لذواتنا دون مبرر فترانا نكييل مدحا كثيرا ومبالغة في وصف احد الاشخاص بانه "لامع وفنان وخطير وعظيم وووووووو" كما نسبغ الالقاب بسخاء فهذا اوذاك الاعلامي العظيم والكاتب الاوحد والتشكيلي للاروع والموسيقي المبدع والطبيب البارع والمهندس الاعظم ويغيب عنا حال بلادنا في كل المجالات المتعلقة بهؤلاء العظماء.. فقيمة الانسان والمهني من قيمة عمله واسهامه وحال موطنه فيما يختص بتخصصه وعمله .... ان كنا بهذه العظمة فلماذا بلادنا صارت "عضمة" تلوكها كلاب كثيرة شرسة جائعة من سوء اعمالنا .... انك لا تغطي "العفن" ولكن تمنع مايسبب العفن
| |
|
|
|
|
|
|
Re: ثقافة المبالغة عند اهل السودان (Re: abubakr)
|
الاخ / ابوبكر
بوست قيم يصب في مسار تشخيص الشخصية السودانية ونقد الذات ، وهو امر هام حتى يمكننا من ايجاد الوسائل الفعالة لاعادة صياغة تلك الشخصية بما يجعلها تواكب مسار العصر صحيح ان لنا من الايجابيات والمحاسن ، ولكن بالفعل تم تضخيم تلك الايجابيات والتقليل من شان المساؤي والعيوب ، واذا استمر مثل هذا النهج فسنكون من الذين ضل سعيهم في الحياة الدنيا وهم يحسبون انهم يحسنون صنعا
لك التحية مجددا
| |
|
|
|
|
|
|
Re: ثقافة المبالغة عند اهل السودان (Re: عبد الحافظ خضر)
|
ياباشمهندس مسكاقمى .. نحن فعلا اتعودنا على المبالغة واتذكرت بى كلامك دا مبالغة واحد صاحبنا هنا فتح موضوع عن زواج فى بيت البشير وقال انو كان زواج خرافى والعشاء كان ماحصل والنتيجة انو ضيعوا قروش الشعب السودانى فى العزومة دى ولما سألوا صاحبنا عن العشاء الخرافى قال كان الصحن فيهو نص دجاجة وشوية مقبلات ويمكن حبة طعمية ..
انا كنت قبل كدة معارض فى نوعية الكتابات دى لكن وصلت لقناعة انها ضرورية واخضاعها لمثل النقاشات دى ممكن يخلينا نشتغل عليها ونحاربها ولو على اضيق نطاق فى بيوتنا ومع اولادنا ونعلمهم كيف يعالجوا السلبيات دى ..
تحياتى ..
| |
|
|
|
|
|
|
Re: ثقافة المبالغة عند اهل السودان (Re: عبد الحافظ خضر)
|
ألحبيب أبوبكر النقد الذاتي الخطوة الأولي للنجاح نحن فعلا شعب مبالغ وطيب .....شفت كمية الحزن علي لاعبنا إيداهور..مبااااالغة....رغم حزن الجميع لكن ياخي النبي(ص) مات زي ما بقولوا أهلنا.....وبعدين لو مات رئيس الجمهرية ( المنتخب) حنعمل شنو؟ كلامي ليس للتقليل من شأن الحدث المؤسف نفسه ...لكن نحن بندي كل شئ كوز
إقتراح: أدونا أمثلة لمبالغاتنا
| |
|
|
|
|
|
|
Re: ثقافة المبالغة عند اهل السودان (Re: Osama Mirghani)
|
العزيز اسامة
Quote: لنقد الذاتي الخطوة الأولي للنجاح نحن فعلا شعب مبالغ وطيب .....شفت كمية الحزن علي لاعبنا إيداهور..مبااااالغة....رغم حزن الجميع لكن ياخي النبي(ص) مات زي ما بقولوا أهلنا.....وبعدين لو مات رئيس الجمهرية ( المنتخب) حنعمل شنو؟ كلامي ليس للتقليل من شأن الحدث المؤسف نفسه ...لكن نحن بندي كل شئ كوز |
تعرف يااسامة لازم نضع مواصفات او حدود معينة ل"طيب" .. ان تكون طيبا مع الاخر وقاسيا مع ذاتك واهلك امر يقع في خانة "ثقافة المبالغة السودانية " .. السودان ارض اطول حرب اهلية في افريقيا واكبر كارثة انسانية في افريقيا الان (دارفور) وتتعامل السلطات (والذين هم بالتاكييد مننا) بقسوة مبالغ فيها مع الشعب وحال شعبنا بيان والاغتيال السياسي في السودان كثير و الطلاب الذين اغتيلو في معسكرات الدفاع الشعبي كما في مقال اخر في هذا المنبر..الخ من قسوة تصل حد الفجور بيان مع تقديري لمشاعر متابعي كرة القدم واللاعبيين في السودان فلقد ذهلت مثلك لهذا الدفق المشاعري الطاغي عند رحيل اللاعب النايجري المفاجئ في بلد يموت فيه الناس وقوفا امام المستشفيات حين لا يجدون علاجا ويموت الاطفال في المخيمات في دارفور جفافا .. ان نحول بعض من هذه المشاعر الدفاقة نحو الداخل وفي عمل نافع ربما يمتص هذه المبالغة كما اشرت
إقتراح: أدونا أمثلة لمبالغاتنا
| |
|
|
|
|
|
|
Re: ثقافة المبالغة عند اهل السودان (Re: بكري اسماعيل)
|
عزيزي بكري
Quote: ليتنا نعرف قدر أنفسنا بدلاً عن هذا التعالي الأجوف .. |
اكييد فعالم اليوم المعلومة متاحة فيه صوتا وصورة ومقياس التنمية والازدهار والتطور لا يحتاج الي سفر لمعاينة فلذا فلننظر الي حالنا وحال بلدنا ونقييم ذواتنا وفقا لذلك ...
| |
|
|
|
|
|
|
Re: ثقافة المبالغة عند اهل السودان (Re: عبد الحافظ خضر)
|
عزيزي عبد الحافظ
الامر مهم حيث ان اثره السالب علي كثير من افعالنا واقوالنا يتفاقم يوما بعد يوم ...اننا بشر خطاؤون والاصرار علي ايجابياتنا فقط بمبالغة والتغاضي عن سلبياتنا بمبالغة افقدنا التوازن .. فلنبالغ في اصرارنا علي عمل نافع وقول نافع..ان القادم لا يبدو سهلا بل عاصيا ونحن اضعنا عقودا من عمر بلادنا هدرا في صراعات وفساد وقهر وقسوة بغلو ومبالغة واصرار ....
| |
|
|
|
|
|
|
Re: ثقافة المبالغة عند اهل السودان (Re: abubakr)
|
أخي أبو بكر المبالغة وتكبير كل شيء أصبحت سمة مميزة لحديثنا العفوي اليومي شوف طريقة سلامنا كيف نبالغ فيها وتكرار عبارات السؤال عن الحال والاحوال والشوق وكيف الحال مرة اخرى والاحوال مرات والاولاد ووووو،
وبمناسبة المبالغة فقد فوجئت قبل مدة ورايت لاول مرة بعض اهلنا بالسودان عند دخولهم للعزاء يرفعون الفاتحة ثلاث مرات قبل بدءهم بالسلام وعزاء اهل المتوفي اليست هذه مبالغة
اما المبالغة في هذا البوست فهي كديسة باحثة أحوال الشماشة
Quote: وما زال في خاطري ما قرءته لناشطة اجتماعية (لا سياسية) مهتمة باحوال "الشماشة" ما وجدته يوما في حلة كانت علي نار ينتظرها اطفال منهم ( كانت كديسة ) ... |
والموضوع فتح جديد جدير بالمناقشة
| |
|
|
|
|
|
|
Re: ثقافة المبالغة عند اهل السودان (Re: عبد الرحمن خليل)
|
تخيل أخي أبوبكر لو أن الإنجازات التي تمت في ماليزيا في عهد مهاتير كانت في السودان، لتم وصفه بسيدنا سليمان القرن العشرين الذي سخرت له الريح! وتخيل لو كل كبري بني في دبي تم الاحتفاء به كما نفعل في السودان؟؟!! عندنا مثل في كردفان يقول: الفقران راس الغنماية بيملى بيتو! وهذا هو شأننا في السودان... أي مؤسسة أو مصنع يتم افتتاحه يقال لك أنه زود بأحدث الأجهزةن في الوقت الذي قد تفوق فيه قيمة أحدث الأجهزة كل تكلفة المشروع! بسبب هذه المبالغة، بدأت أشك حتى في مساحة السودان! والعزاء الوحيد هو أن المعلومة ليس مصدرها سودانيون.
| |
|
|
|
|
|
|
Re: ثقافة المبالغة عند اهل السودان (Re: محمد الأمين موسى)
|
من ضمن ثقافة المبالغة والتي أحياناً كثيرة لا أجد لها أثر في الواقع المعاش، المبالغة في وصف (العرب) بالكرم والشهامة والمرؤة وغيرها من تخيلات شعراء ودائماً ما أقول بأن الشاعر عندما يكتب قصيدة ما فانه في الغالب لا يوصف حالة واقعية امامه وانما ما يتمنى حدوثه لذا كثرت في اشعار العرب الحديث عن الكرم وغيرها من مفردات مشابهة لا نجدها كثيراً في أرض الواقع في غربتنا التي أمتدت لأكثر من عقدين، بل وداخل بلدنا السودان كثير ما نلحظ ذلك فهل من المبالغة الوصف بالكرم؟؟؟
| |
|
|
|
|
|
|
Re: ثقافة المبالغة عند اهل السودان (Re: محمد الأمين موسى)
|
ياعزيزي محمد سلام
Quote: السودان... أي مؤسسة أو مصنع يتم افتتاحه يقال لك أنه زود بأحدث الأجهزةن في الوقت الذي قد تفوق فيه قيمة أحدث الأجهزة كل تكلفة المشروع! |
اللحظة وانا اقرء لك ما كتبت وزيارات قلقيادات عليا جدا لمشروع (حاضنة) وقبلها(زراعي) كامن غذائي ومحاربة الفقر في بلد الفقر فيه لكل الشعب الفضل (مع الاعتذار لصاحب المقولة الفاتح جبرا).. مشاريع قريبة من المدن وبالذات العاصمة لمحاربة الفقر والعطالة ؟؟؟؟فماذا عن باقي المليون ميل مربع ؟؟؟...ولماذا قيادات عليا في افتتاح مشاريع صغيرة ....تضخيم الاعمال الصغيرة لاعطائها شكل انجاز دولة فيه مبالغة اضرت بالدولة والبلد ....لماذا يفتتح رئيس جمهورية جسرا مثلا (ومهنتي العمارة والتطويير العمراني) وعشرات الجسور والانفاق تبني حولناحيث اعيش ولم اشاهد قيادات.. ...
| |
|
|
|
|
|
|
Re: ثقافة المبالغة عند اهل السودان (Re: abubakr)
|
الباشمهندس الحبيب .... تحياتي ...
ياخ قال ليك: نحن الساس ونحن الراس ونحن الدنيا جبناها وبنيناها بويت في بويت واسعل جدّي ترهاقا وخلي الفاقة والقاقا تقول لي شنو .. وتقول لي منو؟
ياخ والله عندنا مبالغات ظريفة بس المهم ما نصدّقها
وحتى على مستوى زرع القيم في التعليم ... درّسونا في الأوّلية الثورة المهدية والنضال ضد الإستعمال الإنجليزي ... وكنا على يقين إنو الجندي السوداني لم تلد حواء أشجع منّو.
موضوع هام وشيّق
| |
|
|
|
|
|
|
Re: ثقافة المبالغة عند اهل السودان (Re: محمد أبوالعزائم أبوالريش)
|
ياابوالريش
Quote: ونحن الدنيا جبناها وبنيناها |
تخيل صبي او انسان عادي ليس له فيما يحدث حوله من معرفة وهو جالس في برندة هلكانه امام تلفاز يستمع الي هذا ثم وفي نفس الفضائية فيلم او حتي اخبار من الدنيا وير عمائر ودنيا غير الدنيا ....اننا بمبالغتنا قولا وغناء نضر بمصداقيتنا ....اذا كنا نريد ان نكون الساس والرس فلنعمل بربع طاقة مبالغتنا فاكييد سنفعل شيئا في بناية الدنيا
| |
|
|
|
|
|
|
Re: ثقافة المبالغة عند اهل السودان (Re: abubakr)
|
السلام عليكم ...... سلام يا دفعة بالرغم من موافقتي لمجمل حديثك إلا أنني أرى انك قسوت قليلاً علينا وإن كنت أفسرها بقسوة الأب على إبنه رجاء إصلاحه ...... وقبل أن أدافع عنا دعني أحكي لك هذه النكته وحدثت في أوائل أيام دراستي بمصر وكنت أدردش مع زميل لي مصري الجنسية عن زميل آخر وكنت معجباً ب(شطارة) ذلك الزميل ولم أجد وصفاً مبالغاً لما أحس به من إعجاب بشطارة ذلك الزميل سوى وصفه ( ياخي الزول ده شاذ عديل كده) كما نصف الشطار عادة وزي ما بيقولوا العرب (فغر محدثي فاه من الدهشة) ....... صحيح أن كثير مما أوردت من صفات سيئة موجودة في ممارسات السودانيين ولكن أيضاً كثير منها موجود عند معظم الشعوب الأخرى وبالمقابل فكثير مما صنف وصور كأنه صفات سالبة عندنا لسنا بدعة فيه وعلى سبيل المثال لا الحصر فنطق الكلمات بطريقة خاصة أو خاطئة، ليس حكراً على السودانيين فالتسعة التي يخطئ السودانيين نطقهاةالغين والقاف والزال يخطئ مثلهم الخليجيون في نطق أي كلمة تحتوي على حرف الجيم ويفعل بالمثل المصريون بحرف القاف والجيم أيضاً ويغير اللبنانيون معظم الحروف ويستعملون لغة مكسرة مخلوطة مضحكة لأى عربي يعرف لغته .... حياتنا الاجتماعية الواسعة المتشابكة لها أثر كبير على تصرفاتنا عامة وعلى لهجتنا المستعملة خاصة وتواصلنا (الزائد عن الحد أحيانا) يساهم في إبراز أهمية جلسات الونسة والسمر ولا بد لمن يريد تميزاً في مثل هذه الأجواء أن يجذب انتباه المستمعين بكلمات المبالغة هذه فالكلمات العادية ليست جاذبة وحتى كلمات المبالغة نفسها قد لا تكفي أحياناً ، فنلجأ للأصوات المجسمة التي نتميز بها دون شعوب الأرض كأن يحكي لك أحدهم يا زووووووووووووول والله لما لستك العربية طرشق تللللللللللل راسي ده سوى زننننننننننننن اسوي شنو يا ربي ...اسوي شنو يا ربي وانا رخصة ما عندي بس اسمعليك ناس الشرطة تي تا ... تي تا ... تي تا ... عليك أمان الله يا زول عملت ليك زغبير طوالي ..... وأظن كذلك عزيزي أبوبكر أن ثقافة تضخيم الذات موجود في معظم الشعوب وهو شيء لابد منه بل ومطلوب (أحياناً) ليجمع الناس على حد أدنى من الوطنية والهوية فلو لم تجد شيئاً تفتخر فيه بوطنك لفقدت حبك له واعتزازك به وأظن أن كثيراً من الصفات التي (نبالغ) فيها، موجودة فينا ربما لا تكون بنفس ما نظنه ولكنها قطعاً أكثر مما هو موجود عند شعوب كثيرة وأعود الى ضرورة تضخيم الإنجازات ففي دبي التي تعيش فيها مثلاً يمكنك أن تفتح الصفحة المحلية في الصحيفة اليومية مثلاً لترى أن الفخر بهذا المواطن الذي تحصل على الماجستر في ذلك العلم أو ذلك البطل الرياضي الذي احرز التصنيف التاسع في بطولة الواق واق الودية للسنوكر. وهكذا فأنت ترى أخواننا المصريين أحياناً لا يتركون شيئاً الا وقالوا انهم (كفراعنة) أول من مارسوه ونحن أصحاب أكبر صحن تبولة ونحن أصحاب أطول علم ...الخ
فهواية نحن أول من فعلنا كذا منتشرة ونحن الأفضل في كذا .. تقريباً لدى كل الشعوب. ولأنعدام الأنجازات الظاهرية كالمباني والأبراج والكباري وما إليها عندنا ، فإننا نتجه الى تفضيل أنفسنا بمقاييس يصعب العثور على مقياس لها مثل نحن أكثر مرؤة , أكثر أمانة ...الخ .....
| |
|
|
|
|
|
|
Re: ثقافة المبالغة عند اهل السودان (Re: الزوول)
|
السلام عليكم الزوول الدفعة
ظروفي مثلك جعلتني اتعامل مع اجناس متعددة ويوميا لعقود كثيرة وبالتالي اوافق علي ان شعوبا اخري تبالغ ولقد ابتدرت موضوعي بما اشار اليه الكاتب السعودي ناصر الحجيلان وهو يتناول ثقافة المبالغة في السعودية وعند العرب ...حتي اللحظة وبعد اربع عقود تعامل مع اجناس غير السودانيين لم استمع الي من يقول "نحن الافهم اوالاعلم اوالاشطر اوالاحسن" او كلها باكثار ربما يكاد ان يكون لازمة اي حديث الا عندنا نحن ... اشرت الي موضوع نطق القاف والغين باشارة ضمنية الي النشر الاعلامي الواسع من خلال مذيعيين ومذيعات (هذا لم يكن معروفا عند اجيال اولي من مذيعي ومذيعات السودان) فانت تشساهد اخبار تذاع في فضائيات عربية كثيرة باللغة العربية الفصحي وفي بلاد لها نطق مختلف لبعض الحروف ومنها القاف والجيم والكاف ولكن لا تسمع المذيع او المذيعة يرددها ... انا فيما يخص عوالمنا اوافق علي القاء ضوء كثير علي الانجاز المميز ولا تهويني ارقام الاول والاكبر الا في نطاق اسهامها الوطني او القومي وحتي الاول والاكبر التي استهوت البعض حيث اعيش فهي ليست قولا ولا مخاطبة وانما انجاز مادي ملموس ....فلننجز شيئامميزا ماديا ملموسا يراه الجميع وتزدهر وتتطور من خلاله بلادنا ثم نبالغ في حمده ووصفه ولا نصرف الجهد والوقت جزافا في اشياء صغيرة نضخمها قولا فقط .... لايعقل ان نكون كما يقول وداليمني الساس والراس وبنينا الدنيا وعاصمتنا تغرق ببيوتها وبشوارعها وانفاقها وجسورها- التي بالغ الولاة في صرف مبالغ"مبالغ" فيها- في مياه امطار موسمية .... يجري الوقت سريعا ولقد اضعنا كثير من الاهداف في مباريات نمو وتطور وازدهار متعددة ونحن نتصارع بيننا في غلو ومبالغة في امور لا تنفع البلاد ولا العباد .... اليس "مبالغة" ان يكون السودان بعد 54 عاما منذ الاستقلال بهذا الشكل فشلا وفسادا وتاخرا واعلامنا وقادتنا يبالغون في وصف انجازات واعمال اما لم تحدث او حدثت ولكنها باهتة قليلة ضعيفة والدليل حال بلادنا وحالنا ....
اكييد ترمي بك الصدف مرات لتستمع الي خطب الانتخابات من مرشحيين في السلطة وخارجها وتتعجب من "قوة عيونم" وهم يبالغون في كل ما يقولون...
يااااخ حرام مودتي
| |
|
|
|
|
|
|
Re: ثقافة المبالغة عند اهل السودان (Re: abubakr)
|
Quote: لماذا يفتتح رئيس جمهورية جسرا مثلا (ومهنتي العمارة والتطويير العمراني) وعشرات الجسور والانفاق تبني حولناحيث اعيش ولم اشاهد قيادات.. ... |
أيه رايك: في عام 2006 دشن رئيس الجمهورية أول جهاز صراف آلي بمركز عفراء! هذا الخبر (الفضيحة) قرأته آنذاك في جريدة الخليج للأسف! لكن أغرب المبالغات، هي الكم الهائل من الكلمات والخطب التي يلقيها الصادق المهدي في المناسبات اللي تسوى واللي متسواش!
| |
|
|
|
|
|
|
Re: ثقافة المبالغة عند اهل السودان (Re: abubakr)
|
هذا المنبر والذي يجمع اطراف السودان كله وعند مباراة كرة قدم بين الفرق الرئيسية او الدوري العام تتحول واجهته الي قائمة من المواضيع المختلفة عن الحدث الكروي ومناكفات بين كل الاطراف حتي تظن ان كل قضايا اهل السودان قد حلت .. انها المبالغة ... وما يحدث في المنبر يحدث في الواقع الاف المرات واليكم اثر مباشر لهذه المبالغة:
Quote: الراي العام التاريخ: الإثنين 8 مارس 2010م، 23 ربيع الأول 1431هـ 42267 انتحر أمس طفل يدعي أحمد في الصف الرابع أساس، يبلغ من العمر(11) عاماً بمنطقة أم القرى شمال مربع (45) بالخرطوم بحري في أعقاب سماعه نبأ وفاة ايداهور لاعب المريخ مساء أمس الأول |
| |
|
|
|
|
|
|
Re: ثقافة المبالغة عند اهل السودان (Re: abubakr)
|
عزيزى ابو بكر تحياتى كلامك صاح .. الزول يكورك ليك يا فلان يا فلان !! ترد عليه تقول لى نعم .. يقول ليك انت جيت ؟؟ لوووووب يا ابو بكر
ــــــــــــــــــــــ هل المبالغه نوع من انواع الكذب ؟؟
| |
|
|
|
|
|
|
Re: ثقافة المبالغة عند اهل السودان (Re: دينا خالد)
|
يامراحب ....دينا هنا
Quote: كلامك صاح .. الزول يكورك ليك يا فلان يا فلان !! ترد عليه تقول لى نعم .. يقول ليك انت جيت ؟؟ لوووووب يا ابو بكر |
مباااالغة ....دي عايزة ليها عبقرينو زي صاحبي مالكولم غلادويل يكتب فيها كتاب
| |
|
|
|
|
|
|
Re: ثقافة المبالغة عند اهل السودان (Re: abubakr)
|
حكى الفنان الكابلي في إحدى لقاءاته عن قطة طريفة حدثت له بسبب أغنية: لقد لامه أحد الأطباء وقال له أنت السبب! ما السبب؟ قال الطبيب سمعتك تغني: "كسلا أشرقت بها شمس وجدي فهي في الحق جنة الإشراق..." فطلبت نقلية إلى كسلا فورا! وعندما قدمت إليها أحبطت... المبالغة في الوصف... المبالغة في التقدير... المبالغة في دراسات الجدوى (راجع دراسة جدوى جامعة المغتربين على سبيل المثال)... المبالغة في عرض المشاريع (سندس) حكى لنا أحد مثقفاتية الكورة - نحن في مرحلة الثانوية العامة - أن اللاعب التونسي طارق دياب في كأس العالم انفرد بحارس المرمى الهولندي وشات الكورة فضربت في القائمة اليمنى وارتدت عنده فشاتها فضربت في القائمة اليسرى فارتدت عنده وفسسددها إصابة في المرمى!!! مهارة مباااالغة! وحكى لنا الشخص ذاته إنو صديق منزول أراد أن يسدد ضربة جزاء وكان الحارس أخاه فطلب من أخيه ألا يتصدى للتسديدة - والقصة تدلل على مدى قوة صديق منزول في التسديد - ولكن أخاه رفض وأصر على التصدي للكرة. وعندما شات صديق منزول الكرة تصدى لها أخوه ولكنها دخلت في بطنه وخر صريعا على الفور!! من مبالغة السودانيين: أي مبنى به طابق واحد على الأقل (فيلا مثلا) فهو عمارة! وبرج البركة به خمسة طوابق!
| |
|
|
|
|
|
|
Re: ثقافة المبالغة عند اهل السودان (Re: محمد الأمين موسى)
|
يا عزيزي محمد
المبالغة في رسم صورة مغايرة للواقع مضرة بالواقع...وصف الجمال عند البشر او المكان او الملابس يجب ان يكون صورة لواقع حتي لا يفقد الموصوف قيمته او الاقبال عليه حين يكون دون الوصف المبالغ فيه وهذا يجري علي اشياء كثيرة فمن المبالغة الضارة وصف الذي يؤدي عمله بانه "حمار شغل" الا يكفي ان يكون شغلا "عملا" لا قولا وجعجعة .... ومثل الذي حكاه الكابلي كثير وحتي الان وفي الفضائيات السودانية وفي هذا العالم المتواصل صورة وصوتا تري برامج يراد بها تروييج سياحي ودعوة للاخريين الي زيارتها ويكون المكان بائسا لا يرقي الي اي موقع جد عادي في بلاد الدنياالتي تمتع بطبيعة وجذب سياحي ...
| |
|
|
|
|
|
|
Re: ثقافة المبالغة عند اهل السودان (Re: abubakr)
|
ومن الاشياء التي قرءت عنها في هذا المنبر (وارجو ان يكون الامر ليس كما قيل) وهي مبالغة ضارة : ان تجارا او زوارا غير رسميين من بلاد اخري يمكنهم استئجار عربة رسمية بسايرن تتقدم ركبهم ليفسح لهم الطريق ...
ولقد شاهدت مرة في فضائية سودانية تجارا عرب يزورون الرئيس فيتقدم ليستقبلهم عند باب مكتبه ....؟؟ اين البروتوكولات والتسلسل الوظيفي السيادي والتنغيذي ؟؟.. مبالغة .... في موسم الامطار السابق رايت شوارعا بناها الوالي المتعافي باموال كثيرة وعمرها لايتجاوز عاميين او ثلاث وقد انشقت من فعل امطار موسمية ؟؟ ورايت نفقا لمليئا بماء امار موسمية حيث انه لا يوجد تصريف اساسا .....
اليست مبالغة في الخطا والاهمال ولافساد وصرف مال الشعب والبلد هدرا .....
| |
|
|
|
|
|
|
Re: ثقافة المبالغة عند اهل السودان (Re: abubakr)
|
لكي يكون الإنسان – أى إنسان – صادق مع الآخرين لابد أن يكون صادقاً مع نفسه in the very beginning أها الناس البتبالغ دي أكيد بتكضب على نفسها أو بمعني تاني غاشه نفسها والغش في النهاية وسيلة من وسائل الكذب البواح وعادة ما نصف مثل هذا التصرف عندنا بوصف "فاكيها في نفسو" وهي درجة من درجات شوفة النفس التي تتخطي الحد المقبول في موازين المجتمع وتجنح بصاحبها إلى المبالغة. أسوأ أنواع الكضب – والكذب كله سوء حد التحريم – ذلك الذي يتعلق بالمشاعر فعندما نسرف في إبداء إحساس أو شعور تجاه أى واحد وتكون دواخنا في حقيقة الأمر غير ذلك حيث أننا لا نحس بما نبديه من زيف ، وحتى عندما نتحدث بكلام بالبلدي كده نحن ما قدرو أو حتى نتصرف بمظهر كضاب. الحكاية دي أصبحت ثقافة مجتمع وهي شكل من أشكال البوبار في الفاضي والمليان كمان ، نهول الأمور ونجعل من القزم عملاقاً ونتخيل ونتخيل ونتخيل دون أن نتقدم قيد أنملة ، هسي منتدانا دا زاتو فيهو حاجات أقل ما يوصف بها أنها مباااالغة وبخاصة في باب النضال الوطني والتغيير المنتظر أونلاين. المشكلة أنا مبالغاتنا بتصل مراحل الكضب الضار في أمور كتيرة ومع كده نتعايش ونعيش معاها وإذا مسكت واحد بالثابته وحاولت تناقشو في كضبتو وتفندها ليهو يقول ليك ياخ هي جات على دي بس ومن هذا الباب تنداح المبالغات حتى أصبحت في سوق الكلام أكثر من الحقائق فأنعكست الصورة وأصبحت المبالغة حقيقة تمشي بيننا دون إستحياء طبعاً. نحن مشينا مع الأسف خطوات كبيرة باعدت بيننا وبين الواقع فأصبحنا نعيش في هذه المبالغات بأننا الأحسن والأغني والأذكي والأجمل وهلم .... الغريبة بي مبالغاتنا الكتيرة ما زلنا متأخرين في الإخراج والمونتاج والتأليف والتصوير في المجال السينمائي على سبيل المثال ، وهو مجال عماده وركيزته الأساسية المبالغة والخيال الخصب.
يا أخي أمس جيتك في البيت وقالو لي إنك طلعت يااخ بتبالغ ياخ والله أمس كانت عند ناس .... حفله كاربه ياخ بالغت
تعرف دكان حاج فضل الفي الناصية أى الجمب بتاع اللساتك والله دا عندو فول ما حصل ياخ بتبالغ
ألو سميرة معليش والله شفت مكالمتك متأخر شوية كنت في إجتماع أصلو شنو لكين والله بالغت عديل كده
أسكتي أسكتي أسكتي (وهي أصلاً لم تتكلم) والله محلات ... فيها كريم تبييض مبااااااااااالغه وسعرو كمان أسكتي ساكت لكين ما بتبالغي خلينا نمشي ليهم الليله المسا
المهم في النهاية كلو ببالغ القاصد يكضب والما قاصد يستوي في إستخدام مصطلح بالغت بتصريفتها من مبالغه وبتبالغ وبالغتي ولكين ما قربت تبالغ مع إجادة إستخدم الـ body language عشان تكون المبالغة في قمتها. زي لمن تكون بتتكلم مع واحد ويقول ليك ، أصول شنو ، قول والله ، ودي برضو نابعه من دهشة الملتقي لتلقى الخبر أياً كان ولا يكون تأكيده إلا بأن تقول والله كما أمرك وتكون ربما عينك في عينو وهو فاتح خشمو وبعاين ليك بنصف إبتسامه ونصف دهشه</font>
| |
|
|
|
|
|
|
Re: ثقافة المبالغة عند اهل السودان (Re: abubakr)
|
عزيزي الملا
مصداقية الشخص هي التي تجعل منه مسئولا يعتمد عليه ..ز الاضافة الي واقع وحقيقة يجعلهما لا واقع ولا حقيقة .. الصدق يبدو للبشر صعبا بينما هو غير مكلف وينظر الي الكذب علي انه سهل ومتاح بينما هو مكلف ياخذ من قيمة مصداقيتنا.... كل الذي احاول ان انبه اليه هو ان نقيس واقعنا علي حقيقته كما هو فان كان موجبا نطوره ونضيف اليه اضافة حقيقية وان كان سيئا نتخلص منه
| |
|
|
|
|
|
|
Re: ثقافة المبالغة عند اهل السودان (Re: abubakr)
|
كثير من السودانيين يعشقون مبارايات كرة القدم وفي ذلك لا يختلفون عن اجناس كثيرة فالبريطانيون علي اختلاف مناطقهم واثنياتهم هم اكثر من يغشقها واجد زملائي يبدؤون يومهم بكلمات عن الكرة تاخذ بضع دقائق ثم يواصون عملهم مع اختلاف انديتهم غالب ومغلوب...كما اسلفت سابقا هذا المنبر يتحول الي مباراة كرة قدم اسفيرية حين تكون هنالك مبارايات للفرق الكبيرة .الخ ..... قبل ايام رحل من الفانية لاعب نايجري كان يلعب لنادي المريخ ..لكل اجل كتاب وانتهت ايامه في هذه الدنيا في ساحة الكرة التي احبها واحترفها ...ليس هو اول لاعب يموت في الملعب ولكن اهل السودان وحيث انهم يبالغون كثيرا في فرحهم وترحهم وخصموتهم بدؤ اولا باصدار التهم جزافا علي اخر ربما كان السبب في وفاة اللاعب وتحركت جماهير الكرة الي المشرحة تنتظر نتيجة التشريح وكتبت الصحف واهتمت الفضائيات بالخبر وصارت لقاءات تلفزيونية خاصة عن اللاعب ...وانا صراحة لم اكن اعرف عنه شيئا الا انني سمعت او قرءت اسمه وكنت اظن ان الاسم كنية للاعب سوداني فانا ليست لي اهتمامات كروية خلال العقديين الماضيين وقبلها كانت اهتمامات ما تيسر لحظية ....وتعالو نقرء في هذا الخبر المنشور في صحيفة الراي العام السودانية اقدم الصحف السودانية لنري كيف يبالغ اهل السودان.. يتصل نائب الرئيس معزيا ...طائرة خاصة تجهز ثم تلغي لليوم الثاني نزولا عند رغبة زوجة اللاعب ..رئسيس اكبر ناديين سودانيين واعضاء من مجالس الادارات واللاعبيين وحتي سفير السودان سيرافقون جثمان اللاعب الي بلده...الخ ... مع يقيني بان كرة القدم هي الترفيه الشعبي لاهل السودان وكثيرا ما تستعملها الحكومات باهتمام كبير بها يفوق اهتمامها باولويات اخري كاداة لتلهي الشعوب عن امور اهم من تعليم وصحة وغذاء وامن وسلام الا انني لا افهم مطلقا لماذا هذه المبالغة ... واقرؤ الخبر دون حساسية فالغرض هو ان نتوازن في ردود افعالنا وفيما نقول ونفعل ونتلافي المبالغة فهي ضارة
Quote: التاريخ: الثلاثاء 9 مارس 2010م، 24 ربيع الأول 1431هـ نائب رئيس الجمهورية يعزى طائرة خاصة تنقل جثمان فقيد المريخ صباح اليوم الى نيجيريا الخرطوم: الطيب شيخ ادريس ? ينقل صباح اليوم جثمان الراحل فقيد الرياضة والمريخ اللاعب ايداهور بالطائرة الخاصة الى مسقط رأسه بمدينة بينين النيجيرية حيث يوارى الثرى هناك.. من جانبه فقد اتصل الاستاذ علي عثمان محمد طه نائب رئيس الجمهورية بالأسرة المريخية ناقلاً تعازيه الحارة وقد اشادت الأسرة المريخية بهذا الاتصال مؤكداً ان الدولة ظلت تدعم الرياضة في لحظة الأحزان.. ? وكان من المفترض ان يغادر الجثمان صباح امس الا ان ارملة الفقيد السيدة «ساندرا» بعد حضورها من الامارات قد طلبت التأجيل لليوم وكان مجلس المريخ قد اكمل ترتيباته كافة لنقل الجثمان بطائرة خاصة حيث تقرر ان يرافق الفقيد «ايداهور» مجلس الادارة برئاسة السيد جمال الوالي ومحمد جعفر قريش السكرتير ومتوكل احمد علي نائبه وعبدالقادر همد مساعد الرئيس وجمال احمد عمر نائب امين الخزينة وطارق عثمان عضو المجلس.. كما يرافق الفريق فاروق حسن ود. محجوب صديق والفاتح المقبول «مجلس الشورى» وكذلك يرافقه السيد صلاح احمد ادريس رئيس نادى الهلال والعمدة سعد عثمان ومن الاتحاد السوداني سيتسليو جوبا وفياض اسماعيل واسماعيل عطا المنان وتاج السر عباس من اتحاد الخرطوم واللاعبون فيصل العجب وهيثم طمبل بالاضافة للنيجيريين كليتشي ووارغو وقائد الهلال هيثم مصطفى ويرافق الجثمان ارملة الراحل والسفير السوداني بنيجيريا المتواجد حالياً بالخرطوم.. ? مما يجدر ذكره ان الراحل قضى «5» مواسم بالقلعة الحمراء حتى نال الجنسية السودانية بالتجنيس في الموسم الماضي واحتل موقعه في تشكيلة الفريق الاحمر وصار احد معالمه البارزة في التهديف والخلق الرفيع وقد استطاع من خلال مسيرته ان يحسم الكثير من المباريات لتضع الأقدار حداً لنهاية اللاعب امسية السبت الماضي بهبوط حاد في الدورة الدموية كما جاء في قرار الطبيب اثناء تأدية مباراة فريقه امام فريق الامل عطبرة ضمن مباريات الاسبوع الثالث للدورى الممتاز السوداني.. |
| |
|
|
|
|
|
|
Re: ثقافة المبالغة عند اهل السودان (Re: abubakr)
|
ارجو من الاعزاء الذين يقرؤون هذا الموضوع ان يتفضلو بايراد نماذج لمبالغة في قول او فعل (ممارسات عامة) تعتبر ضارة او نتاجها ضار حيث ان الغرض من ابتداري لهذه المساجلة هو التعريف والبحث عن حلول ان اممكن ..انها اسهام اضعف الايمان ....
| |
|
|
|
|
|
|
Re: ثقافة المبالغة عند اهل السودان (Re: abubakr)
|
الصديق ابوبكر فى فترة السبيعينات كانت مفردة مبالغة شائعة جدا تجد فى الحوارات بالغت ياخ ما تبالغ بالغتى لكن مبالغة
عندى صحبى زول طيب جدا لكن بتاع مبالغات ودايما يطلعنى زول كيشا ساى يقول لى اها السيارة دى اشتريتا بكام اول ما اوريهو يرد يازول غشوك والله اختا عديل كدا امبارح كان عارضنها برخص التراب
يقول لى اها خروف العيد اشتريتو بكام اوريهو يرد يازول غشوك والله انا بس بعد الصلاة اركب عربتى امشى اشترى بارخص سعر
بيتك دا اجارو كم اوريهو يازول غشوك والله بيت اكبر منو دايرين فيهو تلاتة بس
وتعال شوف لمن تشتير لشراء ارض فى السودان البداية يقولو ليك الاسعار نزلت تمشى تفتش تلقاها فى السما
| |
|
|
|
|
|
|
Re: ثقافة المبالغة عند اهل السودان (Re: abubakr)
|
ومبالغة في فوارق اجتماعية كما وصفها بشري الفاضل هنا :
Quote: أنت تقول فشخرة وهذه كلمة موفقة منك لوصف حال مظاهر العمارة في عاصمة بلادنا في الوقت الذي ترزح فيه بقية البلد في معضلات الحرب الأهلية (دارفور والقتال القبلي المدعوم بالسلاح في الجنوب) وانهيار المشاريع (الجزيرة) وتفشي العطالة وتفشي الأمراض والفساد. الذين يلوحون بمفاتيح عرباتهم الفاخرة من بي ام دبليو فما فوق قلة وهي قلة لاترى صورة السودان إلا فيهاوهي الفئة نفسها التي تزركش المكاتب الحكومية وتمنح الأعوان والمناصرين مفاتيح الأسواق فتضج تلك الأسواق بالمرايا والسلع الاستفزازية بينما بقية الشعب تبحلق وتقول في كل حين: - النشوف آخرتا(آخرتها). Re: عمارات ومباني وأغاني لاحصر لها وشوارع وكباري ومطا...حيرة وانكفاء على الذ
|
| |
|
|
|
|
|
|
Re: ثقافة المبالغة عند اهل السودان (Re: abubakr)
|
"علي بالطلاق"
لازمة مبالغ في ترديدها اما لاثبات حدث او قول او للتهديد .. مبالغة في تهميش اهم علاقة انسانية واهم شريك بوضع العلاقة والشريك في طرف هاوية "الطلاق" ..لازمة توضح مدي افلاس وضعف بيان القائل
| |
|
|
|
|
|
|
Re: ثقافة المبالغة عند اهل السودان (Re: abubakr)
|
السلام عليكم ...... يا جماعة خفوا علينا شوية .... ذكرتوني بقصة عمنا الإمام (الأعمش مع صاحبو) ......... حكي أنه وقعت بين الأعمش وبين امرأته وحشة فسأل بعض اصحابه ان يرضيها، ويصلح ذات البين بينهما، فدخل ذلك المصلح عليها وقال: «إن أبا محمد الأعمش شيخنا، وفقيهنا، فلا يزهدنك فيه عمش عينيه ، وحموشة ساقيه ـ أي دقتها ـ وضعف ركبتيه، وقزل رجليه ـ أي عرجته ـ ، ونتن إبطيه، وبخر شدقيه ـ أي نفسهُ الكريه ـ».
فقال الاعمش قم قبحك الله فقد أريتها من عيوبي ما لم تكن تعرف !! ....
| |
|
|
|
|
|
|
Re: ثقافة المبالغة عند اهل السودان (Re: abubakr)
|
Quote: وعبد الكريم صالح محمود من الرياض يروي قصته مع رسوم المغادرة التي لم تخطر بباله حتى دخوله لساحة المطار برفقة عائلته المكونة من سبعة أفراد.. ليتفاجأ برسوم مغادرة بلغت «53» ألف جنيه.. في حين ان جيبه لم يكن يحتوي إلا على «03» ألف جنيه «بالقديم».. ليضطر لبيع إحدى اساور بناته بأبخس ثمن ليتمكن من المغادرة.. ويتساءل عبد الكريم عن معنى العودة الجاذبة التي تنادي بها الدولة للمغتربين..
|
الكلام الفوق دا نموذج من نماذج مبالغاتنا وتجد الكلام والرودود الحماسية في مقال بعنوان باع أسورة إبنته في المطار ليدفع الرسوم والذي تم نقله من موقع آخر يمكن الإطلاع عليه من خلال الرابط أدناه. التوقيع كوز سبيل (recycled علبة أناناس)
http://http://www.rayaam.info/News_view.aspx?pid=0&id=42023
| |
|
|
|
|
|
|
Re: ثقافة المبالغة عند اهل السودان (Re: almulaomar)
|
من الأمثلة التي تقول للزول الببالغ بتبالغ ياااخ نحن ناقشين وتبيخ ليهو المبالغة بتاعتو: كان ما متنا ما شقينا التٌربْ وكا سكاري عدو الجراره (جمع جره) وهو يحوم حول المعني نسوي هيصه نسوي ربه * ونعمل من الحبه قبه (مثل هيجن من إعداد الأمثال السودانية بالتعاون مع هيئة حلمنتيش العليا) شوف عيني الصقير بي جناحو كفت الفره
| |
|
|
|
|
|
|
Re: ثقافة المبالغة عند اهل السودان (Re: almulaomar)
|
Quote: وحصلت قدام عينى واتضح انه العسكرى كان محتاج لستين الف جنيه اخدها وضحك بعد اخدها قطع الورقة بتاعة الغرامة ؟؟؟؟؟ |
بت الشيخ ,,, سلامات هسع يجيك اخونا عمر عثمان يقول ليك دا حادث فردى ومعزول ,, اها كان جاء وقال كدى دى مابتكون مبالغة يا ابوبكر? ابوبكر والله الموضوع ده مهم جدا وربنا يقدرنا نساهم معاك فيهو. وبالمناسبة قبل كذا سنة شاهدت لقاء فى قناة الجزيرة مع سعيد الكرمى صاحب برنامج قول على قول الذى كان يبث من الـ BBC والآن طبع فى حوالى 11 مجلد تحدث فى هذا الموضوع فأجاد ليت الخبراء بالمنبر يلايمونا على هذه الحلقة واعتقد ان البرنامج كان اسمه زيارة خاصة خالص الود لكما.
| |
|
|
|
|
|
|
Re: ثقافة المبالغة عند اهل السودان (Re: almulaomar)
|
يا عزيزي الملا ...الحالة عجب ...بينما صاحبنا دة بيدفع رسوم مغادرة -يعني طالع من البلد وبعيالو وكدة يساعد الحيكومة في تقليل عدد الشعب الفضل (الحق الفكري والادبي للفاتح جبرا) قرءت انو جمال الوالي دفع 22 الف دولار تمن تلاجة لحفظ جثمان اللاعب النايجري في بلده هناك حتي تتم طقوس نايجرية تاخذ شهرا قبل الدفن ...وفي نفس الصحيفة والخبر قرءت ان السلطات النايجرية "اندهشت كثيرا" عندما هبطت طائرة خاصة تحمل جثمان اللاعب ووفودا رسمية وشعبية كان في استقبالها اهل السفارة السودانية ...وتقولي مبالغة
| |
|
|
|
|
|
|
Re: ثقافة المبالغة عند اهل السودان (Re: abubakr)
|
مبالغة : مسئول كبير يؤكد في التلفزيون انه لا يوجد "فساد مؤسسات " ابدا في السودان ( هسع شرطي المرور الاخد ستيين الف اما المارة ومزق الايصال اما م المارة كما اشار صحبي الجميل (سلمي سلامة) هل هو تصرف فردي ؟؟ انا كانت المؤسسة التي ينتمي اليها تراقب وتحاسب فما كان ان فعل ذلك امام الملا وهو يضحك ؟؟؟ عشرات الشركات التي يملكها ولاة ووزراء كانو لا يملكون حتي مرتباتهم قبل ان يتولو المناصب هل هي فساد افراد او مؤسسات ؟؟؟
| |
|
|
|
|
|
|
Re: ثقافة المبالغة عند اهل السودان (Re: abubakr)
|
الأول: تصدق محمود جا أمبارح من السفر الثاني: يا أخ بتبالغ (مبالغة عفوية غير ملزمة)
الأولي: والله لو شفتي شيلة هند أسكتي ساكت أريتا شيلة حبيبتك الثانية: بالله لكين ما ببالغو (طبعاً بين بالله وبين لكين في رفعة حواجب كده وحتة دهشه مصطنعه) (هي لم تشوف الشيلة حتى وهذا ضرب من ضروب النفاق الإجتماعي الذي يمليه عليها إستدراج المتحدثة نحو مزيد من الشمار. الأول: أوب سوري متأسف يا إبن العم الثاني: يخرج منديل ويمسح بنطلونه ملولحاً رأسه ومردداً بحسره والله بالغت عديل كده (مبالغه reaction)
الأول: يا زول ها يا أخي دا بعوم مع التماسيح عديل كده تقول لي شنو الثاني: غير مصدق ومحاولة إستفزازية لجر المتحدث في الكلام "يا أخ أصلو شنو" الأول: أصلو شنو ، طيب أقول ليك حاجه وحياة أمي شفت في البرد الموية في الزير بتكون إتجمدت في الشمالية عندنا أها الزول دا بيعوم ليك عديل كده من الشرق للغرب ويتخارج من الموية دي كأنه ما في شئ ، يا أخ دا بيقولو ليهو ود المويه في البلد الثاني: والله دا ببالغ عديل كده دا خطير (مبالغه standing on the fence المستمع بين مصدق وبين ما مصدق وإن كان أقرب إلى عدم تصديق القصة)
هي: دا يا يمه يلحقنا ويفزعنا دي حليمه متزوحه ليها إطناشر سنه ما ضاقت الجنا مشت ليهو أها أداها الجنا (أخصائي نساء وولادة) هي التانيه: يلحقنا ويفزعنا يا إنتي يعني هسي أودي ليهو تهاني دي بتخلي البتسوي فيهو دا هي: قلت ليك دا مبروك ديل أهل الله كش زي الكضابين المشينا ليهم ديك ، دا وإنتي يا دوب داخله عليهو يقول ليك إتفضلي يا فلانه يا بت فلان إن شاء الله ما تعبتي في المواصلات _مباااااااااااااااااااااااااااااااااااااالغه
| |
|
|
|
|
|
|
Re: ثقافة المبالغة عند اهل السودان (Re: abubakr)
|
حيث أن السائل لم يحكها كما تفعل أنت الآن سوف يترك فسحه صغيرونة لهذا البالغ حتى يرجع إلى صوابه ويمكن في حالة حدوث زنقة أن يقول لهم بسبح في إتجاه الشاطئ. أها قصرت معاك ولا بالغت
واحد رقيب في البوليس إتفلسف على ولد ذوات وقبض عليهو المهم وداهو النقطة والتلفونات بقت تتخابت ، اللواء مين والعقيد مين وهلم أها صاحبنا سألوه قالو ليهو إنت قبضت الزول دا قال ليهم أيوه الولد من شدة الغيظ قال ليهم هو زاتو منتحل شخصية وقال إنو نقيب أها عشان عارف إنو أمة لا إله إلا الله دي حا تمسك في الضل وتخلي الفيل قعد يحلف وقال ليهو والله سيادتك قت لو رقيب ما قت لو نقيب
| |
|
|
|
|
|
|
Re: ثقافة المبالغة عند اهل السودان (Re: د.محمد بابكر)
|
اينما وجد ابو بكر.......... توجد المواضيع الاكثر قيمة وتشويق ومبااااااالغة فى الروعة بالجد انت رجل مبالغة..... اها شن قولك فى تحليلي ده يا قريبنا العزيز ابو بكر الشوق ليك محنة قلنا نتاوق بالاسم الجديد .. على وزن سودان جديد شفت بكري بالغ معانا كيف ؟؟؟ لووول تحياتي ومعزتي
| |
|
|
|
|
|
|
|