|
|
 Re: شرطة امن المجتمع والحريه الشخصيه (Re: العوض المسلمي)
|
ليس الامر مقصورا فقط على شرطة امن المجتمع
بل شرطة المرور والشرطة الجنائية وشرطة المحاكم وشرطة السياحة وشرطة امن المرافق
الشرطة من اهم الاجهزة التنفيذية الامنية ..
والدور المنوط بيها كبير ولايخفى على احد..والمراجعة والتدقيق بصورة مستمرة في الجهاز الُشرطي واجب تمليه الحصافة ومآلات الحال ..
ومن مايحمد ان التجاوزات ليست في نصوص قانون الشرطة ولا القوانين الاجرائية المصاحبة..
وانما في الاداء الشُرطي والتنفيذ..
كمية الرعب المصاحب للاعمال الامنية في البلاد جعلت المواطن البسيط لادري بالضبط اين تقف حقوقه واين تبتدي..
كما وان جهالة المواطن بحقوقه الدستورية والتي كفلها له القانون جعل العديد من رجال الشرطة يتمادون في تجاوز حدود وظائفهم ..
مؤخرا صارت هذه التجاوزات عُــرفاُ مُــلزماُ ..
وعادي ممكن العسكري لو مسكتو من بدلتو العكسرية في مشادة : يقول ليك: فك الكاكي ده او ستة شهور سجن عشان الكاكي..
بينما لاتوجد مادة في القانون تعظم الكاكي ممكن بي سببو تتسجن..
الشرطي عادي لو تجاوز حدو في وظيفتو ممكن تخش جوه الكاكي بتاعو ذاتو بما يحفظ كرامتك وحقك في الدفاع عن نفسك ..
وآفة الشرطي في السودان شخصنة المواضيع..
يعني الواحد لو حصلت ليك مشكلة في اي شي ممكن عادي الشرطي يبقي الموضوع بينك وبينو بصورة شخصية خارج الاطار القانوني والتجاوز البي سببو حصلت المشكلة..
واذكر فيما اذكر كنتا الخطوط السعودية للحجز ..
واحتجيت على التجاوزات في الصفوف والانتظار بلا مبرر ..
قام واحد جاني لابس بدلة مايوية وقال لي : مالك عامل فوضى في الصالة؟؟
رديت وشرحتا ليهو انو الناس بتجي من بره وتخش تووش لانو بتعرف الموظف الفرتكاني..
يمين شمال وخد وهات جابت ليها صوت عالي ..
كالعادة لامن شديت معاهو دقا لي جعباتو ومرق لي بطاقة مرسوم فيها صقر الجديان..
وقال لي بي كل قيافة دعمها ذلك الصقر : ممكن تجي معانا المكتب لو سمحت؟
والحق يقال انا ماشفتا من البطاقة غير الصقر بس عرفتا انو الصقر ده ياهو الصقر الحقار الذي لازمنا من ايام الجامعة والثانوي وفي الحلة ..
طبعا رفضتا امشي اي حتة وقتا ليهو انا عندي شغلة هنا ولازم اقضيها..
وماجيت عشان امشي معاك الحتة الانتا شايف انو انا لازم امشيها..
انفعل زيادة وقال لي بتمشي غصب عنك..
طوالي عرفتا انو الموضوع بعد ده بقى شخصي بيني وبينو وليس بيني وبين نظام يُظن اني تجاوزتو..
بعديها طوالي قال لي يالزول انا موش الصالة دي ..اها خليتا وقاعد ليك انتا بس..
وماعندي شغلة غيرك الليلة..
منتهى الشخصنة طبعا..جاب اخرو..
رديت بي برود انا بقة عندي شغلة غيرك..
وعشان ماتضيع وكتك ياسعادة العقيد امشي جيب اذن من سلطة قضائية وتعال سوقني الحتة العايزها..
وده كلام انا جايبو ليك من نفس الحتة الادتك الصقر الفرحان بيهو ده..ومرقتا ليهو ليهو بطاقة ماشاف فيها اي حاجة غير علم السودان ودخلتها تاني سريع..
انا طبعا ماعارف ياتو من الجهات الحكومية بتخت في بطاقة منسوبيها علم السودان ..
بس اعتدمتا على انو هيبة تلك الالوان والميزان بتاع السلطة القضائية جنب العلم ..
واضفتا في حزم مفتعل: اي شي تاني غير كده انا بعتبروا تجاوز لي حدك وبداوسك هنا في البلاط ده عادي لو عايز..
طبعا انا قتا الكلام ده وقلبي بنطط لانو الزول كان مفتل وزعلان ورايحة ليهو شخصية عايز يمرقها فيني..
انقرو تاني سالني؟؟
عموماُ استغراب الناس اليوم داك كان دلالة واضحة على انو الاستسلام والخنوع تجاه الحاجات الذي دي هو ديدن العامة ..
وكتير من السوابق القضائية ادين فيها افراد شرطة بل واعدموا للافراط وتجاوز حدودهم الوظيفية..
بس بي صراحة اكثر ما شجع هذه التجاوزات هم المواطنين انفسهم..
الواحد تلقاهو مستعجل عايز يلحق ليهو شي وماعندو مانع يدي العسكري اي شي عشان يتخارج..
او تلقاهو رعديد وجهلول عندو (كاكي فوبيا)
صورة الشرطي القامع والمرعب يمكن ان تتبدل الى ادمي منظم وهلبفل وحاسم عند الضرورة..
بس وينها الاكاديمية وسعة الرزق والممكن تنتج شرطة منتجة..
|
|
 
|
|
|
|
|
| العنوان |
الكاتب |
Date |
| شرطة امن المجتمع والحريه الشخصيه | العوض المسلمي | 01-14-08, 11:06 AM |
| Re: شرطة امن المجتمع والحريه الشخصيه | amin siddig | 01-14-08, 11:47 AM |
| Re: شرطة امن المجتمع والحريه الشخصيه | Elawad Eltayeb | 01-14-08, 12:48 PM |
| Re: شرطة امن المجتمع والحريه الشخصيه | العوض المسلمي | 01-14-08, 04:36 PM |
| Re: شرطة امن المجتمع والحريه الشخصيه | العوض المسلمي | 01-14-08, 03:43 PM |
| Re: شرطة امن المجتمع والحريه الشخصيه | هشام المجمر | 01-14-08, 11:53 AM |
| Re: شرطة امن المجتمع والحريه الشخصيه | عبدالله شمس الدين مصطفى | 01-14-08, 12:06 PM |
| Re: شرطة امن المجتمع والحريه الشخصيه | abubakr | 01-14-08, 12:52 PM |
| Re: شرطة امن المجتمع والحريه الشخصيه | Mustafa Mahmoud | 01-14-08, 03:51 PM |
| Re: شرطة امن المجتمع والحريه الشخصيه | Elbagir Osman | 01-14-08, 05:15 PM |
| Re: شرطة امن المجتمع والحريه الشخصيه | Elbagir Osman | 01-15-08, 05:13 AM |
| Re: شرطة امن المجتمع والحريه الشخصيه | DKEEN | 01-15-08, 09:59 AM |
| Re: شرطة امن المجتمع والحريه الشخصيه | معاذ حسن | 01-15-08, 10:15 AM |
| Re: شرطة امن المجتمع والحريه الشخصيه | Alshafea Ibrahim | 01-15-08, 10:07 AM |
| Re: شرطة امن المجتمع والحريه الشخصيه | أحمد أمين | 01-15-08, 01:20 PM |
| Re: شرطة امن المجتمع والحريه الشخصيه | amin siddig | 01-15-08, 01:46 PM |
| Re: شرطة امن المجتمع والحريه الشخصيه | العوض المسلمي | 01-16-08, 09:42 AM |
|
| |
فيس بوك
تويتر
انستقرام
يوتيوب
بنتيريست