تجي من الصباح فرتقك فرتقك فرتقك تقرأ نفس كلام أمس ! تقوم تمرق تجي بعد ساعتين تلات اربعة تجي تقرأ نفس الكلام القبل ساعتين تلاتة اربعة تقوم تجي بالليل برضو تجي تقرأ نفس الووك ورورووك
زمان لمن كنا طلبة (الكلام دة قبل تلاتين أربعين سنة) بلغة المنبر طبعاً المهم الواحد كان عندو طموح إنو ممكن يعمل شيتاً عليهو القيمة لدرجة كان من الممكن انو الواحد يفقد روحو عديل في سبيل قناعاتو قناعاتو دي طبعاً زاتها خشم بيوت في زمنا السجمان داك . يعني تلقي واحد قناعاتو حبيبتو وتاني تلقي زول قناعاتو الهلال وواحد تاني قناعاتو الأمل عطبرة وواحد تاني قناعاتو كباية عرقي وواحد قناعاتو الهجرة يعني بالعربي كدة يتفكفك بأي طريقة انشاء الله بي (سمبك) الي جانب انو في ناس تانين اهتماماتهم كانت سياسية نحنا ديل طبعاً كنا مصنفين ضمن القناعاتهم مرحلة التطور الوطني الديمقراطي وهو في تقديري برنامج متكامل لكن لسوء حظوا بفقد في أدواتو يوم ورا يوم ! أدوات التغيير وكيفيتو وامكانيتو ودة (نقاش طويل حيكون برعاية صديقنا محمد حسبو أو حسبو كما نسميه) بس لسه ربكم رب الخير ما سهل لينا في تساهيل الكتابة . المهم في حالة بتاعت قرف عام وزهج واحباط ودبرسة وتلقي اي زول مركب ليهو وش كرتون ! اختفت حاجات كتيرة لكن أكتر حاجة ألمتني هو كلام قالو لي ماسا صاحبنا في التلفون قبل يومين . قال لي يا خضر نحنا بقينا نتلم كلنا وبنقعد نعاين لي بعض يعني مالاقين شيتاً يقولوه ! الونسات طبعاً كملت ! الضحك والقرقراب ديل مشوا بعدلهم ! ولأكثر ما أعجبني تعليق لصديقي قرمبوز انو الناس تخت علم قبلما يبدوا يتكلمو !
ياخوانا نحنا ماشين وين بالضبط ؟ طاحونة البلد أم مقنيتة رامية طوالي دي لمتين حتظل تطحن أحلام الناس ثم ياخ الناس الفي بلاد (برة) علي قول ميمي صاحبي حيرجعوا ولا عاملين خروج نهائي وتذكرة اتجاه واحد أنا غايتو واحد من الناس البقيت بدخل المنبر دة أفتش فتيش علي أمل باقي في النهاية بتخارج بي دربي لأنو كان قعدت شوية ممكن أصاب بحالة بتاعت فقدان وعي . وأنا الشهادة لله الي جانب (أعوذ بالله من كلمة أنا) ماناقص فقدان وعي ! البوست دة ذاتو مافي زول يتوقع مني رد لأنو بي صراحة أنا مافتحتو زاتي عشان ارد علي زول أنا فتحتو عشان أثير أسئلة يعني العايز يجي يكتب فيهو يجي وهو عامل حسابو انو هو برضو صاحب (حلال) زي ما بقولو أخوانا الخليجيين ! آسف كفلائنا الخليجيين ! هسي بالله دة اسمو كلام زول عندو بلد مليون ميل مربع ذابحو النيل من الوريد للوريد يكون شغال موظف بمهنة (عامل نجار مباني) طيب علي الاقل حقي الاكاديمي دة ياخي انصروهو ينصركم الله !
وأقول قولي هذا واستغفر الله العظيم لي ولكم ! قومو الي حاجاتكم وتصاريفكم وارزاقكم يرحمكم الله !
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة