أنصار عرمان يُدشِّنون حملته الإنتخابِيّة من مكب نفايات بالسوق العربي (صورة)

Quote: علاء يا صاحب .. كيفك وكيف الأولاد والأهل كلهم .. والله أنا قريت كلام بنت الحسين لمن إتكيفت شكراً يا مريم .. عارف يا علاء الواحد لمن يجي ينتقد الإنقاذ عشان الحاجات البتصيب اللحم الحي .. واللحم الحي (الميت) دا ياهو أهلنا ياهم البتعبوا من ظلم الساسة والسياسة .. أهلنا ديل عايزين أولادهم يتعالجوا ويتعلموا ويتوظفوا ودا كلو مافي .. ومصيبتنا نحن كلها في الخرطوم دي ياها البقت السودان قسموهو والباقي أدوهو لي أهله .. الخرطوم يا علاء الحكت ليك عليها مريم دي فيها كل بلاوي الدنيا بداية بي برميل الزبالة دا ونهاية بجمار صاحبنا علاء شاموق بالمناسبة دي خلينا نسلم عليهو ونقول ليهو ليك وحشة يا صاحب والله زمااان .. ودا حالتو يا علاء لسه ما طلعنا بيك على طريق الخرطوم مدني لمن تصل للقلقالة بكون قلبك مقبوض وخايف من الطريق ولما تصل هناك ممكن عادي تلقى الكهرباء قاطعة ومويه مافي ولو جيت في الخريف زي ما إنت شفت وحكيت ممكن تتحبس تلاتة يوم ما تتطلع ودا لسه ما مشينا بيك لي وراء محل الإذاعة ما بتصل .. يا علاء أيه يفيد لو إتبنت عمارة سمحة زي برج الفاتح ومستشفى الخرطوم تعاني زيها وزي المرضى .. أيه يفيد لو وصلو شارع ظلط لبيت الترابي ومدارسنا الحكومية كتب وأدراج ما فيها .. الـ30 جامعة دي يا علاء ما شفنا فيها واحد إتوظف ليهو في وظيفة كلهم مشردين الآن وحالهم بائيس وما أكثر البطالة في السودان ما عايز أحكي ليك عن الخريج ومستواهو الأكاديمي لأنو دا موضوع طويل .. الكلام سمح والشعارات مدفوع عليها 20 سنة ونحن نسمع في الكذب ويجي البشير يقول ليك نحن ما بنكذب ياخي الكذب دا دافعين فيهو قروش ما هي كل الآلة الإعلامية مسخرة ليهو .. يا علاء أنا ما ضد إنتماءات البني آدم وقناعاتو ولكن ربنا دا خلق لينا عقل نميز بيهو ولنا قلوب ترى قبل الأعين وما أكثر المآسي التي رأتها عيوننا في الـ20 سنة الماضية .. طبعاً مسألة الديمقراطية دي بقت فرمالة أي واحد يجي يحكي عنها ممكن يطلّع منها روايات .. لكن نحن في الديمقراطية الحضرناها دي ما كنا بدرجة الوعي الفيها نحن الآن زي ناس كثر عاشوها .. نحن الآن بنعائش وبنشوف وشاهدي عصر يعني بنتكلم بوعي لأن كل الحاجات قدامنا .. الديمقراطية دي طريق طويل وليها ثمن لازم ندفعه ونتعلمه عشان بلدنا تمشي لي قدام .. الديمقراطية دي معناها حقوق وواجبات وأي فرد في المجتمع عارف هو بعمل في شنو وفق دستور يرتضيهو كل أهل البلاد تتساوى فيه الحقوق ويتساوى فيه الجميع .. صراحة عجبني البوست وعجبني الحوار الهادي وهذا ما نفتقده هنا .. ليس المهم أن تغلبني وأغلبك ورأيي هو الصاح وتبقى المسألة رجالة وعنتريات .. وفي النهاية لا يصح إلا الصحيح .. والوطن للجميع .. كان لقيت الوقت بجيك راجع ..