ريهان الشاذلى &مريم عزالدين ورندة حاتم على راس قائمة المرشحات (فى تحالف النساء بالاحزاب )

Quote: الونسة حوار الزين حامد ست النفر ....الماضي سيعود الآن) امرأة صقلتها تجارب الحياة والتي عبرت عبر دروبها الشائكة منذ ان وطأت قدماها ارض الحياة حملت طباشيرة تدرس الاطفال عشقت الوطن والارض والتراب، البداية كانت هنالك في الجزيرة حيث الطين والجروف في مدني الحنينة ومن ثم واصلت المشوار دون توقف شهدت مايو والانقاذ وعرفت الفصل مع ارتفاع صوتها المطالب دوما بعودة الحقوق لاهلها وواصلت الآن وهي تقف على عتبة البرلمان تدفعها خبرة السنين منذ الاتحاد النسائي في السبعينيات، ست النفر ميرغني قنديل، ارملة المرحوم التجاني الطيب صاحب التجربة الاعلامية الكبيرة وعضوة لجنة المفصولين وترفع صوتها للدفاع عن قضاياهم وقالت حنجيب من الآخر عشان تحل مشكلتهم من جوه البرلمان وزي ما تجي تجي.. جلسنا اليها لتحكي لنا حكاوي الماضي والحاضر وآمال المستقبل فماذا قالت؟ ٭ انتي حضرتي انتخابات كثيرة ليه اترشحتي في دي بالتحديد؟ ـ العضوية في البرلمان ليست فشخرة اجتماعية كما يتصورها البعض وانما هي حالة لرد الحقوق لاهلها.. وده الخلاني اترشح يعني من اجل الناس. ٭ والحقوق دي راحت هسة بس؟ ـ انا معاك الحقوق دي رائحة من زمان لكن هسه فات السكات الحد عشان كدي نحن دخلنا المنافسة من اجل الوصول لداخل البرلمان عبر اصوات الناس التعبانه او الصامته. ٭ يعني هسه انتي داخله الانتخابات «اسبيكر»؟ ـ آي انا داخله اسبيكر واسبيكر عالي كمان عشان اعادة حقوق الناس والمفصولين تحديدا. ٭ يعني انتي الموضوع كلو غبينه؟ ـ آي مغبونة من حاجات كتيره من زمن نميري وهسه جاء الزمن الزول يفش فوقوا غبينته ما عشان نفسه ولكن عشان كل المغبونين وانا استاذة من السبعينيات وكنت شغالة موظفة ببند الشريف وبند الشريف ده اسمه بند العطالة وحسه بقى البند الاساسي المفروض الناس تحركه وحا يكون اكبر من البند الاساسي يعني هسه البلد دي فيها كم عاطل شوف انت براك. ٭ هسه انت ما تخلي الفرصة للشباب؟ ـ انا بالمناسبة والناس الكبار هم ملح الطعام والما عندوا كبير يشتريه عشان اكبر منك بيوم اكثر خبرة منك بسنوات والخبرة في الكورة ضرورية خليه البرلمان. ٭ هسه انت ح تصلي؟ ـ باذن الله وارادة الجماهير وتحديدا الاساتذة والنسوان يا اخ ديل كتيرات وقادرات على انو يدخلونا البيت الابيض ذاتو ناهيك من البرلمان السوداني. ٭ اها وبعد ما تصلي حتسوي شنو؟ ـ حاعمل من اجل اصلاح الحال، اول حاجة ضرورة عودة المفصولين لوظائفهم ودعم مشاريع التعليم ومحاربة الفساد وحاعمل على دعم قضايا النساء يعني بدل مستشفى دايات واحد في امدرمان حاعمل مستشفى في كل حي ونملأ البلد وليدات وبنيات. ٭ يعني هسه برنامجك للنسوان بس؟ ـ لا، دعم النساء هو دعم مباشر للرجال يعني مستشفى الولادة لما يكون جنب البيت يوفر حق المواصلات والتعب واللا رأيك شنو، بس خلي الناس تصوت لينا والامور حتسلك ان شاء الله.