Quote: عارف يا فتح الرحمن، والله انا البورد ده من دخلتو لساني اتصلح في العربي، اسي نحرير دي يعني شنو؟ النيم عرفناهو، العمبلوق ده شنو؟
يا ملكة فيما يخص " نحرير " احيلك لسيدي البدوي اما العمبلوق فاستأذن بت الملك في اني اتهجم على تخصصها شوية و ارد ليك انا . . نقول بعد الحمد لله و الثناء على من لا نبي بعده ، و على غرار فرقة الاصدقاء في شرح معنى " سخلة " للخواجة بأنها " عتود"س وايف " او بحروف لاتينية مبينة : Atood's Wife . . فالعمبلوق هو الـ kid من الخرفان و ما لم يبلغ الحلم من الضان . . و الله اعلم " رواه قيقا راوي "
اها دحين دايرين فزعتك في تفكيك " نحرير " و تحرير التحريف في " عمبلوقي " الفكيتو انا دا فوق ، بعدين نجي في شان زعمي العالي " المحاسبة بتتحبّا و الله " الح احاول جاهداً اثباتو و نفي كوتك السابق السبغ علينا كل آضاد " الآكشول " و توعدنا بلحظة حقيقة ماحقة لكل البدجت و الفوركاستينغ و الاستيميشنز . . . خلني النسجل اعتراف اول : انا شخصياً عندي مشكلة كبيرة مع اللغة ، مطلق مفردة لغة ، اكان عربي كان انقليزي . . و المحاسبة جات تمت الطين بلة * المحاسبة في روحا دي لغة ( ودي جاييك ليها وراء مع التقيل ) اسي المقام مقام ترويح اسي دي . . امسك وردك و اتنسم رحيق تم بيهو ليلتك دي . . وبعدين نرجع لباقي النضم . .
قال سيدي البرعي افادنا الله بنفحاته و مدنا بمدٍ منه متصل : مالي و للايام لا تستدينُني و قلبي بدين الحب قد اغلق الرهنَ
الى ان بلغ مبلغاً : نسيمٌ سرى من نحو كاظمةٍ وهنى . . اوردني من لطفه المورد الاهنأ
مع تحذير بخط واضح و صريح اغالط عن سلمى بسعدى و لبنى تنصلاً و ما قصدي سعاد و لا لبنى ما بغيتي الا قباءً و قبابُها . . مدد يا سيدي البرعي مدد
شفت المال و الحب ماشين سوا كيف . . من يومن المال و الحب متلازمات . . . رغم انو اللغة حمالة اوجه . . و فيها شي عجيب ! و مرات مرات كدي بتبقى لي مخاتلة بخشم الباب . . كلٌ يغني على ليلاه المحاسبة بتتحبّا و الله . . و ها نحن نقيم البوست محراب عشان كدي ما تحرش علينا افراد تيمنا ياخ ! تيسير دي رأس الحربة تعرف قصة الكيمياء قصة معاي ( برضو جاياك ) . . لكن الـ( م. ض . د ) برضو في المحاسبة عندنا بقول عليها بلغة الفرنجة : الـ ( أن سيرتينتي سيركوميستانسس ) و دا البجيب الفوركاستينغ و الايستيميشن و بحوجنا للـ التنبوء و التوقع الرياضي ( توقع الخسارة )** . . شفت كيف ؟ ما بين الرياضة و الرياضيات تشابه لغوي ما اكتر . . و قطع شك دي ما عندها علاقة بالكورة و نتيجة الهلال الما متوقعة ابداً و لا تقديرات لعيبتو الغلط شفت اللغة شربكت الشغلة كيف ؟
-------------- * مرات اللغة بنفهما بالحساب مش العكس ، اسي صاحبك بي هناك مستخدم " اس " و دا رمز رياضي استخدامو اللغوي جايط جداً و خاطئ و بلخبت الزول بس ! .. كيف يعني اس المشكلة ، جذر المشكلة ؟ . . جائز . . اساس المشكلة ؟ . . دا الصحيح الـ " أُس " دا فوق يا ناس و كان قوتو بقت 2 نبقى بنتكلم عن " مساحة " و كان بقت 3 بكون حجم ! .الجذر هو البرجعنا للاساس . . استخدموا " جذر " و " اساس " المشكلة احسن . . و لا كيف ؟ ** خصوصاً في " التأمين "
صاحبكم دا الحب خلاهو يعلن البانكربسي . . . و البرعي بدين الحب قد اغلق الرهن . . ! يا شباب المشاركة خلوها في الآخر . . ما تجهجهوا باكاتنا زي جماعتنا مع ما زمبي يا رغيم؟! قلت لي عرفتي معنى " نيم " . . . طيب العبارة كلها عرفتي معناها " تأكل نيم " ؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة