هل من المعقول أن تتزوج من امرأةٍ ثانية؟ .. دعوة للنقاش

Quote: دكتور صلاح البشير صباحك خير ياخي انا ما عارف ابدا من وين غيتو النبدا بشكرك وشكر منبركم (ما بنبركم) اللدانا الفرصة دي عشان نتكلم لفت نظرى عنوان مقالك عملته نفسى ما شايف ولك ما افتح صفحة المنبر العام القى الناس بتقرا وعددا بزيد وانا لسه عامل ما شايف اختليك المؤشر تاع الماوس عليه وبعدين اقول سيبك لكن بيني وبينك الشمار كتلنى وقلته اشوف الحاصل شنو دخلت وقريت واتخلعته ومن الخلعه لمن شعرة جسمى كلبت الكلام ده كلو وانا عامل ما شايف على اى حال انا ح احكي ليك تجربتي مع التعدد انا اتزوجت المره الاولى وانا كنت صغير في سنى واتزوجت بت عمي لزم الله يرحمه والزواج تم حقيقي بسبب رغبة الوالد الله يرحمه برضو كان عاوز "يرجلني" ودي على وزن "يستتني" بتاعت النسوان وكمان كان عايزني اغطى قدحى السابو عمى الله يرحمه تاني المهم انا تزوجت والحق يقال بت العم كانت قايدا لى ايديها شموع وما لي انا بس بل لوالدى الله يرحمه تاني برضو ولوالدتى ودي الله يطول في عمرا وكانت تخدم حتى اخوانى الصغار واخواتى كمان وبعد ده كلو كانت مخليه بالها مع اولادنا وطبعا شخصي الضعيف وشخصي الضعيف دي عشانك انت يا دكتور المهم برغم كلي ده انا كنت شايف انو ناقصاني حاجه كنت حاسي اني اتخميت ما اخترت براي المهم مرة الايام والمرة دي ما فاضل ليها الا تديني باقي عمره ومع ده احساسي بالخمة كلو يوم بيكبر توفى الوالد وانا بقيت زي الحصان الجامح عايز لي سبب اعرس كان ساي قلتا لي سلام اقول ليك بجيكم اخطب اختك بكره المهم صارحتها برغبتي في الزواج ما قالت اي حاجة غير الله يقدرك وبرغم انها حسستني بتفاهتى الا اني اتروجلت وعرست لى واحده من اسره معروفه وبت سمحه جدا اول حاجه امي قاطعتني وقالت لو شفتو قدامي بكتلو والله يا دتور بتعمله وانا كت عشان اجي لي بت عمي واولادي الساكنين معاها بجي بعد ما تكون نامت ويا ما تلبت الحيطة عشان ادخل خاصة لما تكون نايمه في الحوش جنب الباب تتخيل يا دكتور لمن امك تقاطعك عشان عرسته وكمان تحلف تكتلك والغريبه معاملت امي اتغيرت معاى ومعاملة زوجتى كانت زي ما هى يمكن افضل وبديت اشوف فيها حاجات ما كنت شايفا قبل كده فيها حنية ميه وفيها ريده الف وفيها شوق مليون مليون الشوية دي دشليون وحاتك يا دكتور اها زوجتى التانية كانت ممتازه لاكن عندا ام اجارك الله نجاض عديل على اليمين دي اسوا من خلقو ربنا في الدنيا دي مره شرانيه فقر الله يلعنا في القبل الاربعة تنق في اضان بتها الليل والنهار وبدت المشاكل المره الفقر دي كانت فاكرانى اضينه وممكن تركب هي وبتها فوق ضهرى ويدلدلو رجليهن كمان قال شنو لازم اطلق مرتى الاولى عشان افاضا ليهم المهم عشته في نكد بسبب المره الفقر دي خمسه سنين والبت مديا اضانه لامها وسودت عيشتى معاه وانا بحاول بكل الطرق اني اسد طريق المفارقه الى ان مرضت زوجتى الاولى مرض دخلها المستشفى مرضت شديد يا دكتور وقربت للموت الدخلت فيني تاني ما مرقت كنت خايف خوف ما بعدو خوف واليوم كلو ابكى وادعو الله انو يقوما بالسلامه وفى المستشفى قابلته امى لاول مره بعد مقاطعه خمسه سنوات مع اني قاعدمعاها فى البيت ضمتنى امى وهى بتبكي وعفت منى بعد ما شافت حالتى طبعا انا عندى واحده بتموت ما ممكن امشى للتانيه وهى وامها هارني تلفونات دى مابرضو مرتك هاملى كده لى اي انتا قايل ما عندها ولى الوليه الوشه زى الغراب دى نكدت على عيشتى سالتها الفقر قلت ليها انا ما جاى عندى زول بموت عايزين شنو تاني قالت لى كما جيت الليله طلق لى بتي قلت ليها بتك طلقانه بالعشرة ما التلاته ومن اليوم داك ما شفتها الفقر الله يلعنا في القبل الاربعه المهم مشيت كلمته امى وقلت ليها انا طلقته فلانه تصدق يا دكتور واحنا في الظرف ده والموت حايم حوالينا امي تزغرد وتقدلنى وتمشى تقدل زوجتى البين الحيا والموت وتهزها وهي راقده في السرير وبعدها مشت اتوضت وصلت ليها ركعتين وهاك يا ياسين امكن قرتها اليوم داك مية مره وبعد يومين تلاته حالة زوجتى وبت عمى بدت تتحسن والدكتور بشرنا وقال بس ادعو ليها واحنا حنتكفل بالباقى قعدنا بعدداك تلاته اسابيع في المستشفى وامي تشيل وتحكي لزوجتى بالعملته واني طلقته المره التانية والله يا دكتور ما شفته منها غير ابتسامه عمرى ما شفته زيها ولغاية الليله يا دكتور ما قادر انساها الحمد لله زوجتى الان بصحه جيده واحنا اخر سعاده وتانى التوبه ما بعملها الحمد لله انو ربنا اداني واحده بنسوان الدنيا كلهن والله يا دكتور وانت ما طالبني حليفه انا بقيت من شدت ما كرهت النسوان بقن ما بهزن فينى شعره الحمد لله معليش كترت عليك يا دتور بس نصيحة كان معرس ارضى بقسمتك ومره واحده كفايه وكان ما معرس نصحتى ليك ما تعرس اصلو شكرا ليك مره تانيه ومع السلامه الطاهر المامون