هل من المعقول أن تتزوج من امرأةٍ ثانية؟ .. دعوة للنقاش

Quote: الدكتور صلاح السلام عليكم شكرا يادكتور لذوقك العالي والسماح لاصوات من خارج سودانيز أون لاين بالدخول عبر بوابة ايميلك الخاص وده بيؤكد اهتمامك بأراء جميع قراءك كنت اليوم في مناسبة في الخرطوم في مدينة الرياض تحديدا وفجأه بدا نقاش حول التعدد وفجاه القعده من خمسه بنات اصبحت حوالى الخمسين مرأة مره واحده بمختلف اعمارنا الأصغر مني والاكبر المتزوجة والمخطوبة واللي لسه ما بين هذه وتلك قعدت اسمع في الاول عايزه اعرف اتجاه الريح واصلها لقيت الاصل هو موضوعك اما الاتجاه فكان اكتر من اتجاه وطبعا يا دكتور لما ونسه زي دي تكون في مناسبه وفي الرياض فده معناه انو موضوعك ده بقى على كل لسان ببساطه كدا بقى على كل لسان نساء المجتمع الراقي وعشان ما في واحد او واحده يزعلمن حكاية الراقي دي نسحبه ونقول المجتمع العامل روحو راقى طبعا انت والناس المشاركين معاك عايزين تعرفوا احنا كنا بنقول في شنو الحقيقه الكلام كان بدور حول تلاثه نقاط الاولى هل التعدد مقبول للمراة ولا ما مقبول وانقسمت المجموعة الكبيرة الى قسمين والاغرب يا دكتور انو المجموعه الاكبر كانت تدسه فقط بانو ده محلل للراجل شرعا ولازم نقبلو لكن احساسي انا بالمجموعة دى غير احساسي بردها اولا لاني حسيت انهن قابلات الموضوع ده مبدأ مش عشان الدين بس لا هن من جواهن موافقات والاغرب يا دكتور او عدد المتدينات فى المجموعة دي اقلا كتير من الما ملتزمات اقصديعني المامحجبات يعنى هم على عدم التزمن الشكلى موافقات والعكس صحيح في المجموعه الاصغر النقطه التانيه كانت الزوجه الاولى تعمل شنو ودي برضو اختلفنا فيها جماعة تقيف معاها وجماعة لا جماعة تقول تصبر على البلا وجماعة تقول تنفصل وتعيش براها وبعد شويه تختلط الامور وكل جماعة تتبنى الراى المخالف ببساطه كدا النقطه دى جايطه وما حصل فيها اتفاق لكن كان لدى ملاحظه لاحظتها انو كل المتزوجات كانن مع انها تصبر ولا واحده فيهن اعترضت او قالت تنفصل كانهن متوقعات رجالن يعرسو فيهن على الرغم من انو انا بعرف كل رجالن وا شايفه انو ممكن يعرسو تاني النقط التالته كانت دكتور صلاح زاتو وبرضو الناس اختلفت فيك بداية من كتابتك باللغه العربيه الفصحى ومرور بعدم وضوح موقفك ونهاية باصرارك بعدم الاجابه على سؤال سالوهو ليك وما عرفنا اجابته اذا كان معرس ولا ما معرس الحاجه الوحيده الاتفقنا فيها انك مودب لانك بترد على الناس بادب واتفقنا كمان انك بارد وبالك طويل ارجو انو ده ما يزعلك انا بس حبيت انقل ليك الشفته وعايزه اقول مره تانيه كلام بتداولو نسوان الرياض بالانا شفتو ده حيقى موضه والله يستر ما تبقى الموضه راجل المره حلو حلا مره تاني بشكرك يا دكتور واتوقع انك تلاقي اكتر من رساله من بنات حضرن معاى نفس المناسبه دي لانو كتار قالو حيردو عليك وشكرا اختك ك . ج