هل من المعقول أن تتزوج من امرأةٍ ثانية؟ .. دعوة للنقاش

Quote: اخي الكريم دكتور صلاح سلام شكرا اخي الكريم انك اديتنا فرصه نشارك معاكم فى سودانيون على الخط افتكر انو دي الترجمة الصحيحه وشكرا لضيوفك اللي خلو للنقاش طعم ولون ح ادخل فى الموضوع طوالى انا مره اولى مطلقه ح تسال دي تجي كيف اقول ليك احنا اربعه اخوات اتنين مطلقات واتنين معرسين فيهن وانا واحدة من المطلقات ديل بصراحة احنا حظنا نكد مع العرس ما عارفه ليه سبب طلاقي اني ما رضيت تخش على مرة تانية زي اختيني التانيات وياريتني لو رضيت ما تتفاجأ ايوه يا ريتينى رضيت بكررها مليون مره طيب يا دكتور انا حاسه انك متفاجئ وليك حق لكن لما اشوف حالتى وحالة اختى المطلقة واقارنا بحالة اخواتي الرضو يقسمو رجالم مع نسوان تانين بحس هم صاح واحنا غلط انا يا دكتور كنت ولا زلت بحب زوجي اقصد طليقي كان عايشين فى امانة الله لغاية ما جات واحده لفت دماغو وعرسها حقيقة ما دسه على كلمنى قبل يعرس واجل عرسو لسنه للحول عشان باقي على وانا راسى والف سيف ما اقعد معاهو ما دام اختار لى ضره وياريت السيف ده كان قطعت بيهو راسي ظاتو اصريت على الطلاق وعملت مشاكل وقلت ليهو بربي الولد انا (انا ضابطة ادارية كبيرة) انت ما دخلك بيهو امشي للفت راسك وكلام كتير ومع كده هو ما زعل حاول معاى ومع ابوي واهلي كلهم وانا ساده دي بي طينه ودي بعجينه بس عايزه الطلاق المهم تم الطلاق وقعدسته شهور يحاول معاى وانا ارفض وسمعت بعدها انو اتزوج بعد كده طارت السكره وركت الفكره حسيت الدنيا دي بقت صغيره جدا جدا ما قادره ارقد في سرير هو ما فيهو اخلاقى بقت ضيقه فى نخرتى ما قادره احتمل اي حاجه حتى ولدى ما قادره اعاملو كويس صدقنى يا دكتور انا بحبو جدا وعارفه انو بحبنى لكن انا ما عارفه اتصرفت كده ليه خاصه وانا شايفه اخواتى المرو بنفس الموقف بلعو الزعل ورجالم خاشين ومارقين كانهم ماعرسو فيهم يضحكن ونسن كلو حاجه ولما اكون براى بقعد ابكى واندم واقول ياريت لو ده كلو حصل وما ادس عليك بتمنى اشوفه لما يجي يشوف ولدو وبرغم انى ما محتاجه لنفقه وممكن اربى ولدى براى والحمد لله وابوى كمان ما مقصر لكن بنتظر لما يجى يشوف ولدو عشان اشوفه واملى عينى منو انا عارفه انى حيرتك لكن والله يا دكتور انا بدعى فى كل صلاه انو يجى يرجعنى وصدقنى ما عشان الولد بس عشاني انا كمان انا متاكده انو هو لى هسه بحبنى بشوف ده فى عينو وياريت ياريت القى واسطه بينى وبينو انا فترته خلاس يا دكتور وما عارفه اعمل شنو وبقول لاخواتى اوعو تعملو زى كان الرجل عايز يعرس ابلعن مغستكن فى بطنكن الزعل بروح وببقى الزول الحبيب والرفيق العزيز اعزنى يا دكتور العبره خانقانى مع السلامه اختك ش . ع