هل من المعقول أن تتزوج من امرأةٍ ثانية؟ .. دعوة للنقاش

Quote: دكتور صلاح البشير السلام عليكم اولا لازمنشكرك عشان ادينا الفرصة نشارك عبر ايميلك واحنا مجموعة من الاصحاب بنات واولاد من جامعات مختلفة وتخصصات مختلفة برضو بنتابع سودانيز اون لاين يوميا وبنستفيد منها جدا المشكلة ما عارفين نشترك فيها كيف وبعضنا حاول الاتصال بالعنوان الموجود وحتى الآن ما نجحو لفت نظرنا موضوعك وتبادلناه فيما بيننا عن طريق الجات واختلفنا بين موافق وغير موافق الغريبة ان البنات ما عندهن راي قاطع ما عدا زميلة واحدة اللي رفضت هذا الموضوع تماما وبتفترض ان الرجال خاينين كمان واستشهدت بكلام انت جبتو لما اتكلمتها عن ماسميته البعد العملي وكلامك عن علم النفس بصراحة يا دكتور الكلام ده بيعمل لينا اكتئاب لانو احنا شغل ما لاقين عشان نعرس يكون في رجال بيعرسوا اتنين وتلاته وبصراحة كمان وباعتبارى شاب لازال في ريعان شبابه انا متاكد انو البنات ما خدينها معانا تقضية وقت والواحدة عارفة انو ما في امل فينا وليهم حق الواحد ما عندو البركب بيهو الحافله ولا الركشه ويوم اللى يعزمه على كباية شاي تضبح ليهو موية عشان كده هن ما عندهن حل معانا واحنا ما عندنا حل ليهن وكان عرست ليها راجل مرة ما عندي حاجة اعملها ولا الومه اقشقش دميعاتي واغني ليها في الليلة ديك يعني ح اعمل شنو تفتكر نحن ناس غلابة جينا في وقت غلط امكانياتنا العلمية تسد عين الشمس لكن ما عندنا قروش والحكومة داقسه ناس جيوب مليانة وخدود شعرانه وقلوب سعرانه شعرانه دي عشان الدقون وكدا عندنا يا دكتور واحده من شلتنا دي فاكه منها قالت كان لقت دكتور صلاح ده زاتو بتعرسو انشا الله يكون معرس عشرة شيل شيلتك كان معرس وكان ما معرس دى تحلج بلد المهم يا دكتور التعدد ده رقيصا احنا ما عندنا ليهو رقبة كلمنا عن الممكن نناقشك فيهو كلمنا عن سوق العمل وكان انت ما في السودان يعني اقصد كان انت مغترب وكده عليك الله ورينا جهتك انت شكلك كدا بساعد الناس احنا محتاجين للمساعدة دي وشكرا اخوك او ابنك او اي حاجة عادل عن شلة محطة عشرة(أوعى يا دكتور تقول لي محطة عشرة دي وين تكون انتهيت مننا)