|
|
 شكر.. و..عرفان بعد نجاح الزواج
|
شكر العريس عماد والعروس الاء.. كل الذين شاركوهم في زواجهم سواء كان بالحضور او رسائل الموبايل او وصو زول... وصلهم التهاني... ويخصون بالشكر ام العروس التي رضت بالشيلة بالرغم من أنها قالت" مبشتنة وما عندها طعم"....كما يخصون بالشكر ضُرس خالة العريس المرا الشبكة سعاد.....والذي تاورها يوم العرس حيث خلاها تكضُم.. وما تنشبك في أي راجل واللا مرا واللا شافع حيث انها ماعندها قشة مُرة وتنشبك في أي حاجة في أي وقت... كما يخصون بالشكر شُفّع ابن عم العريس ايهاب ... لأنهم كانو قاعدين ساكت وما قاعدين ينططو بين الكراسي ويلعبو دس دس ورا ضهور المعازيم...كما يخصون بالشكر.... اخت العروس سلمى والتي مشاركة منها ما ضربت شلاليفا بالاحمر البنفسجي وما قرنت حواجبينها... وما لبست بلوزتا البنفسجية ونعلاتا البنفسجيات... كما يشكرون عم العريس اُمحُمد والذي مشاركة منو استحما وغسّل جلابيتو وظهرا وكواها للعرس والغدا قصّر وهو ما اتغدا وما فتح خشمو بكلمة جزاه الله الف خير....... كما يشكر العروسين جد العروس المرحوم عوض الله الذي كان قرّب يموت يوم العرس لكنو اجل الموت ومات بعد العرس باسبوع... كما يشكرون وزارة الداخلية وخصوصا ناس البوليص والمتمثلة في النفر عسكري عباس والذي تحنفش وضرب واحد عشرين طلقة من مسدس الحكومة ساعة العقد وهو تأكيد لأن الشرطة في خدمة اعراس الشعب....كما ايضا لا يفوتهم الا ان يشكرو الحاجة نعمات والدة البوليص عباس سيد المسدس لانها كانت كل ما ولدها يضرب طلقة هي تزغرد فزغردت حفظها الله واحد عشرين زغريدة... كما يخصون بالشكر ود خالة العريس عماد.. والذي بالرغم من شتارتو وقوة عينو عامل فيها فنان وغناي وقدر مافي مناسبة في الحِلة يمسك المايك ويهري خلق الله ومشاركة منو رفض يغني في حفلة العرس....كما يخصون بالشكر المطربة المحلية جدا نجاة جبجبة .. التي اتقلبت بها ركشة يوم القيدومة وكسرت كُراعا و جات تدرّج علي عكازين وغنت وجبجبت لمن الله غفر ليها... لها منا جزيل الشكر وفي ميزان حسانتا...كما يشكرون و يثمنون دور صاحبة العروس نعمات والتي لمت الكشف من زملاء و زميلات العروس وجابتو للعروس في الفندق بالرغم من انو ناقص تلاتين جنيه لكن عافينهن ليها لله والرسول...كما يشكرون طوب جارهم شيخ عمر والذي شارك بطوبة لما كراع كرسي الكوشة وقعت واتكسرت رفعوها بيها....كما يخصون بالشكر الحاج احمد والد العريس والذي قسّم حق الكشف مع العريس قسّمة الحلال والبلال....وما شال منو الا حق الكهربا...كما يشكرون سميرة والكان مجكسا العريس والتي حردت وما جات العرس لانو لو جات كان دخلت العريس في ضُفورو وكانت دخلت عليهو بالساحق والماحق والبلا المتلاحق... وكما يشكر العريس والعروس الكلاب المطلوقة الايام دي في البلد وتاكل في الناس انها ما جات اكلت العروس وخلت العريس يشرب ما يروى ... كما يشكرون شكر خاص جدا الاستاذة عشة ام ضنب والتي ملصت ضنبا حتين جات العرس... ... ...كما يخصون بالشكر كاتب هذه لكلمات ... وبيت مال وعيال ....... العروسين عما د و ألاء
|
|
  
|
|
|
|
|
|
|
|
Re: شكر.. و..عرفان بعد نجاح الزواج (Re: Hadeer Alzain)
|
يا هدير نان ما شفتي المنبر دا بقى كيفنو؟؟؟. والزحمة الفيهو ومافي زول ساعل.... وانا المسيكين دا ان بقت عندي كديسونة دايرة تلد ساكت ما تلقى بكان تلد فيهو... وبعد ما ربتا يسهل لها وتلقى البكان وتلد يجي بكري يشيلا هي ووليداتا في كرتينة ويجدعا في السهلة...عليك الله النضم دا بي يرضي لو مسلم؟
| |
|
|
|
|
|
|
|
|
 Re: شكر.. و..عرفان بعد نجاح الزواج (Re: سجيمان)
|
سجيمان يا أخوي
المنبر فعلآ كبر وبالتالي مشاكلو بتكتر .. ربنا يزيد ويبارك. والريس
مشغولياتو كترت معاهو ربنا يعينو ... وإنت يا كبيرهم مفروض تساعد
الريس دا ياخ بدل تزعل منو. وربنا يخليكم لبعض ويديم الود بينكم.
وأنا من الليلة متنازلة ليك من بكاني في الزحمة دي بس تاني ما تغيب
ونورت منبرك!
| |
|
|
|
|
|
|
| |
سجيمان
Hadeer Alzain
سارة علي
طارق جبريل
فيس بوك
تويتر
انستقرام
يوتيوب
بنتيريست