(حين تفتح الرئة شرفاتها فيجلس في رملتها الدُقاقة الأصدقاء: عادل ود الصول شهاب كرّار والصغيرة ماريل عادل).
برتقالةُ في المسام سمّيت براحي علي وسيم الاصدقاء بقّت رياح واتجهجهت ما بيني ما بينو التفاصيل الانيقهْ هذا الصديق وريحة الكتب الاليفهْ هذا الطريق في ذات شرود للذاكره نحو التواريخ المخيفه، هُوْ كان بظن إنّو المكان رغم اختلاف جتّة زمانو لا بد يعود ما الحلم بستان الخيال والفجّه لو ضاقت بيتسع الحنين في افقِ روح المرحله، هُوْ كان بظن انو الحريق جوّاهو درب الممكنات نحو الرحيق نفض النعاس واحتاج لفاس شان يحتطب من غابة الاسي اغنياتو علّق علي شفة احتمالو اسم ماريل العتيد ودا نبض بتّو، وانا حتّي بتذكّر سمايتا يوم نده صاحب علي شارع بلادي أرحْ... نفرتق ظلمة الحاصل هنا، ضحك الجميع وابوي أحمد ماسك العود وبيدندن ( يالبنيّه مالكي) شدّوكي في مرحالكي، ضج الوطن بالامنيات يا حِنْ حنين للامسيات الطاعمهْ نَفَس الغنا والجكّهْ يوم دلّينا وردات القمر للارض واتمقّينا في ضهري البنيّه الفينا اتغدينا وانحلينا من سرب المتاوقه في براح الأصدقاء. في داك زمان ما قبل اسبوع أو اقل كنّا بنشاهد حالة الإنسان غرب او قول قريب من حالة الخالد جواي دوبيت حُجاي أم فقرا أو دبّت دبيباتنا في غناي فينقر حداي موية فريق ما اتفرتقت رغم الحفير كل البَهَم الناس وعبّادي الشمس والجوم جُداد بندر شنو!؟ ريحة أباطيك بتعد كم نسمه في حلق النزيف قدّت سماك شان الامل يحلب سحابو مطر بُخات بخت الأرض ديك بالثبات، إنت البيتعرّف وطن بي حالو يوم جيتك هناك سوّيت شنو؟ الشفّع الشافو الخدار ينبع علي كفّيك وطن ما رضعو غير الإحتمال يمكن يموتو إذا رحل ذاك الحمار نحو المشافي يمكن بتتدارك ضحك صوتم ولد راكز بونّس فيهم الروح المحال شفت الفرق بين الشدر قاعد وِلِد ليهم ظلال والزول بونّس في عقابينم كلام ديل ما بيعرفو الفرق بين لا أو نعم ما هُم بَهَمْ لكن (لَعَمْ) هو المستساق في ظنّهم ذاك الوسط بين دِين ودَين بين هَم صدح والهُم نبح والنحنا لا بد أن نكون. تلك المفارقه يا صديق تعني الوطن والبرتقالة في المسام إن لم تجهجه ريحة الكتب الأليفة لن تعرّف ثورة الروح ما تبقي من حطام الوعي فيك.. أها شفت كيف!!؟
عاصم الحزين الخرطوم- بانت الاشلاق/ لا شائك ولا اسلاك 10 يناير 2010
(الفينقر قرية تقع بجنوب كردفان غرب مدينة الدبيبات)
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة