يا شهيد وطني المناضل *1* يا شهيد وطني المناضل يا رجولة ويا جسارة فاتو عشرين من رحيلك وذكرة الموت والمرارة ولسة في اعماقنا عايش وكل يوم بتشع حرارة وذكرتك مشتولة فينا وما بنمل نحنا اجترارا نار مولعة في حشانا لاخمد لا مات اوارها ************** جيت مراكب خير مسافري حاشا ما ضلت مسارا نطفتك من طينة طيبة شاربة لللنقة والطهارة جيت شايل احلام بلادك وعفة الناس الفتارى ثرت ما قصدك مناصب لارئاسة ولا وزارة ثرت شان ناسنا الغلابة وليها اطلقت الشرارة ورحت انت شهيد رسالتك والشهادة اعظم رسالة *************** يكفى انو بلدنا تشهد قدت موكب انتصارا ويكفى انو الجيش بيشهد تستحق نوط الجدارة بس خسارة زمنا اعور ومت في زمن العوارة في زمان السرقة واضحة والرشاوي نهار جهاره والخيانة بقت فضيلة والفضيلة بقت دعارة والكرم صار عملة نادرة وطال غياب الخير توارى واللصوص في كل شارع وكل شئ اصبح شطارة والكضب والغش وحاتك اضحى من سمة الحضارة ******************* ورخصت الانفس وبارت مابتساوى تمن سيجارة والملايين يا شهدينا اصبحت في هم صغارا في الشمس مشرورة دائما واقفة تقلاها الحرارة تجري دائما من صباحا ولا مساها ورا خدارا والغلا اصبح غول بيبلع قولي بس كيف الدبارة وناس بتتحكم وحاتك فينا من خلف الستارة بالرخيص باعتنا علنا للعدو رهنت قرارا ************** وناس تفتش في الرئاسة دار تموت شان الامارة ناس تلملم في الاراضي وناس قصور فللا وعمارة وناس تفكر دار تهاجر فيزا كانت او اعارة وناس بتنده لله سائلي كان يعجل بي دمارا وناس معيشتا في المعاصي دايرة في سكرا وقمارا وناس بتجري وراء شيوخا ماسكي في ضنب الحمارة وزول شبيه الديك يعوعي كسر الجر والخمارة ************
وناس بويتاتنا الكبيره دايره زول رهن الاشاره والكبار سبب المشاكل والمصايب من كباره ....................... .الجماعه اتلمو بره ولسه فى شكلا وكجاره والخيانه على وشيها والنفاق اصبح شعارا وبكره ترجع للحكومه وتانى ترجع لى شجاره وتانى ترجع للمشاكل وما ينوبنا سوى غبارا وانت مت عشانا نحنا المساكين ..المقاطيع...الحيارى .............................. البلد كل يوم ماشى جارى واقعى على الحداره مين يموت زيك عشانا شان يردلا اعتبارا مين يضحى يجى ويقودا ويبقى فال ليها وبشاره وايد بتردع كل خائن او عميل للغير سفاره والبدور ليها البشاتن والبفتش لى ودارا وسيف يجز لى راس عدوها وقاضى فى الحق لا يبارى ويبقى من ضمن البيفلح والبيقلع لى عداره والبيرفع ........والبسند والبشيد...لى عمارا والجماهير تبقى حره ومن سجن ينفك اسارا .................................. البلد............. تجتاحو ثوره . ثورة النار........والحجاره ثورة....الماشبعو اصلا ثورة ....الناس الفقارا ثورة.......العدمان وعارى من قميص..... اوكان زراره ثورة...المظلوم ....ويدعى دعوة الرجا .......والمراره وكل ايد مرفوعه ضارعه راجى يوما تاخدو تارا ثورة اب جيبا.....مفتق رابطو بى سعفى ودباره ثورة الحاقبلو منجل ثورة الشايلو فاره ثورة ال للخير يغنى ثورة البمدح بطاره ثورة العمال جمبعا ثوره بى اسم التجاره ثورة العشوائى سكنو ثوره من حى العماره ثورة الجيعان ويحلم أكله بى شيه ومراره .................. ثورة اللوح والدوايى ثوره ترفل فى وقاره ثوره طاعمى ومو مسيخى ثوره بى توما وشمارا ثورة النومن مقطع باتو بردانين سهارا ثورة الكل فى وطنا من قبايل..من مشايخ من نظارا ثوره فيها اخوات مهيره ثوره بى فن بى مهاره
ثوره ذى برقا بيشلع صاقعه يطرش انفجارا .............................. ثوره للعز فى بلادى لابسه اكليل افتخارا ثوره فيها فيها الله اكبر ثوره والاسلام ازارا ثوره فوق كل حربه مصحف ثوره بى معنى العباره ثورة الدين والشريعه ومطلب الامه وخيارا ثوره للخير والتكافل يبقى عنوانه واطارا ثورة المظلوم شهيدنا تهزم الزل والحقاره ما البيزرع طلم لازم بكره من يجنى الخساره ...................................... الشاعر احمد سيداحمد بلول ابن عم الشهيد عثمان بلول
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
فيس بوك
تويتر
انستقرام
يوتيوب
بنتيريست