|
14...........
|
عيد الحب أو 14فبراير (أول شىء ياجماعة العنوان دة ملطوش من طه سليمان) فى مثل شعبى بليغ وفصيح جدا بيقول: (شهر ماعندك فيو نفقة ماتعد أيامو) اها أنا مع 14فبراير بتاعكم دة دى نظريتى الشغالة ,وبفهم شديد كمان
هو الحب دة داير ليهو يوم؟ شنو شابكننا عيد الحب ومابعرف إيه (نحن نسعى إلى حب لاعلاقة له بالزمن ولا الأمكنة) نحن ناس محبة على الإطلاق حب تتنفسو مع هوا الله تتصالح مع ثقالة حبيبك/تك ولسانو الطويل أو شتارتو , شناتو, ومخو التخين زمنو الفارق, تمسك إيدو وتطلعو من مربع مشترك, تكملو جمال بعض تمشو مشوار جمييييل , وفى كل محطة ترسمو لوحة بالفرح, الحزن والأمنيات شبه المستحيلة وتبقى ممكنة وخضرا ومفرهدة طووول العمر دة الحب البستحق الإحتفال ماسمعتو امل دنقل كتب شنو؟ (أنك لاتدرين معنى ان يمشى الأنسان ويمشى بحثاً عن إنسان آخر حتى تتآكل فى قدمية الأرض)
لو إتآكلت الارض فى قدميكم بحثاً عن إنسان بتبقى أيام الله كلها 14 فبراير. وبعدين الحب دة ذاتو حق أتنين ناس بحبو وسعيدين جدا , وديل ولااااااااا محتاجين لعيدكم دة يعنى بفهمكم دة أيامهم كلها 14 فبراير حب يعنى حب عمرك كلللللللللو
وناس الحب دة مجهجهم وخاليهم يعدو فى نجوم الضهر وديل لو إحتفلو تكون ميتة قلب منهم ساى او محاولة لتلطيف الأجواء , والخروج من بالحب من عنق الزجاجات الكتيرة الدخلوهو فيها
أماهنا فاكتست الشوارع كلها بالورود الحمرا والقلوب !!!!! الأعلانات فى الشوارع عن عروض العطور والمجوهرات وصفوف طويلة فى صالونات التجميل
هنا طبعا (الناس الحِِبية وناعمة)أناخو بعيرهم, يتجملوا للحبيب/ة ويتنافسوا فى شكل الهدية وغرابتها -وأهم شىء قيمتها-
نحن حب شنو لينا ؟؟؟ السودانى لمن يحبك بيعزمك غدا؟؟؟؟ (فى إستثناءات) وطوالى يقول ليك: رايك شنو نشرب حاجة وبتكون على طول بيبسى (بيبسى دة زمان -حسة بقى فى فينو...شامبيون...وهلم جرا) كانو المعدة هى الراعى الرئيسى للحب ويستمر المسلسل دة لفترة طويلة ,
مداخل تعبانة ومضروبة والسودانية لما تحب تحرص على جمال وجهها (برضو فى إستثناءات) وتنسى ماعداه ويقضوا ليهم زممممممممممن هو ينفق وهى تتجمل
ليه نحن ماصريحين فى الحب؟ وأجمل الحب وأعمقه مابنى على الصراحة
يحبك شديييييييد, ويبركن عربيتو فى ساحاتك كلها (جمب بيتكم /جامعتك ولا محل الشغل ) (دة طبعا لما يكون عندو عربية) ويلصق ليك زى الضل لمن يجيبك الواطة ويعرسك
اها بعد دة طوالى تنسى أى لمسة أو همسة أو نظرة حنينة
بس طوالى يسألك, الغدا؟ القميص مامكوى
شرابى الأسود وينو؟ إنتى جنك نِقة وكلام كتير وتبقى لاأنثى ولايحزنون , ويكون الحب مالايق عليك أووووووووووووووووه - ينسى ليك حتى اليوم الجابك فيو الواطة دة خلى يتذكر ليك عيد الحب الا من رحم ربى ويطلع يفتش عن الحب فى قلوب وعيون التانيات وأنتى ولاجايبة خبر وأنتى بعد داك بتبقى زى حبوبتى لابسة قميص مورد بالعجين وريحة البصل شعرك منكوش وبتلعنى فى اليوم الاكلتى فيهو الغدا الفوق داك وبتصرخى مع العيال زى المجنونات (فى الحقيقة من غير زى)
أها يأخوانا تحياتى للناس البحبو ومحتفلين وللناس البتعانى وبرضو محتفلة وبرضوللناس الماعندهم نفقة فى الشهر دة
وكل سنة وإنتو طيبين
|
|
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: ندى عثمان حسن)
|
سلامات ندى
تعرفي تزوجت يوم 13 فبراير طبعاً زماااان لم نكن نعرف وقتها . المدام وأنا أو ربما هى كانت تعرف لكنها لم تقل أن هذا هو يوم عيد العشاق أو عيد الحب أو فلانتاين المهم وجدنا أنفسنا - فجأة - نعيش هذا اليوم غصباً عنا كريماتي لا يصدقن هذا أو لا يردن أن يصدقن ( يتهمننا ) - زوراً - أننا قد جسدنا قمة الرومانسية وبمناسبة هذا اليوم
كنا شباباً ممتلئ فرح بالدنيا قلنا نحتفل بعيد زواجنا الأول وبرضو زماااان دعونا مجموعة صغيرة من الأصدقاء مع زوجاتهم في إستراحة في مدينة زايد بالمنطقة الغربية لإمارة أبو ظبي ونحن في عز الإحتفال جاء إتصال هاتفي لأحد المدعوين يبدو أنه إتصال مهم ومستعجل ، ويبدو أن بينهم موعد مسبق نساه صاحبنا المدعو فسمعته يقول دون أن أقصد التصنت عليه يعتذر لصاحبه المتصل
" والله نحنا هسع في الإستراحة ، أخونا عاطف وزوجتو طبعاً لسع السكين سارقاهم ، عازمننا حاجة إسمها عيد زواج ، تقول شنو ؟؟ فياقة شباب ........"
مت من الضحك .
| |
![URL](https://sudaneseonline.com/db/blank.gif) ![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: عاطف عمر)
|
Quote: ( يتهمننا ) - زوراً - أننا قد جسدنا قمة الرومانسية وبمناسبة هذا اليوم |
وأنت ليه ناكر ياخ؟
Quote: كنا شباباً ممتلئ فرح بالدنيا قلنا نحتفل بعيد زواجنا الأول وبرضو زماااان |
وحسة؟!
سلامو يااستاذ عاطف
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: ندى عثمان حسن)
|
بس طوالى يسألك, الغدا؟ القميص مامكوى
شرابى الأسود وينو؟ إنتى جنك نِقة وكلام كتير وتبقى لاأنثى ولايحزنون , ويكون الحب مالايق عليك أووووووووووووووووه - ينسى ليك حتى اليوم الجابك فيو الواطة دة خلى يتذكر ليك عيد الحب الا من رحم ربى ويطلع يفتش عن الحب فى قلوب وعيون التانيات وأنتى ولاجايبة خبر وأنتى بعد داك بتبقى زى حبوبتى لابسة قميص مورد بالعجين وريحة البصل شعرك منكوش وبتلعنى فى اليوم الاكلتى فيهو الغدا الفوق داك وبتصرخى مع العيال زى المجنونات (فى الحقيقة من غير زى)
-------------------------------------------- دي الحاله ما عندك نفقة فيو كان عندك كان قلتي شنو شكرا لزرع الابتسامه وانا معاك لا زمان ولا مكان للحب
بس على فكره الفلنتاين في السودان ماخد طابع شوفوني وبوبار دا من خلال مشاهدتي زماااااااااااان وعلى زمنا كنا بنلبس أحمر ورمادي ههههههههههه هسه ماعارفه الحاجات وصلت وين
ندوية كل سنه وانتي الحب
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: بكري الخير)
|
Quote: دي الحاله ما عندك نفقة فيو كان عندك كان قلتي شنو |
ياوجن, عندئذ مابقول...لووووول
قصة الشراب الاسود , أظنها معذباك؟
كل سنة وإنتى طيبة , وأيامك كله أعياد
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: معتصم مصطفي الجبلابي)
|
ندي سلامات ..
كلام حلو شديد .. خصوصا الجزء ده :
Quote: يحبك شديييييييد, ويبركن عربيتو فى ساحاتك كلها (جمب بيتكم /جامعتك ولا محل الشغل ) (دة طبعا لما يكون عندو عربية) ويلصق ليك زى الضل لمن يجيبك الواطة ويعرسك اها بعد دة طوالى تنسى أى لمسة أو همسة أو نظرة حنينة بس طوالى يسألك, الغدا؟ القميص مامكوى شرابى الأسود وينو؟ إنتى جنك نِقة وكلام كتير وتبقى لاأنثى ولايحزنون , ويكون الحب مالايق عليك أووووووووووووووووه - ينسى ليك حتى اليوم الجابك فيو الواطة دة خلى يتذكر ليك عيد الحب الا من رحم ربى ويطلع يفتش عن الحب فى قلوب وعيون التانيات وأنتى ولاجايبة خبر |
هههههههههه أوجزت وجبت التايهه يا ندي .. انت قايله نحن زايغين من الموضوع من هيّن ؟ أو كما قال قيقراوي.. الرومانسيه هي الطبيخ, حتي قلنا ليته سكت لوووول ..
عندي بت خالي قالت الموضوع ده زي لما تجي تقطعي الشارع, ياطقشتك عربيه, ياوصلتي بهناك !! عشان كده وخوفا من الحادث, درب السلامه ياحبيبه لوووول ..
| |
![ICQ](https://sudaneseonline.com/db/blank.gif) ![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: Amany Elamin)
|
Quote: عندي بت خالي قالت الموضوع ده زي لما تجي تقطعي الشارع, ياطقشتك عربيه, ياوصلتي بهناك !! |
ياامانى سلامو
مالا علينا بت خالتك ياخ؟
يعنى شنو حسة نقطع ولامانقطع؟
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: ندى عثمان حسن)
|
Quote: اصللللللو ماعرفتك وأنت رومانسى |
رومانسي دا أساسي ياخ! .. أنا ود الصايم!
كدي أشرحي لينا الرومانسية دي شنو؟ (الرومانسية) الأنا بعرفا محل بتاع عبايات في شارع أم الحمام العام!
| |
![URL](https://sudaneseonline.com/db/blank.gif) ![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: ندى عثمان حسن)
|
Quote: وأنت ليه ناكر ياخ؟
|
والله يا ندى ( البهيتة ) حاااارة الجماعة ديل بهتونا في صمة خشمنا لو الزمن داك سألوني من فالنتاين دا إمكن كنت أقول عليه ( عطر ) جديد أو هو شرف لا ندعيه وتهمة( ننكرها )
وبعدين معاك ؟؟ دي نوع أسئلة بتودي الزوول في طريق ( خرج ولم يعد ) صديقي ( ع ) يسمي يوم الزواج بـ ( ليلة الخناجر الطويلة ) شفتي يا أماني بت خالتك برضو ( حنينة ) كيف ؟؟؟ كان دائم التهكم على بأنو
" نحنا من يوم إتزوجنا تاني ما إتذكرنا اليوم دا كان يوم كم ؟؟ ولو - بالصدفة - إتذكرناهو بنعمل رايحين . إنت من نكد الدنيا عليك الدنيا كلها بتذكرك ليهو "
عالم حاقدة
| |
![URL](https://sudaneseonline.com/db/blank.gif) ![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: Tabaldina)
|
Quote: ( تعديل لحذف ما بين القوسين حقيقة جملة الدنيا زايلة دى رجعت الواحد للموت والحياة .. وربنا يرحم موتانا ) |
شكراً ياتبلدينا
أنا شفت مداخلتك وإستغربت
لكن خيرً مافعلت
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: عاطف عمر)
|
Quote: صديقي ( ع ) يسمي يوم الزواج بـ ( ليلة الخناجر الطويلة ) |
أخير بت خالة أمانى والله,
Quote: " نحنا من يوم إتزوجنا تاني ما إتذكرنا اليوم دا كان يوم كم ؟؟ ولو - بالصدفة - إتذكرناهو بنعمل رايحين . إنت من نكد الدنيا عليك الدنيا كلها بتذكرك ليهو "
عالم حاقدة |
العالم البتذكرك ؟ ولا صاحبك؟
الليلة يوم الأسئلة التعسفية
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: عاطف عمر)
|
ندى سلام ..
عيد الحب او الفالنتاين قبل كمين سنة
كان بجينا وبغشانا فى الاحفاد وهاك يا
احمر وهدايا وفٌسح ووووو
اسى خرج ولم يعد وفى رواية اخرى
كااااااك
ا
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: سارة كرودى)
|
Quote: عيد الحب او الفالنتاين قبل كمين سنة
كان بجينا وبغشانا فى الاحفاد وهاك يا
احمر وهدايا وفٌسح ووووو |
ياسرور , ناس الأحفاد ديل كانوا مرجعيتنا فى آليات إلأحتفال بعيد الحب
Quote: اسى خرج ولم يعد وفى رواية اخرى
كااااااك |
حسة لابسة فستان مورد بالعجين , موهيك؟
سلامو كتير
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: ندى عثمان حسن)
|
ندى ازيك وربنا يجعل ايامك كلها حب
ماعارف فى مثل هذه مناسبات دائما بتذكر المشوكشين و المشوكشات رايكم شنو نسمع ابو الزيك كمشاركة منى لهؤلاء ...............
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: ندى عثمان حسن)
|
اللهم اجعل ايامنا كلها اعيادا للحب والتسامح
قيل
ان ادروب سمع لاول مرة بعيد الحب فسال جاره
ودا كمان كم ركعة كمان دا ؟
اما بلدياتنا الشايقي فكان يتحدث مع خطيبته تلفونيا فقالت له طبعا بعد اسبوع عيد الحب ياحبيبي فقال لها
والله ما سمعتا بيهو لكن بالواضح كدا ما تقولي دايرا لك زيادة مصاريف
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: محمد المرتضى حامد)
|
شوفي بوستك دا جاب لي الهواء كيف
تاني الواحد ياندى الا يشوف ليه مشفراتيه يعلموه الشغله
-------------------------------------------------------------
اختي وجن انا اسمي ............ صديقي العزيز زوجك المحترم محمد الأمين عبدالرازق منذ ان كنا سوياً في جامعة بومبي. تعقيب على ردك في بوست ندي عثمان 14.....
(ويطلع يفتش عن الحب فى قلوب وعيون التانيات وأنتى ولاجايبة خبر )
اقول لك صديقي محمد الأمين عبدالرازق لا يفعلها والله, إنه صادق صدوق صادق الوعد.
-------------------------------------------
يعني أنا الفستاني مورد بالعجين
نعم الصديق أنت والله ونعم الزوج هو يعلم الله
مجرد إعجاب بكلام النديه الشقيه
لكنه لا يخلو من شراب أسود
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: وجن)
|
Quote: يعني أنا الفستاني مورد بالعجين
نعم الصديق أنت والله ونعم الزوج هو يعلم الله
مجرد إعجاب بكلام النديه الشقيه
لكنه لا يخلو من شراب أسود |
وأدام الله عليكم المحبة ياوجن , ياخ الجاتك فى إعجابك سامحتك والله
عشان تانى ماتعجبو ساى,لوووووووووب
الشراب الأسود دة أظنو قاسم مشترك - فى واحدة صاحبتى سافرت السودان , زوجها ضرب ليا الصباااح, صحاها من النوم , إتخلعت وسالتو فى شنو؟
قال ليا: مافى حاجة مافى حاجة, بس ماعرفت الشرابات وين؟
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: بكري عباس علي)
|
Quote: ان ادروب سمع لاول مرة بعيد الحب فسال جاره
ودا كمان كم ركعة كمان دا ؟ |
قول ليهو هنا , ح تركع عمرك كلو..
Quote: والله ما سمعتا بيهو لكن بالواضح كدا ما تقولي دايرا لك زيادة مصاريف |
جاها من الآخر
سلامو يابكرى وكل سنة وإنت طيب
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: ندى عثمان حسن)
|
تعرفى ياندى عندى اربعه حبيبات بضربلهم يوم عيد الحب اتنين منهم تلفوناتم لايمكن الوصول اليهاووالتالته قالو مرقت وخلت تلفونا فى البيت اما الرابعه فاخبرونى قبل اسبوع انها تزوجت وغادرت مع زوجها جيت قريت بوستك دا استمتعتبو وهسي قايم انوم ودااخر فالنتاين اؤمن بالاحتفال به عشان الجاى الواحدبكون دخل القفص عمرك شوفتيلك زول بحتفلو جوا قفص برضو كيفتنى حكاية المعده الاقتبسا مولانا المرتضى والله دى قطعتى فوقا الابداع اتمنى فنتاين الجاي قناعاتك تتغير ياكمان عراقيك يكون مورد بالعجين happy valentine day
| |
![Yahoo](https://sudaneseonline.com/db/blank.gif) ![URL](https://sudaneseonline.com/db/blank.gif) ![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: WAD ELGAALI#4)
|
Quote: تعرفى ياندى عندى اربعه حبيبات |
ماعندهن أيوتها سالفة حبيباتك ديل
Quote: اتمنى فنتاين الجاي قناعاتك تتغير ياكمان عراقيك يكون مورد بالعجين |
بتمنى برضو قناعاتك تتغير ,
وكل سنة وإنت طيب
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: ندى عثمان حسن)
|
Valentine’s day jokes.. To,
Ms.Juliet Sub: Offer of love!
Dearest Ms Juliet,
I am very happy to inform you that I have fallen in Love with you since the 14th of October (Saturday)..
With reference to the meeting held between us on the 13th of Oct. At 1500 hrs, I would like to present myself as a prospective lover.
Our love affair would be on probation for a period of three months and depending on compatibility, would be made permanent.
The expenses incurred for coffee and entertainment would initially be shared equally between us. Later, based on your performance, I might take up a larger share of the expenses.
However I am broadminded enough to be taken care of, on your expense account.
I request you to kindly respond within 30 days of receiving this letter, failing which, this offer would be cancelled without further notice and I shall be considering someone else.
I would be happy, if you could forward this letter to your sister, if you do not wish to take up this offer.
Wish you all the best! Thanking you in anticipation, Yours sincerely,
Romeo
دة كلام تمام,
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: Amira Elsheikh)
|
Quote: سؤال للنقاش -وانا جادة والله-
بينفع نكون صريحين , مع ناس الشراب الأسود ديل؟ |
ندى ياندى,,ازيك شدييييد,,,,
وانا اكثر جدية منك ياندى واخدت الكويتيشن دا لانو جزء من هواجسي هو مسالة الصراحة دى ويجب انها تكون فى كافة العلاقات الانسانية من غيراستثناء,,الصراحة هى مايبعث الرضاء والطمانينة فى الاخر والا احسن الواحد يعيش الون ويحمل هواجسو...احلامو,,,تجاربو,,,اخفاقاتو,,,,ومخافو,,,من ان يعيش مع اخر ويضيف عب جديد,,,,
مستغربة فى الناس البتتكلم وتبرر لانو مافى صراحة مطلقة فى العلاقات الانسانية ? ,,,الحب قيمة والصراحة والوضوح برضو قيم تدعم وتقوى الحب وتجعل استمرارية العلاقات ممكنة ومحتملة,,,,
وكل سنة وانت طيبة ياندى,,
(عدل بواسطة Amira Elsheikh on 02-15-2010, 08:52 AM)
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: Amira Elsheikh)
|
ندوية صباحك نوووووور ...
ما عارفع ليه لكن عندى احساس انو عيد الحب الليلة .....
...
والغريبه الليلة الاتنين ما الاربعاء يعنى كان نقول لولية ...
نسيت اختو ليك امبارح لوووول ..
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: سارة كرودى)
|
Quote: ما عارفع ليه لكن عندى احساس انو عيد الحب الليلة .....
...
والغريبه الليلة الاتنين ما الاربعاء يعنى كان نقول لولية |
دة كلام تمام, وكل أيام أعياد وحب
Quote: نسيت اختو ليك امبارح لوووول .. |
اييييييييييي يوم ممكن ياخ
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: Amira Elsheikh)
|
Quote: مستغربة فى الناس البتتكلم وتبرر لانو مافى صراحة مطلقة فى العلاقات الانسانية ? ,,,الحب قيمة والصراحة والوضوح برضو قيم تدعم وتقوى الحب وتجعل استمرارية العلاقات ممكنة ومحتملة,,,,
وكل سنة وانت طيبة ياندى,, |
البت أميرة بتقول كلام زى الورد
وإنتى طيبة
وسلامو كبيييييييييير
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: ندى عثمان حسن)
|
ندوش
كل عام وانتى الحب
اها انتى سألتى سؤال قلتى:
"ممكن نكون صريحين فى الحب"
غايتو لقيت ليك رد كده عجبنى فى بوست مجاور قلت اجى اشارك بيه ممكن
Quote: ما تغالبى الريد بغلبك وبظهر الخافيهو قلبك... حتى عينيك ما حتقدر رغم حرصك تخفى حبك.. يامكابرة
إيه بضيرك لو صدقتى وقلتى كل الحاسة بيهو....
------------------- * حقوق النشر محفوظة لمنولة العسل ست البوست المجاور |
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: ندى عثمان حسن)
|
اها يا ناس العيد الكبير فلتنتو خلاس ؟ مالو عيدكم قصير كدا ؟ . . مش زي الاعياد التانية مفروض يكون ليهو تاني و تالت . . و لا كيف
![](http://www.sudaneseonline.com/uploadpic/jan09upload/v.jpg) فضلة خيركم نحن ضبحنا مع كامل تضامني مع الخرفان و دماءها الطاهرة السالت هدر في اليوم دا و مزيد من الفساتين الموردة بالعجين و البصل بارفيومز و الله رومانسيةالورود اهين من رومانسية الكروش / القروش . . اسي كيلو اللحمة بكم و بوكيه الورد بكم ؟!
و الله يا ناس البنادر بتسووا ليكم في جنس محن ؟ اها كم عيد عندكم في الحول ؟ بنسأل دايرين نعرف . . شن عرف العرب بغسيل الصابون كمان ؟!
---------
يا ست الدار و بوست سمح جد و اكتر شئ عجبني الاوفر بتاع روميو . . نعم اني فضلة خيرك محاسب ؤ كدا كمان كان بتعرفي جوليت انصحيها تكسب ساي - تعمل اكسبتناس للاوفر دا و تكسب زمنها - دي فرصة " بزنس " مربحة - حكم انو قابل الشير الاكبر من التكاليف بناء على اداءها - الفرص دي ما بتتوفر كل يوم. . و لا كل 14 من كل شهر ![](http://www.sudaneseonline.com/db/attention/010_Smile.gif) كمان كان ما دايرة تسمع الكلام و تمرر لاختا ما تبقى حاسدة
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: قيقراوي)
|
قيقراوى
سلامو
اقول ليك ماعندنا نفقة , تقول تانية العيد؟
انا ذاتى اوفر روميو دة ريحنى شديد, دة كلام من الآخر خالص
بس اوعى تكون جنك شرابات؟
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: ندى عثمان حسن)
|
Quote: نحن نسعى إلى حب لاعلاقة له بالزمن ولا الأمكنة) نحن ناس محبة على الإطلاق حب تتنفسو مع هوا الله تتصالح مع ثقالة حبيبك/تك ولسانو الطويل أو شتارتو , شناتو, ومخو التخين زمنو الفارق, تمسك إيدو وتطلعو من مربع مشترك, تكملو جمال بعض تمشو مشوار جمييييل , |
وتجوا راجعين تقومى تملصى ليهو الشراب وتسخنى الغداء ..
يا ندى والله من الليله إنتى حتبقى كاتبتى المفضله ! يأخ إيه الجمال واللغه الباذخه دى ؟ خطيره إنتى يابت !! حأعمل ليك رابطة معجبين .
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: عادل سهل)
|
Quote: يحبك شديييييييد, ويبركن عربيتو فى ساحاتك كلها (جمب بيتكم /جامعتك ولا محل الشغل ) (دة طبعا لما يكون عندو عربية) ويلصق ليك زى الضل لمن يجيبك الواطة ويعرسك
اها بعد دة طوالى تنسى أى لمسة أو همسة أو نظرة حنينة
|
ما قلتي الا الحق يا ندو يا حبيبتي..
انا راجلي رسل لي 800 وشوية رسالةSMS في اربعة شهور قبل العرس..
كلها من عينة:
صحيت من النوم ومر طيفك الملائكي في شارع احزاني العتيدة
ولا :شميت ريحة البنفسج والدعاش لما جيتي في خاطري ولمحتك وقلت
دي امجاد ولا هايس؟
كمية كده من الوهمات والدجل عمل لي بيهم تخدير عام زي احرف ANAESTHETIST
اها وبعد العرس عينك ما تشوف الا الضلمة..
الرسالة الوحيدة والمكررة هي: اجيب ليكم عيش صامولي ولا بلدي؟
اييييييييييييييييييييييييييه عجبي!
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: قيقراوي)
|
قيقراوى
ياخ دة جهاد عديل مش حب, والله حقو نصرف ليك دستة شرابات , لحدى العيد الجاى
زول ملتزم بمتطلبات البركنة , كلها
يعنى حسة سفنجة ومربوطة بخيط اخدددر
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: ندى عثمان حسن)
|
مرحبا ندى ، ، ،
أولاً أشكرك على روحة الطيبة فى ادارة الحوار بهذا البوست ، رغم ما به من مطبات !
Quote: ياخ إبراهيم سهل ببقى ليك شنو؟ |
ابراهيم أخوى ، وأوصل له سؤالك عنه ، لعله دفعتك باقتصاد الخرطوم
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: عادل سهل)
|
Quote: ابراهيم أخوى ، وأوصل له سؤالك عنه ، لعله دفعتك باقتصاد الخرطوم |
شكراً ياعادل ,
إبراهيم أستاذنا , وتربطنى بزوجتو صداقة جميلة
تحياتى لإبراهيم وندى
| |
![Edit](https://sudaneseonline.com/db/icon_edit.gif)
|
|
|
|
|
|
Re: 14........... (Re: Rawia)
|
ياراويا
كل سنة وإنتى طيبة, وكتييير عاااشقة
وشكراً على شيرين , البنية البتغنى بكل إحساسا, وتخليك تحسى أنو أصل الكلام , غنا
| |
![Edit](https://sudaneseonline.com/db/icon_edit.gif)
|
|
|
|
|
|
|