سَجَم أُمّكن .. أَكَان .. شُغُلّكَن فِي النَار .. وحَلّتكَن فِي المَكّتَب

Quote: الأخ الدكتور صلاح البشير السلام عليكم اسمح لي أن ابتدر هذه المشاركة بسؤالك مباشرة، هل هذا الحديث الشيق وهذه العبارات البليغة هي شعور حقيقي؟ أم أنها مجرد كلمات لشخص قادر على حلو الكلام. إنك ايها الكريم إن صدقت فأنت تسمو بنا جميعاً إلى عالم لا أراه أمامي ، ولكني رسمته ألف مرة في خيالي. كم تمنيت أن أجد لنفسي في قلب إنسان ما ما وجدته زوجتك في قلبك، وأخاف فقط ألا تكون صادقاً. واسمح لي أخي الكريم بسؤالٍ آخر، كيف تمكنت من أن ترى تلك الرحمة التي وصفت وأم أولادك تصفف شعر بناتها؟ .. ما أروع وصفك، لكني أخاف ألا تكون صادقاً وأن يكون الأمر مجرد رسمٍ بالكلمات. وسؤال أخير أود أن أختم به مشاركتي، آمل أن تجيب عليه أو أن يجيب عليه أي من المشاركين الذكور، أيوجد رجلٌ فيكم يحب امرأته كهذا الحب الذي تدفق بين السطور؟ ... لست أدري، فهل من مجيب؟ اعتذر للإطالة وشكراً لك أخى على ما قدمته، ولزوجتك وأسرتك ألف تحية ، أما نحن فسجم أمنا اختك ع . س

Quote: الأخ العزيز د. صلاح أهل الحوش زي ما بتقولوا سلام متعتنا يا دكتور الله يخليك لأسرتك صحي والله يا دكتور البيت بيت المرة ما بيت الراجل شكرا اخوكم عبد المطلب ياسين

Quote: دكتور صلاح.. بالله عليك هل تحكي عن واقع حاضر وموجود.. أم خيال وأحلام؟؟

Quote: ما صعب انو يكون الكلام حقيقي

Quote: الأخ د. صلاح البشير أرجو يا دكتور أن تسمح لي بالرد على الأخت ع.س صاحبة الرسالة الأولى . أود أولاً أن أؤكد لكي أن الدكتور صادق جداً في مشاعره وفي كلامه ويا أختي لدكتور صلاح عبارتان مميزتان هما : 1. برضو بنات بلدي أعف وأطهر وأجمل وأنبل نساء الأرض جميعا 2. بلدا أنتن بناته ما بتجيها عوجة . إذن دكتور صلاح عنده رأي إيجابي جداً في المرأة السودانية . من أين نبع هذا الرأي ؟ وأكيد أن دكتور صلاح لا يعرف كل النساء السودانيات ولكنه يعرف امرأة واحدة أعطته هذا الانطباع وجعلته يعتقد هذا الاعتقاد في المرأة السودانية وهي السيدة زوجته التي استطاعت أن تمتلك قلبه ومشاعره وتقدم نموذجاً مشرفاً للمرأة السودانية في نظره. وبالتالي الدكتور لا يكتب كلاماً جميلاً فحسب وإنما يحس وبصدق بكل كلمة وكل حرف سطره . بعدين يا أختي لما نلقى رجل سوداني يكتب كلام زي دا في زوجته ويوم عيد ميلادها نحييه ونشجعه ولا نحبطه؟ ومعروف أن الرجل السوداني بخيل جداً في التعبير عن مشاعره بسبب تريبته . ودعيني أختي أضم صوتي إلى صوتك وأسأل معك الرجال المشاركين نفس سؤالك : أيوجد رجل رجل يحب امرأته كهذا الحب الذي تدفق بين السطور؟ وأضيف إليه سؤالاً آخر إذا وُجد هذا الرجل هل هو على استعداد لإعلان حبه لامرأته على الملأ؟ وإن كان دكتور صلاح ليس هو الوحيد الذي كتب عن زوجته في البورد ويحضرني مثالين قريبين الأخ: بخاري عثمان عندما كتب في زوجته نجلاء أيضاً يوم عيد ميلادها وكمان تجلت السيدة عفاف أبو حريرة في بوحها بريدتها لزوجها على الملأ . على أي حال أنا أحيي دكتور صلاح وبقول له يا ريت لو نلقى بس عشرة رجال زيك أختكم جميعاً ع . ع

Quote: د. صلاح والمتداخلين مساكم الله بالخير حقيقة ان الزوجة الصالحة نعمة من نعم الله سبحانه وتعالي على البني ادم كما هو الزوج الصالح نعمة الزوجة الصالحة الصبورة هي وراء نجاح الرجل وكثير من الرجال اعرفهم ناجحين وذلك لوجود سبب اساسي وهو الزوجة الصالحة المفكرة والمدبرة والعارف لاصول التعامل مع زوجها ومدبرة لبيتها لكم التحية جميعا

Quote: اولا السلام عليكم ورحمة الله تعالى وبركاته جد تعجز الكلمات عن وصف ماكتبت فى حق زوجتك ولا املك غير الدعاء لكم بالصحة والعافية ودوام الفرح والسرور بينكم لكن عندى طلب اكيد لكل حياة ناجحة وسعيدة طرق للتغلب على صعوبات الحياة ومشاكلها الدايمة التى لا بد انها مرت عليكم فارجو ان تذكر فى نفس البوست او بوست منفصل عن طريقتكم فى التغلب على المشاكل (اكان رجال السودان ديل يتعملو شوية) من تجربتكم الناجحه وانت فخر لرجال السودان الفاهمين والذى نتمنى ان يحذو حذوك جميع الرجال وعلى قول حبوبتى (انت يا يما راجل البنيات لى حدهن) اديتنى امل شوية انو رجال السودان ديل فيهم امل انو يقدرو المرأه وما ينظرو ليها فقط كخادمة تلبي طلباتهم لك كل الشكر أختك س . ن

Quote: السلام عليكم يا ود الناس مالك حارق فشفاشنا وهارد كبدتنا يعني يا انتا ما سوداني يا مرتك دي نازلة براها من السماء الكلام ده ما كلام رجالنا الغير النبيح ما بعرفوا يقولوا حاجة انت يا دكتور داير تقنعني انو رجالنا احنا ديل ممكن الواحد يا خد ليه اجازه عشان يساعد مرتو ديل الواحد فيهم يوم الجمعة ما عايز يقعد مع اولادوا مرتو دي خليها معليش يا دكتور والله انا قريت مقالك ده مية مرة وكل مرة ابكي اكتر وزي ما قلته يا دكتور فعلاً سجم امنا أكان ده حالنا وداك حالكم اختك و . خ

Quote: الأخ العزيز دكتور صلاح السلام عليكم والله يا دكتور خجلتنا يعني احنا تاني نقول لنسوانا ديل شنو الواحدي فيهن اليوم كله مكفكفة شعره التقول عايزة تضارب تجيب ليك صينية الأكل عشان تتسمم مش تاكل بنفس وبعدا تلفح توبه وتمشي تطير ما ترك ياخي سيبنا من النسوان ديل وكلمنا في المفيد انت جواك كتير والنسوان ديل بودوك في داهية اخوك : عبد الرحيم حسن

Quote: الأخ دكتور صلاح كيف حالك يا الوقفته حالنا يا خوي لي ثلاثه يوم المرة لاوية بوذا ما عارف ليه، سألتها ألف مرة وهي تقول لي ما في حاجه زهجانة عايزة اطق سالته البنية قالت لي امي كلما تقعد في الكمبيوتر دموعه تجري فتحت الكمبيوتر اشوف في شنو ورجعت اتصفح الكانت بتتصفحو ما فهمته حاجة المهم بعد ما كوركت فيها فتحت لي موضوع السجم ده قريتو مرة ومرتين وثلاثه ما لقيت فيه غير كلام لواحد فارغ بيتكلم عن مرتو (معليش لكلمة فارغ دي) سألته تاني الكلام ده البخليك تبكي ما ردت علي قلت ليها الزول ما كاتب حاجة بتبكي زول فاضي قاعد يتغزل في مرتو انت مالك بيهو برضو سكتت قمت نهرتها ليك ولأول مرة تقوم فيني وتقول لي (انت ما بتقول كلام زي ده لي .. المانعك شنو .. ولا أنا ما بستاهل) الحقيقة ما قدرته أرد في وقتها وقعدت تاني اقرا الموضوع تاني وتالت وبصراحة قريته بطريقة مختلفة واحمد الله بحاول اصلح الحال ولك الشكر على عبد القادر الصادق

Quote: السيد الفاضل : د صلاح البشير السلام عليكم و رحمة الله وبركاته بعد قراءتى لموضوعك الجميل فى المنبر أود أن أرد عليه بقليل من الأسطر امتنانا للرجل الذى أكرمنى و كان بحق من خيار الناس لأنه خيرهم لأهله ربما قد لايعبر كثيرا عن فيض مشاعره و لكنى اراها فى ألق عينيه و أجد أن افعاله وسماته أفضل من كل ما كتب الشعراء ونثر الأدباء... هو من صبر معى فى ضراء مرضى و فرح قبلى فى سراء نجاحى الذى صنعه هو بتشجيعه لى وبأن وضع دراستى وعملى فى قمة اولوياته هو من صبر على تأخرى فى الأنجاب وعدم استجابتى للعلاج..كان هو من يواسينى عندما ينحسر مد ايمانى وتهطل أدمعى شكرا يا أبا محمد و لحواء السودانية التى تقرأ هذه الكلمات تذكرى بأن زوجك و ان كان لايحسن الرسم بالكلمات و اهداء الورود فانه عطوف و ان عمل جاهدا لاخفاء ذلك كريم و ان ضاقت به المعايش محب و ان أخفى ذلك لمفاهيم قديمة و ان لم يكن كذلك فبوسعك انت و لأحد سواك بعث كل الصفات الحميدة فى نفسه وللشابة التى تنتظر رجل المستقبل وتتوجس خوفا لما ترى حولها من تجارب مؤلمة أقول لها أحسنى الاختيار و غضى الطرف عن مفاهيم الآخرين المادية و ابحثى عن الخلق والدين و لاتنسى طبعا التكافؤ العمرى والعلمى وهناك كثير من الاسر التى ترفل فى نعيم المودة و الرحمة ولكن السكينة صوتها ناعم كالهمس أما الغضب فله هدير ولذا أنت تسمعين أصوات الخصام العالية فقط و عذرا لأهل اللغة على أى أخطاء نحوية أو تعبيرية فأنا أحسن التعبير والكتابة بلغة أخرى وقد كتبت الموضوع و أنا أغالب أدمعى أختكم جميعا أم محمد

Quote: الأخ الدكتور أبوصلاح حندخل توش بسلام الله زيما دخلته انت قلوبنا توش وحتى من غير استئذان والله يا دكتور كلامك سمح سماحة قلتى لي راجلي بس انت اقرى الكلام ده واتخيل نفسك كاتبه لي وانا حاتخيل نفسي مكتوب ليها الكلام ده الراجل دخل في مضافرينه وما عرف يودي وشه وين وبقى زي الماسكاه ام هله هله يتلفت يمين وشمال والله يا دكتور انا عندي راجل يختو في الجرح يبرى لكن كلام زي ده ما بعرف يقوله واحنا النسوان ديل بنحب نطري اضانا لكن نقول شنو يا هه دي قسمتنا يا دكتور يا خي الراجل ده داير ليه درس عصر عدييييييل كده ما تفتح ليك مدرسة ولا فصل محو امية ليهم ما اتقل عليك با دكتور ضيوفك كتار ما شاء الله سلام وما تنسى درس العصر اختكم ع . م

Quote: الأخ الكريم دكتور صلاح السلام على من اتبع الهدى كنا نعتقد أن الرجل السوداني متخم بالجمود، لا يرغب في البوح ولا يجد لذة في الحديث عن نساءه، لكنك أثبت غير ذلك، والمشكلة أنك الوحيد الذي فعلت، قرأت لآخرين يتحدثون عن نساءهم، لكنه حديث أقرب إلى الاستنكار منه إلى هذا البوح، لا فض فوك، وقد ظفرت بذات الدين فتربت يداك شكراً أخي الكريم على هذه الكلمات الطيبات أخوك الطاهر عبد المحسن

Quote: الدكتور صلاح السلام عليكم اخي في الله د.صلاح البشير والله إبداع وروعه ربنا يخليكم لبعض ويجمع شملكم أختكم: ح. أ