|
|
 محمد عبد الماجد والمزج العجيب بين الكورة والفن والحب ( في عشق الهلال ،،، طبعاً )
|
منقول من موقع جريدة قوون 16 / 2 / 2010
رغم الاعتراضات الكثيرة التي تقال عن (عيد الحب) باعتبارها ظاهرة غربية..إلا ان الفهم والقصد الذي نريده من (عيد الحب) يبعد عن هذه المنطقة.
} الحب الذي نقصده هنا ...حب يخرج عن نطاق (فالنتاين) ..واللون الاحمر ...والوردة الحمراء.
} حب اكبر من هذا الاطار.
} من قبل كان (خليل فرح) قد انطلق بحبه الي مسامي ابعد...عندما جعل (الوطن) هو حبه الاول والاخير.
} بشكلية قريبة من هذا (التماس)..قدم لنا خليل فرح اروع آيات الحب واجمل اهدافه.
وقلبي لي سواك ما شفتو مال
خذيني باليمين وانا راقد شمال
عازة ما نسيت جنــة بلال
وملعب الشباب تحت الظلال
ونحن كالزهور فوق التلال
} ليس هناك في الارض شاعر خلط بين حب الوطن وحب الحبيبة كما فعل (خليل فرح) ...حتي انك لا تستطيع ان تفرق بين هذا وذاك.
} غير (خليل فرح) تعالوا الي هذا العرض (العشقي) الذي قدمه الهلال في هذه الايام وتوافق مع ايام يسميها الناس بايام الحب.
} مباراة الهلال وبني ياس في الامارات كانت براهين عشق ودليل هوي.
} ما قدمته الجماهير في الامارات تجاوبا وتعايشا مع انتصار الهلال بكأس ودي يؤكد العشق الخرافي للهلال.
} في عيد الحب لم نكن نحتاج الي اكثر من ان نشاهد جماهير الهلال تتجاوب وتتعاطي الهلال بكل هذا العشق.
} العطاء في المدرجات كان مدهشا حتي ان معلق المباراة ترك تفاصيل المباراة رغم روعتها واصبح يتحدث عن (جماهير) الهلال.
} لكن مع هذا لا نجهل هذا التواصل.
} تمددنا في ذلك اليوم عشقا ...طولا وعرضا.
} علاءالدين يوسف كان مثل (عبدالعزيز محمد داؤود) في (تم دور وادور)...التي كتبها ايضا خليل فرح وتغني بها تباعا الخليل وعبدالعزيز داؤود وعبدالكريم الكابلي وعبدالعزيز العميري واسرار بابكر.
} علاءالدين يوسف في كل لعباته ..يظهر لنا في هذا الثوب.
تم دور وادور
عم نوره شال
فات الحله نور
زي بدر التمام
} وفييرا يقطع الكورة ويمرر ويغني:
واحدين قالوا نور
واحدين قالوا دوب
مروي ما بتنور
زي بدر التمام
} ناس المريخ طبعا نفسهم اتقطعوا ...قعدوا يتفرجوا في (فييرا) ما مصدقين.
} ايه الابداع دا؟...ايه الفن دا؟.
} وعلاء الدين يوسف يغني في غناه.
مين يقوم يتهور
يبري القيف هناك
تحته الدابي كور
زي بدر التمام
} الدابي منو يا علاء الدين ؟...في دابي غيرك ...والله البمر عليك كلو بتبلع جب.
} تقول بتلعب في (برشلونة).
} غايتو (فن) زي دا نحن ما شفناه.
} المباراة كلها انا احك في عيوني.
} وفييرا يغني.
الحسود يتضور
ناره ماكله لسانه
كله زور ومزور
زي بدر التمام
} طبعا المريخاب من تجيب ليهم سيرة (التزوير) بتضايروا ...بقطعوا الخبر.
} بسكتوا ساي.
} زمان نحن كان عندنا (كديسة)....الكديسة وقت تشرب (اللبن)...بتبقي مسكينة...تقعد تتمسح للزول في كرعينو.
} نحن من نشوفها بتتمسح في زول كدا ...بنقنع من (اللبن).
} ناس المريخ ديل هسع شربوا (اللبن).
} عشان كدا من سيرة (البصمة) نجيبها ليهم ..ببقوا زي الضارباهم (مطرة).
} بصم..ما بصم.
} والله لو عملتوا ليكم عشرة طوابق ...(البصمة) دي ما نخليها ليكم.
} في زول بزور ليه (بصمة) يا جماعة.
} الكلام دا نحن في الافلام الاميركية ما بنشوفو.
} ليكم حق ..تفرحوا بـ (الطابق التاني).
} ومهند الطاهر بي غادي مدور في عثمان حسين ..شيء (كنت فاكر القي قربك الحنان تغمرني بيه).
} وشيء:
انا فيك عشقت الروعه ما احلاها
في الدل والدلال
والمعاني الراسمه نور
اشراقه في عينيك ظلال
وابتسامتك لما
تأسر قلبي
تحكي عن المحال
تحكي عن شوقك اليا
وتحكي عن بعد الوصال
} ناس المريخ ...ما بفهموا الكلام..إلا نحول ليهم الكلمات دي لـ (طوب واسمنت وسيخ) عشان يستوعبوا الحاصل.
} نوع دا ...انتوا ما بتحلموا بيه.
} عيد الحب دا ...ناس المريخ ما بفهموا لينا فيه حاجة.
} انا اقول ليكم حاجة غريبة.
} حاجة ظاهرة...كلكم ما افتكرتوا ليها...ولا اتخيلتوها.
} في عيد الحب ...العالم كلو (لبس احمر)...الروسي والهندي والايطالي لبسوا احمر.
} اصبح (اللون الاحمر) هو الغالب.
} تتخيلوا الناس كلها لبست (احمر)...ناس المريخ عشان تعرفوهم (مطوفشين) كيف...يوم الحب خلوا شعارهم (الاحمر) ولبسوا اللون (الاخضر).
} في (وصافة) اكتر من كدا.
} نحن مالنا.
} وراغو بالاخضر بقي زي فردة العمود (الفاضية).
} في عيد الحب ...هيثم مصطفي مع كل تمريرة يغني (لو بهمسة)...وفي باص القون بغني (المستحيل).
} قلت ليكم الشغل دا صعب عليكم.
} احمد الفاضل في الطرف الشمال مدور في اغاني الطيب عبدالله ..ِشيء انت يا الابيض ضميرك وشيء السنين وشيء ليل الفرح.
} اقول ليكم حاجة تانية.
} استوعبوها لي عليكم الله.
} ناس المريخ ديل في سيكافا التي نظمت هنا...جابوها ليها اكثر من ثمانية فرق.
} فرق ما سمعنا بيها في حياتنا..نازحين من رواندا ...وبتاعين سلة من الصومال.
} هي الصومال فيها (سلة).
} وزنجبار ...واسماء لفرق كدا ...لو جبت ليك شافع من الروضة عشان يشخبط ليك اسمها ما بعرف.
} اسماء غريبة...تقول اسماء (مشخبطة).
} مع (الحمام) الجابوا المريخ دا ...الجماعة ديل خسروا 2 مليار جنيه في البطولة (الفارغة) دي.
} وقسموا المجموعات ..عشان (الكأس) يكون عنده طعم.
} مجموعة في بورتسودان ..ومجموعة في ام درمان ...ودوروا علي هذا الاساس (نفخ) في الصحف.
} وقعدوا يولعوا في (الانوار) ويطفوا فيها.
} زي الشافع البجي من حتة ما فيها كهرباء.
} يعلق اليوم كلو في (مفتاح) اللمبة ..يولع ويطفي.
} ناس المريخ عملوا كدا.
} تصوروا بعد السيناريوهات دي ...ناس المريخ ما شالوا الكأس.
} الفريق الغلبوه 6 في الافتتاح ..جاء وغلبهم واحد في النهائي...شال الكاس من استاد المريخ.
} وهم قاعدين يتفرجوا.
} نحن كاسنا ده جباناه من برة...حمرة عين عديل.
} قلعناه قلع بي عشرة لاعبين ..امام فريق مدجج بالمحترفين.
} كاس احضرناه يوم عيد الحب ..محمول بالعشق والحب الكبير للهلال.
} والله نحن لو في حتتكم دي ..كنا بعد (سيكافا)...قلبنا الاستاد ..محل تصوير مستندات.
} كنت بتستفيدوا اكتر.
} ديمة حارجننا مع (الضيوف).
} طبعكم كعب.
} ملحوظة: بعد سيكافا ديك ...مفروض (الحكومة) تنزلكم درجة رابعة...خسرتوا البلد في الفاضي.
هوامش
} الهلال فرحان بي كأسو...وناس المريخ فرحانين بـ (اصابة يوسف محمد).
} قالوا رجعوا من اثيوبيا بي نقطة واصابة يوسف محمد.
} اوضح دليل علي ضعف قوة المريخ ...هو ان سعيد السعودي اصبح (ارتكاز) اساسي في المريخ.
} واوضح دليل علي ضعف المريخ ..ان (طارق مختار) نجم مباراة المريخ وسان جورج.
} طيب وين النفطي.
} وين وارغو ...العملتوا بيه (زحمة) في كينيا.
} يا ربي (طارق مختار) دا كان معسكر براه في (كينيا).
} خبر عاجل: في عيد الحب يا ناس المريخ تلبسوا (اخضر).
|
|
 
|
|
|
|
|
|
|
 Re: محمد عبد الماجد والمزج العجيب بين الكورة والفن والحب ( في عشق الهلال ،،، طبعاً ) (Re: منتصرمحمد زكى)
|
Quote: عيب محمد عبد الماجد أنه يرى الفن وكل ماحوله
من خلال منظار أزرق .. وذلك خصما عليه لا محالة .. فالحياة مجموعة
من الألوان امتزاجها وتجانسها يمنحها ذلك التناغم والرونق .. فالأزرق
دون بقية الألوان .. لون باهت لا بريق له .. ولا حياة فيه |
؟؟؟؟؟؟؟؟
تحياتي يا منتصر
كل منا يري الدنيا من خلال منظاره / منظوره الخاص به
ولا أري في ذلك عيباً لي ولا لك ولا لمحمد عبد الماجد
أتفق معك في أن
| Quote: فالأزرق دون بقية الألوان .. لون باهت لا بريق له .. ولا حياة فيه |
ولكن هذه المقولة ليست قصراً علي الأزرق فقط ،،، أليس كذلك ؟؟
مودتي
| |
|
|
|
|
|
|
| |
Fadl Karrar
محمد عبد الماجد الصايم
منتصرمحمد زكى
فيس بوك
تويتر
انستقرام
يوتيوب
بنتيريست