|
||| الحَسْرَة في جُوّاي بَكَتْ .. سَكَت اللسانْ .. صَمتِي اعتَذَر! |||
|
شابهتي زولاً .. لي هَجَرْ زرع الامل .. عاهد غدر .. ما شفّع الآمال وكت جرت الدموع .. شافني ونَكَرْ عشت الجفاف .. وسط الجروف ضقت العطش .. جنبي البحر شوق الحبيب نيران جَمُرْ ياما اكتويت منو وصَبَرْ فوقي السحاب كم ظني خاب كسّر ظنوني وما جَبَرْ أوفيت دهور .. ضوّيتَ نور .. شان البذور تصبح شِجر تشهد على سهري النجوم .. والقمرة .. والمولى الستر ياما الليالي بكن معاي وكتين قصايدي بكن دَهَر لا غلبي ينفع .. لا شقاي .. لا دمعي يشفع .. لا سفر ياهو المقدّر من زمان ألقاك مكاجر يا قدر! يخلق من الشبه أربعين سبحانو كم أبدع صور روعة وجمال .. رقة وكمال فوق الضهر .. مردوم شَعَر عينين .. موشّحة بالرموش حاجبين .. هلال أوّل شهر عوداً .. مِتِل بان الجروف وشّاً.. يغير منو القَمَرْ النظرة .. من عينيك إبّر صوتك .. حنين ضاهى الوتر خايف عليكي من العيون من نظرة الجواهو شَرْ من غيرة الحسّاد عليك من كل شياطين البَشَرْ يا روعة .. يا ضو القمر يا نسمة .. يا أطيب ثَمَر يا بسمة .. في الأعماق تَسُرْ يا ذكرى .. في ليل السَمَرْ منّك طعن قلبي السؤال للذكرى كان قلبي افتكر قلتيلي ما قرَّبْ خلاص تعقد تفِكْ سِتْ المهر الحسرة .. في جواي بَكَتْ سَكَتْ اللسان .. صمتي اعتذر الدمعة .. كانت دار تفِرْ قلت السُّكات أحسن خَبَرْ لامن قصايدي تكون ردود جواها موجودة العِبَرْ عاندني .. في دربي الزمن مقسوم لي .. في المويتين عَكَرْ إلا الفرح لي يا حياة في المستحيل منحوت .. حَجَرْ مكسور جناح .. شايل الجراح مكتول ضمير .. خاطري انكَسَرْ ما تقولي في ضحكي الفرح بذرف دموعي .. بعد حذر! حتى السحاب .. ينضم رَعَد يضحك برِقْ .. يبكي المطر!! لو كنت ما خايف العذاب من نار جهنّم من سَقَر كان يوم خطيبك يحكي ليك والله ود خالتي انتحر !!
_________ الشمالية .. 1997
|
|
|
|
|
|