لا تخرج ايها المواطن الطيب الى اي مظاهرة لانها شرك

Quote: سلام يا دكترة برضو مصرّة انو الرسم هو المبشتن ؟ او على حد قولك " رسم التابة واليابة " !! احمد المرضي فنان كبير . . و عندو رؤية و رأي طيب ما في احتمال انو تكون قرايتك للرسمة غلط ؟ مجرد احتمال ؟ . . سيسي بس ؟ آي قاصد قراية . . من قرأ يقرأ فهو قارئ . . قراءة بالفصحى ،إذا كان اللوحة بقروها – و العهدة على " اقتراح " عاطف خيري - من باب أولى الكاريكاتير بقروه . . و بقروه . . وبقروه .، و اللون اللحمر من الالوان الاساسية البتمنح اللوحة ازدواجية القراية . . . انا غايتو قارئ عادي من أمة " إقرأ " ، و ما انا بناقد لو الكاركتير غاظك ؟ فدا المطلوب اصلاً . و شنافك ليهو ما بحلك . تقومي طوالي تتدرعي اللافتة البتناسبك ، و تسمعي كلام اللسان اللحمر داك تدسي البخرة ، مايشوفها ( المواطنين الطيبين ) كمان . . سمح ؟ ياخ ما تراكي فقعتي مرارتنا بكتابك دا ! انا شخصياً عملتي لي قرحة في المصران الاعور خليتيهو ما اعور و لا حاجة ذاتو ! بقى بعينين عديل . و بشوف شعاع كمان !! ياخ ( أطيب ) ** ( مواطن ) الافتراض انو حصيف و حذق ، و واعي جداً . نحن المطمبرين جوّة الدارة دي يانا الغبيانين . نتراقص عراة إلا من منطق ، و استقامة رأي يقمن صلب مقالنا ، و يسترن عورة حديثنا. فليكتب كلٌ منا كتابه ، و لنحتكم للجماهير دي . و هي ما بتظلم زول . حقك يا عزيزة تعتقدي و تستنتجي ، تحلمي ، تتخيلي . تتوهمي و تغلطي ذاتو . و الأهم من دا كلو انك تكوني رأي و تعبري عنو ، و دا حق دونه المهج و الأرواح . و هنا الرك . دا الطلعوا ليهو ناس ( حافظ حسن ) و دا السالت ليهو دماؤهم الطاهرة ، و تعفرت أرجلهم بتراب عشقوهو . الغلط وين هنا ؟ في حق تاني برضو ضمنتو لي و ليك و لكل انسان ، صحائف و مواثيق حقوق الانسان ، و الدساتير الوطنية ، بما فيها دستور السودان القومي الانتقالي 2005 م ( نيفاشا ) ، هو حق التنظيم و التبشير بالرأي بطرق سلمية ، و مكفول للكل . المشكلة وين لما ادعوا الناس لتظاهرة سلمية . ما دا رأي زيو و زي رأيك بعدم الطلوع ، و الاتنين بعبرن عن موقف ( سياسي ) المشكلة شنو ؟ و ليه ما ادعو أي زول بتفق معاي – في حد ادنى ، على الحقوق الأساسية – المشكلة شنو في إني ادعوه للنزول للشارع ؟ الاداك الحق انت تدعيهو لعدم الخروج ( مستبطنة رضى عن الحكومة ، او متذرعة بخوف منها ) و حرمني من الحق رفض الاستبداد و التسلط دا منو او شنو ؟ تاني نرجع لسيرة البحر ؟ أما تشكيكك في الناس الاتوزعتا المنافي ، فدي دعوة أساسها باطل و غير مستقيمة أساسا . و نفس المنطق الواقف على راسو بتاع الحكومة كعبة و شينة . . . و اووووك اررووك . . الخ. من الله خلقنا ما شفنا لينا حكومة شرط ! و لا شرط اصلاً انو الحكومة تكون شابة و جميلة . دا تسطيح بالموضوع ساي يا فردة ! قلنا ليكم المواطن ( الطيب ) دا ما طيب شديييييييد لدرجة ريالة قدر دا كمان ! و قنابير ذاتو مافي الزمن دا ! يا ستي الناس البرة دي يوماً ما كانت جوة ، و جوة المعمعة دي و دفعت استحقاق رأيها دا كاملة *، لانها اتعودت انها تنشروا و تصدح بالحق – حسبما تراه – و بطرق ديمقراطية . ليه مزانقاهم في ابداء آراءهم . ما هو دي انت برّة و بتعبري عن آراءك المنعك منو ؟ لما تستهزئي بآراء الناس ، من حقهم يسخروا من رائك برضو ، و لا شنو يا الركاب ؟ لما تقولي مناتلين ، و مناضلي كيبورد ، و معارضة ضل بارد . من حقهم يطلعوك كوزة و أمنجية كمان ، و بتنفذي في خطة " جاهز المنابر " – العهدة على الفنان احمد المرضي - . و بتدعمي الجلادين ، بسكوتك عن الحق ، و ذر الرماد على عيون " المواطن الطيب " و تغبيش رؤيتة ، و إلزامه بالنظر للحقيقة من الزاوية العاوزا الجلاد ! قلت لي حكومة دموية ؟! اها تقترحي علينا شنو مع الحكومة ( الدموية ) دي ؟ بس نركز و نردد " احدٌ . . احد ؟ ياخ ما ترانا 20 سنة نعاني العسف ، و نسام سوء العذاب ! حدو وين الكلام دا ؟ التغيير ح يجي كيف ؟ و من وين ؟ يعني بس نخاف و نشوف لينا زاوية نلعق فيها جراحنا ساي ؟! البخوفنا شنو ؟ و المقابل شنو ؟ كان تلايقيها بشوية خطاب ديني اقلو بتبقى مبلوعة ، و بتنهضم لينا برا عطرون ! بس ننتظر الثواب في الدار الآخرة ساي ، او نخاف الوقوع في الاثم( شرعاً ) النسخة الأصلية لبيان هيئة علماء السودان: تكفير كل من يقوم بمسيرات سلمية!!! بمخالفة الحاكم بإسم الله . . ظل الله في الارض ! لا يا دكترة . . و بنرددا في وجه الظلم لا القبل منك كان قوي كان اقوي جتة و اعتي جبروت وينو اسي ؟ . . . يمهل و لا يهمل و ين سدنة نظامو ؟ و ين حارقي البخور و ماسحي الجوخ ؟ عشان نلم المداخلة الطالت و استطالت دي ، نقوم نقول : ببساطة ممكن نمايز بين موقفين لا ثالث لهما في موضوع مظاهرات الاثنين 7 ديسمبر ، من جهة الطلوع او عدمو . و كل موقف كطبيعة المواقف السياسية ليهو مناقب و ( مسالب ) مثالب . يلا تسقط رخص هنا مامعانا ! البكتش كامل – الجمل بما حمل - بخيرو و شرّو . التشِبِح بين الموقفين دا او ما اسماه بكري الجاك " مسك العصاية من النص " مرفوض . كلو زول يختار البناسبو ، و برضي ضميرو ، و يدفع ضريبتو . الصفوف انفرزت تماماً . يا معانا يا مع الخيانة . . المسالة بالبساطة دي يادكتورة . الموقف العاوزة تقيفيهو هنا مفرداتو ما بتتراكب . بس ---------- * في ردي لماما دوما ح احكي ليكم عن تلاتة شباب هنا دا في بوستيك دا من الناس البرة المابتكلموا ساي الحاجة الوحيدة الممكن اوافقك فيها في طرحك هناالرسالة الضمنية الموجهة لقادة و جماهير تنظيمات و كيانات المعارضة: " قل ما تشاء . . كن ما تقول "